1 เฌาพรา แฮะ ฮอต กาลาง ดี เฆ ดูอี อีซาเรลัะ ลอง ตู ปึอน เฆ ดึห อูน โกรว ปี โลว ปยาต แวน เฆ ตึอน. เฆ ยี ตู โทม. อึณ มึห ดูอี อู วี, อัน จืร อาคาน. อัน มูห ฆอน อาคามี อี มูห หลาน อาฌาบาดี. อาฌาบาดี บอ มูห ฆอน อาเฌนรา อี ตัห แคง ครึร อายูดา ตึอน. อัน แฮะ หลึร โฆรห เฌาพรา, โบง แตห เฌาพรา รู กาเซา ดี เฆ ดูอี อีซาเรลัะ บอกาเฆลียด.

2 อาโยวซูอา วี จัร ดูอี มัง อี แตห เฆ เลห ดี มืง เยรีโคว, วี ฮาว ยอด มืง อายี, มืง อี กอย กาเครียะ ดี มืง เบดอาเวน อี กอย นา เลห ซีแง มืง เบดาเอน. อัน มืร ต็อห ดี เฆ, “แตห เบ โฮะ, คยอง ดี ยอด โดง ตี.” แฮะ ฮอต, ดูอี เฆ ตี บอ ฮาว ยอด อู เฌณ.

3 เฆ บอ วี ตัห, กาลาง ดี อาโยวซูอา ต็อห, “อาว โลว แตห ดูอี เอ บอกาเฆลียด ฮาว ตึก มืง อายี ตี. ดูอี มอก อา แหรณ โอย แหรณ มืร แฮะ ฮอต ปึอน. อาว โลว แตห ดูอี เอ บอกาเฆลียด ฮาว, แกวะ แตห เฆ โลว หณาบ บอ นูน ปีเยณ. ดูอี เฆ ตี แฮะ เปรต กาเซา. 4 ปาย ตี เฆ ดูอี อีซาเรลัะ มอก โอย แหรณ วี บอ ฮาว. เฆ บอ วี กาดูห ดี เตา วีว นา ปัน. โคว, เฆ อีมาย แคง มืง อายี แฮะ แป เฆ. 5 เฆ ดูอี แคง มืง อายี บอ ง็อห ยัม ดูอี อีซาเรลัะ โอย ฆึร ดี เดา วี. เฆ คูงครัห ดูอี อีซาเรลัะ จูห ดี บาง มาโลห มืง กอ ฌัม ดี โดง โบลห เฆ มาว. เฆ บอ ง็อห เฆ ดอ โลง เฆ โดบ นอน. ปาย ตี น็อห เฆ ดูอี อีซาเรลัะ บอ อึณจัม อู เฌณ, อาว ฮู มึห โปลม. เฆ บอ โยว กาเซา.

6 วาย อัน ตี, อาโยวซูอา บอ กายาต ครึง ปี ตา อัน, แตห อึณ ลึห แคะ แฮะ กลึร อัน. อัน บอ มูด ฆึบ ดี กาดาย ดี อาต ฌีดืก เฌาพรา. บอ กอย ดี ตี กอ ฌัม บา ดี อับ. เฆ ดา ตาง อี แยต เฆ ดูอี อีซาเรลัะ, เฆ บอ โบง ปาย ตี. เฆ บอ ดึห กาปูห ฮับ แดง ฆีณ เฆ. 7 อาโยวซูอา วี ต็อห, “อึย แม เฌาพรา อี อึบ โตต ดอน โมยว, เหมา อึณ ปาย ปี แตห แม ดูอี เฆ นี กาโลห อึม แบลง ยอดาน, วี อาบ เฆ ดี ดูอี อาโมวรีด, แตห เฆ ปึอน ดี ปยาต เย? ดอ กอย เย นา ดอย อึม แบลง ยอดาน ตึอน, เซ อึณ แฮะ เบระ ดี น็อห เย, อึณ แฮะ หมึอม กาเซา ดี เย. 8 อึย แม เฌาพรา, เซ ดูอี อีซาเรลัะ ฮี ชึม ดี รันซู ปาย นี, เย ดี ต็อห มาเซ ดี อี เฮา. 9 ดูอี อาโมยว กานัณ บอ ดูอี แคง มืง นี ดอน อี แฮะ ฮอต ยึร ลอง อัน ตี. เฆ ดี บอ ตัห แวง โรบ เย บอ ง็อห แวน โตต เย บอกาเฆลียด, แกวะ แตห เฆ ซี นัมโหลห เย. อี มูห อาพูง ดังโคว แม เฌา, แม ดี วี โบง ปาย เหมา แตห อึณ ลึห?”

