1 นาง โอวมี ตึอน วี มึห วอแว อีมาย อัน อู วี. ดูอี วี ตี, อัน ครัม กาเซา. ฆาย อาเอลีมาเลก มูห อู ครึร. อัน จืร อาโบวอาบ.

2 นาง รูทา อี มูห ดูอี โมวอาบ ตึอน บอ หมาณ ดี ฆึณ อัน ต็อห, “แตห โอว ฮาว แฆบ กาโย็ง โหงว อี โจห แคง โดง นา, โยว อึณ บอ มึห อี กาเว โอว, ซอ แตห โอว แฆบ.” ฆึณ อัน วี ต็อห, “อึร, แตห แม ฮาว.”

3 ปัน ตี นาง รูทา บอ ฮาว เหรต ดี แฆบ กาโย็ง โหงว อี โจห อี บรัด นา ปัน เฆ อี โซะ โหงว ตี. แฮะ ฮอต, อัน บอ วี นับ, โดง แฮะ ฮาว แฆบ อัน แฮะ วี มูห แคง โดง นา อาโบวอาบ อี มูห หลูกหลาน อาเอลีมาเลก ตึอน.

4 ดอ กอย อัน โดง ตี อาโบวอาบ บอ ตัห แคง มืง เบดแลม, ตัห ฮาว กาลาง ดี เฆ อี โซะ โหงว แคง โดง นา อัน. อัน ต็อห, “แตห เฌาพรา ม็องการา ดัว ดี เบ.” เฆ อี โซะ โหงว ตึอน ปี วี ต็อห, “แตห เฌาพรา ม็องการา แตห บอ ดี แม.” 5 อาโบวอาบ บอ ดีหมอด ดา อี แยต เฆ อี โซะ โหงว ต็อห, “ฆอน อีบึณ นี, อัน มูห วอแว อาเซ?”

6 ดา อี แยต เฆ วี ต็อห, “อัน มูห ดูอี อาโมยว โมวอาบ อี โดบ ตัห นาง โอวมี ตึอน. 7 อัน แฮะ ต็อห ดี เย, ‘โอว หมาณ ดี แฆบ กาโย็ง โหงว อี โจห นา ปัน เบ นี.’ อัน แฮะ ตัห แฆบ ซีณ ซีณวัห เจว กอ ฌัม ดอ ตี นี. อัน บอ รัณ เซเซ, ดีเหลา แคง ทึบ อาดา อู กาจัน.”

8 อาโบวอาบ วี ต็อห ดี นาง รูทา, “แม โทม โฆรห โอว. อาว โลว ฮาว แฆบ โหงว แคง โดง นา ปอ อู โปละ. อาว โลว เลห ตัะ ดี นี. แตห แม แฆบ มี แคง โดง นา โอว นี โดบ เฆ แดเจณ โอว.

9 แตห แม ยอด โดบ อีบึณ อี กอย แคง ล็อก นา แปะ แฮะ โซะ เฆ. โอว แฮะ ฮอต กาลาง ดี เฆ อีมาย, แกวะ แตห เฆ บลัต แม. เซ แม บอ ซี เดียง อึม, ฮาว เดียง อึม แปะ แฮะ ต็อะ อูน ฆอน กาโณม เฆ แคง กาโละ นี.”

10 อัน แฮะ ฮอต ต็อห ปาย ตี, นาง รูทา บอ มูด ฆึบ ดี กาดาย กรึบ อัน, วี ต็อห ดี อัน, “เหมา อึณ ปาย ปี รีมาด แม ดี โอว แคะ ตี บอ กาลาง โฆรห ดี โอว อี มูห ดูอี อาโมยว เฮา?”

11 อาโบวอาบ วี ต็อห ดี อัน, “อี เฮา แฮะ ฮอต กาลาง โตต ดอน โมยว ดี โอว ลอง แม. แม แฮะ ลึมลา ซีคยา ฆึณ แม วาย แฮะ ฮอต ยัม อีมาย แม. เฆ บอ กาลาง ลอง แม แฮะ คัม ดี แวน ฆูณ มา แม, วี ตัห กอย กาแต ดูอี ปี ตู ดึอม ยึร แม. 12 แตห เฌาพรา วี ดัว นา หมึอม ดี แม, แตห อึณ ปี แปะ แฮะ โบง แม นา หมึอม ดี อี. เฌาพรา อี มูห เฌาพรา ปี กรึบ ดูอี อีซาเรลัะ, ปี ต็อห แม ดี ตัห บึง, ตัห กรึบ, แตห อัน วี โบง เวียะ อี หมึอม ดอน โมยว ดี แม.”

