1 อานี มูห กาดาย ปี ลาย กาซาง เฆ แคง ครึร อามานาเซ อี มูห ฆอน ฆีณ อาโยว ตึอน. ฆอน ฆีณ อามานาเซ มูห อามาคีรา. อัน มูห ฆูณ ดัง เฆ ดูอี ฆีเลอาด. เฆ ดูอี อามาคีรา แฮะ แบน ดา ซึก อี กยัะ ดี กาโฆห. โคว, เฆ แฮะ ปึอน มืง ฆีเลอาด บอ มืง บาซัน. 2 กาดาย อี กอย นา เฆต ซีแง อึม แบลง ยอดาน, เฆ แฮะ กาย็อห ดัว ดี เฆ หลูกหลาน อามานาเซ อาดา ปอ อู กาแต. แคง ครึร เฆ ตี, อึณ บอ มูห อึณกรึห อาบีเอจา, อาเฮเลก, อาซารีเอน, อาเซเคม, อาเฮพา บอ อึณกรึห อาซามีดา. อึณกรึห เฆ ตี, เฆ มูห โตต ฆอน อามานาเซ อี มูห ฆอน อาโยว ตึอน. เฆ ดอน อี แฮะ แบน ฆีณ อึณกรึห เหมา อึณกรึห อัน.

3 อึณ ยี มูห อาจาลอพัด อี มูห ฆอน อาเฮพา บอ มูห หลาน อาฆีเลอาด. อาฆีเลอาด ตี วี มูห ฆอน อามาคีรา อี วี มูห ฆอน อามานาเซ. หลูกหลาน อามานาเซ อี จืร อาจาลอพัด ตี, อัน ยี ตู มึห ฆอน อีมาย คอ อู วี. อัน มึห มี ฆอน อีบึณ ดีโลย. ฆอน อัน เฆ ตี บอ จืร นาง มาลา, นาง นออา, นาง ฮอกาลา, นาง แมก, บอ นาง ดีราจา. 4 อีบึณ เฆ ตี บอ ฮาว โดง กอย ดา อี หลู ดี เฌาพรา อี จืร อาเลอาซา, ฮาว บอ ดี อาโยวซูอา อี มูห ฆอน อานูน บอ ดี เฆ ดา ตาง ตึอน. เฆ บอ ต็อห, “เฌาพรา แฮะ ฮอต กาลาง ดี อาโมวแซ, แตห อัน กาซาง กาดาย อี แบน คาฆูน ดี เย โดบ บีนอง วอแว เย อี มูห อีมาย.” ปาย ตี อาโยวซูอา บอ กาซาง กาดาย อี แบน คาฆูน ดี เฆ, แตห อึณ บอ โดบ แคะ ปี ปึอน อูกัด อูวา ฆูณ เฆ, แตห อึณ โดบ บอ แปะ แฮะ กาลาง อูน เฌาพรา. 5 ปาย ตี ครึร อามานาเซ วี ปึอน กาดาย ฆึร บูน แดง มืง ฆีเลอาด ฆาย มืง บาซัน อี กอย นา เฆต ซีแง อึม แบลง ยอดาน ตึอน. 6 โคว, ฆอน อีบึณ แคง ครึร อามานาเซ เฆ ตี, เฆ แฮะ ปึอน กาดาย โดบ วอแว เฆ อี มูห ฆอน อีมาย. ปาย ตี กาดาย แคง มืง ฆีเลอาด, เฆ แฮะ กาซาง ดัว ดี ฆอน อามานาเซ อี ซี ฆีด อี หณัม ปึอน คาฆูน ดี เฆ.

