1 เฌาพรา วี กาลาง ดี อาโยวซูอา ต็อห, “แกวะ โยว, แกวะ แตห แม มึห น็อห เตียะ. แตห แม แดะ ดูอี แม บอกาเฆลียด, แตห เบ วี โฮะ กาโฆห มืง อายี. โอว แฮะ แตห แม แป คูนดีคัม มืง อายี บอ ดูอี อัน บอ มืง อัน บอ กาดาย อัน. อึณ ดี แบน โตต โกรว แม. 2 แม โลว โบง ดี มืง อายี บอ ดี คูนดีคัม แคง มืง ตี, แตห อึณ ปี ปี โบง แม ดี มืง เยรีโคว บอ ดี คูนดีคัม อัน ตึอน. คา นี เบ แฮะ ปึอน ดึห โกรวกราม เฆ บอ โดว ซัดดาวา เฆ ดี เบ. แตห เบ แรน ดา ซึก เบ ฮาว บัร ดี ตึก นา ปัน มืง ตี.”

3 ปาย ตี อาโยวซูอา บอ เฆ ดา ซึก อัน บอ แรน โดว เฆ, แตห เฆ ตึก มืง อายี ตี. อาโยวซูอา บอ ร็อห ดูอี อี กยัะ หลึอม อี เฮา อาดา โอย หมึณ วี. อัน จัร เฆ ฮาว แคง หมึร ตี. 4 อัน ต็อห, “แตห เบ โทม ซีคยา. เบ โลว ฮาว บัร นา ดอย มืง, แกวะ แตห เบ บอ กอย โต็ง กาเซา. แตห เบ ดัน กาโฆห ดอน อี. 5 บอ โอว บอ เฆ ดูอี อี โดบ โอว, เย ดี วี ฮาว ณืร มืง ตี. เซ เฆ ดูอี แคง มืง อายี ฮี เลห ตัห กาโฆห ดี เย ปี คา อาต ตึอน, โอว ดี แตห เย วี เตา วีว นา ปัน. 6 เย ดี แตห เฆ คูงครัห เย, แตห อึณ กอ ราม กาโต็ง ดี มืง เฆ. เฆ ดี บอ ทาง, เย แฮะ เตา เฆ ปี คา อาต ตึอน. 7 ปัน ตี เบ อี กอย บลาก นา ดอย มืง บอ โลว วี เลห ตัห, กาโฆห ดึห มืง ตี. โคว, เฌาพรา ปี กรึบ เบ ดี ดึห มืง ตี ดัว ดี เบ. 8 เซ เบ แฮะ ฮอต ปึอน มืง ตี, เบ โลว ดึห เงา โดะ กาซึม, แตห อึณ ปี ปี กาลาง อูน เฌาพรา. โอว มืร แฮะ ดัว อามีง ดี เบ ปาย ตี.”

9 แฮะ ฮอต, อาโยวซูอา บอ จัร เฆ ฮาว. เฆ มืร ฮาว บัร นา เฆต ซีแง มืง อายี ดี กาแต มืง อายี ฆาย มืง เบดาเอน. หมึร ตี, อาโยวซูอา บอ ตัม แคง โดง คยัะ เฆ ตี โดบ เฆ ดูอี กืน.

10 อาโยวซูอา บอ ยีต ซีณ ซีฌ วัห เจว, บอ ยอด ซีคยา แคะ กอย เฆ ดา ซึก อัน. บอ อัน บอ เฆ ดา ตาง อี แยต เฆ ดูอี อีซาเรลัะ, เฆ บอ แยต ดา ซึก โฮะ ดี มืง อายี. 11 ดา ซึก อี โดบ อัน เฆ บอ ฮาว ซืร ดี มาโลห มืง. เฆ บอ คยัะ นา กัว มืง ตี. ดี กาแต เฆ ฆาย มืง ตี, อึณ บอ มึห ดีลัยะ กาคัน. 12 อัน แฮะ ดึห ดูอี พัน แหรณ วี, แตห เฆ วี ฮาว บัร ดี กาโฆห นา เฆต ซีแง ดี กาแต มืง อายี ฆาย มืง เบดาเอน ตึอน. 13 ดา ซึก ดอน อี อี กอย แคง ดับ แฮะ ฮอต ฌัม โดง ดี โลว กอย เฆ. เฆ ดา ซึก อี กืน แฮะ กอย นา กัว มืง ตี. เฆ ดา ซึก อี บัร อี เครียง, เฆ บอ กอย นา เฆต ซีแง มืง ตี. แคง หมึร ตี อาโยวซูอา บอ ฮาว แคง ดีลัยะ ตี.