13 นาง รูทา วี ต็อห ดี อัน, “อึย แม ดา กาณา. แม แฮะ กาเว กาเซา โอว, แฮะ กาลาง โฆรห ดาคึย ดี โอว. โอว ยี ตู มูห อี ปึอน โบง ฆาน แม.”

14 แฮะ ฮอต, บอ วี ฌัม อาคราว ดี โฮม โบม. อาโบวอาบ วี กาลาง ดี นาง รูทา ต็อห, “แตห แม ตัห โฮม คามูน, จู อึม มางูน ดี นี.” ปาย ตี นาง รูทา บอ ตัห ตูต โคบ เฆ อี โซะ โหงว ตึอน. อาโบวอาบ บอ ดึห โหงว มาตูห, ดัว ดี อัน. อัน บอ โฮม, แตห อัน กอ แพ. อึณ กอ วี กาโลย. 15 นาง รูทา แฮะ ฮอต โฮม, อัน บอ วี ฮาว แฆบ กาโย็ง โหงว อี โจห ตึอน.

อาโบวอาบ วี กาลาง ดี เฆ อี โซะ โหงว ต็อห, “แตห อัน แฆบ บอ ซีบัยะ โหงว ปี เบลห อูน เบ, แกวะ แตห อัน หมึอม ซาย. 16 แตห เบ ดึห บอ กาโย็ง โหงว มัง กาล็อะ, ดัว ดี อัน, เบลห แตห อัน ดึห. เบ แกวะ แน อัน.”

17 ปัน ตี นาง รูทา บอ แฆบ กาโย็ง โหงว อี โจห อี รัห แคง โดง นา ตึอน. บอ ฌัม บา ดี อับ, อัน บอ มัห กาโย็ง ปี แฆบ อัน. อัน ปึอน อู เอพา, อี ปี กาบัก ฆึร ดี อา แบล. 18 อัน บอ ปัห เวณ โหงว อัน แคง มืง โดง กอย ฆึณ อัน, อัน บอ ดึห บอ โหงว มาตูห กาโลย โฮม อัน, ดัว ดี ฆึณ อัน.

19 ฆึณ อัน วี ต็อห ดี อัน, “อาตึร แม บอ ฮาว แฆบ โหงว นา เหมา? แม บอ ฮาว โบง ฆาน มาเซ? ดูอี อี แฮะ กาเว แม ตี, แตห เฌาพรา ม็องการา แตห ดี อัน.” นาง รูทา บอ วี กาลาง ลอง ดูอี ตึอน อี มูห ดา กาณา โดง ฮาว โบง อัน ฆาน, แตห ฆึณ อัน นับ. อัน ต็อห, “โดง ฮาว โบง รึม โอว ฆาน อาตึร นี, อึณ มึห อีมาย อู วี, อัน จืร อาโบวอาบ.”

20 นาง โอวมี วี ต็อห ดี เอา อัน, “แตห เฌาพรา ม็องการา แตห ดี ดูอี วี ตี. เฌาพรา นับ ดี โบง ปี ดึอม ดัว อัน กาดีก ซัดฌา ดี ดูอี อีม บอ ดี ดูอี ยัม.” แฮะ ฮอต, นาง โอวมี ปี วี ต็อห, “ดูอี วี ตี มูห วอแว กาเครียะ ดี โอว. อัน บอ มูห ดา อี กาอาบ ยอด แมน อาย.”

21 นาง รูทา อี มูห ดูอี อาโมยว โมวอาบ ปี วี ต็อห, “อึร, แฮะ หมาน, ดูอี วี ตี, อัน แฮะ ต็อห ดี โอว, ‘แตห แม แฆบ กาโย็ง โหงว โดบ เฆ แดเจณ โอว, แตห เฆ กอ ฮอต โตต โซะ โหงว นี.’”

22 แฮะ ฮอต, นาง โอวมี วี ต็อห ดี นาง รูทา, “อึย แม ฆอน โอว, แตห แม โบง ฆาน โดบ เฆ ฆอน อีบึณ อี มูห แดเจณ อัน. อาว โลว ฮาว แคง โดง นา อี เฮา, โยว เฆ โบง นา ตู หมึอม ดี แม.”

23 ปาย ตี อัน แบน ฆึก เฆ อีบึณ อี มูห แดเจณ อาโบวอาบ ตึอน. อัน บอ แฆบ กาโย็ง โหงว อี โจห อี รัห, แตห เฆ กอ ฮอต โตต โซะ โหงว บาลี ฆาย เคาคยูง. อัน บอ กอย รึม โดบ ฆึณ อัน ปาย ตี.