1 เฆ วี กาตาม จึบ ฮาอา, อึณ บอ เลห อาดา ครึร อาซีเมโอน, แตห เฆ ปึอน คาฆูน ดี เฆ โดบ อึณกรึห เหมา อึณกรึห อัน. กาดาย เฆ ตี บอ กอย แคง กาดาย ดูอี ครึร อายูดา.

2 มืง เฆ ตี บอ มูห มืง บีราเซบา, มืง เซบา, มืง มอลาดา, 3 มืง ฮาฌาซูอาน, มืง บาลา, มืง เอเฌม, 4 มืง เอลาตอลาด, มืง ซูลา, มืง ฮอมัะ, 5 มืง ฌีกาลาด, มืง เบดมาคาโบด, มืง ฮาฌาซูซีม, 6 มืง เบเลปอด บอ มืง ซาราฮีน. มืง เฆ ตี บอ เรา อี กอย นา เรต มืง เฆ, อึณ กอย ฆึร ดี โอย มืง.

7 อึณ บา บอ มืง อาอีน, มืง รีมโมน, มืง เอซา, มืง อาซาน บอ เรา อี กอย นา เรต มืง เฆ ตี. อึณ กอย พวน มืง. 8 อึณ บา บอ เรา อี กอย กาตัด, กอย โรบ มืง เฆ ตี กอ วี ฮาว ฌัม ดี มืง บาลาดบีรา อี มูห มืง รามา, อี กอย บลาก นา เตต. อาตี บอ มูห กาดาย คาฆูน เฆ ครึร อาซีเมโอน โดบ อึณกรึห เหมา อึณกรึห อัน. 9 อี มูห กาดาย คาฆูน เฆ ดูอี อายูดา, อึณ แฮะ กาว็อห กาเซา. โคว, บอ เฆ ครึร อาซีเมโอน แฮะ ปึอน คาฆูน ดี เฆ แคง กาดาย ครึร อายูดา.

10 เฆ วี กาตาม จึบ ฮาโอย, อึณ บอ เลห อาดา ครึร อาเฌบูโลน. เฆ บอ ปึอน กาดาย ดี เฆ โดบ อึณกรึห เหมา อึณกรึห อัน. กาอูน กาดาย ปี ปึอน เฆ ตี, อึณ บอ ฮาว ฌัม ดี มืง ซารีด. 11 จูห ดี ตี อึณ วี ฮาว บลาก นา เฆต ซีแง, ฌัม ดี มืง มาฮาลา บอ ดี มืง เดเบเซด บอ ฮาว ดี โรง อึม อี กอย กาตัด มืง ยอกานัม. 12 จูห ดี บลาก นา เลห ซีแง มืง ซารีด อึณ ฮาว บอ ดี โดง จืร คีซาโลดทาบอ, บอ วี ฮาว ดี มืง ตาบาราด, ปี วี โฮะ ดี มืง ยาพา. 13 อึณ บอ วี ฮาว บลาก นา เลห ซีแง, ฌัม ดี มืง ฆาทัะเฮพา บอ มืง เอดกาซีน. อึณ ปี วี ฌัม ดี มืง รีมโมน, ปี วี โฆง ฮาว ดี มืง เนอา. 14 กาอูน กาดาย บลาก นา กัว, อึณ บอ ฮาว นา มืง ฮามาโทน. อึณ บอ ฮาว ฌัม ดี ดีลัยะ อี จืร ยีพาเอน. 15 แดง ตี, อึณ บอ บา บอ มืง กาตาด, มืง นาฮาลา, มืง อาซีมารูน, มืง อีตาลา บอ มืง เบดแลม. อี มูห มืง ฆึร ดี อา มืง บอ เรา อี กอย นา เรต มืง เฆ ตี.

16 มืง เฆ ตี บอ เรา เฆ บอกาเฆลียด แฮะ แบน โตต คาฆูน กาดาย ครึร อาเฌบูโลน โดบ อึณกรึห เหมา อึณกรึห อัน.

17 เฆ วี กาตาม จึบ อึณพวน, อึณ บอ เลห อาดา ครึร อาอีซาคา โดบ อึณกรึห เหมา อึณกรึห อัน.

