ดอ อัน ตี มาโลห มืง เยรีโคว ตึอน แฮะ กาบีด โตต ดอน โปละ. เฆ บอ บัร ซีคยา, แกวะ แตห เฆ ดูอี อีซาเรลัะ ปึอน ดี ลึบ. ดูอี ลึบ ดูอี เลห อู วี มืร อาว มึห.

2 เฌาพรา ยี กาลาง ดี อาโยวซูอา ต็อห, “บัร แม ยอด, โอว ดี ดึห มืง เยรีโคว บอ คูนดีคัม แคง มืง ตี บอ เฆ ดา ซึก อัน อี แฮณ กาเซา, วี อาบ ดี แม. 3 บอ แม บอ เฆ ดา ซึก แม, เบ โลว ฮาว โรบ มืง ตี อู ซีแง อู เฌณ, แตห อึณ กอ โนะ เดา ซีแง. 4 ดา อี หลู ดี เฌาพรา อาดา บู วี โลว โฆ็ง เวา นึง แป, อู วี อู โบ็ง, แยต ดี อาต ฌีดืก เฌาพรา. ฮี ฌัม ซีแง อึณบู, เบ โลว ฮาว โรบ มืง ตี อาดา บู โรบ. ดอ ฮาว เบ, เฆ ดา อี หลู ดี เฌาพรา โลว บูด เวา นึง แป ตี. 5 ปาย ตี เฆ โลว บูด นึง แป ตี, แตห อึณ ฮัม โต็ง กาเซา. ดอ ยึร เบ ฮัม ตี, แคะ กอย ดูอี บอกาเฆลียด, แตห เบ ดัด ตาง ตาง, ดัด ซีนัน ซีนืง. แรง มืง ตี ดี ดีฆล็อห โจห อู เฌณ. ปาย ตี แคะ กอย เฆ ดูอี, เฆ ดี ฮาว โฮะ ซืร แคง มืง ราง อาเซ ราง อัน.”

6 อาโยวซูอา อี มูห ฆอน อานูน มืร แดะ เฆ ดา อี หลู ดี เฌาพรา, กาลาง ดี เฆ ต็อห, “แตห เบ กาฆอด ฮาว ฌีดืก เฌาพรา, แตห เฆ ดา อี หลู ดี เฌาพรา อาดา บู วี ดึห เวา นึง แป, ฮาว แยต ดี อาต ฌีดืก เฌาพรา.” 7 อัน มืร กาลาง ดี เฆ ดูอี กืน ต็อห, “แตห เบ ฮาว โรบ มืง ตี. แตห เฆ ดา ซึก อี โฆ็ง ครึง กาโฆห, แตห เฆ แยต นา อาต ฌีดืก เฌาพรา.”

8 อาโยวซูอา แฮะ ฮอต กาลาง ปาย ตี ดี เฆ ดูอี กืน, เฆ ดา อี หลู ดี เฌาพรา บู วี มืร ดึห ดี โฆ็ง เวา นึง แป บู โบ็ง บอ บูด บอ ฮาว. ดูอี อี กาฆอด ฌีดืก เฌาพรา บอ โดบ ดี ปัน เฆ. 9 นา อาต เฆ ดา อี หลู ดี เฌาพรา อี บูด เวา นึง แป ตึอน มืร, แฮะ มึห เฆ ดา ซึก อี โฆ็ง ครึง กาโฆห. เฆ แยต ดี อาต ดอน อี. นา ปัน ฌีดืก เฌาพรา ตึอน มืร, อึณ แฮะ วี มึห ดา ซึก อี บัร นา ปัน. เฆ อี โลว บูด เวา, เฆ บอ บูด เซเซ. 10 อาโยวซูอา บอ กาลาง ดี เฆ ดูอี กืน ต็อห, “อาต ฌัม อาคราว ดี จัร โอว เบ ดัด, เบ แกวะ ดัด ดอ เหมา. โฆรห มืร, เบ แกวะ โฆรห. เซ โอว ยี จัร เบ ดัด, แตห เบ ดัด ตาง ตาง.” 11 ปาย ตี อัน มืร จัร เฆ กาฆอด ฮาว ฌีดืก เฌาพรา ตึอน, ฮาว โรบ มืง ตี อาดา อู โรบ, ปี วี แตห เฆ ลึบ กอย แคง โดง คยัะ เฆ อู หมึร.

