1 วาย อัน ตี อาโยวซูอา แฮะ กัด กาเซา, อาซาก อัน มืร แฮะ กืน. ดอ อัน ตี เฌาพรา วี ต็อห ดี อัน, “แม แฮะ ฮอต กัด กาเซา. โดง ซี ดี โลว กาโฆห มืร อึณ ยี ซี กืน กาเซา.

2 กาดาย มืง อี ซี ฆีด เฆ ตี, อี มูห มืง โดง กอย เฆ ดูอี พีลีที บอ มืง โดง กอย เฆ ดูอี เฆซูรา บอกาเฆลียด. 3 อึณ บอ จูห ดี แบลง อึม ซีโฮวรา อี กอย นา เลห ซีแง มืง แอฆึบ กอ วี ฮาว ฌัม บอ กาอูน กาดาย มืง เอโครน บลาก นา กัว. อึณ แฮะ แบน โตต กาดาย มืง กานัณ. อึณ มูห โดง กอย เฆ คูนดีคัม มืง พีลีที พัน กาดัง อี กอย มืง ฆาซา, มืง อาจูด, มืง อาซาเคโลน, มืง ฆัะทัะ, มืง เอโครน บอ มืง อาเวม อี กอย บลาก นา เตต บอกาเฆลียด. 4 อึณ ยี ซี มึห บอ มืง ดูอี กานัณ บอกาเฆลียด, บอ มืง อาราฮา โดง กอย เฆ ดูอี ซีโดน ตึอน กอ วี ฮาว ฌัม บอ มืง เอแพก อี กอย ดี กาอูน กาดาย มืง ดูอี อาโมวรีด. 5 อึณ มูห บอ มืง ดูอี เกปาลา บอ มืง เลบานูน บอ มืง อี กอย บลาก นา เลห ซีแง. อึณ บอ จูห ดี มืง บาลัะกาด อี กอย นา เตต นอน เฮราโมน กอ วี ฮาว ฌัม ดี มืง เลโบวฮามาด.

6 อี มูห เฆ ดูอี อาโมยว ซีโดน บอกาเฆลียด อี กอย แดง นอน ดี กาแต นอน เลบานูน ฆาย มืง มีซาราพอซามีน, โอว อี มูห เฌาพรา ดี บอ โฮว เตา โตต ดูอี เฆ ตี ดี อาต เบ. เบ ดี บอ ดึห มืง เฆ ตี, กาซาง กาแต เบ ดูอี อีซาเรลัะ, แตห อึณ แบน คาฆูน เบ, แตห อึณ โดบ ปี จัร โอว เบ โบง. 7 ปาย ตี แตห เบ กาซาง กาดาย มืง เฆ ตี ดี ดูอี อาดา ดีม ครึร บอ ครึร อามานาเซ อู กาแต.”

8 อี มูห ครึร อารูเบน ครึร อาฆัด บอ ครึร อามานาเซ อาดา ปอ อู กาแต, เฆ แฮะ ฮอต ปึอน กาดาย อี ดี แบน คาฆูน ดี เฆ. อาโมวแซ อี มูห แดเจณ เฌาพรา แฮะ กาซาง ดัว ดี เฆ กาดาย อี กอย นา เลห ซีแง อึม แบลง ยอดาน ตึอน.

