1 กาอูน กาดาย ปี ลาย กาซาง เฆ ดี ดูอี อายูดา ดี อึณกรึห เฆ ดอน อึณกรึห อึณ บอ ฌัม ดี กาอูน กาดาย มืง เอโดม อี มูห แปร กาฮ็อห จีนา, อี กอย บลาก นา เตต ซืด.

2 กาอูน กาดาย เฆ บลาก นา เตต ตี อึณ บอ จูห ดี โฆะ อึม ดึง ซัยะ ซ็อง บลาก นา เตต. 3 อึณ บอ ฮาว บลาก นา เตต อึณเตณ กาแต นอน อี จืร อาราบีม,^a กอ วี ฮาว ฌัม แคง แปร กาฮ็อห อี จืร จีนา. อึณ บอ ฮาว บลาก นา เตต มืง กาเดบานา. อึณ ปี วี ฮาว บอ ดี โดง จืร เฮฌาโรน, ปี วี โฮะ ฌัม บอ ดี โดง จืร อาดารา. แฮะ ฮอต, อึณ วี แลบ ฮาว บอ ดี โดง จืร กากัะ. 4 อึณ บอ วี ฮาว โดบ อึณเตณ อี ฮาว ดี โดง จืร อาจาโมน บอ ฮาว ฌัม ดี ดีลัยะ มืง แอฆึบ, วี ฮาว ฌัม ดี อึม นัมมูกซารา. อึณ บอ มูห กาอูน กาดาย เฆ ดูอี อายูดา อี กอย ซืด บลาก นา เตต.

5 กาอูน กาดาย อี กอย บลาก นา เลห ซีแง อึณ บอ โดบ อึม ดึง ซัยะ ซ็อง, บอ วี โฮะ ฌัม โดง ตัห ลึบ อึม แบลง ยอดาน. กาอูน กาดาย บลาก นา กัว, อึณ บอ จูห ดี โดง ลึบ อึม แบลง ยอดาน ตี, 6 วี ฮาว ฌัม ดี โดง จืร เบดฮอกาลัะ, ปี วี โฮะ บลาก นา กัว, ฌัม ดี โดง จืร เบดอาราพัะ, ปี วี ฮาว โดง กอย มาว อาปอฮัน. อาปอฮัน ตี บอ มูห ฆอน อารูเบน. 7 กาอูน ตี ปี วี เลห ฮาว โดบ ดีลัยะ อาคอ, วี โฮะ ดี มืง เดบีรา, ปี วี วีต โฮะ บลาก นา กัว ดี มืง ฆีลัะฆา อี ลาย กาซืร ดี อึณเตณ อี จืร อาตูมีม, อี กอย บลาก นา เตต ดีลัยะ ตี. อึณ ปี วี ฮาว บอ ดี โตห อึม เอเนเซเมด, บอ ฌัม ดี โตห อึม อีรอกีลา. 8 อึณ บอ โฮะ โดบ ดีลัยะ เบนฮีนูม อี กอย บลาก นา กัว นอน โดง แด เฆ ดูอี เยบูซีด มืง ตาง อี มูห มืง เยรูซาแลม ตึอน. กาอูน กาดาย ตี อึณ บอ ฮาว ดี กาแดะ นอน อี กอย นา เลห ซีแง ดีลัยะ แบลง ฮีนนูม อี กอย บลาก นา กัว แบลง เรพีม. 9 อึณ ปี วี จูห ดี ตี, วี โลง ดี โตห อึม แบลง เนพาตอ, ปี วี ฮาว ดี มืง เฆ อี กอย โคบ นอน อาเพโรน, วี โลง ฌัม ดี มืง บาอาลา อี จืร บอ กีรียาดยารีม. 10 ปัน ตี อึณ บอ แลบ ฮาว บลาก นา เฆต ซีแง, กอ วี ฮาว ฌัม ดี นอน เซอี. แฮะ ฮอต, อึณ บอ โฮะ บลาก นา กัว นอน ยารีม อี จืร บอ นอน เดซาโลน. อึณ บอ วี โลง ฌัม ดี มืง เบดเซเมด บอ กาโลห ดี มืง ทีมานา. 11 กาอูน กาดาย ตี บอ ฮาว ดี นอน อี กอย นา กัว มืง เอโครน, ปี วี ฮาว ดี โดง จืร ซีเคโรน. อึณ บอ กาโลห นอน บาอาลา, วี ฮาว ฌัม มืง ยาปาเนลา. แฮะ ฮอต, อึณ บอ ฮาว ฌัม ดี อึม นัมมูกซารา.

12 กาอูน กาดาย บลาก นา เฆต ซีแง, อึณ บอ โดบ บาง อึม นัมมูกซารา. อาตี แฮะ แบน กาอูน กาดาย เฆ ครึร อายูดา อึณกรึห เหมา อึณกรึห อัน.