12 ปา แคหณา อาโยวซูอา มืร ยีต ซีณ ซีณวัห เจว. 13 อาดา ซีแง ตี มืร, เฆ ดา อี หลู ดี เฌาพรา บอ ดา ซึก เฆ ตึอน ฮาว โรบ มืง ตี, ฮาว ลาย ดาม ปี ซีแง อาต ตึอน. เฆ ดา ซึก อี ฆ็อง อี แร เฆ ตึอน มืร, แฮะ แยต ดี อาต. เฆ ดา อี หลู ดี เฌาพรา อาดา บู วี อี โฆ็ง เวา นึง แป บู โบ็ง ตึอน มืร ฮาว ดี อาต ฌีดืก เฌาพรา บอ บูด เวา. นา ปัน เฆ ตี, แปะ แฮะ วี มูห เฆ ดา อี หลู ดี เฌาพรา อี กาฆอด ฌีดืก เฌาพรา บอ เฆ ดา ซึก อี ฆ็อง อี แร แฮะ วี ฮาว ดาม เฆ ตี. คา นี มืร, เฆ บูด เวา นึง แป ตี อาดา อู โรบ. 14 ซีแง ฮาอา นี มืร, เฆ ฮาว โรบ มืง ตี อาดา อู โรบ. แฮะ ฮอต เฆ ปี วี ลึบ กอย แคง โดง คยัะ เฆ ตึอน. เฆ โบง ปาย ตี อาดา เดา ซีแง.

15 ฮี ฌัม ซีแง อึณบู, เฆ มืร ยีต ซีณ ซีณวัห เจว, ซีณ ดอ กาจูห แปร ดี บลาง. เฆ ฮาว โรบ มืง ตี บู โรบ ปี ซีแง อาต ตึอน. อึณ ยี มูห ซีแง ตี, เฆ ปึอน ดี ฮาว โรบ มืง ตี อาดา บู โรบ. 16 ดอ ฌัม โรบ อึณ บู, เฆ ดา อี หลู ดี เฌาพรา มืร แฮะ ครึง ดี บูด เวา นึง แป. ดอ อัน ตี อาโยวซูอา วี จัร เฆ ดูอี กืน ต็อห, “แตห เบ ดัด ตาง ตาง. เฌาพรา แฮะ อาบ มืง นี ดี เบ. 17 มืง ตี บอ เฆ ดูอี อี กอย แคง มืง ตี, เบ โลว ปยาต แวน โตต, แตห อึณ ปี โกรว ปี หลู ดี เฌาพรา. มาแล, อี มูห นาง ราฮาบ บอ ดูอี แคง อึณโฮม อัน, เบ โลว อูน อาซาก เฆ, แตห เฆ ลอด ยัม โกบ แฮะ จอย, แฮะ ปรา อัน ดี ดึห เครียง ดูอี อี แฮะ ดึอม ตัห ปรา ดี คยอง ดี ลึบ แคง มืง นี. 18 บอ โกรว ปี โลว ปยาต แวน ตี, เบ ตู ปึอน ดึห อูน คอ อู โมยว. เซ เบ ปรา ดี ดึห อูน, เบ โลว คัม ดูก. เบ ดี บอ แตห บอ โดง คยัะ เบ ลึร ชึม โตต. 19 บอ มูห รึอน, บอ มูห ครีว, บอ มูห โกรวกราม บ็อง เดณ บอ ดอน โมยว อี มูห ฮีน แฮะ แบน อี ซีงา บอด ดี เฌาพรา. เบ โลว ดึห อูน โตต แคง โดง อูน เบ โกรว เฌาพรา.”