9 กาดาย มืง เฆ ตี อึณ จูห ดี มืง อารอ อี กอย โคบ ดีลัยะ แบลง อารานูน. อึณ บอ บา มืง อี กอย ดี กาแต ดีลัยะ ตี. อึณ บอ บา ฆลัง แดง นอน อี จืร เมเดพา, กอ วี ฌัม ดี มืง ดีโพน. 10 อึณ บอ บา มืง แบน มืง แบน มืง ปี อึบ คูนดีคัม อาซีโฮน อี มูห ดูอี อาโมวรีด, อี อึบ มืง เฮซาโพน ตึอน. อึณ บอ ฌัม ดี กาอูน กาดาย เฆ ดูอี อัมโมน. 11 มืง เฆ ตี บอ บา มืง ฆีเลอาด บอ โดง กอย เฆ ดูอี เฆซูรา บอ ดูอี อามาคา, นอน เฮราโมน บอ นอน, มืง บาซัน บอ มืง กอ วี ฮาว ฌัม ดี มืง ซาลากา. 12 อึณ บอ บา บอ มืง คูนดีคัม อาออคัะ อี อึบ กาดาย มืง บาซัน บอ มืง. อัน บอ มูห ดูอี ดี กาแดะ ซืด กาแต เฆ ดูอี ราพาด. อัน อึบ บอ มืง อาซาตารูด บอ มืง เอตารี. ดูอี เฆ ตี มูห ดูอี แปะ แฮะ กาโฆห แฮะ แป อาโมวแซ. 13 มาแล, เฆ ดูอี อีซาเรลัะ ตู โฮว เตา เฆ ดูอี เฆซูรา บอ เฆ ดูอี อามาคา. เฆ บอ ปึอน ดี กอย รึม โดบ ดูอี อีซาเรลัะ กอ ฌัม อาตึร นี.

14 อี มูห ดูอี ครึร อาเลวี, อาโมวแซ ยี ตู ดัว กาดาย อี แบน คาฆูน ดี เฆ. โคว, ปี หลู อี โดะ ดี เงา อี มูห ปี หลู ดี เฌาพรา อี มูห เฌาพรา ปี กรึบ เฆ ดูอี อีซาเรลัะ, ฌึร ตี แฮะ แบน คาฆูน ดี เฆ.

15 อาโมวแซ แฮะ ฮอต ดัว กาดาย ดี ครึร อารูเบน, แตห อึณ แบน คาฆูน ดี เฆ อึณโฮม เหมา อึณโฮม อัน.

16 กาดาย เฆ ตี บอ จูห ดี มืง อารอ อี กอย ดี โคบ ดีลัยะ อารานูน บอ มืง อี กอย แคง กาแต ดีลัยะ ตี, บอ ฆลัง แดง นอน อี กอย โคบ มืง เมเดพา ตึอน. 17 อึณ กอ ฌัม ดี มืง เฮซาโพน, บอ มืง อี กอย ดี ฆลัง แดง นอน อี บา บอ มืง ดีโพน, มืง บามูดบาลัะ, มืง เบดบาลัะมอง. 18 บอ มืง ยาฮาด, มืง เกดามูด, มืง เมพาด, 19 มืง กีรียาซีม, มืง ซีบามา, มืง เฌรีด บอ มืง ซาฮา อี กอย แดง นอน กาแต ดีลัยะ 20 บอ มืง เบดเบอูรา บอ บันดาบ นอน ปีซากา, บอ มืง เบดเยซีมูด. 21 กาดาย เฆ ตี ลึบ ฮาว บอ แคง มืง อี กอย แคง ฆลัง ปี อึบ คูนดีคัม อาซีโฮน อี มูห ดูอี อาโมวรีด อี อึบ แคง มืง เฮซาโพน ตึอน. อาโมวแซ แฮะ กาโฆห, แฮะ แป อัน บอ เฆ ดา กาณา อี อึบ มืง มีดีอาน. ดา กาณา เฆ ตี, เฆ จืร อาเอวี, อาเรเคม, อาฌูรา, อาฮูรา บอ อาเรพา. ดา กาณา เฆ ตี, เฆ บอ มูห ฆอน คูนดีคัม อี ดาม คูนดีคัม อาซีโฮน อี กอย แคง กาดาย มืง เฆ ตี. 22 แคง ดูอี แปะ แฮะ ง็อห ยัม เฆ ดูอี อีซาเรลัะ ดอ ลาย กาโฆห เฆ, เฆ ง็อห ยัม บอ อาบาลาอัม อี มูห ฆอน อาปอซอ. โคว, อัน แมน เบดาง. 23 อึม แบลง ยอดาน ตึอน บอ แบน กาอูน กาดาย ครึร อารูเบน อี กอย บลาก นา เฆต ซีแง. อาตี แฮะ แบน เรา แบน มืง เฆ ดูอี ครึร อารูเบน, แฮะ แบน คาฆูน ดี เฆ อึณโฮม เหมา อึณโฮม อัน.

