1 ปัน ตี นาง ฮานา บอ ซาคึร. อัน ต็อห,

“เฌาพรา แฮะ โบง แตห น็อห โอว โบยว ดาคึย โกบ ดัว อัน แฮณ ดี โอว.

โมต โอว นี วี ปึอน กาลาง โฆรห อี แป โตต รันซู โอว. โคว, น็อห โอว แฮะ โบยว ดาคึย. เฆฌู เฌาพรา แฮะ คยอด โอว.

2 อาว มึห อาเซ อี บอด ปี เฌาพรา แฮะ บอด.

อาว มึห เฌา ปอ อู กาดัง อี ปี เฌาพรา ปี กรึบ โอว.

อัน ปี มาว เฆ ดาอาง อี ปึอน บึง. อาว มึห ปี ดี บึง ปอ อู โมยว.

3 แกวะ แตห เบ กาลาง โฆรห ปีคึก.

โฆรห ปีจา, แกวะ แตห อึณ เลห แคง โมต เบ.

โคว, อัน เฌา มูห เฌาพรา อี นับ โตต ดอน โมยว. อัน เฌา ดี บอ ยอด ปี โบง เอ ดอน โมยว, แตห อึณ ปี อัน ซัะ แดง ลัะจู, โยว อึณ ดี จัน ดี อึณ จึร.

4 อัะ เฆ บลา ปี โฆ็ง ดา ซึก อัน เฌา แฮะ แป ดี กาบัก แวน.

เฆ อี แฮะ เกห คา อาต, อัน เฌา ยี วี แตห เฆ มึห แฮณ เฆ โปลม กืน.

5 เฆ อี แฮะ ดึอม โฮม แพ, โฮม ตาง, เฆ ดี วี โลว ฌาง ดี โฮม.

เฆ อี ดึอม เอต ปี ดี โฮม, เฆ ยี ดี วี ปึอน ดี โฮม แพ.

เฆ อี ตู ดึอม มึห ดี เฮียง ฆอน, เฆ ดี วี มึห ฆอน บู วี.

เฆ อี ยี มึห ฆอน กืน, เฆ วี ดีหลัห. แฮณ เฆ ดี วี โยม.

6 เฌาพรา แฮะ นับ ดี แตห อี ยัม บอ นับ ดี แตห อี อีม.

อัน เฌา ตี บอ แตห อี ฌัม มืง มารานัะ, ปี วี แตห อี วี ยีต วี อีม.

7 เฌาพรา โบง แตห อี พลาน บอ แตห อี ครัม.

อัน เฌา ตี อัน แตห เอ โจห โดง เตียม, ปี วี มยูก โจะ แตห เอ กอย โดง จา.

8 อัน เฌา ดี แตห เฆ อี พลาน วี ครัม, แตห อึณ ปี เฆ เลห แคง กาปูห.

บอ เฆ อี ตู มึห มาเซ, อัน แตห เฆ วี มึห, แตห อึณ ปี เฆ เลห แคง พูน เอียง มัก.

อัน ดี วี มยูก แตห เฆ ปึอน ดี กอย โดบ ดา ตาง, แตห เฆ ปึอน อาพูง ดังโคว กืน.

เฌาพรา อี อึบ กาดาย บอกาเฆลียด, อัน แฮะ แตห กาดาย กอย มัน ซีคยา.

9 อัน เฌา ดี ลึมลา เฆ อี ซีงา บอด, อี โดบ อัน, แกวะ แตห เฆ กาลึบ.

เฆ อี ตู บอด, เฆ ดี กอย แคง อับ ว็อง, อาว ฮู ปึอน กาลาง โฆรห ปีจา.

อาว มึห อาเซ อี ปึอน แป โกบ บึง อัน โดว บรีม อัน.

10 เฆ อี แคณ เฌาพรา, เฌาพรา ดี บยัด แวน, แตห เฆ หราย.

อัน เฌา ดี วี กาแคณ ดี เฆ, แตห อึณ ปี กานัม ฮัม แคง เบลณ.

เฌาพรา ดี ซูงพยาด ดารา ดี ดอน อี, แตห อึณ กอ ฌัม โดง ซืด กาดาย.

อัน เฌา ดี แตห แฮณ เฆ โปลม ดี คูนดีคัม ปี ร็อห อัน.

อัน ดี อืบ มยูก ดา อี ปี ร็อห ปี ตึย อัน, อี ดี คัม ดี พ็อห นามัน ดี ฆีณ อัน.”

แคะ ตี นาง ฮานา อืบ เฌาพรา.

