1 คูนดีคัม อายาพีน อี อึบ มืง ฮาจอ บอ ยึร ลอง เฆ ดูอี อีซาเรลัะ แฮะ กาโฆห, แฮะ ออง แบน โปละ แบน โปละ, อัน บอ จัร ดูอี ฮาว กาลาง ดี คูนดีคัม อาโยวบาบ อี อึบ มืง มาโดน บอ ดี คูนดีคัม อี อึบ มืง อาซีมารูน บอ คูนดีคัม แคง มืง อาคาซาบ. 2 อัน จัร เฆ กาลาง บอ ดี คูนดีคัม บลาก นา กัว บอกาเฆลียด, บอ อี กอย ดี นอน, อี กอย แคง แปร กาฮ็อห อี จืร อาราพัะ อี กอย บลาก นา เตต อึม ดึง ฆาลีเล,^a บอ อี กอย แคง ฆลัง บอ นา เตต ฆลัง บอ แดง นอน อี กอย บลาก นา เฆต ซีแง อี กาตัด มืง นาโพดดอรา, 3 บอ ดี คูนดีคัม มืง กานัณ อี กอย อา บลาก อึม แบลง ยอดาน, บอ มูห ดูอี อาโมยว อาโมวรีด, ดูอี เฮทีด, ดูอี เพเรซีด บอ ดูอี เยบูซีด อี กอย ดี มืง แดง นอน, ดูอี ฮีวีด อี กอย ดี ดัง นอน เฮราโมน บอ ดูอี แคง มืง มีฌาพา, อัน กาลาง ดี เฆ บอกาเฆลียด ลอง ดูอี อีซาเรลัะ เฆ ตี. 4 ดูอี เฆ ตี มืร แฮะ แรน ดา ซึก เฆ, แตห อึณ กืน กืน, แตห อึณ กอ ปี กาฮาต โคบ อึม นัมมูกซารา. เฆ บอ มึห บอ มังปร็อง บอ ลักเลา. 5 คูนดีคัม เฆ ตี แฮะ ตัห ลาย กาฌูะ แคะ มึห เฆ โปลม. เฆ บอ ตัห คยัะ ดับ เฆ, แตห เฆ แบน อู พึง, กอย โคบ อึม ดึง แมรัม, บัร ดี กาโฆห ดี ดูอี อีซาเรลัะ.

6 เฌาพรา วี กาลาง ดี อาโยวซูอา ต็อห, “อาว โลว โยว เฆ. โคว, แคหณา อาคราว นี โอว ดี อาบ เฆ ดี เบ, แตห เฆ ยัม โตต บอกาเฆลียด ดี อาต เบ ดูอี อีซาเรลัะ. แม โลว แดบ กาดัด ซีนัะ ดีแฆะ มังปร็อง เฆ, โดะ กาซึม บอ ลักเลา เฆ.”

7 ปาย ตี อาโยวซูอา บอ เฆ ดา ซึก อัน บอ ฮาว อู เฌณ. เฆ บอ ตัห กาปลูห บอ กาโฆห อู เฌณ โคบ อึม ดึง แมรัม ตี. 8 เฌาพรา บอ แตห ดูอี อีซาเรลัะ แป เฆ. ดูอี อีซาเรลัะ แฮะ กาโฆห ดี เฆ บอ คูงครัห เฆ กอ ฌัม โต็ง กาเซา. เฆ กอ วี ฌัม ดี มืง ตาง อี จืร มืง ซีโดน บอ มืง มีซาราพอซามีน. เฆ กอ วี ฌัม บอ แคง ดีลัยะ มีฌาพา อี กอย นา เลห ซีแง ตึอน. เฆ มืร แฮะ ง็อห ยัม โตต รันซู เฆ. อู วี มืร อาว ฮู มึห. 9 อาโยวซูอา มืร โบง ดี เฆ, แตห อึณ โดบ ปี กาลาง อูน เฌาพรา. อัน มืร แดบ กาดัด ซีนัะ ดีแฆะ มังปร็อง เฆ, โดะ กาซึม บอ ลักเลา เฆ.

10 ดอ อัน ตี อาโยวซูอา บอ วี ตัห กาโฆห ดึห มืง ฮาจอ, ง็อห ยัม บอ คูนดีคัม เฆ. อาคราว ดอ อัน ตี มืง ฮาจอ มึห อาพูง ตาง หลึอม มาน มืง บอกาเฆลียด. 11 เฆ แฮะ ฮอต ง็อห แวน โตต ดูอี แคง มืง ตี, ตู แตห เฆ ลอด คอ อู วี. อัน บอ โดะ แวน บอ มืง ฮาจอ ตี.

