1 อานี อึณ มูห ลอง อาโยวซูอา ดึห กาดาย มืง กานัณ อี กอย บลาก นา เฆต ซีแง อึม แบลง ยอดาน, วี กาซาง ดัว ดี เฆ ดูอี อีซาเรลัะ. ดา อี หลู ดี เฌาพรา อี จืร อาเลอาซา บอ อาโยวซูอา อี มูห ฆอน อานูน บอ เฆ อี มูห ดา ตาง อี อึบ ดูอี อีซาเรลัะ, เฆ บอ กาซาง ดัว ดี เฆ ดูอี บอกาเฆลียด. 2 เฆ กาตาม แตห อึณ โดบ แปะ แฮะ ดึอม กาลาง เฌาพรา ดี อาโมวแซ ตึอน. เฆ มืร กาย็อห ดัว ดี เฆ ดูอี อาดา ดีม ครึร ดี อู กาแต. 3 โคว, อาโมวแซ แฮะ ฮอต กาย็อห ดัว มืง อี กอย บลาก นา เลห ซีแง อึม แบลง ยอดาน ดี เฆ ดูอี อาดา อา ครึร ดี อู กาแต. อัน ยี ตู ดัว มาเซ ดี ดูอี ครึร อาเลวี. 4 ครึร อาโยว ตึอน แฮะ กาย็อห แบน อา ครึร, อึณ บอ มูห ครึร อามานาเซ บอ ครึร อาเอพารีม. อี มูห ครึร อาเลวี, อาโมวแซ ยี ตู ดัว, ตู กาซาง กาดาย ดี เฆ. เฆ ปึอน มี มืง โดง ดี กอย เฆ, บอ โอ็ง เปต, โดง ดี เฮียง เฆ พึง มาบู บอ พึง มามัก เฆ. 5 ปาย ตี เฆ ดูอี อีซาเรลัะ บอ กาย็อห กาดาย มาน มืง เฆ ตี, แตห อึณ โดบ ปี ดึอม กาลาง อูน เฌาพรา ดี อาโมวแซ ตึอน.

6 อาดา อู ซีแง เฆ ดูอี ครึร อายูดา มัง อี บอ ตัห โดง กอย อาโยวซูอา ดอ กอย อัน ดี โดง จืร ฆีลัะฆา ตึอน. กาแต เฆ ตี มึห อาดา อู วี อี จืร อาฆาลีบ อี มูห ฆอน อาเยโพวนา อี มูห ดูอี อาโมยว เกเนซีด. อัน บอ กาลาง ดี อาโยวซูอา ต็อห, “แม แฮะ ฮอต นับ โฆรห ปี ดัม อูน เฌาพรา ดี อาโมวแซ อี มูห ดูอี ปี อึบ เฌาพรา ดอ กอย เฆ ดี โดง จืร กาเดบานา อี มูห ลอง แม บอ โอว ตึอน. 7 อาโมวแซ อี มูห แดเจณ เฌาพรา แฮะ ดึอม จัร โอว, แตห โอว เลห ดี โดง จืร กาเดบานา วี ฮาว คยอง ดี ยอด มืง นี. ดอ อัน ตี อาซาก โอว แฮะ ปึอน พวน ฆึร ซีนัม. โอว บอ วี ตัห, โอว มืร กาลาง โฆรห มูห, โฆรห หมาน ดี อาโมวแซ. 8 เฆ ดูอี อี ฮาว โดบ โอว, เฆ แฮะ โบง แตห น็อห ดูอี โยว กาเซา. โอว ยี แฮะ วี มึห น็อห ซืร น็อห หมาน ดี โดบ เฌาพรา ปี กรึบ โอว. 9 ปาย ตี อาโมวแซ แฮะ วี กาแซณ ดี โอว ต็อห, ‘โกบ แฮะ โดบ ซีคยา แม เฌาพรา ปี กรึบ โอว, กาดาย โดง แฮะ ฮอต ฮาว แณต แม ตี, อึณ ดี แบน คาฆูน แม บอ คาฆูน เฆ หลูกหลาน แม เซเซ.’

10 แตห แม วี ยอด ดอ ตี นี. ซีณ กาลาง เฌาพรา ดี อาโมวแซ ตี, แฮะ ปวน ตัห พวน ฆึร ดี พัน ซีนัม. ดอ อัน ตี ซีงยา ฮาว เฆ ดูอี อีซาเรลัะ แคง แปร กาฮ็อห ตึอน. เฌาพรา มืร แฮะ โบง โดบ กาดีก ซัดฌา อัน, แตห โอว ซี มึห อาซาก. ยอด, อาซาก โอว มืร กอ แฮะ วี ปึอน ดา ฆึร ดี พัน ซีนัม. 11 โอว ยี ซี มึห โปลม ปี ดอ จัร อาโมวแซ ตี ดี โอว. โอว มืร ซี มึห แฮณ ปึอน กาโฆห ดี รันซู ปี ดอ มึอน. 12 โกบ อึณ ปาย ตี โอว หมาณ, แตห แม อาบ ดัว กาดาย มืง อี กอย ดี นอน นี ดี โอว, อึณ บอ มูห มืง แปะ แฮะ กาแซณ เฌาพรา ดี ดัว ดี โอว. แม มืร แฮะ ยึร ลอง เฆ ดูอี โดว ตาง, โปลม ตาง อี จืร ดูอี อานาคีม, อี กอย ดี นอน ตี แคง มืง อี มึห แรง อี มัน ซีคยา. ปาย ตี เซ เฌาพรา กอย รึม โดบ โอว, โอว ดี บอ ปึอน โฮว เตา ดูอี เฆ ตี ปี แปะ แฮะ กาลาง อูน เฌาพรา ดอ อัน ตี.”

13 แฮะ ฮอต, อาโยวซูอา บอ ม็องการา ดัว ดี อาฆาลีบ อี มูห ฆอน อาเยโพวนา บอ อาบ มืง เฮโบรว ตี, แตห อึณ แบน คาฆูน อัน. 14 ปาย ตี มืง เฮโบรว บอ แบน กาดาย อาฆาลีบ อี มูห ฆอน อาเยโพวนา อี มูห อาโมยว เกเนซีด กอ ฌัม อาตึร นี โกบ แฮะ โดบ ซีคยา อัน ดี เฌาพรา อี มูห เฌาพรา ปี กรึบ เฆ ดูอี อีซาเรลัะ. 15 อาต อัน ตี มืง เฮโบรว บอ จืร มืง กีรียาดอาบา. ดา อาบา ตี บอ มูห ดูอี อี มึห โปลม ตาง หลึอม อี เฮา กาแต เฆ ดูอี อานาคีม ตึอน. วาย อัน ตี เฆ ปึอน กอย ดาคึย. อาว ฮู มึห รันซู อี ดี กาโฆห ดี เฆ.