10 เฌาพรา วี กาลาง ดี อาโยวซูอา ต็อห, “ยีต, เหมา อึณ ปาย ปี มูด ฆึบ แม แดง กาดาย นี? 11 ดูอี อีซาเรลัะ แฮะ ฮอต ลูต. เฆ แฮะ หลึร โฆรห ปี ดัม อูน โอว ดี เฆ. เฆ แฮะ ดึห อูน โกรว ปี ต็อห โอว โลว ปยาต แวน. เฆ แฮะ ปรา, แฮะ กาโลว, แฮะ วี ดึห อูน แคง โกรวกราม เฆ. 12 โกบ ลอง อัน ตี, เฆ ดูอี อีซาเรลัะ ตู ปึอน แป รันซู เฆ. โคว, เฆ โลว วี กาบัด เตา รันซู เฆ. โดว โบ็ง เฆ แฮะ กาอาบ ลึร ชึม. เซ แม ยี ตู ปยาต แวน โกรว อี โลว ปยาต แวน ตี, โอว อาว ฮู กอย รึม โดบ แม ดอ เหมา.

13 ยีต, แตห แม กาลาง ดี ดูอี เฆ นี ต็อห, “แตห เบ วี ปีซีงา เบ อาดา แคหณา. โอว อี มูห เฌาพรา ปี กรึบ เฆ ดูอี อีซาเรลัะ แฮะ ต็อห, ‘เบ ดูอี อีซาเรลัะ, เซ โกรว ปี ต็อห โอว โลว ปยาต แวน ตึอน ยี ซี กอย โดง กอย เบ, เซ เบ มืร ตู ปยาต แวน โกรว ตี, เบ ตู นับ ดี แป รันซู เบ.’

14 กาลาง ดี เฆ, แตห เฆ ตัห แคหณา เจว หณา. แตห เฆ ตัห โดบ ครึร เหมา ครึร อัน. ครึร ปี ร็อห โอว ตี, เฆ โลว ตัห โดบ อึณกรึห เหมา, อึณกรึห อัน. อึณกรึห ปี ร็อห โอว ตี, เฆ ดี โลว ตัห อึณโฮม เหมา, อึณโฮม อัน. ดูอี แคง อึณโฮม ปี ร็อห โอว ตี, เฆ ดี โลว ตัห วี เหมา, วี อัน. 15 เซ ฮี กาตูณ โกรว ปี ดืง ตี ดี วี แปะ แฮะ ร็อห โอว เฆ ตี, บอ มูห วี เหมา มืร, เบ โลว ดึห ดูอี วี ตี โดะ แคง เงา บอ อัน บอ ดูอี แคง อึณโฮม อัน. บอ โกรวกราม อัน บอ ดอน โมยว เบ โลว โดะ แวน โตต แคง เงา โดบ อัน. โคว, ดูอี วี ตี แฮะ หลึร โฆรห ปี กาแซณ เฌาพรา. อัน มืร แฮะ โบง แตห ดูอี อีซาเรลัะ หมึอม ซาย กาเซา.”

16 ปา แคหณา ซีณวัห เจว อาโยวซูอา แตห เฆ ดูอี อีซาเรลัะ ตัห ดี อัน ครึร เหมา ครึร อัน. อัน เฌา บอ ร็อห ครึร อายูดา. 17 อัน มืร แดะ ครึร อายูดา อึณกรึห เหมา อึณกรึห อัน. อัน เฌา บอ วี ร็อห อึณกรึห อาเฌนรา. ปาย ตี อัน มืร แดะ อึณกรึห อาเฌนรา โดบ อึณโฮม เหมา อึณโฮม อัน. อัน เฌา บอ วี ร็อห อึณโฮม อาฌาบาดี. 18 ปาย ตี อัน บอ แดะ ดูอี แคง อึณโฮม อาฌาบาดี, แคะ มึห อีมาย ดอน วี. อัน เฌา บอ ร็อห อี จืร อาคาน อี มูห ฆอน อาคามี อี มูห หลาน อาฌาบาดี ตึอน.

