1 อาตอนีเฌดีก อี มูห คูนดีคัม แคง มืง เยรูซาแลม, อัน แฮะ ยึร ลอง อาโยวซูอา แฮะ กาโฆห, แฮะ ปึอน มืง อายี, แฮะ ปยาต แวน บอกาเฆลียด. บอ มืง บอ คูนดีคัม แคง มืง ตี, อัน แฮะ โบง ปี ปี โบง อัน ดี มืง เยรีโคว บอ ดี คูนดีคัม แคง มืง ตี. อัน แฮะ ยึร บอ ลอง เฆ ดูอี แคง มืง กีปอง แฮะ ลาย แบน อู ฆึก ดี ดูอี อีซาเรลัะ, แฮะ วี กอย รึม โดบ เฆ. 2 ดอ อัน ตี คูนดีคัม บอ เฆ ดูอี แคง มืง เยรูซาแลม บอ กาปึณ บอ โยว กาเซา. โคว, มืง กีปอง ตี บอ มูห มืง ตาง ปี ดอน มืง อี มึห คูนดีคัม. อึณ บอ ตาง หลึอม มืง อายี. ดา ซึก แคง มืง ตี มืร มูห โตต ดูอี กยัะ. 3 ปาย ตี อาตอนีเฌดีก อี อึบ มืง เยรูซาแลม บอ จัร อี ฮาว กาลาง ดี คูนดีคัม อาฮอรัม อี อึบ มืง เฮโบรว, คูนดีคัม อาบีรัม อี อึบ มืง ยาโมด, คูนดีคัม อายาพา อี อึบ มืง ลาคีด บอ ดี คูนดีคัม อาเดบีรา อี อึบ มืง เอกาลอน. 4 อัน ต็อห ดี เฆ, “แตห เบ ตัห จอย โอว กาโฆห ดี ดูอี มืง กีปอง. ดูอี เฆ ตี แฮะ ฮอต วี แบน อู ฆึก, วี กาล็อะ ดี อาโยวซูอา บอ ดี เฆ ดูอี อีซาเรลัะ.”

5 ปาย ตี เฆ คูนดีคัม ดูอี อาโมวรีด พัน กาดัง ตี บอ ลาย โพรม ดี ฮาว กาโฆห, ฮาว ตึก มืง กีปอง ตี. อึณ บอ มูห คูนดีคัม มืง เยรูซาแลม, คูนดีคัม มืง เฮโบรว, คูนดีคัม มืง ยาโมด, คูนดีคัม มืง ลาคีด, คูนดีคัม มืง เอกาลอน.

6 เฆ ดูอี กีปอง ตึอน มืร วี ตึย ดูอี เฆ, ฮาว กาลาง ดี อาโยวซูอา อี กอย ดี ดับ แคง มืง ฆีลัะฆา ตึอน ต็อห, “เย หมาณ, แกวะ แตห แม เบลห แวน เย, แตห แม ตัห จอย เย ครัน ครัน ดอ ตี นี, แตห อึณ คยอด เย. เฆ คูนดีคัม อาโมยว อาโมวรีด อี กอย มืง ดี นอน แฮะ ลาย โพรม ดี ตัห กาโฆห ดี เย.”

7 ปาย ตี อาโยวซูอา บอ เฆ ดา ซึก อัน บอกาเฆลียด บอ ดา ซึก อี กยัะ กาเซา ดี กาโฆห, เฆ บอ เลห ดี มืง ฆีลัะฆา ตึอน. 8 เฌาพรา วี กาลาง ดี อาโยวซูอา ต็อห, “อาว โลว โยว เฆ. โอว ดี แตห แม แป เฆ, อาว มึห อาเซ อี ดี ปึอน คัม แม.”