13 เฌาพรา แฮะ ฮอต กาลาง ดี อาโยวซูอา, แตห อัน อาบ ดัว มืง ยูดา อาดา อู ปอด ดี อาฆาลีบ อี มูห ฆอน อาเยโพวนา แคง ครึร อายูดา ตึอน. อัน แฮะ ปึอน มืง กีรียาดอาบา อี มูห มืง เฮโบรว. อึณ บอ มูห กาดาย ปี ดึอม อึบ อาบา อี มูห ฆูณ ดัง อานาก ตึอน. 14 อาฆาลีบ บอ โฮว เตา หลูกหลาน อานาก อี มูห อึณกรึห อาเซมเซ, อึณกรึห อาฮีมาน บอ อึณกรึห อาตาลาม, แตห เฆ เลห แคง มืง ตี. 15 อัน ปี วี แรน ซึก, ฮาว กาโฆห ดี มืง เดบีรา. มืง ตี แฮะ ดึอม จืร มืง กีรียาดซอพา. 16 อาฆาลีบ วี ต็อห, “อาเซ แฮะ กาโฆห ปึอน มืง กีรียาดซอพา ตี, โอว ดี อาบ ฆอน ดีบยา โอว อี จืร นาง เอซอ, แตห อัน แบน อีบึณ วี ตี.” 17 ปาย ตี อาออซันเยลา อี มูห ฆอน วา อาฆาลีบ อี จืร อาเคนาด, อัน บอ กาโฆห บอ ปึอน มืง ตาง ตี. อาฆาลีบ บอ อาบ ดัว นาง เอซอ ดี อัน.

18 อู ซีแง, ดอ ตัห กอย นาง เอซอ ดี อีมาย อัน, อัน บอ กาซูห อีมาย อัน, แตห อัน หมาณ กาดาย ดี ฆูณ อัน. นาง เอซอ บอ ฮาว โดง กอย ฆูณ อัน. ดอ โลง อัน ดี มาลา อัน, อาฆาลีบ บอ ดีหมอด อัน ต็อห, “มาเซ ปี โลว แม?”

19 อัน วี ต็อห, “โอว หมาณ, แตห แม ดัว คอซอง ดี โอว. กาดาย แปะ แฮะ ดัว แม ฆูณ ดี โอว ตึอน, อึณ กอย นา เตต บอ มูห โดง กาฮ็อห กาเซา. โอว หมาณ, แตห แม ดัว บอ โดง มึห อึม โตห ดี โอว.” ปาย ตี อาฆาลีบ บอ ดัว กาดาย อี มึห อึม โตห ดี อัน อี กอย บลาก นา เตต บอ บลาก นา กัว.

20 อานี อึณ บอ มูห กาดาย แปะ แฮะ ปึอน เฆ ดูอี แคง ครึร อายูดา ดอน อึณกรึห, ดอน อึณโฮม, แตห อึณ แบน คาฆูน ดี เฆ.

21 มืง แปะ แฮะ ปึอน เฆ ตี อี กอย บลาก นา เตต ซืด อึณ บอ ลาย กาเครียะ ดี กาอูน กาดาย มืง เอโดม. อึณ บอ มูห มืง กาบาเฌลัะ, มืง เอเด, มืง ยากูรา, 22 มืง กีนา, มืง ดีมอนา, มืง อาตัะตา, 23 มืง เกเดซัะ, มืง ฮาจอ, มืง อีทานัน, 24 มืง จีพัะ บอ มืง เกเดซัะ, มืง เบลูด, 25 มืง ฮาฌอฮาตัดตา, มืง กีราอูดเฮฌาโรน อี จืร บอ มืง ฮาจอ, 26 มืง อามาม บอ มืง เซมา, มืง มอลาดา, 27 มืง ฮาฌอกาตา, มืง เฮจัะโมน, มืง เบดเบลีด, 28 มืง ฮาฌาซูอาน, มืง บีราเซบา, มืง เบจาซายา. 29 มืง บาอาลา บอ มืง ลีม, มืง เอเฌม, 30 มืง เอลาตอลาด, มืง เคซีลา, มืง ฮอมัะ, 31 มืง ฌีกาลาด, มืง มาตาแมนา, มืง ซันซานา, 32 มืง เยปอด, มืง ซีลาฮีม, มืง อาอีน บอ มืง รีมโมน. มืง เฆ ตี บอกาเฆลียด บอ เรา อี กอย นา เรต มืง ตี, เฆ กอย อา ฆึร ดี ดีม มืง.

33 มืง อี กอย แคง ฆลัง อี กอย นา เฆต ซีแง, อึณ บอ มูห มืง เอซาตอลา, มืง โฌวรา, มืง อาซานา, 34 มืง จานอ, มืง เอนกานีม, มืง ทาโบว, มืง เอนัม, 35 มืง ยาโมด, มืง อาตูลัม, มืง ซอคอ, มืง อาเจกา, 36 มืง ซารีม, มืง อีตีซีม บอ มืง เกตีรา อี บอ จืร มืง กาแตราซีม. มืง เฆ ตี บอกาเฆลียด บอ เรา เฆ อี กอย นา เรต มืง เฆ ตี, เฆ กอย ฆึร ดี พวน มืง.

