1 วาย ตี อาโบวอาบ บอ ฮาว ตูต บาง มาโลห มืง. อัน บอ ยึร อี มูห วอแว กาเครียะ อาเอลีมาเลก ปี ต็อห อัน ตึอน. ดูอี วี ตี แฮะ ฮาว โดบ อึณเตณ. อัน บอ แดะ ดา อี ตี ต็อห, “อึย ดา ฆึก, ตัห ตูต ดี นี อู กาจัน.” ดูอี ตึอน บอ ตัห ตูต ดี ตี.

2 อาโบวอาบ บอ วี ฮาว แดะ บอ เฆ อี มูห ดา ตาง ฆึร วี แคง มืง ตึอน. อัน บอ ต็อห ดี เฆ, “ตัห ตูต ดี นี.” เฆ บอ ตูต ดี ตี. 3 อัน วี กาลาง ดี ดา อี มูห วอแว กาเครียะ ตึอน ต็อห, “นาง โอวมี อี ตัห มืง โมวอาบ ตึอน, อัน ซี ย็อง โดง นา อี มูห โกรว อาเอลีมาเลก อี มูห อีกัด อาย ตึอน. 4 โอว ทาง, โอว โลว กาลาง แตห แม นับ. เซ แม ซี จึห, แตห แม จึห, แตห บอ เฆ ดูอี อี ตูต ดี นี ยึร, แตห บอ เฆ อี มูห ดา ตาง แคง มืง เอ นี บอ นับ. เซ แม ตู จึห, แม วี กาลาง, แตห โอว นับ. อาว มึห อี ดี กาอาบ จึห แดง แม. อี มูห โอว, โอว โลว ดีหมอด แม ดี อาต.” อัน วี ต็อห ดี อาโบวอาบ, “อึร, โอว อี ดี จึห.”

5 แฮะ ฮอต, อาโบวอาบ วี ต็อห ดี อัน, “แม ฮี จึห โดง นา ตี ดี นาง โอวมี, แม โลว ดึห บอ นาง รูทา อี มูห ยา ซีปรัห อี มูห ดูอี โมวอาบ ตึอน, แตห อัน แบน อีบึณ แม. แม โลว ซืบ คาฆูน เฆ อี แฮะ ฮอต ยัม ตึอน, แกวะ แตห อาโมยว เฆ หราย.”

6 ดูอี ตึอน วี ต็อห, “เซ อึณ ปาย ตี โอว ตู แบน จึห. โอว โยว บอ คาฆูน โอว วี ชึม. แปะ แฮะ กาอาบ โอว จึห ตี, โอว วี อาบ ดัว ดี แม.”

7 ดอ มึอน เฆ ดูอี อีซาเรลัะ มึห ทูงฆยาม ปาย นี. เซ เฆ กาจึห กาย็อง โกรวกราม เฆ, ดูอี ย็อง โลว บูต คูดีณ อัน ดัว ดี ดูอี จึห. เฆ โบง ปาย ตี แตห ดอน อี นับ, ปี กาจึห กาย็อห เฆ แฮะ มูห แฮะ หมาน.

8 ดูอี อี มูห วอแว อาโบวอาบ วี ต็อห ดี อาโบวอาบ, “แตห แม จึห ดี แม.” แฮะ ฮอต, อัน บอ บูต คูดีณ อัน ดัว ดี อาโบวอาบ.

