1 วาย อัน ตี เฌาพรา วี กาลาง ดี อาโยวซูอา ต็อห, 2 “แตห แม วี กาลาง ดี เฆ ดูอี อีซาเรลัะ, แตห เฆ ร็อห อูน มืง โดง ดี ปึอน เตา ฮาว เครียง, แตห อึณ ปี ปี กาลาง อูน โอว ดี อาโมวแซ ตึอน. 3 เซ อึณ มึห ดูอี อี แฮะ ตา ดึร ยัม อี เฮา, ยี ตู อูน น็อห ดี ง็อห, แตห อัน ปึอน ดี เตา ฮาว เครียง ดี ตี, แตห อัน ลอด ดี เฆ อี วี ซี โบง เวียะ ดี อัน.

4 เซ อัน เตา ฮาว แคง มืง เฆ ตี อู มืง, อัน โลว ฮาว ดี บาง มาโลห มืง อี มูห โดง ดี ซูงพยาด ดา ตาง อามู อี. อัน โลว กาลาง แหน ลอง อาเร อัน ดี เฆ ดา ตาง ตี. ปัน ตี เฆ ดี วี แตห อัน ลึบ แคง มืง, ดัว โดง กอย ดี อัน. แตห อัน ปึอน ดี กอย. 5 เซ ดูอี อี ซี โบง เวียะ ดี อัน อี ซี ง็อห อัน ตึอน วี คูงครัห โดบ อัน, เฆ ดูอี แคง มืง ตี ตู ปึอน ดึห ดูอี ปี พยาก อัน, อี ตู อูน น็อห ดี ง็อห ยัม อี เฮา. เฆ ตู ปึอน อาบ ดัว ดี เฆ ดูอี อี ซี โบง เวียะ ดี อัน ตี. เฆ โลว ฆ็อง แร อัน. โคว, อัน ตู อูน น็อห ดี ง็อห ยัม อี เฮา บอ ตู ดึอม มึห ดี ลาย กาลูต ดี อี. 6 อัน โลว กอย แคง มืง ตี, แตห อึณ กอ ฌัม ปัน ดี ฮอต เฆ ดูอี กืน ซูงพยาด อามู อัน บอ แตห อึณ กอ ฌัม ปัน ฮี ฮอต ยัม ดา อี หลู ดี เฌาพรา อี มูห โจว บาน อัน ตี. วาย อัน ตี อัน แฮะ วี ปึอน เวณ ดี กาง บรีม อัน อี มูห แคง มืง โดง ตัห อัน.”

7 ปาย ตี เฆ บอ อูน มืง เกเดซัะ อี มูห แคง กาดาย มืง ฆาลีเล อี กอย แคง กาดาย ครึร อานาบทาลี อี มึห นอน. เฆ อูน บอ มืง เซเคม อี กอย แดง นอน อาเอพารีม บอ มืง กีรียาดอาบา อี บอ จืร มืง เฮโบรว อี กอย แคง กาดาย ยูดา อี มึห นอน. 8 บลาก นา เลห ซีแง แบลง ยอดาน บอ มืง เยรีโคว, เฆ แฮะ ร็อห มืง บีจา อี กอย แคง แปร กาฮ็อห แดง ฆลัง นา กัว อี มูห กาดาย อารูเบน. เฆ แฮะ ร็อห บอ มืง ราโมดฆีเลอาด แคง โดง กอย ครึร อาฆัด บอ มืง กอลัน อี กอย แคง กาดาย อี จืร บาซัน อี มูห กาดาย ครึร อามานาเซ เฆ ตึอน. 9 มืง เฆ ตี, แฮะ แบน มืง ปี ร็อห อูน เฆ อาดา ดูอี อีซาเรลัะ บอ ดูอี อาโมยว เฮา อี แฮะ ตา ดึร ยัม อี เฮา ยี ตู อูน น็อห ดี ง็อห ยัม อาซาก อี, แตห อึณ แบน โดง แร โดง ฆ็อง เฆ. เซ ดูอี กืน หณัม ปึอน ดี ซูงพยาด อามู เฆ ตี, ดูอี หณัม ปึอน โบง เวียะ แตห อัน ยัม.