37 แดง ตี, บอ มูห มืง เจราน, มืง ฮาตาซัะ, มืง มีกตาลากัด, มืง อาซัน, 38 มืง ตีลาน, มืง มีฌาพา, มืง โยกเทลัะ, 39 มืง ลาคีด, มืง ปอจากาด, มืง เอกาลอน, 40 มืง คาโบน, มืง ลามาด, มืง กีดีด, 41 มืง เกตารูด, มืง เบดดาโฆน, มืง นามา บอ มืง มีกาตา. มืง เฆ ตี บอกาเฆลียด บอ เรา เฆ อี กอย นา เรต มืง เฆ ตี, เฆ กอย ฆึร ดี เดา มืง.

42 แดง ตี อึณ บอ มูห มืง ลีปานา, มืง เอซา, มืง อาซาน, 43 มืง ยีพาด, มืง อาซานา, มืง เนจีบ, 44 มืง ฆีลัะ, มืง อาคาจีบ บอ มืง มาเรซา. มืง เฆ ตี บอกาเฆลียด บอ เรา อี กอย โรบ มืง ตี, เฆ กอย ดีม มืง.

45 อึณ บอ มูห มืง เอโครน บอ เรา อี กอย โรบ มืง เฆ ตี. 46 จูห ดี มืง เอโครน ตี, กอ วี ฮาว ฌัม บลาก นา เฆต ซีแง ดี อึม นัมมูกซารา โดง กอย กาเครียะ ดี ทูง มืง อาจูด. 47 บอ มืง อาจูด บอ มืง ฆาซา บอ เรา อี กอย กาตัด มืง เฆ ตี บอกาเฆลียด, กอ วี ฮาว ฌัม ดี ดีลัยะ มืง แอฆึบ บอ ดี บาง อึม นัมมูกซารา.

48 มืง อี กอย แดง นอน มืร, อึณ บอ มูห มืง ซามีรา, มืง ยาตีรา, มืง ซอคอ, 49 มืง ตานา, มืง กีรียาดซอพา อี จืร บอ มืง เดบีรา, 50 มืง อานาบ, มืง เอตาซามอ, มืง อานีม, 51 มืง โฆวเซน, มืง ฮอโลน บอ มืง กีโลว. มืง เฆ ตี บอกาเฆลียด บอ เรา อี กอย โรบ มืง เฆ ตี, เฆ กอย ฆึร ดี อู มืง.

52 แดง ตี อึณ บอ มูห บอ มืง อาราบ, มืง ดูมา, มืง เอซัน, 53 มืง ยานีน, มืง เบดทาโบว, มืง อาลูมาเพด, 54 มืง โฮมตา, มืง กีรียาดอาบา อี จืร บอ มืง เฮโบรว บอ มืง จีออรา. มืง เฆ ตี บอกาเฆลียด บอ เรา อี กอย โรบ มืง เฆ ตี, เฆ กอย ดีม มืง. 55 แดง ตี, อึณ บอ มึห มืง มอนัะ, มืง ฆาเมลัะ, มืง จีพัะ, มืง ยูทา, 56 มืง เยจาเรลัะ, มืง ยอกาดัม, มืง จานอ, 57 มืง กาอีนัะ, มืง ฆีบียา บอ มืง ทีมานา. มืง เฆ ตี บอกาเฆลียด บอ เรา อี กอย โรบ มืง ตี, เฆ กอย ฆึร มืง.

58 แดง ตี อึณ บอ มูห มืง ฮาลัะฮู, มืง เบดฌูรา, มืง เกตอ, 59 มืง มาราด, มืง เบดอาโนด บอ มืง เอลาโคน. มืง เฆ ตี บอกาเฆลียด บอ เรา อี กอย โรบ มืง เฆ ตี, เฆ กอย เดา มืง.

60 แดง ตี อึณ บอ มูห มืง กีรียาดบาลัะ อี จืร บอ มืง กีรียาดยารีม บอ มืง ราบา บอ เรา อี กอย โรบ มืง เฆ บอกาเฆลียด, เฆ กอย อา มืง.

61 มืง อี กอย แคง แปร กาฮ็อห มืร, อึณ บอ มูห มืง เบดอาราพัะ, มืง มีตีน, มืง เซกัะกา, 62 มืง นีซัน, มืง ซัยะ บอ มืง เอนเกดี. มืง เฆ ตี บอกาเฆลียด บอ เรา อี กอย โรบ มืง เฆ ตี เฆ กอย เดา มืง.

63 ปี บอ แฮะ ปาย ตี มืร, เฆ ดูอี ครึร อายูดา ยี ตู ปึอน โฮว เตา เฆ ดูอี เยบูซีด อี กอย แคง มืง เยรูซาแลม ดอ เหมา. โคว อัน ตี, กอ ฌัม อาตึร เฆ ดูอี เยบูซีด บอ ปึอน ดี กอย กาซู กาวัร โดบ เฆ ดูอี ครึร อายูดา.