20 ปาย ตี เฆ ดา อี หลู ดี เฌาพรา บอ บูด เวา นึง แป เฆ ตึอน. ดอ ยึร เฆ ดูอี กืน ฮัม เวา นึง แป ตี, เฆ บอ กาโพรม ดี ดัด เรียง อู เฌณ. แรง มืง ตี บอ ดีฆล็อห โจห อู เฌณ. แคะ กอย เฆ ดา ซึก บอกาเฆลียด, เฆ บอ กาโพรม ดี ลึบ ฮาว ซืร แคง มืง ตี. เฆ บอ ฮาว รึบ มืง ตี. 21 เฆ บอ ตา มาปัวะ ลาง เฆ บอ บลา เลียห เฆ, ง็อห ยัม ดูอี แคง มืง ตี. เฆ บอ ง็อห แวน บอ อีบึณ บอ อีมาย บอ ดูอี กัด ดูอี หนึม บอกาเฆลียด, แตห อึณ กอ โตต. เฆ บอ ง็อห ยัม บอ มามัก, มาบู บอ มาลา เฆ. เฆ แตห มืง ตี บอ มืง แบน ปี หลู ดี เฌาพรา.

22 ดอ อัน ตี อาโยวซูอา วี กาลาง ดี ฆาย อา วี อี แฮะ ฮาว ปรา ดี คยอง ดี ยอด มืง ตึอน. อัน ต็อห, “แตห บาย ฮาว ดี กาง ยา มาลัม ตึอน, ฮาว แดะ อัน บอ ดูอี แคง อึณโฮม อัน, แตห เฆ เลห ตัห. แตห บาย โบง โดบ แปะ แฮะ ดืง แฮะ กาแซณ บาย ดี อัน.” 23 ฆาย บอ ฮาว แดะ นาง ราฮาบ บอ ฆูณ มา อัน บอ อีกัด วา อัน บอ ดูอี แคง อึณโฮม อัน ดอน อี, แตห เฆ เลห ตัห. เฆ บอ วี ดึห ฮาว อูน เฆ โคบ โดง คยัะ เฆ ดูอี อีซาเรลัะ.

24 แฮะ ฮอต ปาย ตี เฆ บอ ดึห เงา, โดะ มืง ตี บอ อี กอย แคง มืง ตี. มาแล, อี มูห รึอน เฆ ครีว, บ็อง เดณ เฆ ฮีน, เฆ วี ดึห อูน แคง โดง อูน เฆ โกรว เฌาพรา. 25 อี มูห ยา มาลัม อี จืร นาง ราฮาบ ตี บอ บีนอง วอแว อัน ดอน อี, อาโยวซูอา แตห เฆ กอย ฆยามซา โกบ แฮะ ดึห เครียง อัน ดูอี อา วี อี แฮะ ตัห ปรา ดี คยอง ดี ยอด มืง เยรีโคว ตึอน. หลูกหลาน นาง ราฮาบ ตี, เฆ บอ ปึอน ดี กอย กาแต เฆ ดูอี อีซาเรลัะ กอ ฌัม ดอ ตี นี.

26 ดอ อัน ตี อาโยวซูอา วี ดืง ต็อห, “อาเซ วี ซัม วี อึณปราย มืง เยรีโคว นี, แตห อัน คัม กาซัม ดืง เฌาพรา. อาเซ วี โบง วี ซัม เจณ ร็อง, แตห อัน ชึม ฆอน ฆีณ อัน. อาเซ วี ปยีต ร็อง มาโลห มืง, แตห อัน ชึม ฆอน เตียะ อัน.”

27 ปาย ตี เฌาพรา มืร กอย รึม โดบ อาโยวซูอา. ซาดาง ลอง อัน บอ ลึห ฮาว ดอน นา ดอน โปละ, ดอน มาน ดอน มืง.