1 ลอง เฆ ดูอี อีซาเรลัะ แฮะ กาโฆห แฮะ ออง ตึอน, อึณ บอ ลึห ฮาว ฌัม โดง กอย เฆ คูนดีคัม อี กอย นา เฆต ซีแง อึม แบลง ยอดาน ดอน โปละ. อึณ มูห คูนดีคัม อี กอย ดี นอน บอ แคง ฆลัง อี กอย โคบ อึม นัมมูกซารา กอ ฌัม ดี มืง เลบานูน บลาก นา กัว. คูนดีคัม เฆ ตี บอ มูห คูนดีคัม ดูอี เฮทีด, ดูอี อาโมวรีด, ดูอี กานัณ, ดูอี เพเรซีด ดูอี ฮีวีด บอ เฆ ดูอี เยบูซีด. 2 เฆ บอ วี ตัห กาฌูะ, วี กาโพรม ดี กาโฆห ดี อาโยวซูอา บอ เฆ ดูอี อีซาเรลัะ.

3 มาแล, เฆ ดูอี แคง มืง กีปอง อี มูห ดูอี ฮีวีด, เฆ แฮะ ยึร ปี โบง อาโยวซูอา ดี มืง เยรีโคว บอ ดี มืง อายี ตึอน. 4 เฆ บอ วี ปีหล็อก เฆ ดี อาโยวซูอา. เฆ บอ ดึห ปี ดี โฮม, ฮับ แคง ฮู บรีม, ฮู กาปยาต. เฆ บอ ดึห อึม มางูน, ฮับ แคง ฮู ฮูน อี แฮะ บรีม, แฮะ หลูห, แฮะ วี กาปาง. เฆ บอ วี ดาง แดง กอบ มาลา เฆ. 5 เฆ บอ ชึบ ดี ตา ครึง บรีม บอ คูดีณ อี แฮะ กาปยาต แฮะ วี กาปาง. ปี ดี โฮม เฆ มืร แฮะ กาฮ็อห แฮะ กาดีห. 6 เฆ บอ ฮาว โดง กอย อาโยวซูอา แคง ดับ โดง คยัะ เฆ ดี มืง ฆีลัะฆา ตึอน. เฆ บอ กาลาง ดี อาโยวซูอา บอ เฆ ดูอี อีซาเรลัะ ต็อห, “เย แฮะ ตัห มืง อี โต็ง กาเซา. เย ตัห หมาณ ดี ลาย กาแซณ, แตห เอ แบน อู ฆึก.”

7 เฆ ดูอี อีซาเรลัะ วี ต็อห ดี เฆ, “เหมา เย ดี ปาย ดี ลาย แบน อู ฆึก ดี เบ? โยว เบ กอย กาตัด เย, ตู กอย กาตัด เย, เย ตู นับ?”

8 เฆ มืร วี ต็อห ดี อาโยวซูอา, “เย หมาณ ดี แบน หมาย แม.” อาโยวซูอา วี ดีหมอด เฆ ต็อห, “เบ มูห อาเซ? เบ ตัห นา เหมา?”

9 เฆ วี กาลาง ดี อาโยวซูอา ต็อห, “เย แฮะ ตัห มืง อี โต็ง กาเซา. โคว, เย แฮะ ยึร ลอง เฌาพรา ปี กรึบ เบ บอ ลอง แปะ แฮะ โบง อัน เฌา ดอน โมยว แคง มืง แอฆึบ ตึอน. 10 เย แฮะ ยึร บอ ลอง แปะ แฮะ โบง อัน เฌา ดี คูนดีคัม ดูอี อาโมวรีด อา กาดัง อี แฮะ กอย นา เลห ซีแง อึม แบลง ยอดาน. อึณ มูห คูนดีคัม อาซีโฮน อี อึบ มืง เฮซาโพน บอ คูนดีคัม อาออคัะ อี อึบ มืง บาซัน อี กอย แคง กาดาย มืง อาซาตารูด ตึอน. 11 โกบ อึณ ปาย ตี เฆ ดา ตาง อี อึบ อี แยต เย บอ เฆ ดูอี เรา ดูอี กาง แคง มืง เย บอกาเฆลียด, เฆ วี กาลาง ดี เย ต็อห, ‘แตห เบ ดึห ดี โฆ็ง ปี ดี โฮม, แตห อึณ แบน จารีะ จาคัะ เบ. ฮาว แตห เบ กอ กาตูณ เฆ บอ ต็อห, “เย อี มูห หมาย เบ หมาณ ดี ลาย กาแซณ ลาย แบน อู ฆึก ดี เบ.” 12 แตห เบ ยอด, คามูน เย มืร. ดอ เลห ฮาว เย ตัะ กาง, ต็อห ดี ฮาว โดง กอย เบ, อึณ ซี ซีอูณ ซีดาะ. ดอ ตี นี แฮะ ฮอต วี กาฮ็อห วี กาดีห. 13 ฮู ฮูน ปี ฮับ เย อึม มางูน นี มืร ซี กามาย. ยอด, ดอ ตี นี แฮะ ฮอต วี กายาต กาปยาต โตต. ครึง ปี ตา เย บอ คูดีณ ปี ชึบ เย มืร แฮะ ฮอต บรีม, แฮะ ฮอต วี กายาต โตต. โคว, อาคราว อึณเตณ เย แฮะ โต็ง กาเซา.’”