14 คูนดีคัม อี อึบ มืง อายี บอ ยึร ดูอี อาโยวซูอา, บอ อัน บอ เฆ ดูอี อัน บอกาเฆลียด บอ ปีครัน เฆ, แรน ซึก เฆ, ฮาว โดง ลึห ฆลัง อาราพัะ, แตห เฆ ปึอน ดี กาโฆห ดี ดูอี อีซาเรลัะ. มาแล, อัน ตู นับ ลอง เฆ ดา ซึก แฮะ วี บัร นา ปัน มืง. 15 อาโยวซูอา บอ เฆ ดูอี อัน บอ ณึงราง แฮะ ชึม, ณึงราง วี เตา ฮาว โดบ อึณเตณ อี ฮาว นา แคง แปร กาฮ็อห. 16 ปาย ตี คูนดีคัม เฆ ดูอี อัน มืร แดะ แคะ กอย อีมาย แคง มืง, แตห เฆ บอกาเฆลียด คูงครัห, โดบ ดี ปัน อาโยวซูอา เฆ. เฆ มืร แฮะ คูงครัห, แฮะ ฌัม ราม กาโต็ง ดี มืง เฆ. 17 แคะ กอย อีมาย แคง มืง อายี บอ แคง มืง เบดาเอน, อาว มึห คอ อู วี อี ตู คูงครัห โดบ เฆ ดูอี อีซาเรลัะ. เฆ บอ เบลห แวน มืง เฆ, อาว ฮู มึห อีมาย คอ อู วี อี ซี กอย แคง มืง เฆ.

18 ดอ อัน ตี เฌาพรา วี กาลาง โฆรห ดี อาโยวซูอา ต็อห, “แตห แม ดึห บลา เลียห ปี โฆ็ง แม, หงา ดี มืง อายี. โอว ดี ดึห มืง ตี, อาบ ดัว ดี แม.” อาโยวซูอา มืร โบง โดบ ปี ต็อห เฌาพรา ตี. 19 ดอ โจะ อัน แด อัน ตี, เฆ ดา ซึก อี แฮะ เครียง เฆ ตึอน มืร ยีต ตัห, กาแบลบ ฮาว ลึบ แคง มืง ตี อู เฌณ. เฆ มืร ปีครัน เฆ ดึห เงา โดะ มืง ตี.

20 ดอ วี ยึร เฆ ดูอี มืง อายี ลอง ดัก เงา แฮะ วี เลห โฮะ แคง เบลณ, เฆ อาว ฮู ปึอน เตา ฮาว นา เหมา, แตห เฆ ลอด ยัม. ดอ อัน ตี เฆ ดูอี อีซาเรลัะ อี แฮะ ณึงราง เตา ฮาว แคง แปร กาฮ็อห ตึอน บอ วี กาบัด วีว ตัห กาโฆห ดี เฆ. 21 อาโยวซูอา บอ เฆ ดูอี อัน แฮะ ฮอต ยึร ดา ซึก อี บัร นา ปัน ตึอน, แฮะ ฮอต ปึอน ดี ลึบ แคง มืง ตี. ดัก เงา มืร แฮะ เลห แคง มืง ตี. โคว, เฆ มืร วี กาโพรม ดี กาบัด วีว, วี กาโฆห ง็อห ยัม ดูอี มืง อายี เฆ ตี. 22 เฆ ดูอี อีซาเรลัะ อี แฮะ กอย นา ปัน บอ เลห ตัห แคง มืง, จอย เฆ กาโฆห. ปาย ตี ดูอี มืง อายี แฮะ กอย ดี กาแต ดูอี อีซาเรลัะ อี แฮะ ตัห กาโฆห ดี เฆ บอ นา ปัน นา อาต. เฆ ดูอี อีซาเรลัะ บอ ง็อห ยัม โตต เฆ บอกาเฆลียด. แกวะ แตห อึณ ซี ฆืด คอ อู วี. 23 อี มูห คูนดีคัม มืง อายี ตี, เฆ บอ เหมต โดว อีม อัน, วี ตัห ตึย ดี อาโยวซูอา.

24 เฆ ดูอี อีซาเรลัะ แฮะ ฮอต ตา มาปัวะ ลาง เฆ, ง็อห แวน โตต รันซู เฆ ดี แปร กาฮ็อห โดง คูงครัห เฆ ดี ดูอี อายี ตึอน, เฆ ปี วี เวณ ลึบ แคง มืง อายี ตึอน, ปี วี เวณ ง็อห โตต เฆ อี ซี ฆืด ดี ตี. 25 เฆ ดูอี มืง อายี บอกาเฆลียด อี ยัม ซีแง ตี บอ อีบึณ บอ อีมาย เฆ กอย อู หมึณ ดี อา แหรณ วี. 26 อาโยวซูอา มืร ตู เบลห โลง แด อัน, อัน มืร หงา บลา เลียห อัน, แตห เฆ กอ ปึอน ดี ง็อห แวน โตต ดูอี แคง มืง อายี ตี. 27 มาแล, อี มูห โดว ซัดดาวา บอ โกรวกราม ปี พาด ดึห เฆ แคง มืง ตี, เฆ แฮะ ปึอน ดึห โตต ดี เฆ, แตห อึณ โดบ ปี กาลาง อูน เฌาพรา ดี อาโยวซูอา.

