1 อานี อึณ มูห ฌาราง เฆ คูนดีคัม อี อึบ กาดาย มืง แปะ แฮะ กาโฆห แฮะ ปึอน เฆ ดูอี อีซาเรลัะ. อึณ มูห กาดาย มืง อี กอย นา เลห ซีแง อึม แบลง ยอดาน. อึณ บอ จูห ดี ดีลัยะ แบลง อารานูน, วี โฮะ ฌัม ดี นอน เฮราโมน. อึณ บอ บา แปร กาฮ็อห อี จืร อาราพัะ นา เลห ซีแง. เฆ แฮะ กาโฆห, แฮะ แป คูนดีคัม อา กาดัง.

2 อึณ บอ มูห คูนดีคัม อาซีโฮน อี มูห ดูอี อาโมยว อาโมวรีด. อัน บอ อึบ มืง เฮซาโพน บอ มืง อารอ อี กอย ดี กาโตะ ดีลัยะ อารานูน. กาดาย อัน บอ จูห ดี ดีลัยะ ตี บอ กาแต, กอ วี ฌัม ดี แบลง อึม ยาโบก อี มูห กาอูน กาดาย มืง ดูอี อัมโมน. มาน มืง ปี อึบ อัน, อึณ บอ บา บอ มืง ฆีเลอาด อู กาแต. 3 อัน อึบ บอ ดีลัยะ อาราพัะ จูห ดี อึม ดึง ฆาลีเล,^a วี ฮาว บลาก นา เตต กอ ฌัม อึม ดึง ซัยะ ซ็อง, ปี วี ฮาว ดี มืง บีเยซีมาด กอ ฌัม ดี นอน ปีซากา อี กอย บลาก นา เตต.

4 เฆ แฮะ แป บอ คูนดีคัม อาออคัะ อี อึบ มืง บาซัน. คูนดีคัม ตี บอ มูห วี กาแดะ ซืด แคง ดูอี ราพาด. อัน บอ กอย แคง มืง อาซาตารูด บอ มืง เอตารี. 5 มาน มืง ปี อึบ อัน, อึณ บอ บา บอ นอน เฮราโมน, บอ มืง ซาลากา, มืง บาซัน บอ มืง เฮา กอ วี ฌัม ดี กาอูน กาดาย ดูอี เฆซูรา บอ ดูอี อามาคา. อึณ บอ ลึบ ฮาว บอ แคง มืง ฆีเลอาด อู กาแต, กอ วี ฌัม ดี มืง คูนดีคัม อาซีโฮน อี อึบ มืง เฮซาโพน ตึอน.

6 อาโมวแซ บอ เฆ ดูอี อีซาเรลัะ แฮะ กาโฆห แฮะ ออง คูนดีคัม ฆาย อา กาดัง ตี. อาโมวแซ อี มูห แดเจณ เฌาพรา แฮะ ดึห มืง เฆ ตี, วี ดัว ดี ครึร อารูเบน, ครึร อาฆัด บอ ครึร อามานาเซ อู กาแต, แตห ดูอี เฆ ตี บึง.

7 อาโยวซูอา บอ เฆ ดูอี อีซาเรลัะ แฮะ กาโฆห แฮะ แป โตต แคะ กอย เฆ คูนดีคัม อี อึบ มาน มืง บลาก นา เฆต ซีแง อึม แบลง ยอดาน. อึณ บอ จูห ดี มืง บาลัะกาด, โดบ ดีลัยะ ฆลัง เลบานูน, กอ วี ฮาว ฌัม ดี นอน ฮาลัก อี กอย บลาก นา เตต, อี วี กาตัด ดี มืง เซอี.^b อาโยวซูอา แฮะ ดึห มาน มืง เฆ ตี, วี กาซาง ดัว ดี ครึร เฆ ดูอี อีซาเรลัะ, แตห อึณ แบน คาฆูน อาราง เฆ เซเซ. 8 มืง เฆ ตี, อึณ บอ มูห มืง อี กอย ดี นอน บอ อี กอย แคง ฆลัง บอ แคง ดีลัยะ อาราพัะ บอ แคง มืง ดี บันดาบ นอน, อี กอย แคง แปร กาฮ็อห บอ โลง บลาก นา เตต ตึอน. อึณ บอ มูห โดง กอย ดูอี เฮทีด, ดูอี อาโมวรีด, ดูอี กานัณ, ดูอี เพเรซีด ดูอี ฮีวีด บอ ดูอี เยบูซีด.

9 คูนดีคัม แปะ แฮะ กาโฆห แป เฆ ดูอี อีซาเรลัะ, อึณ บอ มูห คูนดีคัม มืง เยรีโคว, คูนดีคัม มืง อายี อี กอย โคบ มืง เบดาเอน.

10 อึณ มูห บอ คูนดีคัม อี อึบ มืง เยรูซาแลม, คูนดีคัม อี อึบ มืง เฮโบรว,

11 คูนดีคัม อี อึบ มืง ยาโมด, คูนดีคัม อี อึบ มืง ลาคีด,

12 คูนดีคัม อี อึบ มืง เอกาลอน, คูนดีคัม อี อึบ มืง เกจา,

13 คูนดีคัม อี อึบ มืง เดบีรา, คูนดีคัม อี อึบ มืง เบดกาเด,

14 คูนดีคัม อี อึบ มืง ฮอมัะ, คูนดีคัม อี อึบ มืง อาราด,

15 คูนดีคัม อี อึบ มืง ลีปานา, คูนดีคัม อี อึบ มืง อาตูลัม,

16 คูนดีคัม อี อึบ มืง มีกาตา, คูนดีคัม อี อึบ มืง เบดาเอน,

17 คูนดีคัม อี อึบ มืง ทาโบว, คูนดีคัม อี อึบ มืง เฮพา,

18 คูนดีคัม อี อึบ มืง เอแพก, คูนดีคัม อี อึบ มืง ลาจารูน,

19 คูนดีคัม อี อึบ มืง มาโดน, คูนดีคัม อี อึบ มืง ฮาจอ,

20 คูนดีคัม อี อึบ มืง อาซีมารูน, คูนดีคัม อี อึบ มืง อาคาซาบ,

21 คูนดีคัม อี อึบ มืง ทานัก, คูนดีคัม อี อึบ มืง มีกีตอ,

22 คูนดีคัม อี อึบ มืง เกเดซัะ, คูนดีคัม อี อึบ มืง ยอกานัม อี กอย ดี นอน ฆาเมลัะ,

23 คูนดีคัม อี อึบ มืง อาดอรา อี กอย โดง จา อี จืร นาโพดดอรา, คูนดีคัม อี อึบ มืง โฆวยีม อี กอย มืง ฆีลัะฆา

24 บอ คูนดีคัม อี อึบ มืง ดีราจา. คูนดีคัม เฆ ตี บอกาเฆลียด, เฆ กอย โอย ฆึร ดี อู กาดัง.