1 แคะ กอย เฆ ดูอี อีซาเรลัะ บอกาเฆลียด, เฆ บอ วี ตัห กาฌูะ ดี มืง ซีโลว. เฆ บอ วี ซัม ทึบ บีก บอด ดี ตี. กาดาย มืง เฆ ตี, เฆ แฮะ ปึอน ดี อึบ โตต. 2 ดอ อัน ตี อึณ ยี ซี กอย ดูอี อีซาเรลัะ อาดา บู ครึร, อี หณัม ปึอน ดี กาซาง คาฆูน ดี เฆ.

3 โคว, อาโยวซูอา วี ดีหมอด ดี เฆ ดูอี อีซาเรลัะ บอกาเฆลียด ต็อห, “เบ ดี บัร เหลณ ปอ แคะ เหมา, แตห เบ กอ ฮาว ดึห กาดาย แคง มืง แปะ แฮะ อาบ ดัว เฌาพรา ดี เบ อี มูห เฌาพรา ปี กรึบ เฆ ฆูณ ดัง เบ? 4 แตห เบ ร็อห ดูอี กาแต เบ, อู ครึร โอย วี. โอว ดี แตห เฆ ฮาว ยอด แคง มืง ตี, แตห อึณ กอ กาลัต โตต. แตห เฆ แดม อูน ปี ปาย อารึบ กาดาย แคง มาน มืง อี ดี แบน คาฆูน ดี เบ ตี. แฮะ ฮอต, แตห เฆ วี ตัห ดัว ดี โอว. 5 เฆ โลว กาย็อห กาดาย ตี, แตห อึณ แบน บู ปอด. อี มูห ครึร ดูอี อายูดา, แตห เฆ กอย แคง มืง บลาก นา เตต. เฆ ดูอี ครึร อาโยว, แตห เฆ กอย แคง มืง บลาก นา กัว. 6 เซ เบ แฮะ ฮอต แดม ปี ปาย อารึบ กาดาย บู ปอด ตี, แตห เบ วี ตัห ดัว ดี โอว. ปาย ตี โอว ดี กาตาม ดาง เบ ดี อาต เฌาพรา อี มูห เฌาพรา ปี กรึบ เอ. 7 เฆ ดูอี อาเลวี, เฆ ยี ตู ปึอน คาฆูน กาแต เบ. ฆาน หลู เฆ ดี เฌาพรา แฮะ แบน คาฆูน เฆ. อี มูห ครึร อาฆัด, ครึร อารูเบน บอ ครึร อามานาเซ อู กาแต ตึอน, เฆ แฮะ ปึอน กาดาย อี กอย บลาก นา เลห ซีแง อึม แบลง ยอดาน. อาโมวแซ อี มูห แดเจณ เฌาพรา แฮะ ฮอต กาซาง ดัว ดี เฆ.”

8 อาโยวซูอา แฮะ ฮอต กาลาง ดี เฆ ลอง อัน ตี, ดูอี ปี ร็อห เฆ ตึอน บอ ฮาว, แตห เฆ ปึอน ดี แดม ปี ปาย อารึบ กาดาย เฆ ตี. อาโยวซูอา มืร แฮะ ต็อห ดี เฆ, “แตห เบ ฮาว แคง มืง เฆ ตี, แตห อึณ กอ กาลัต. แตห เบ แดม อูน ปี ปาย อารึบ กาดาย เฆ ตี. แฮะ ฮอต, แตห เบ วี ตัห ดัว ดี โอว. โอว ดี กาตาม ดาง เบ ดี อาต เฌาพรา แคง มืง ซีโลว นี.” 9 ปาย ตี เฆ บอ ฮาว แคง มืง เฆ ตี, แตห อึณ กอ กาลัต โตต ดอน โปละ. เฆ บอ แดม ปี ปาย อารึบ กาดาย ตี, แดม บอ จืร เรา จืร มืง, บอ กาย็อห แตห อึณ แบน บู ปอด. แฮะ ฮอต, เฆ บอ วี ตัห โดง กอย อาโยวซูอา ดี มืง ซีโลว ตึอน. 10 อาโยวซูอา บอ กาตาม ดาง เฆ ดี อาต เฌาพรา, บอ กาย็อห ดัว ดี เฆ ดูอี อีซาเรลัะ ครึร เหมา ครึร อัน.

11 ปี กาตาม อาโยวซูอา, อึณ เลห อาดา เฆ ดูอี ครึร อาเบนยาม แบน อึณกรึห แบน อึณกรึห. มาน มืง เฆ ตี, อึณ บอ กอย ดี กาแต ครึร อายูดา ฆาย ครึร อาโยว.