12 อาโยวซูอา มืร แฮะ กาโฆห แฮะ ปึอน มืง ดี ตาง เฆ ตี บอกาเฆลียด. อัน แฮะ ปึอน บอ คูนดีคัม เฆ, แฮะ ง็อห ยัม ดอน อี, แตห อึณ บอ โดบ ปี กาลาง อูน อาโมวแซ อี มูห แดเจณ เฌาพรา ตึอน. 13 มาแล, แดง มืง ฮาจอ ตี, มืง อี กอย แดง นอน เฆ ตึอน, เฆ ดูอี อีซาเรลัะ ตู โดะ, แตห อึณ กาซึม. อาโยวซูอา โดะ กาซึม มี อู มืง ตี. 14 โกรวกราม อี มึห ดี ง็อห ดี คัน บอ โดว ซัดดาวา แคง มืง ตึอน, เฆ ดูอี อีซาเรลัะ แฮะ ดึห โตต ดี เฆ. อี มูห ดูอี, เฆ บอ ง็อห ยัม โตต ดอน อี, อู วี มืร อาว ลอด. 15 เฌาพรา แฮะ กาลาง ดี อาโมวแซ ปาย ตี. อาโมวแซ ปี วี กาลาง ดี อาโยวซูอา. อาโยวซูอา วี โบง โดบ ดอน แด, แตห อึณ ปี ปี กาลาง เฌาพรา ดี อาโมวแซ, ตู แตห อึณ บลืง คอ อู โมยว.

16 ปาย ตี อาโยวซูอา แฮะ กาโฆห, แฮะ ฮอต ปึอน มืง เฆ ตึอน บอกาเฆลียด. อึณ บอ มูห มืง อี กอย แดง นอน บอ มืง อี กอย นา เตต นา กัว, บอ กาดาย มืง โฆวเซน บอกาเฆลียด, บอ แคง ฆลัง นา เตต, บอ ฆลัง อาราพัะ, บอ นอน อีซาเรลัะ บอ แคง ฆลัง, อัน แฮะ ปึอน โตต. 17 กาดาย ปี ปึอน อัน, อึณ บอ แบร ฮาว จูห ดี นอน ฮาลัก อี กอย บลาก อี โฮะ ดี นอน เซอี.^b อึณ กอ วี ฌัม ดี มืง บาลัะกาด อี กอย ดี ดีลัยะ เลบานูน, บอ นา เตต นอน เฮราโมน. คูนดีคัม แคง มืง เฆ ตี อาโยวซูอา แฮะ แป โตต, แฮะ ง็อห ยัม โตต เฆ ดอน อี. 18 อัน มืร แฮะ ลาย กาโฆห ดี คูนดีคัม กืน เฆ ตี, กอ เหลณ กาเซา. 19 อึณ มึห มี ดูอี ฮีวีด อี กอย มืง กีปอง, อี แฮะ ลาย แบน ฆึก ดี เฆ ดูอี อีซาเรลัะ, ปี ตู กาโฆห อัน. มืง เฮา อัน แฮะ ฮอต กาโฆห ปึอน โตต. 20 โคว, อึณ มูห เฌาพรา อี โบง แตห น็อห เฆ ดืร กาเซา, แตห เฆ กาโฆห ดี ดูอี อีซาเรลัะ, แตห อัน เฌา ปึอน ดี ปยาต แวน โตต เฆ บอกาเฆลียด. อัน มืร ตู มึห น็อห กาเว เฆ, แตห อัน ง็อห ยัม โตต เฆ, แตห อึณ บอ โดบ ปี กาลาง อูน เฌาพรา ดี อาโมวแซ ตึอน.

21 ดอ อัน ตี อาโยวซูอา บอ แยต เฆ ดา ซึก อัน, ฮาว ปยาต มืง เฆ ดูอี อานาคีม อี มูห ดูอี โดว โต็ง โดว ตาง. อึณ บอ มูห ดูอี อาโมยว อี กอย แดง นอน, แคง มืง เฮโบรว, มืง เดบีรา, มืง อานาบ บอ แดง นอน กาดาย มืง ยูดา บอ กาดาย นอน มืง อีซาเรลัะ. 22 แคง มืง บอ มืง อาว ฮู มึห ดูอี อานาคีม ตี. อี ซี ฆีด อี จี อี แจก, เฆ ซี กอย แคง มืง ฆาซา, มืง ฆาทัะ บอ มืง อาจูด. แดง ตี, อาว ฮู มึห คอ อู วี แคง มืง ดูอี อีซาเรลัะ. 23 ปาย ตี อาโยวซูอา มืร แฮะ ปึอน ดอน มืง ดอน โปละ. อึณ แฮะ โดบ ปี กาลาง อูน เฌาพรา ดี อาโมวแซ ตึอน. อาโยวซูอา บอ กาซาง มืง เฆ ตี ดี ดูอี อีซาเรลัะ, แตห อึณ แบน คาฆูน ดี เฆ, ครึร เหมา ครึร อัน. วาย อัน ตี, เฆ แฮะ ปึอน ดีเหลา, อาว ฮู โลว กาโฆห.