14 ดูอี อีซาเรลัะ มืร ตู ดีหมอด เฌาพรา. เฆ บอ เทว ดี จีม ปี ดี โฮม ดูอี เฆ ตี. 15 อาโยวซูอา มืร แฮะ ลาย กาแซณ ดี เฆ, ตู กาโฆห ตู ง็อห ยัม เฆ. อัน บอ ควาง แตห เฆ กอย ดาคึย, กอย ฆัด เฆียด. เฆ ดา ตาง แคง พึง ดูอี อีซาเรลัะ มืร โพรม โดบ บอ ลาย ดืง ดี เฆ.

16 วาย แฮะ ฮอต ลาย กาแซณ เฆ อาดา โอย ซีแง, เฆ ดูอี อีซาเรลัะ บอ วี นับ, ดูอี เฆ ตี มูห ดูอี มืง กีปอง อี กอย เครียะ, กอย กาตัด เฆ. 17 ปาย ตี เฆ ดูอี อีซาเรลัะ บอ วี แรน ซึก, วี โฮะ ฌัม ดี มืง โดง กอย เฆ. มืง โดง กอย เฆ ตี, อึณ บอ มูห มืง กีปอง, มืง เคพีรา, มืง เบรอซี บอ มืง กีรียาดยารีม. 18 มาแล, เฆ ดูอี อีซาเรลัะ อาว ฮู กาโฆห ดี เฆ. โคว, เฆ ดา ตาง แฮะ ฮอต ลาย ดืง ลาย กาแซณ ดี แบน อู ฆึก ดี เฆ บอ แฮะ แตห เฌาพรา ปี กรึบ ดูอี อีซาเรลัะ โทม ลอง อัน ตี. เฆ ดูอี กืน ยี วี เอห วี ปึณ ดี เฆ ดา ตาง ตี.

19 ดา ตาง เฆ ตี ยี วี ต็อห, “เย แฮะ ฮอต ดัว กาดีก ซัดฌา ดี เฆ. เย มืร แฮะ ดืง, แฮะ แตห บอ เฌาพรา ปี กรึบ เอ ดูอี อีซาเรลัะ โทม ลอง อัน ตี. เอ อาว ฮู ปึอน บลัต, อาว ฮู ปึอน ปยาต เฆ. 20 เย ดี โบง ดี เฆ ปาย นี. เย โลว เบลห แตห เฆ กอย ดาคึย, กอย ฆัด เฆียด โกบ แฮะ ดัว เย กาดีก ซัดฌา ตี. เซ เย โบง แตห กาดีก ซัดฌา เย ลึร, โยว เฌาพรา ดี วี ดัม หมาบ ดี เย. 21 แตห บอ เบ เบลห, แตห เฆ กอย ดาคึย กอย ฆยามซา. มาแล, เฆ โลว เกด เฮ บอ ต็อะ อึม ดัว ดี เอ ดอน อี.” เฆ ดา ตาง แฮะ ดัว กาดีก ซัดฌา ปาย ตี เฆ มืร โบง โดบ ปาย ตี.

22 วาย อัน ตี, อาโยวซูอา วี แดะ ตัห ดูอี กีปอง, ต็อห ดี เฆ, “เหมา อึณ ปาย ปี กาโลว เบ ดี เย ต็อห, เบ แฮะ ตัห โต็ง กาเซา? เบ ยี มูห ดูอี อี กอย เครียะ, กอย กาตัด เย. 23 โกบ โบง เบ ปาย ตี เฌาพรา แฮะ ดืง เบ. ดูอี เบ บอกาเฆลียด โลว แบน หมาย อี เกด เฮ, อี ต็อะ อึม ดัว ดี ดูอี แคง กาง โดง กรึบ โอว เฌาพรา.”

24 เฆ มืร วี เวียะ โฆรห อาโยวซูอา ต็อห, “เย แฮะ นับ ลอง เฌาพรา อี มูห เฌาพรา ปี กรึบ เบ. อัน แฮะ ดึอม กาลาง อูน ดี แดเจณ อัน อี มูห อาโมวแซ ตึอน. อัน แฮะ ต็อห, อัน ดี ดึห โตต มืง นี บอกาเฆลียด วี อาบ ดัว ดี เบ, แตห เบ ง็อห ยัม โตต ดูอี แคง มืง นี. โกบ แฮะ ฮอต ตัห เบ, เย แฮะ โยว กาเซา เบ. โคว, เย แฮะ โบง ปาย ตี. เย โยว อาซาก เย บอกาเฆลียด ดี บอ ชึม ดีโลย ดีลาย. 25 ดอ ตี นี เย มูห หมาย แม. แม แฮะ อึบ เย. ปี ทาง แม แฮะ บอด แฮะ หมึอม ดี เย, แตห แม โบง.”

26 อาโยวซูอา มืร โบง ปาย นี ดี เฆ บอ ฆ็อง แร เฆ, ตู แตห ดูอี อีซาเรลัะ ง็อห ยัม เฆ. 27 ซีแง ตี, อัน ซูงพยาด ดี เฆ, แตห เฆ คัม ดี แบน หมาย อี ต็อะ อึม, อี เกด เฮ ดัว ดี ดูอี อีซาเรลัะ อี มูห ดูอี เรา ดูอี กาง บอ ดี เฆ อี โบง ฆาน ดี กาโช็ง หลู ดี เฌาพรา. เฆ โลว โบง ฆาน ตี โดง ร็อห อูน เฌาพรา อาดา เฆ ดูอี อี กรึบ อัน แตห กอ ฌัม อาตึร นี.