9 อาโยวซูอา เฆ ดา ซึก อัน บอ เลห ดี มืง ฆีลัะฆา แคง หมึร, วี โฮะ ดี มืง กีปอง บอ กาโฆห ดี ดูอี อาโมวรีด เฆ ตึอน อู เฌณ. 10 เฌาพรา บอ แตห เฆ ดูอี อาโมวรีด กาฟัร กาเฟียน บอ ชึม ดี ดูอี อีซาเรลัะ. เฆ ดูอี อีซาเรลัะ บอ ง็อห ยัม เฆ กืน โคบ มืง กีปอง ตี บอ วี คูงครัห ฮาว เฆ โดบ อึณเตณ อี โลง ดี มืง เบดโฮวรูน, บอ กาโฆห ดี เฆ กอ ฌัม ดี มืง อาเจกา บอ มืง มีกาตา. 11 ดอ กาแบลบ เตา เฆ ดูอี อาโมวรีด ดี ดูอี อีซาเรลัะ, ฮาว โดบ อึณเตณ อี เลห แคง มืง เบดโฮวรูน, ฌัม มืง อาเจกา, เฌาพรา บอ เบลห โลง เบรีย ตาง โจห แดง เฆ, แตห เฆ กืน ยัม ดี ตี. ดูอี เฆ อี ยัม โดบ อึณเตณ ตี, อึณ บอ กืน หลึอม อี ยัม ดี มาปัวะ ลาง เฆ ดูอี อีซาเรลัะ.

12 ดอ แตห เฌาพรา เฆ ดูอี อีซาเรลัะ แป ดูอี อาโมวรีด ตี, อาโยวซูอา วี ซาคึร บอ กาลาง ดี อาต เฆ ดูอี อีซาเรลัะ ต็อห, “อึย ซีแง, แตห แม จ็อง ฆืด กาโรย มืง กีปอง. อึย มาเฆียน, แตห แม จ็อง ฆืด กาโรย ดีลัยะ อาจาลูน.”

13 ปาย ตี ซีแง บอ ฆืด อู เฌณ. มาเฆียน มืร ฆืด, แตห อึณ กอ ฌัม ปัน ดี ฮอต เฆ กาโฆห ออง รันซู เฆ. ลอง อัน ตี, อึณ แฮะ แดม อูน แคง บับ อายาซา. ซีแง บอ ฆืด จ็อง แคง ฆางหราว, อาว ฮู กาเตา ดี เฆต, อึณ กอ ซี โนะ อู ซีแง. 14 อาต อัน ตี อาว ดึอม แบน ปาย ตี คอ อู ซีแง. วาย อัน ตี มืร อาว ฮู มึห ปาย ตี ปอ อึณ ปัว. เฌาพรา แฮะ โทม โฆรห ดูอี. โคว, อัน แฮะ กอย รึม โดบ เฆ ดูอี อีซาเรลัะ, กาโฆห ดี รันซู เฆ.

15 วาย อัน ตี อาโยวซูอา บอ เฆ ดา ซึก อัน บอ วี เวณ โดง กอย เฆ ดี มืง ฆีลัะฆา ตึอน.

16 เฆ คูนดีคัม พัน กาดัง ตึอน, เฆ บอ ลอด ยัม. เฆ แฮะ เตา ฮาว เครียง เฆ แคง กาเดา มาว อี กอย ดี โดง จืร มีกาตา. 17 อี เฮา แฮะ วี ยึร เฆ กอย แคง กาเดา มาว ดี มีกาตา, เฆ วี เวณ กาลาง ดี อาโยวซูอา ลอง อัน ตี. 18 อาโยวซูอา วี ต็อห ดี เฆ, “แตห เบ ดึห มาว ตาง กาบีด กาเดา มาว ตี, วี จัร ดูอี มัง อี บัร. 19 อี มูห เบ, แกวะ กอย ดี ตี, แตห เบ คูงครัห โดบ ฮาว รันซู เบ, วี กาโฆห โดบ ดี ปัน เฆ, แกวะ แตห เฆ วี ปึอน ดี ตัห ลึบ แคง มืง เฆ. โคว, เฌาพรา แฮะ แตห เบ แป เฆ.”

20 อาโยวซูอา บอ เฆ ดูอี อีซาเรลัะ บอ ง็อห ยัม โตต เฆ บอกาเฆลียด. มัง อี เฆ บอ แฮะ รีน ดี เตา บอ ปึอน ดี เวณ ลึบ แคง มืง เฆ อี มึห แรง, แตห เฆ ลอด ยัม. 21 วาย ตี เฆ ดา ซึก อาโยวซูอา บอกาเฆลียด บอ วี ฮาว ฌัม โดง กอย อาโยวซูอา ดี ดับ มีกาตา ตึอน. รันซู เฆ ตี อาว มึห อาเซ อี ยัะ กาลาง กาบัห ดี ดูอี อีซาเรลัะ คอ อู วี.

