1-2 ดอ กอย เฆ แคง มืง ซีโลว อี มูห กาดาย มืง กานัณ ตึอน, เฆ อี มูห ดา ตาง แคง ครึร อาเลวี บอ ฮาว โดง กอย ดา อี หลู ดี เฌาพรา อี จืร อาเลอาซา บอ ดี อาโยวซูอา อี มูห ฆอน อานูน ตึอน บอ ดี เฆ อี มูห ดา ตาง เฆ ดูอี อีซาเรลัะ. เฆ บอ ต็อห, “เฌาพรา แฮะ กาลาง ดี อาโมวแซ, แตห เบ ดัว มืง ดี เย บอ กาดาย อี กอย โรบ มืง เฆ ตี, แตห อึณ วี แบน โอ็ง เปต โดง ดี เฮียง เย โดว ซัดดาวา เย.” 3 ปาย ตี เฆ ดูอี อีซาเรลัะ บอ ร็อห มืง มัง มืง แคง คาฆูน เฆ. เฆ ร็อห บอ กาดาย อี ดี แบน โอ็ง เปต, วี อาบ ดัว ดี ดูอี อาเลวี, แตห อึณ โดบ ปี ดึอม กาลาง เฌาพรา.

4 ปี กาตาม เฆ ดี อาต, อึณ บอ เลห อาดา อึณกรึห อาโควฮาด อี มูห ครึร อาเลวี. เฆ ดูอี อาเลวี อี มูห หลูกหลาน อาโรน อี มูห ดา อี หลู ดี เฌาพรา. เฆ บอ ปึอน มืง ฆึร ดี โอย มืง. มืง ปี ปึอน เฆ ตี, อึณ บอ กอย แคง กาดาย มืง ยูดา, มืง อาซีเมโอน บอ แคง มืง อาเบนยาม. 5 หลูกหลาน อาโควฮาด อี ซี ฆีด ซี กอย, เฆ บอ ปึอน มืง ฆึร มืง อี กอย แคง กาดาย อาเอพารีม, อาดาน, บอ อามานาเซ อาดา อู กาแต.

6 เฆ หลูกหลาน อาเฆนราโซน บอ ปึอน ดี บึง มืง ฆึร ดี โอย มืง อี กอย แคง กาดาย มืง อาอีซาคา, อาเซน, อานาบทาลี บอ มืง อามานาเซ อี กอย แคง กาดาย มืง บาซัน.

7 เฆ หลูกหลาน อาเมนรารี อึณกรึห เหมา อึณกรึห อัน, เฆ บอ ปึอน ดี บึง มืง ฆึร ดี อา มืง อี กอย แคง กาดาย อารูเบน, อาฆัด บอ อาเฌบูโลน.

8 มืง เฆ ตี บอ กาดาย อี ดี แบน โอ็ง เปต เฆ ตึอน, เฆ ดูอี อีซาเรลัะ บอ กาตาม กาย็อห ดัว ดี เฆ ดูอี ครึร อาเลวี.

9 แคง กาดาย มืง ยูดา บอ แคง กาดาย อาซีเมโอน เฆ บอ ฮับ แคง ฌาราง มืง ปี ดี ดัว เฆ. 10 เฆ บอ กาตาม แตห อึณ โจห ดี หลูกหลาน อาโรน อี มูห อึณกรึห อาโควฮาด แคง ครึร อาเลวี.

11 เฆ บอ ปึอน มืง อี จืร มืง กีรียาดอาบา. อาบา บอ มูห ฆูณ อานาก. เฆ บอ ต็อห มืง เฮโบรว. อึณ บอ กอย แคง กาดาย ดูอี อายูดา. บอ โอ็ง เปต อี กอย โรบ มืง เฆ ตี, เฆ แฮะ ปึอน. 12 มาแล, อี มูห มาน เฆ โดง นา บอ เรา เฆ, อาฆาลีบ อี มูห ฆอน อาเยโพวนา แฮะ ปึอน.

