1 ปัน อัน ตี อาโยวซูอา อี มูห ฆอน อานูน วี จัร ดูอี อา วี, แตห ฆาย เลห โดง จืร ซีดีม, วี ฮาว คยอง ดี ยอด แคง มืง กานัณ บอ มืง เยรีโคว, แตห ฆาย นับ ปี ปาย เฆ. ดูอี ฆาย ตี บอ ฌัม แคง มืง เยรีโคว, ฆาย บอ ฮาว ลึบ ตัม แคง กาง ยา มาลัม อู วี อี จืร นาง ราฮาบ.

2 คูนดีคัม แคง มืง ตี บอ ยึร อี ต็อห, “แฮะ มึห ดูอี อีซาเรลัะ มัง อี อี แฮะ ปรา ดี ตัห คยอง ดี ยอด มืง เอ.” 3 คูนดีคัม ตี มืร ตึย ดาลาม อัน ฮาว กาลาง ดี นาง ราฮาบ ต็อห, “ดูอี อี ตัห กอย แคง กาง แม นี, เฆ ปรา ดี ตัห คยอง ดี ยอด แคง มืง นี. แตห แม ดึห เลห เฆ.”

4 นาง ราฮาบ แฮะ ฮอต เครียง ฆาย, อัน วี ต็อห, “แฮะ หมาน, อึณ แฮะ มึห ดูอี อี ตัห โดง กอย โอว นี. มาแล, โอว ตู นับ นา ตัห เฆ. 5 บา ดี อับ อาต กาบีด อี มาโลห มืง, เฆ แฮะ วี เลห ฮาว. เฆ ฮาว นา เหมา, โอว มืร ตู นับ. แตห เบ คูงครัห โดบ เฆ ครัน ครัน, โยว เบ ปี ซอ ครับ.” 6 มาแล, อัน ยี แฮะ แยต โฮะ ฆาย นา แดง กาตูะ กาง, วี เครียง ฆาย ครึม โดง ราย อัน แกง กาตัม. 7 ดาลาม คูนดีคัม เฆ ตึอน วี โดบ ดี ยอด ฮาว โดบ อึณเตณ อี ฮาว ดี แบลง อึม ยอดาน, แตห เฆ กอ ฌัม ดี บาง กาโลห. เฆ แฮะ ฮอต เลห นา เรต มืง, ดา อี บัร มาโลห แฮะ วี กาบีด มาโลห มืง.

8 อาต อีด ดูอี ฆาย ตึอน, นาง ราฮาบ แฮะ โฮะ โดง กอย ฆาย แดง กาตูะ กาง ตึอน. 9 อัน แฮะ กาลาง ดี ฆาย ต็อห, “โอว แฮะ นับ, เฌาพรา ดี อาบ มืง นี ดัว ดี เบ. ดูอี บอ มาน บอ มืง ดอน อี บอ โยว กาเซา เบ. 10 เย แฮะ ยึร ลอง แปะ แฮะ โบง เฌาพรา, แตห อึม ดีโหนง เรณ ฮีด ดี อาต เบ ดอ เลห เบ แคง มืง แอฆึบ ตึอน. เย มืร แฮะ ยึร บอ ลอง แปะ แฮะ โบง เบ ดี คูนดีคัม ดูอี อาโมวรีด อา กาดัง อี จืร คูนดีคัม อาซีโฮน ฆาย คูนดีคัม อาออคัะ. เบ แฮะ แตห เฆ ชึม โตต. 11 ดอ ยึร เย ลอง อัน ตี, เย บอ โยว กาเซา โกบ เบ. น็อห ยัะ น็อห กยัะ อีมาย เย, อึณ บอ หราย โตต อู เฌณ. โคว, เฌาพรา ปี กรึบ เบ, อัน บอ มูห เฌาพรา อี อึบ บอ แคง ฆางหราว บอ แดง กาดาย. 12 ปาย ตี ดอ ตี นี โอว หมาณ, แตห บาย กาแซณ ดี โอว, ดืง บอ ฆาว ปวน เฌาพรา ตี, แตห อัน เฆฌู ดูอี แคง อึณโฮม โอว, แตห อึณ ปี แปะ แฮะ เฆฌู โอว ดี บาย. แตห บาย โบง บยัะ ลักซานา คอ อู โมยว อู โมยว, แตห โอว นับ ซีคยา บาย ตู กาโลว โอว. 13 แตห บาย กาแซณ ดี โอว, เบ ดี คยอด บอ ฆูณ มา โอว บอ อึณโฮม อีกัด วา โอว เฆ ดอน อี, แกวะ แตห เย ยัม.”