12 กาอูน กาดาย เฆ บลาก นา กัว, อึณ บอ จูห ดี อึม แบลง ยอดาน, บอ วี โฮะ ดี โบรว นอน บลาก นา กัว มืง เยรีโคว, วี ฮาว บลาก นา เฆต ซีแง. อึณ บอ ฮาว กาแต นอน, วี เลห แคง แปร กาฮ็อห อี จืร เบดอาเวน. 13 จูห ดี ตี, กาอูน กาดาย เฆ ตี อึณ ปี วี ฮาว โดบ บันดาบ นอน, วี โลง บลาก นา เตต โดง กอย มืง ลูซา อี จืร บอ มืง เบดาเอน. อึณ บอ โลง บอ ดี มืง อาดาราอาดา อี กอย โคบ ดัง นอน บลาก นา เตต มืง เบดโฮวรูน.

14 กาอูน กาดาย เฆ ตี บอ วี วีต วีว บลาก นา เตต, บอ ฮาว บลาก นา เฆต ซีแง, วี ฮาว ซืด ดี มืง กีรียาดบาลัะ อี จืร บอ มืง กีรียาดยารีม, อี มูห โดง กอย เฆ ดูอี อายูดา. อาตี อึณ บอ มูห กาอูน กาดาย บลาก นา เฆต ซีแง.

15 กาอูน กาดาย บลาก นา เตต บอ จูห ดี มืง กีรียาดยารีม บลาก นา เฆต ซีแง. อึณ บอ ฮาว ฌัม ดี โตห อึม เนพาตอ. 16 กาอูน กาดาย ตี บอ วี โลง ดี ดัง นอน อี กอย นา อาต ดีลัยะ เบนฮีนูม อี กอย นา กัว ดีลัยะ เรพีม. อึณ โดบ ดีลัยะ แบลง ฮีนนูม บอ ฮาว บลาก นา เตต มืง เฆ ดูอี เยบูซีด. อึณ บอ วี ฮาว เลห ดี เรา เอโรวเก. 17 อึณ ปี วี โฆง ฮาว บลาก นา กัว, ฮาว ดี โดง จืร เอนเซเมด บอ โดง จืร เฆลีโอด อี ลาย กาซืร ดี อึณเตณ อี จืร อาตูมีม. อึณ บอ วี โลง บอ โดง กอย มาว อาปอฮัน. อาปอฮาน บอ มูห ฆอน อารูเบน. 18 อึณ บอ วี ฮาว โดบ ซัน นอน เบดอาราพัะ บอ โลง ดี ฆลัง อาราพัะ. 19 อึณ บอ กาโลห ฮาว บลาก นา กัว นอน เบดฮอกาลัะ บอ เลห ดี โฆะ อึม ซัยะ ซ็อง โดง ตัห ลึบ แบลง ยอดาน ตึอน อี มูห กาอูน กาดาย บลาก นา เตต.

20 อึม แบลง ยอดาน แฮะ แบน กาอูน บลาก นา เลห ซีแง. กาอูน กาดาย ตี แฮะ แลบ โรบ กาดาย ปี ปึอน เฆ ครึร อาเบนยาม อึณกรึห เหมา อึณกรึห อัน.

21 มืง ปี อึบ เฆ ครึร อาเบนยาม ตี, อึณ บอ มูห มืง เยรีโคว, มืง เบดฮอกาลัะ, มืง เอเมกกาจีก. 22 มืง เบดอาราพัะ, มืง เจมารีม บอ มืง เบดาเอน, 23 มืง อาวีน, มืง พารา, มืง ออพารัะ, 24 มืง เคพาฮามอ, มืง ออพานี, บอ มืง ฆีบา. มืง เฆ ตี มูห ฆึร ดี อา มืง บอ เรา อี กอย โรบ มืง เฆ ตี.

25 บอ มืง กีปอง, มืง รามา, มืง เบรอซี, 26 มืง มีฌาพา, มืง เคพีรา บอ มืง มอจา, 27 มืง เรเคม, มืง อีเพลา, มืง ตาราลา, 28 มืง เจลา, มืง เอลาบ, มืง ดูอี เยบูซีด อี มูห มืง เยรูซาแลม, มืง ฆีบียา บอ มืง กีรียาด อี มูห มืง ฆึร ดี พวน มืง บอ เรา อี กอย โรบ มืง เฆ ตี.

อาตี บอ มูห กาดาย คาฆูน เฆ ดูอี อาเบนยาม อึณกรึห เหมา อึณกรึห อัน.