9 อาโบวอาบ วี ต็อห ดี เฆ ดา ตาง บอ เฆ อี กอย ดี ตึอน, “อาตึร นี, แตห เบ แบน ซักเซ ลอง แฮะ จึห โอว โกรวกราม อาเอลีมาเลก, โกรวกราม อาคีโลน, บอ โกรวกราม อามาฮาโลน ดอน โมยว. โอว แฮะ จึห โกรว ตี ดี นาง โอวมี. 10 แดง ตี, โอว แฮะ ปึอน บอ นาง รูทา อี มูห ดูอี โมวอาบ อี มูห อีบึณ อามาฮาโลน ตึอน, แตห อัน วี แบน อีบึณ โอว, แตห โอว วี ซืบ คาฆูน เฆ อี แฮะ ฮอต ยัม ตึอน, แกวะ แตห อาโมยว เฆ หราย, แตห เฆ มึห หลูกหลาน แคง กาง เฆ บอ แคง มืง นี. เบ แฮะ แบน ซักเซ ลอง อัน ตี อาตึร นี.”

11 ปัน ตี แคะ กอย เฆ ดูอี บาง มาโลห มืง บอ เฆ ดา ตาง, เฆ ต็อห, “อึร, เย แฮะ แบน ซักเซ แม. แตห เฌาพรา ม็องการา แตห บอ ดี อีบึณ อี ดี ตัห กอย แคง กาง แม ตี, แตห อัน ปี นาง ราเอน ฆาย นาง เลอา, อี มูห มา ดัง เอ ดูอี อีซาเรลัะ. แม มืร แตห ดอน อี กอย แคง มืง เอพารา นี บอ โรวเซ แม. แตห แม บอ มึห อาพูง ดังโคว แคง มืง เบดแลม นี. 12 เซ เฌาพรา ดี ดัว ฆอน ดี อีบึณ วี นี, แตห อึณโฮม แม บอ ปี อึณโฮม อาเพเรด อี มูห ฆอน อายูดา ฆาย นาง ทามา ตึอน.”

13 แฮะ ฮอต, อาโบวอาบ บอ ดึห นาง รูทา แตห อัน แบน อีบึณ อัน. เฌาพรา บอ แตห อัน แด บาดีก ซันเท. อัน บอ มึห ฆอน อีมาย อู วี.

14 อึณ บอ มึห เฆ อีบึณ มัง อี บอ ต็อห ดี นาง โอวมี, “แตห เอ อืบ เฌาพรา. อาตึร นี เฌาพรา แฮะ แตห แม มึห หลาน อี ดี ยอด แมน แม. แตห อัน แบน ดา ตาง กาแต เอ ดูอี อีซาเรลัะ. 15 ปัน ดี กัด แม อัน ดี ยอด ลึมลา แม. โคว, เอา แม แฮะ แบน มา อัน. แม มืร แฮะ ร็อก อัน หลึอม ฆอน อีมาย บู วี.”

16 นาง โอวมี บอ โจะ โฆ็ง ฆอน งัะ ตี บอ ลึมลา, แตห อัน กอ ปี ฆอน อาราง อัน.

17 เฆ อีบึณ อี กอย กาตัด อัน ต็อห, “นาง โอวมี แฮะ ปึอน ดี เฮียง ฆอน อีมาย.” เฆ บอ ต็อห, แตห อัน จืร อาโอวเบด. อัน ตี วี มูห ฆูณ อาเยเซ. อาเยเซ วี มูห ฆูณ อาดาวีด ตึอน.

18 อี มูห หลูกหลาน อาเพเรด, เฆ จืร ปาย นี. อาเพเรด วี มึห ฆอน อี จืร อาเฮฌาโรน.

19 อาเฮฌาโรน วี มึห ฆอน อี จืร อารามา. อารามา วี มึห ฆอน อี จืร อามีนาดาบ.

20 อามีนาดาบ วี มึห ฆอน อีมาย อี จืร อานาโซน.

21 อานาโซน วี มึห ฆอน อี จืร อาซาลาโฆน. อาซาลาโฆน วี มึห ฆอน อี จืร อาโบวอาบ. อาโบวอาบ วี มึห ฆอน อี จืร อาโอวเบด.

22 อาโอวเบด วี มึห ฆอน อี จืร อาเยเซ. อาเยเซ วี มึห ฆอน อี จืร อาดาวีด.