18 มาน มืง เฆ ตี, อึณ บอ มูห มืง เยจาเรลัะ, มืง เคซาลูด, มืง ซูนีม, 19 มืง ฮาพารีม, มืง ซีโฮน, มืง อานาฮาราด, 20 มืง ราเบด, มืง ฆีซีโอน, มืง เอเบด, 21 มืง เรเมด, มืง เอนกานีม, มืง เอนฮาตา, มืง เบดพาเซด. 22 กาอูน กาดาย เฆ ตี, อึณ บอ ฮาว ดอก มืง ทาบอ, มืง ซาฮาจูมา บอ มืง เบดเซเมด. อึณ บอ ฮาว ฌัม ดี แบลง ยอดาน. มืง เฆ ตี บอ เรา เฆ บอกาเฆลียด กอย ฆึร ดี เดา มืง บอ เรา อี กอย นา เรต มืง เฆ ตี.

23 มืง เฆ ตี บอ เรา เฆ, แฮะ แบน โตต คาฆูน เฆ ครึร อาอีซาคา โดบ อึณกรึห เหมา อึณกรึห อัน.

24 เฆ กาตาม จึบ อึณพัน, อึณ บอ เลห ครึร อาเซน โดบ อึณกรึห เหมา อึณกรึห อัน.

25 มาน มืง เฆ ตี บอ บา มืง เฮลัะกา, มืง ฮาลี, มืง เบตีน, มืง อาคาซาบ, 26 มืง อาลัมเมเลก, มืง อามาด บอ มืง มีซาลา. บลาก นา เฆต ซีแง, อึณ บอ กาดูด ฮาว มืง ฆาเมลัะ บอ มืง ซีโฮวราลีบานาด. 27 อึณ ปี วี โฆง ฮาว บลาก นา เลห ซีแง, วี โฮะ ดี มืง เบดดาโฆน, บอ วี กาดูด ฮาว ดี มืง เฌบูโลน บอ ดี ดีลัยะ ยีพาเอน, วี โฮะ บลาก นา กัว, กอ วี โฮะ ฌัม ดี มืง เบดเอเมก บอ มืง นาเยลัะ. อึณ ปี วี ฮาว บลาก นา อาฆัะ มืง กาบูลัะ. 28 อึณ ฮาว บอ ดี มืง อาบาโดน, มืง เรโฮบ, มืง ฮามาโอน, มืง กานา, กอ วี ฌัม ดี มืง ซีโดน อี ตาง. 29 กาอูน กาดาย เฆ ตี, อึณ ปี วี วีต วีว ดี มืง รามา, บอ ฮาว ดี มืง ทูโรว อี มึห แรง ตาง อี มัน ซีคยา. อึณ ปี วี โฆง ฮาว ดี มืง โฮวซา บอ ฮาว ฌัม ดี อึม นัมมูกซารา โคบ โดง จืร อาคาจีบ. 30 อึณ บา บอ มืง อูมา, มืง เอแพก บอ มืง เรโฮบ บอ เรา เฆ ตี บอกาเฆลียด. อึณ กอย อา ฆึร ดี อา มืง.

31 มืง เฆ ตี, บอ เรา อี กอย นา เรต มืง เฆ ตี แฮะ แบน โตต กาดาย คาฆูน ครึร อาเซน โดบ อึณกรึห เหมา อึณกรึห อัน.

32 เฆ กาตาม จึบ อึณเดา, อึณ บอ เลห อาดา ครึร อานาบทาลี โดบ อึณกรึห เหมา อึณกรึห อัน.