13 แดง มืง เฮโบรว อี มูห มืง โดง ดี ปึอน เตา ฮาว เครียง ดูอี อี แฮะ ตา ดึร ยัม อี เฮา, มืง แปะ แฮะ ปึอน หลูกหลาน อาโรน ตึอน แฮะ มูห มืง ลีปานา, 14 มืง ยาตีรา, มืง เอซาตามอ, 15 มืง ฮอโลน, มืง เดบีรา, 16 มืง อาอีน, มืง ยูทา, มืง เบดเซเมด บอ กาดาย อี กอย โรบ มืง เฆ ตี อี ดี แบน โอ็ง เปต. อึณ มึห โตต ดีม มืง อี กอย แคง กาดาย อายูดา ฆาย กาดาย อาซีเมโอน.

17 อี มูห กาดาย อาเบนยาม, เฆ บอ อาบ ดัว มืง พวน มืง. อึณ บอ มูห มืง กีปอง, มืง ฆีบา, 18 มืง อานาโทด บอ มืง อาลามูน บอ กาดาย อี ดี แบน โอ็ง เปต อี กอย โรบ มืง เฆ ตี.

19 มืง แปะ แฮะ ปึอน เฆ ดา อี หลู ดี เฌาพรา อี มูห หลูกหลาน อาโรน บอกาเฆลียด, อึณ กอย ฆึร ดี โอย มืง. บอ กาดาย อี มูห โอ็ง เปต อี แฮะ กอย โรบ มืง เฆ ตี เฆ แฮะ ปึอน.

20 เฆ ดูอี อาเอพารีม บอ ดัว กาดาย ดี ดูอี อาเลวี อี มูห อึณกรึห อาโควฮาด อี ซี ฆีด ซี กอย.

21 แคง กาดาย นอน อาเอพารีม เฆ แฮะ ปึอน พวน มืง. อึณ บอ มูห มืง เซเคม บอ กาดาย อี ดี แบน โอ็ง เปต อี กอย โรบ มืง เฆ ตี. อึณ มูห มืง โดง ดี ปึอน เตา ฮาว เครียง ดูอี อี แฮะ ตา ดึร ยัม อี เฮา. แดง ตี อึณ บอ มูห มืง เกจา, 22 มืง กีบเจม บอ มืง เบดโฮวรูน บอ โอ็ง เปต อี กอย โรบ มืง เฆ ตี.

23 แคง กาดาย ครึร อาดาน เฆ แฮะ ปึอน พวน มืง. อึณ มูห มืง เอลาเตกา, มืง ฆีเบโซน, 24 มืง อาจาลูน บอ มืง ฆาทัะรีมโมน บอ โอ็ง เปต อี กอย เรต มืง เฆ ตี.

25 แคง กาดาย ครึร อามานาเซ อาดา อู กาแต, เฆ แฮะ ปึอน อา มืง. อึณ บอ มูห มืง ทานัก, มืง ฆาทัะรีมโมน บอ โอ็ง เปต อี กอย เรต มืง เฆ ตี.

26 มืง ฆึร มืง บอ โอ็ง เปต อี กอย โรบ มืง เฆ ตี, เฆ ดูอี อีซาเรลัะ แฮะ ดัว ดี ดูอี อาโควฮาด อี ซี ฆีด ซี กอย.

27 เฆ ดูอี อาเฆนราโซน อี บา แคง ครึร อาเลวี, เฆ มืร แฮะ ปึอน อา มืง แคง กาดาย อามานาเซ อาดา อู กาแต. มืง เฆ ตี, อึณ กอย บลาก นา เลห ซีแง. อึณ บอ มูห มืง กอลัน อี กอย แคง กาดาย มืง บาซัน. อึณ บอ แบน มืง โดง ดี ปึอน เตา ฮาว เครียง ดูอี อี แฮะ ตา ดึร ยัม อี เฮา. อึณ มูห บอ มืง เบซาเตรา บอ โอ็ง เปต อี กอย เรต มืง ตี.

28 แคง กาดาย ครึร อาอีซาคา มืร, เฆ แฮะ ปึอน มืง พวน มืง. อึณ บอ มูห มืง ฆีซีโอน, มืง ตาบาราด, 29 มืง ยาโมด บอ มืง เอนกานีม บอ โอ็ง เปต อี กอย เรต มืง เฆ ตี.

