1 กาดาย ปี ลาย กาซาง เฆ อี มูห หลูกหลาน อาโยว, อึณ บอ จูห ดี แบลง อึม ยอดาน อี กอย โคบ มืง เยรีโคว ดี โตห อึม เยรีโคว อี กอย บลาก นา เลห ซีแง. อึณ บอ วี ลึบ ฮาว บอ แคง แปร กาฮ็อห, วี โฮะ ฌัม ดี มืง อี กอย ดี นอน, อี มูห มืง เบดาเอน อี จืร บอ ลูซา. 2 อึณ ปี วี จูห ดี ตี บอ ฮาว ฌัม กาดาย เฆ ดูอี อาคีด อี กอย ดี มืง อาตาราด. 3 อึณ ปี วี โลง บอ บลาก นา เฆต ซีแง, กอ วี ฌัม กาดาย ดูอี อาโมยว ยาพาเลทีด, กอ วี ฮาว ฌัม บอ ดี มืง เบดโฮวรูน. บลาก นา เตต, อึณ บอ ฮาว ฌัม ดี มืง เกจา บอ ฮาว ซืด ดี อึม นัมมูกซารา.

4 ปาย ตี เฆ หลูกหลาน อาโยว อี มูห ครึร อาเอพารีม ฆาย ครึร อามานาเซ อี กอย บลาก นา เฆต ซีแง, เฆ แฮะ ปึอน กาดาย ตี อี แบน คาฆูน ดี เฆ.

5 กาอูน กาดาย เฆ ดูอี ครึร อาเอพารีม อี โดบ อึณกรึห เหมา อึณกรึห อัน, อึณ บอ จูห ดี มืง อาดาราอาดา, วี โฮะ นา เลห ซีแง, วี ฮาว ฌัม ดี มืง เบดโฮวรูน บลาก นา กัว.

6 กาอูน กาดาย ตี, อึณ บอ ฮาว ฌัม บอ ดี อึม นัมมูกซารา บลาก นา กัว มืง เมดเมซา. อึณ ปี วี โฆง ฮาว นา เลห ซีแง, กอ ฌัม ดี มืง ตานีดซีโลว. อึณ บอ กาโลห ฮาว มืง ตี, กอ วี ฌัม ดี มืง ยานอ อี กอย บลาก นา เลห ซีแง. 7 อึณ วี โลง ฌัม ดี มืง อาตาราด บอ ดี มืง นารา, กอ วี ฮาว ฌัม ดี มืง เยรีโคว, วี ฮาว ซืด ดี อึม แบลง ยอดาน. 8 กาอูน กาดาย เฆ ตี อึณ บอ จูห ดี มืง ทาโบว วี โลง นา เฆต ซีแง, ฌัม ดี โรง แบลง กานา, บอ วี ฮาว ซืด ดี อึม นัมมูกซารา. อานี อึณ บอ มูห กาอูน กาดาย เฆ ครึร อาเอพารีม โดบ อึณกรึห เหมา อึณกรึห อัน. 9 เรา เฆ บอ มืง เฆ ซี มึห อี กอย บอ แคง กาดาย อามานาเซ. เฆ ยี แฮะ อูน อาดา เฆ แคง ครึร อาเอพารีม ตี.

10 เฆ ยี ตู โฮว เตา ดูอี กานัณ อี กอย แคง มืง เกจา. ดูอี อาโมยว ตี, บอ กอย รึม โดบ ดูอี อาเอพารีม กอ ฌัม อาตึร นี. เฆ บอ คัม ดี แบน หมาย, คัม ดี รัณ ฆาน, ดัว ดี ดูอี อาเอพารีม เฆ ตี.