19 อาโยวซูอา วี ต็อห ดี อาคาน, “อึย ฆอน อึย, แตห แม โรวเซ เฌาพรา อี มูห เฌาพรา ปี กรึบ ดูอี อีซาเรลัะ, แตห แม บอ อืบ อัน เฌา. แม โลว กาลาง ซืร ซืร หมาบ แม. แม กาลาง โตต ดี โอว ลอง แปะ แฮะ โบง แม. แม แกวะ เครียง มาเซ.”

20 อาคาน วี กาลาง ดี อาโยวซูอา ต็อห, “แฮะ หมาน, โอว แฮะ ฮอต ลูต เฌาพรา ปี กรึบ เอ ดูอี อีซาเรลัะ. โอว แฮะ โบง ปาย นี. 21 แคง โกรว แปะ แฮะ ดึห ตัห เอ ตึอน, โอว แฮะ ยึร ซีโตว ตูน อู พืน อี บอด กาเซา, อี ตัห มืง บาแบ บอ รึอน อา มาย็อห โบ็ง บอ แตง ครีว อี จัน พัน ฆึร เซเคน.^a โอว มืร แฮะ ซี ปึอน กาเซา, โอว บอ วี ปรา เครียง ดี โอว. โอว แฮะ วี ดีบ อูน ครึม ทึบ โอว. อี มูห รึอน ตี, โอว แฮะ เบลห ดี กาดัม อัน นา ครึม ซืด.”

22 ปาย ตี อาโยวซูอา บอ จัร เฆ ดูอี มัง อี ฮาว ลึบ ยอด แคง ทึบ อัน ตี. เฆ บอ ยึร โกรว ตี แฮะ ดีบ อูน. บอ รึอน แฮะ กอย ดี กาดัม อัน. 23 เฆ บอ ดึห เลห โกรว ตี นา เรต ทึบ, วี ฮาว ตึย ดี อาโยวซูอา บอ ดี เฆ ดูอี อีซาเรลัะ บอกาเฆลียด, วี เบลห โตต นา อาต เฌาพรา.

24 อาโยวซูอา บอ เฆ ดูอี อีซาเรลัะ บอกาเฆลียด แตห อี เหมต อาคาน อี มูห ฆอน อาเฌนรา. เฆ บอ ดึห บอ รึอน บอ ซีโตว ตูน บอ แตง ครีว ตึอน, ดึห บอ ฆอน อีบึณ, ฆอน อีมาย อัน, บอ มาบู มามัก บอ มาลา อัน, ดึห บอ ทึบ โดง กอย อัน บอ โกรวกราม บอ ครึง ตา อัน, วี ฮาว ดี ดีลัยะ อาคอ. 25 อาโยวซูอา วี ต็อห ดี อัน, “เหมา อึณ ปาย ปี แตห แม ดูก ดี เย? ดอ ตี นี, เฌาพรา ดี วี แตห ดูก ดี แม.”

ปาย ตี แคะ กอย ดูอี บอกาเฆลียด บอ กาโพรม ดี ดึห มาว, วึณ อัน, แตห อัน กอ ยัม. เฆ บอ วึณ ยัม บอ ดูอี แคง อึณโฮม อัน. แฮะ ฮอต, เฆ บอ ดึห เงา โดะ กาซึม เฆ บอ โกรวกราม เฆ ดอน โมยว. 26 เฆ ปี วี ดึห มาว กืน, วี เบลห แดง โดว เฆ, แตห อึณ กอ แบน อึณปึม ตาง. อึณ บอ กอย กอ ฌัม อาตึร นี. โกบ อึณ ปาย ตี ดีลัยะ ตี, เฆ บอ แตห อึณ จืร ดีลัยะ อาคอ.^b เฆ แฮะ ฮอต โบง ปาย ตี เฌาพรา บอ จู รู อู เฌณ.