24 อาโมวแซ แฮะ ฮอต ดัว กาดาย ดี ครึร อาฆัด, แตห อึณ แบน คาฆูน ดี เฆ อึณโฮม เหมา อึณโฮม อัน.

25 กาดาย ตี, อึณ บอ จูห ดี มืง ยาเฌรา บอ บา มืง ฆีเลอาด บอ มืง, บอ มืง ดูอี อัมโมน กอ วี ฮาว ฌัม ดี มืง อารอ อี กอย กาตัด มืง ราบา. 26 มืง เฆ ตี บอ บา มืง เฮซาโพน กอ วี ฮาว ฌัม ดี มืง รามาดมีฌาพา บอ มืง เบตอนีม, ปี วี จูห ดี มืง มาฮานาอีม กอ วี ฮาว ฌัม ดี กาดาย มืง เดบีรา. 27 อึณ บอ บา มืง อี กอย แคง ดีลัยะ อี มูห มืง เบดฮารัม, มืง เบดนีมารา, มืง ซูโคด, มืง จาโพน บอ มืง อี ซี ฆีด แคง กาดาย มืง คูนดีคัม อาซีโฮน อี อึบ มืง เฮซาโพน ตึอน. กาอูน กาดาย มืง เฆ ตี บลาก นา เลห ซีแง, อึณ บอ โดบ อึม แบลง ยอดาน กอ วี ฌัม ดี อึม ดึง ฆาลีเล. ^a 28 อาตี แฮะ แบน เรา แบน มืง ดูอี ครึร อาฆัด, แฮะ แบน คาฆูน ดี เฆ อึณโฮม เหมา อึณโฮม อัน.

29 อาโมวแซ แฮะ ฮอต ดัว กาดาย ดี ครึร อามานาเซ อาดา อู กาแต, แตห อึณ แบน คาฆูน ดี เฆ อึณโฮม เหมา อึณโฮม อัน.

30 กาดาย เฆ ตี บอ บา มืง มาฮานาอีม บอ มืง บาซัน บอ มืง อี มูห มืง ปี อึบ คูนดีคัม อาออคัะ แคง กาดาย มืง บาซัน ตึอน บอกาเฆลียด. อึณ บอ บา บอ โดง กอย เฆ ดูอี อายาอีรา อี กอย แคง กาดาย มืง บาซัน อาดา เดา ฆึร มืง. 31 อึณ บอ บา กาดาย มืง ฆีเลอาด อู กาแต, บอ มืง อาซาตารูด, บอ มืง เอตารี อี มูห มืง ปี อึบ คูนดีคัม อาออคัะ อี กอย แคง กาดาย มืง บาซัน ตึอน. กาดาย มืง เฆ ตี บอกาเฆลียด, อาโมวแซ แฮะ อาบ ดัว ดี อามาคีรา อี มูห ฆอน อามานาเซ, แตห อัน กาซาง ดี อึณโฮม ฆอน อัน อาดา อู กาแต ตึอน.

32 กาดาย มืง เฆ ตี, อาโมวแซ แฮะ กาซาง ดอ กอย เฆ แคง ฆลัง มืง โมวอาบ อี กอย บลาก นา ตัะ อึม แบลง ยอดาน อี วี ลาย กาซืร ดี มืง เยรีโคว บลาก นา เลห ซีแง. 33 อี มูห ครึร ดูอี อาเลวี, อาโมวแซ ยี ตู กาซาง กาดาย ดี เฆ คอ อี แจก. เฌาพรา ปี กรึบ เฆ ดูอี อีซาเรลัะ, อัน แบน คาฆูน เฆ, แตห อึณ โดบ ปี ดึอม กาลาง อัน ดี เฆ.