33 กาอูน กาดาย เฆ ตี บอ จูห ดี มืง เฮแลบ, วี ฮาว ดี เฮ ตาง อี กอย แคง โดง จืร จานานีม, วี กาโลห ฮาว บอ ดี มืง อาตามีเนแฆบ บอ มืง ยาปาเนลา, กอ วี ฮาว ฌัม ดี มืง ลากูม. อึณ บอ ฮาว ฌัม ดี แบลง อึม ยอดาน. 34 กาอูน กาดาย นา เฆต ซีแง วี ฮาว ดี มืง อาจานูทาบอรา. อึณ จูห ดี ตี, ฮาว ดี มืง ฮูโคก. บลาก นา เตต อึณ บอ เลห ดอก ดี มืง เฌบูโลน. บลาก นา เฆต ซีแง อึณ บอ ดอก ดี มืง อาเซน บอ ฮาว บลาก นา เลห ซีแง, ฌัม แคง กาดาย มืง ยูดา อี กอย โคบ แบลง อึม ยอดาน ตึอน. 35 มืง อี มึห แรง อี มัน ซีคยา, อึณ บอ มูห มืง เจรีม, มืง เจรา, มืง ฮามามาด, มืง รากาด, มืง กีนาเรด, 36 มืง อาตามา, มืง รามา, มืง ฮาจอ, 37 มืง เกเดซัะ, มืง เอตารี, มืง เอนฮาจอ, 38 มืง อีโรน, มืง มีตาเลลา, มืง ฮอรีม, มืง เบดซานาด บอ มืง เบดเซเมด. มืง เฆ ตี บอ เรา อี กอย นา เรต มืง เฆ ตี บอกาเฆลียด, เฆ กอย ฆึร ดี ดีม มืง.

39 มืง เฆ ตี บอ เรา เฆ บอกาเฆลียด, แฮะ แบน โตต กาดาย คาฆูน เฆ ครึร อานาบทาลี อึณกรึห เหมา อึณกรึห อัน.

40 เฆ วี กาตาม จึบ อึณบู, อึณ บอ เลห อาดา ครึร อาดาน โดบ อึณกรึห เหมา อึณกรึห อัน.

41 มาน มืง เฆ บอ มูห มืง โฌวรา, มืง เอซาตอลา, มืง อีรัะเซเมด, 42 มืง ซาลัะเบม, มืง อาจาลูน, มืง อีทาลา, 43 มืง เอโลน, มืง ทีมานา, มืง เอโครน, 44 มืง เอลาเตกา, มืง ฆีเบโซน, มืง บาลาด, 45 มืง เยรูด, มืง เบเนเบราก, มืง ฆาทัะรีมโมน, 46 มืง เมยัะกูน, มืง ราฆูน บอ กาดาย อี กอย ดี อาต มืง โยวพา ตึอน. 47 เฆ ครึร อาดาน ยี แฮะ ชึม มาน มืง เฆ ตี. เฆ บอ วี แรน ซึก, ฮาว กาโฆห ดี มืง เลซา. แฮะ ฮอต, เฆ บอ วี ปึอน มืง ตี, เฆ บอ แตห มืง ตี จืร มืง ดาน โดบ จืร ฆูณ ดัง เฆ อี มูห อาดาน.

48 มืง เฆ ตี บอ เรา อี กอย นา เรต มืง เฆ ตี บอกาเฆลียด แฮะ แบน โตต กาดาย คาฆูน เฆ ครึร อาดาน, อึณกรึห เหมา อึณกรึห อัน.

49 เฆ ดูอี อีซาเรลัะ แฮะ ฮอต ลาย กาซาง กาดาย ตี ดี ดอน ครึร, เฆ บอ วี กาซาง ดัว บอ ดี อาโยวซูอา อี มูห ฆอน อานูน, แตห อึณ แบน คาฆูน ดี อัน, แตห บอ อัน ปึอน. 50 เฆ มืร ดัว มืง ปี หมาณ อัน อี มูห มืง ทีมานาเซรา อี กอย นา กัว กาดาย อี มึห นอน อี จืร อาเอพารีม, แตห อึณ โดบ แปะ แฮะ กาลาง อูน เฌาพรา. อัน บอ แด มืง ตาง บอ กอย ดี ตี.

51 อาตี แฮะ แบน โตต กาดาย คาฆูน แปะ แฮะ กาซาง ดา อี หลู ดี เฌาพรา อี จืร อาเลอาซา ฆาย อาโยวซูอา อี มูห ฆอน อานูน บอ เฆ ดา ตาง อี อึบ เฆ ดูอี อีซาเรลัะ. เฆ แฮะ กาตาม ลาย กาซาง ดี เฆ ดูอี อีซาเรลัะ ดี อาต เฌาพรา ดอ กอย เฆ แคง มืง ซีโลว โคบ มาโลห ทึบ บีก บอด ตึอน. ปาย ตี เฆ บอ ลาย กาซาง กาดาย ตี, แตห อึณ กอ ฮอต โตต ดอน โมยว.