14 ฆาย มืร วี ต็อห ดี อัน, “เซ ยาย ตู โบง โดบ โฆรห ปี กาลาง ยาย ดอ ตี นี, แตห เฌาพรา ง็อห อาซาก ยาย, แตห อึณ กาดาง เบ บอ อึณโฮม. เซ แม ตู กาลาง บยัะ ดี อี เฮา ลอง แฮะ ตัห ยาย ดี กาง แม, เย ดี เฆฌู อึณโฮม แม ปัน ดี อาบ เฌาพรา มืง นี ดี เย. ยาย กาแซณ ดี แม ปาย ตี.”

15 กาง นาง ราฮาบ ตึอน กอย ดึก ดี แรง มืง. โคว, อัน วี ดึห วัน, บยัว โลง แคง กาเดา ปาแตง, แตห ฆาย ปึอน ดี เลห. 16 อัน วี กาลาง ดี ฆาย ต็อห, “แตห บาย ฮาว ซืร ดี นอน ดอย. โยว เฆ ดูอี คูนดีคัม วี ยึร บาย. แตห บาย เครียง บาย ดี นอน ตี อาดา โอย ซีแง, แตห อึณ กอ ฌัม ปัน ดี วี ตัห เฆ. เฆ แฮะ ฮอต วี ตัห, บาย บอ วี ฮาว.”

17 ฆาย มืร วี ต็อห ดี อัน, “โฆรห ปี ต็อห แม แตห ยาย กาแซณ ตึอน, อึณ ตู มึห ดีโคว, เซ แม ตู โบง โดบ ปี ต็อห ยาย นี. 18 เซ เย ฮี ตัห ตึก มืง นี, แม โลว ดึห เซณ เรณ อู ฌ็อง, ปัก ดึก ดี กาเดา ปาแตง โดง เบลห โลง แม ดี ยาย ตึอน. แม บอ โลว วี แดะ ฆูณ มา แม บอ อีกัด แม, วา แม อี มูห ดูอี แคง อึณโฮม เบ บอกาเฆลียด, แตห เบ ตัห กอย กาฌูะ โตต แคง กาง แม ตี. 19 มาแล, วี อี เลห ฮาว ตัะ กาง, ฮาว โดบ อึณเตณ, เซ อัน กาดูห ดี ยัม, อึณ ตู มูห หมาบ เย โกบ แฮะ กาลึบ อัน. วี อี กอย แคง กาง โดบ แม, เซ อัน ยี ยัม, แตห ยาย วี คัม หมาบ ตี. 20 เซ แม มืร วี กาลาง บยัะ ดี อี เฮา ลอง ปี โบง ยาย นี, ยาย มืร ตู โลว คัม โฆรห ปี ดืง ปี ลาย กาแซณ ยาย นี.”

21 อัน มืร วี ต็อห, “แตห อึณ แบน โดบ โฆรห บาย ตี.” อัน แฮะ ฮอต ต็อห ปาย ตี อัน บอ แตห ฆาย ฮาว. ฆาย แฮะ ฮอต ฮาว, อัน วี ดึห เซณ เรณ ฮอย โลง ดี กาเดา ปาแตง ตึอน.

22 ฆาย อา วี ตึอน มืร ฮาว ดี นอน ตึอน, ฮาว เครียง ฆาย ดี ตี อาดา โอย ซีแง. วาย อัน ตี, แดเจณ คูนดีคัม มืร วี ตัห. เฆ แฮะ เหรต ฆาย ดอน นา ดอน โปละ, ยี ตู ยึร ฆาย. 23 ฆาย มืร วี โลง ดี นอน ตึอน, วี กาโลห อึม แบลง ยอดาน, ฮาว โดง กอย อาโยวซูอา. ฆาย มืร กาลาง แค ลอง แปะ แฮะ กาดูห ตัห ฆาย. 24 ฆาย วี กาลาง ดี อาโยวซูอา ต็อห, “เฌาพรา แฮะ อาบ ดัว มืง ตี ดี เอ อาคาคัร. น็อห ดูอี แคง มืง ตี บอกาเฆลียด แฮะ อึณจัม โตต โกบ โยว กาเซา เฆ ดี เอ.”