1 ซีแง นาง โอวมี วี ต็อห ดี เอา อัน, “อึย ฆอน, โอว ซี แตห แม คัด, แด อึณโฮม, แตห แม ปึอน ดี กอย ดาคึย. 2 อาโบวอาบ อี มูห ดา กาณา ฆอน อีบึณ อี แฮะ แบน ฆึก แม, อัน บอ มูห วอแว อาย. แคง หมึร นี เฆ ดี มัห โหงว บาลี เฆ ดี โอ็ง กังน็อห. 3 แตห แม ตา อึม, พ็อห นามัน อูห หงูน, ชึบ ครึง ชีด แม. แฮะ ฮอต, แตห แม โลง ดี โอ็ง กังน็อห, โดง มัห เฆ โหงว ตี. อาต ฮอต โฮม, ฮอต เดียง อาโบวอาบ, แม แกวะ แตห อัน ยึร โดว แม. 4 แม ยอด ซีคยา, แตห แม นับ โดง ฮาว อีด อัน. แม แฮะ โนว โดง อีด อัน, แม บอ ฮาว วึห ฮึบ ปี ปลึก อัน ดี เปลา อัน, บอ อีด ดี ตี. แฮะ ฮอต, อัน ดี กาลาง ปี ดี ปาย ดี แม.”

5 นาง รูทา วี ต็อห, “อึร, แม ฆึณ ต็อห ปาย เหมา, โอว ดี โดบ ปาย ตี.” 6 ปาย ตี อัน บอ ฮาว โดง กอย โอ็ง กังน็อห ตึอน. อัน บอ โดบ ดอน โมยว แคะ ปี ต็อห ฆึณ อัน.

7 อาโบวอาบ ตึอน แฮะ ฮอต โฮม, น็อห อัน มืร แฮะ ดาคึย. อัน บอ ฮาว อีด โคบ อึณปึม โหงว อี กอย นา ตัะ ซืด. ปัน ตี นาง รูทา บอ ฮาว, แกวะ แตห อึณ ฆรัณ. อัน บอ วึห ฮึบ ปี ปลึก อาโบวอาบ ดี อัน. แฮะ ฮอต, อัน บอ อีด ดี ตี.

8 บอ ฌัม กาแต ซึอม, อาโบวอาบ บอ กาจัว. อัน วี ยอด บอ นับ, แฮะ มึห อีบึณ ตัห อีด ดัง เจณ อัน.

9 อัน วี ดีหมอด ต็อห, “อึย, อาเซ แม มูห?” นาง รูทา วี ต็อห, “โอว มูห รูทา, อี มูห แดเจณ แม. โอว หมาณ ดี ดึห กาโตะ ฮึบ ปี ปลึก แม นี, วี ปลึก ดี โอว อี แจก, โกบ มูห แม วอแว กาเครียะ โอว, อี กาอาบ ยอด แมน โอว.”

10 ปัน ตี อาโบวอาบ วี ต็อห, “อึย ฆอน, แตห เฌาพรา ม็องการา ดัว นา บอด นา หมึอม ดี แม. แปะ แฮะ โบง แม ดอ ตี นี, แฮะ หมึอม หลึอม แปะ แฮะ โบง แม อาต นี. แม มืร ตู เหรต ดี โดบ อี มูห กาโณม. บอ อี ครัม บอ อี พลาน แม ตู โดบ. 11 อึย ฆอน, ดอ ตี นี แกวะ แตห แม โยว มาเซ. โอว ดี โบง แคะ ปี หมาณ แม. ดูอี แคง มืง โดง กอย โอว นี, เฆ บอ มืง แฮะ นับ, แม มูห อีบึณ อี มึห น็อห บอด, น็อห หมึอม. 12 แฮะ หมาน, โอว แฮะ มูห วอแว กาเครียะ อี กาอาบ ยอด แมน แม. มาแล, อึณ ซี มึห ปอ อู วี, อี มูห วอแว แม. อัน ซี กาเครียะ หลึอม โอว. 13 แคง หมึร นี แตห แม อีด ดี นี, อาว ลืก. แคหณา ซีณวัห, เซ อัน บอ คัม ดี แบน ดา อี ยอด แมน แม, แตห อัน แบน. เซ อัน ยี ตู คัม ดี ยอด แมน แม, โอว ดี คัม. เฌาพรา มืร แฮะ นับ, โอว ตู กาโลว แม. แตห แม อีด ดี นี กอ ฌัม ซีณวัห.”

14 ปัน ตี นาง รูทา บอ อีด ดัง เจณ อาโบวอาบ ตี, กอ ฌัม ซีณวัห. อัน บอ ยีต ซีณ ซีณวัห ว็อง, แกวะ แตห อี ยึร อัน. โคว, อาโบวอาบ แฮะ ต็อห, “แกวะ แตห อาเซ นับ, อึณ มึห อีบึณ อี ตัห โดง กอย โอว ดี โอ็ง กางน็อห นี.”

15 อาโบวอาบ ปี วี ต็อห ดี นาง รูทา, “บลัห ฮึบ ปี กัน แม ตี ดี นี.” อัน แฮะ ฮอต บลัห, อาโบวอาบ บอ ฆีด โหงว บาลี เดา แบล, ดัว ดี อัน, จอย อัน โจะ. แฮะ ฮอต, อาโบวอาบ เวณ แคง มืง โดง กอย อัน.

16 อัน บอ ตัห ฌัม โดง กอย ฆึณ อัน, ฆึณ อัน บอ ดีหมอด อัน ต็อห, “อึย ฆอน, อึณ บอ ปาย เหมา?” อัน บอ กาลาง แตห ฆึณ อัน โทม ปี ปาย อาโบวอาบ ดี อัน.

17 อัน วี ต็อห, “ดูอี ตึอน แฮะ วี ดัว บอ โหงว บาลี เดา แบล ดี โอว. อัน ต็อห, ‘แกวะ แตห แม เวณ โดว ดีโลย โดง กอย ฆึณ แม.’”

18 ฆึณ อัน วี ต็อห, “ฆอน อึย, แตห แม โอด น็อห, กอย หนีม หนีม, บัร ดี ยอด ลอง อัน ตี, อึณ ดี ปาย เหมา. อีมาย ตี, อัน ตู หน็อะ เหลณ. อัน ดี โบง แตห อึณ ฮอต อาตึร นี ลอง อัน ตี.”