22 วาย อัน ตี อาโยวซูอา วี ต็อห, “แตห เบ วึห กาเดา มาว ตึอน, วี ดึห ตัห คูนดีคัม เฆ พัน กาดัง ตี โดง กอย โอว นี.” 23 เฆ มืร โบง โดบ ปี ต็อห อัน ตี. เฆ บอ ฮาว ดึห เลห คูนดีคัม มืง เยรูซาแลม, คูนดีคัม มืง เฮโบรว, คูนดีคัม มืง ยาโมด, คูนดีคัม มืง ลาคีด บอ คูนดีคัม มืง เอกาลอน. 24 เฆ แฮะ ฮอต ตึย เฆ โดง กอย อาโยวซูอา, อาโยวซูอา มืร วี แดะ โตต แคะ กอย เฆ ดูอี อีซาเรลัะ บอกาเฆลียด, แตห เฆ ตัห โดง กอย อัน. อัน วี เบลห อามีง ดี เฆ ดา โบว อี อึบ ดา ซึก อี แฮะ ฮาว กาโฆห โดบ อัน ตึอน, แตห เฆ ดาง เปลา เฆ แดง โกม คูนดีคัม เฆ ตี. เฆ มืร โบง โดบ ปี ต็อห อัน ตี.

25 แฮะ ฮอต ปาย ตี อาโยวซูอา วี กาลาง ดี เฆ ดา โบว ตี ต็อห, “เบ แกวะ โยว, อาว โลว น็อห เตียะ. ปีโปลม น็อห เบ, แตห เบ มึห น็อห ยัะ. เฌาพรา แฮะ แตห เบ โบง ปาย ตี ดี รันซู ปี ดี กาโฆห เบ.” 26 วาย ตี อาโยวซูอา บอ ง็อห ยัม คูนดีคัม เฆ ตี, วี ปัก ฮอย เฆ ดี เฮ พัน กาดัง, แตห เฆ ฮอย ปาย ตี กอ ฌัม บา ดี อับ.

27 ซีแง บอ เฆต, อาโยวซูอา วี จัร เฆ, แตห เฆ ดึห โลง โดว ยัม เฆ, แตห เฆ วี ฮาว อูน แคง กาเดา มาว โดง เครียง เฆ ตึอน. เฆ บอ วี ดึห มาว ตาง, เบลห แตห อึณ ปึม บาง กาเดา มาว ตี. อึณ บอ ซี กอย กอ ฌัม อาตึร นี.

28 ซีแง ตี, อาโยวซูอา บอ กาโฆห บอ ปึอน มืง มีกาตา. อัน มืร ตู อูน แตห อึณ ฆีด คอ อู วี. อัน มืร โบง ดี คูนดีคัม มืง มีกาตา ตี, แตห อึณ ปี แปะ แฮะ โบง อัน ดี คูนดีคัม แคง มืง เยรีโคว ตึอน.

29 วาย อัน ตี อาโยวซูอา เฆ ดา ซึก อัน วี เลห ดี มืง มีกาตา ตี, วี ฮาว ดี มืง ลีปานา. เฆ บอ กาโฆห ปึอน มืง ตี. 30 เฌาพรา แฮะ แตห เฆ ดูอี อีซาเรลัะ ออง ดา ซึก แคง มืง ตี. บอ มืง บอ ดอน อี อี กอย แคง มืง ตี, เฆ บอ ปยาต บอ ง็อห ยัม โตต. ดี คูนดีคัม แคง มืง ตี เฆ โบง ปี แปะ แฮะ โบง เฆ ดี คูนดีคัม แคง มืง เยรีโคว ตึอน.

31 วาย ตี อาโยวซูอา บอ เฆ ดูอี อีซาเรลัะ บอกาเฆลียด บอ วี เลห ดี มืง ลีปานา ตี, วี ฮาว ดี มืง ลาคีด. เฆ บอ ฮาว แวง โรบ มืง ตี บอ กาโฆห บอ ปึอน มืง ตี. 32 เฌาพรา แฮะ อาบ มืง ลาคีด ดี เฆ ดูอี อีซาเรลัะ ดอ กาโฆห เฆ ซีแง ฮาอา. เฆ มืร โบง แตห อึณ ปี แปะ แฮะ โบง เฆ ดี มืง ลีปานา ตึอน. เฆ มืร ง็อห ยัม โตต ดูอี แคง มืง ตี, ตู แตห เฆ ลอด คอ อู วี. 33 ดอ อัน ตี คูนดีคัม อาเยโฮวรัม อี อึบ มืง เกจา บอ วี ตัห จอย บลาก ดูอี มืง ลาคีด เฆ ตี. อาโยวซูอา บอ กาโฆห บอ แป อัน บอ เฆ ดูอี อัน. อึณ กอ ฮู ฆีด คอ อู วี.