30 แคง กาดาย ครึร อาเซน มืร เฆ แฮะ ปึอน มืง พวน มืง. อึณ บอ มูห มืง มีซาลา, มืง อาบาโตน, 31 มืง เอลากา บอ มืง เรโฮบ บอ โอ็ง เปต อี กอย เรต มืง เฆ ตี.

32 แคง กาดาย ครึร อานาบทาลี มืร เฆ แฮะ ปึอน โอย มืง. อึณ บอ มูห มืง เกเดซัะ อี กอย แคง อืง ฆาลีเล บอ โอ็ง เปต อี กอย เรต มืง ตี. อึณ มูห มืง โดง ดี ปึอน เตา ฮาว เครียง ดูอี อี แฮะ ตา ดึร ยัม อี เฮา. อึณ มึห บอ มืง ฮัมมูดดอรา, มืง กาตาน บอ โอ็ง เปต อี กอย เรต มืง เฆ ตี.

33 เฆ ดูอี อาเฆนราโซน บอกาเฆลียด, เฆ แฮะ ปึอน ดี บึง มืง ฆึร ดี โอย มืง บอ โอ็ง เปต อี กอย เรต มืง เฆ ตี.

34 บอ เฆ ดูอี อาเมนรารี อี มูห ครึร อาเลวี อี หณัม กาลาง ลอง เฆ, เฆ แฮะ ปึอน ดี บึง มืง พวน มืง แคง กาดาย อาเฌบูโลน. อึณ บอ มูห มืง ยอกานัม, มืง กาตา, 35 มืง เดมา บอ มืง นาฮาลา บอ โอ็ง เปต อี กอย เรต มืง เฆ ตี.

36 แคง กาดาย ครึร อารูเบน เฆ แฮะ ปึอน มืง พวน มืง. อึณ บอ มูห มืง บีจา, มืง ยาฮาด, 37 มืง เกดามูด บอ มืง เมพาด บอ โอ็ง เปต อี กอย เรต มืง เฆ ตี.

38 แคง กาดาย ครึร อาฆัด มืร เฆ แฮะ ปึอน มืง พวน มืง. อึณ บอ มูห มืง ราโมด อี กอย แคง กาดาย อืง ฆีเลอาด. อึณ มูห มืง โดง ปึอน เตา ฮาว เครียง ดูอี อี แฮะ ตา ดึร ยัม อี เฮา. เฆ บอ ปึอน บอ มืง มาฮานาอีม, 39 มืง เฮซาโพน บอ มืง ยาเฌรา บอ โอ็ง เปต อี กอย เรต มืง เฆ ตี.

40 ปาย ตี เฆ ดูอี อาเมนรารี อี ซี ฆีด แคง ครึร อาเลวี แฮะ ปึอน ดี บึง มืง ฆึร ดี อา มืง บอ โอ็ง เปต อี กอย นา เรต มืง เฆ ตี.

41 แคง กาดาย อี มูห คาฆูน เฆ ดูอี อีซาเรลัะ ตี, 42 เฆ ดูอี ครึร อาเลวี บอกาเฆลียด แฮะ ปึอน ดี บึง มืง พวน ฆึร ดี ดา มืง. บอ โอ็ง เปต อี กอย โรบ แลบ มืง เฆ ตี แฮะ มึห.

43 ปาย ตี เฌาพรา แฮะ ดึห มืง แปะ แฮะ ดึอม กาแซณ อัน ดี ดัว ดี ฆูณ ดัง เฆ ดูอี อีซาเรลัะ. เฆ บอ ดึห มืง ตี บอ ปึอน ดี กอย แคง มืง เฆ ตี. 44 เฌาพรา มืร แฮะ แตห อึณ เยน, อาว ฮู มึห รันซู อี โลว กาโฆห. อึณ แฮะ แบน โตต ปี ดัว เฌาพรา กาดีก ซัดฌา ดี ฆูณ ดัง เฆ. เฌาพรา แฮะ แตห เฆ ดูอี อีซาเรลัะ ออง รันซู เฆ. แกวะ แตห อึณ มึห อี ซี ปึอน คัม เฆ คอ อู วี. 45 เฌาพรา มืร โบง โตต ดอน โมยว แคะ ปี ดึอม ดัว อัน กาดีก ซัดฌา ดี เฆ ดูอี อีซาเรลัะ, ตู แตห อึณ ฆาด คอ อู โมยว.