28 อาโยวซูอา บอ โดะ กาซึม มืง อายี ตี. อึณ บอ ราม บอ แบน อึณปึม มาว กอ ฌัม อาตึร นี. 29 อี มูห โดว คูนดีคัม อายี ตึอน, อัน บอ ปัก ฮอย ดี เฮ กอ ฌัม บา ดี อับ. ซีแง แฮะ ฮอต เฆต, อัน บอ วี จัร เฆ ดึห โลง โดว ยัม อัน, วี เบลห อูน บาง มาโลห มืง. เฆ บอ วี ดึห มาว เบลห นา แดง, แตห อึณ กอ แบน อึณปึม ตาง. อึณ บอ กอย ปาย ตี กอ ฌัม อาตึร นี.

30 วาย อัน ตี อาโยวซูอา วี โบง กาโช็ง หลู ดี เฌาพรา อี มูห เฌาพรา ปี กรึบ เฆ ดูอี อีซาเรลัะ. อัน วี เบลห อูน กาโช็ง ตี ดี นอน เอบาน ตึอน. 31 อัน โบง โดบ ปี ดึอม กาลาง อูน อาโมวแซ อี มูห แดเจณ เฌาพรา อี แฮะ กาลาง อูน ดี เฆ ดูอี อีซาเรลัะ. อัน บอ โบง โดบ แปะ แฮะ แดม อูน แคง บับ ดารา อาโมวแซ. เฆ ดึห มาว อี ตู แดบ, ตู ด็อห ตา ครึง ฮีน, โบง กาโช็ง ตี. บอ ปี ดี หลู อี โดะ ดี เงา, ปี ดี หลู อี กอย กาฌูะ โฮม รึม, เฆ บอ หลู ดี เฌาพรา แดง กาโช็ง หลู ตี. 32 แดง นอน ตี, อาโยวซูอา วี ทูด เลห, วี แดม ดารา ปี ดึอม แดม อูน อาโมวแซ แดง มาว เฆ ตี. อัน โบง โตต ดี อาต เฆ ดูอี อีซาเรลัะ. 33 แคะ กอย เฆ ดูอี อีซาเรลัะ บอกาเฆลียด, บอ ดา ตาง อี แยต เฆ บอ ดา โบว อี อึบ ดา ซึก บอ เฆ ดา ซึก บอ ดา ตาง อี ซูงพยาด ดารา, เฆ อี มูห ดูอี อีซาเรลัะ อาคาคัร บอ เฆ ดูอี อาโมยว เฮา, เฆ แฮะ จ็อง อา บลาก ฌีดืก เฌาพรา. เฆ กอย มางัห ยอด เฆ ดา อี หลู ดี เฌาพรา อี มูห ดูอี อาเลวี, อี กาฆอด ฌีดืก เฌาพรา ตึอน. เฆ ดูอี อาดา อู กาแต, เฆ วี ดีณ กาตูะ เฆ ดี นอน ฆีราเจม. ปอ อู กาแต, เฆ วี ดีณ กาตูะ เฆ ดี นอน เอบาน. เฆ โบง โดบ แปะ แฮะ ดึอม กาลาง อาโมวแซ อี มูห แดเจณ เฌาพรา ดอ จัร อัน เฆ ดา อี หลู ดี เฌาพรา, แตห เฆ ม็องการา ดัว ดี ดูอี อีซาเรลัะ.

34 แฮะ ฮอต, อาโยวซูอา บอ ตีห บับ ดารา เฌาพรา อี มูห โฆรห ม็องการา บอ โฆรห ดืง. อัน มืร ตีห แปะ แฮะ แดม อูน แคง บับ ดารา ดอน โดว ดอน แด. 35 แคะ บอ มึห ดารา ปี แดม อูน อาโมวแซ ดอน โดว ดอน แด, อาโยวซูอา มืร แฮะ ตีห โตต, แตห เฆ ดูอี อีซาเรลัะ อี ตัห กาฌูะ ดี ตี ปึอน ดี โทม. อึณ บอ มึห บอ อีบึณ บอ ฆอน บอ ดูอี อาโมยว เฮา, อี แฮะ ตัห โทม.