34 วาย ตี อาโยวซูอา บอ เฆ ดูอี อีซาเรลัะ วี เลห ดี มืง ลาคีด ตี, วี ฮาว ดี มืง เอกาลอน. เฆ บอ ฮาว แวง โรบ มืง ตี. เฆ บอ กาโฆห ปึอน มืง ตี. 35 ซีแง ตัห เฆ, เฆ บอ กาโฆห อู ซีแง ตี, แฮะ ฮอต ออง โตต. เฆ บอ ง็อห ยัม ดูอี แคง มืง ตี ดอน อี, แตห อึณ ปี ปี โบง เฆ ดี มืง ลาคีด ตึอน.

36 วาย อัน ตี อาโยวซูอา บอ เฆ ดูอี อีซาเรลัะ บอกาเฆลียด บอ เลห ดี มืง เอกาลอน, ปี วี โฮะ ดี มืง เฮโบรว, วี กาโฆห ปึอน บอ มืง ตี. 37 เฆ บอ ง็อห แวน คูนดีคัม มืง ตี บอ ดูอี อัน ดอน อี. เฆ บอ ง็อห แวน บอ ดูอี เรา ดูอี กาง อี กอย กาตัด มืง ตี. อาโยวซูอา บอ ปยาต แวน โตต. อัน บอ โบง แตห อึณ ปี ปี โบง เฆ ดี มืง เอกาลอน ตึอน, ตู แตห อึณ ลอด คอ อู วี.

38 แฮะ ฮอต, อาโยวซูอา บอ เฆ ดูอี อีซาเรลัะ บอกาเฆลียด ปี วี กาบัด ตัห ดี มืง เดบีรา, แตห เฆ ตึก มืง ตี. 39 เฆ บอ ปึอน มืง ตี, ปึอน บอ คูนดีคัม แคง มืง ตี บอ เรา กาง อี กอย กาตัด มืง ตี บอกาเฆลียด. เฆ บอ ง็อห แวน โตต ดูอี แคง มืง ตี ดอน อี, แกวะ แตห อึณ ซี ฆีด คอ อู วี. อาโยวซูอา บอ โบง ดี มืง เดบีรา บอ ดี คูนดีคัม แคง มืง ตี, แตห อึณ ปี แปะ แฮะ โบง อัน ดี มืง เฮโบรว บอ ดี มืง ลีปานา บอ ดี คูนดีคัม แคง มืง เฆ ตี.

40 อาโยวซูอา แฮะ ออง มืง เฆ ตี บอ มืง. อัน แฮะ แป บอ คูนดีคัม เฆ บอกาเฆลียด. อึณ บอ มูห มืง อี กอย ดี ดัง นอน, มืง อี กอย บลาก นา เตต, มืง อี กอย แคง ฆลัง บอ มืง อี กอย ดี นอน. อัน แฮะ ง็อห ยัม โตต ดูอี แคง มืง เฆ ตี ดอน อี. อัน ตู แตห อึณ มึห อี ลอด คอ อู วี. อัน โบง แตห อึณ โดบ ปี กาลาง อูน เฌาพรา ปี กรึบ ดูอี อีซาเรลัะ ตึอน. 41 มืง แปะ แฮะ กาโฆห แฮะ ออง อาโยวซูอา อึณ บอ จูห ดี มืง กาเดบานา, กอ วี ฌัม ดี มืง ฆาซา. อึณ บอ จูห บอ ดี กาดาย มืง โฆวเซน, กอ วี ฌัม ดี มืง กีปอง. 42 อาโยวซูอา แฮะ แป เฆ คูนดีคัม, แฮะ ปึอน บอ มืง เฆ ดอ กาโฆห เฆ อู เฌณ ตี. โคว, เฌาพรา ปี กรึบ เฆ ดูอี อีซาเรลัะ แฮะ กาโฆห ดาง เฆ.

43 วาย ตี, อาโยวซูอา เฆ ดา ซึก อัน บอ วี ตัห ดี ดับ เฆ อี กอย ดี มืง ฆีลัะฆา ตึอน.