7 มาน มืง อามานาเซ เฆ ตี, อึณ บอ จูห ดี มืง อาเซน ฮาว ดี มืง เมดเมซา อี กอย บลาก นา เลห ซีแง มืง เซเคม. กาอูน กาดาย เฆ ตี บอ ฮาว บลาก นา เตต บอ แลบ มืง ทาโบว ตึอน. 8 ครึร อามานาเซ แฮะ อึบ กาดาย อี กอย โคบ มืง ทาโบว. มาแล, เฆ ยี ตู อึบ มืง ทาโบว ตี. เฆ ดูอี อาเอพารีม ยี แฮะ อึบ. 9 กาอูน กาดาย เฆ ตี บอ วี โลง ดี โรง อึม กานา บอ ดี มืง อี กอย บลาก นา เตต โรง ตี. เฆ ครึร อาเอพารีม แฮะ ปึอน ดี อึบ มัง โปละ อี กอย กาแต มืง อามานาเซ ตี. กาอูน กาดาย อามานาเซ ยี โลง นา กัว โรง อึม ตี บอ วี ฮาว ซืด ดี อึม นัมมูกซารา. 10 ดูอี อาเอพารีม แฮะ อึบ กาดาย บลาก นา เตต. ดูอี อามานาเซ บอ อึบ กาดาย บลาก นา กัว. อึม นัมมูกซารา แฮะ แบน กาอูน อามานาเซ กอ ฌัม ดี โดง กอย ดูอี อาเซน บลาก นา กัว. อึณ บอ ฌัม ดี กาดาย ดูอี อาอีซาคา บลาก นา เตต.

11 มาน มืง อามานาเซ อี กอย ดี กาแต มืง อาอีซาคา ฆาย มืง อาเซน ตี บอ มูห มืง เบดแซอัน บอ มืง อีปาลัม. อึณ บอ บา เฆ ดูอี แคง มืง ดอรา, มืง อีนตอลัะ, มืง ทานัก, มืง มีกีตอ บอ เรา อี กอย โรบ มืง เฆ ตี.

12 ดูอี ครึร อามานาเซ ตู แป ดี โฮว เตา เฆ ดูอี อี กอย แคง มืง เฆ ตี. อี มูห ดูอี อาโมยว กานัณ, เฆ ตู เลห โดง กอย เฆ ตี.

13 มาแล, วาย แฮะ แบร กืน เฆ ดูอี อีซาเรลัะ บอ มึห โปลม มึห แฮณ, เฆ บอ คาหนาบ ดูอี กานัณ เฆ ตี, แตห เฆ แบน หมาย เฆ, รัณ ฆาน ดัว ดี เฆ. เฆ ยี ตู โฮว เตา ดูอี อาโมยว กานัณ เฆ ตี.

14 หลูกหลาน ครึร อาโยว วี กาลาง ดี อาโยวซูอา ต็อห, “เย แฮะ วี แบน ดูอี กืน. โคว, เฌาพรา แฮะ ม็องการา ดัว ดี เย. เหมา อึณ ปาย ปี วี ดัว แม กาดาย มี อู บูน ดี เย?”

15 อาโยวซูอา วี ต็อห ดี เฆ, “โกบ แฮะ แบน เบ ดูอี กืน กาเซา, อึณ แฮะ หมาน, มาน มืง กาแต นอน อาเอพารีม มืร แฮะ กาเคียะ, อาว ฮู โกบ กอย เบ. แตห เบ วี โฮะ โดห ยัห แปร อาดา เบ อี กอย แคง มืง ดูอี เพเรซีด บอ ดูอี ราพาด ตึอน.”

16 เฆ มืร วี ต็อห, “นอน อาเอพารีม ตี ตู ฆลึม อาดา เย. ปี บอ ปาย ตี มืร, เฆ ดูอี กานัณ อี กอย แคง ฆลัง บอ เฆ อี กอย แคง มืง เบดแซอัน บอ แคง เรา อี กอย โรบ มืง ตี บอ เฆ อี กอย โดบ ดีลัยะ เยจาเรลัะ, เฆ แฮะ มึห ลักเลา ฮีน.”

17 อาโยวซูอา วี กาลาง ดี เฆ ครึร อาเอพารีม บอ ครึร อามานาเซ อี กอย บลาก นา เฆต ซีแง ตี ต็อห, “โกบ แฮะ แบน เบ ดูอี กืน, แฮะ มึห โปลม มึห แฮณ ปาย ตี เบ โลว ปึอน หลึอม อาดา อู บูน. 18 แคะ มึห กาดาย อี กอย ดี นอน แฮะ แบน โตต มืง เบ. อึณ ปี บอ มูห นัง แปร มืร, แตห เบ โดห ยัห จูห กาโตะ นา นี, แตห อึณ กอ ฌัม กาโตะ นา ดอย. ดูอี กานัณ เฆ ตี, เฆ ปี บอ แฮะ มึห ลักเลา ฮีน, แฮะ ปึอน กาโฆห บอ แฮะ มึห โปลม มึห แฮณ กืน หลึอม เบ มืร, เบ ยี ดี ปึอน ดี โฮว เตา เฆ.”