11 วาย อัน ตี อาเอนคานา บอ วี วีว ดี กาง อัน อี กอย แคง มืง รามา ตึอน. ปัน ตี ฆอน ตึอน บอ โบง ฆาน แคง โฮว เฌาพรา โดบ อาเอลี อี มูห ดา อี หลู ดี เฌาพรา.

12 ฆอน อาเอลี ตึอน มูห ฆอน ตู โทม โฆรห. ฆาย ตู โรวเซ เฌาพรา. 13 เฆ ดา อี หลู ดี เฌาพรา บอ เฆ ดูอี อี ตัห หลู, เฆ โดบ ทูงฆยาม อู โมยว. เซ อึณ มึห อู วี อู วี อี ตัห หลู โดว ซัดดาวา, เฆ วี ก็อง ยัง ตี แคง กาโละ. เซ อึณ ตู มูห แคง กาโละ, เฆ วี ก็อง แคง มาคาง. เซ อึณ ตู มูห แคง มาคาง, เฆ ก็อง แคง ฆลาว. ดอ ก็อง เฆ ตี, อึณ มึห แดเจณ ดา อี หลู ดี เฌาพรา อู วี, อัน ดี ตัห โฆ็ง มัง แฌต อี มึห การา โอย บัต. 14 อัน ตา ดูห ดูห แคง กาโละ ตึอน. ยัง อี ดึก ดี มัง แฌต อี บัต, ดา อี หลู ตึอน บอ ดึห ดี อัน. เฆ โบง ปาย ตี ดี ดูอี อีซาเรลัะ ดอน อี อี ตัห หลู ดี มืง ซีโลว ตึอน. อาต ก็อง เฆ ยัง, ดา อี หลู ดี เฌาพรา ยี โลว ดึห เบรียง, วี โดะ แคง เงา ดี อาต. 15 เฆ ยี ตู โบง ปาย ตี. อาต โดะ เฆ เบรียง, แดเจณ ดา อี หลู ดี เฌาพรา บอ ตัห ต็อห ดี ดูอี อี ตัห หลู, “ดัว ยัง อู บูน ดี ดา อี หลู ดี เฌาพรา, แตห อัน ปึอน ดี โคว. อัน ตู โลว ยัง แปะ แฮะ ก็อง. อัน ดึห มี ยัง อีม ดีโลย.”

16 เซ ดูอี ตึอน ต็อห, “แตห แม ดึห ยัง เบรียง โดะ แคง เงา ดี อาต. วาย ตี, แม ปึอน ดี โบง ปี ซี โบง แม.” อัน ปี วี กาลาง ต็อห, “อาว มูห ปาย ตี. แม โลว ดัว ดี โอว ดอ ตี นี. เซ อาว ปาย ตี โอว ดี พาด ดึห ปาย ตี.”

17 ฆอน อาเอลี นับ ดี โบง ปาย ตี. โคว, หมาบ ฆาย แฮะ กืน กาเซา ดี อาต เฌาพรา โกบ ตู โรวเซ ฆาย ปี ดี หลู ดี เฌาพรา.

18 อึณ ยี มูห อาซามูเอน อี ชึบ ซีโตว ดีกรัห อี จืร ซีโตว เอโพด. อึณ มูห ซีโตว กาตัม ลูย. อัน บอ โบง ฆาน เฌาพรา. 19 ดอน ซีนัม, ดอ วี โฮะ ฆูณ มา อัน บอ หลู ปี ดึอม โบง เฆ คา อาต, มา อัน นับ ดี จีณ ซีโตว ดีแตด, ดึห ตัห ดัว ดี อัน. 20 อาเอลี บอ ม็องการา แตห อาเอนคานา ฆาย อีบึณ อัน. อัน ต็อห, “อีบึณ แม แฮะ ฮอต หมาณ ฆอน ดี เฌาพรา. อัน แฮะ ฮอต วี หลู ดี เฌาพรา. แตห เฌาพรา วี ดัว ฆอน ปอ วี ดี อีบึณ แม, แตห ฆอน ตี กาดาง ฆอน แปะ แฮะ หลู อัน ตี.” แฮะ ฮอต ปัน ตี อาเอนคานา ฆาย อีบึณ อัน วี เวณ โดง กอย ฆาย. 21 เฌาพรา บอ กาเว นาง ฮานา, บอ แตห อัน แด บาดีก ซันเท, แตห อัน ปึอน ดี เฮียง ฆอน อีมาย ปอ โอย วี, ฆอน อีบึณ อา วี. ฆอน อี จืร อาซามูเอน ตึอน บอ เหรห บอ ตาง ดอ กอย อัน แคง โดง กรึบ เฆ เฌาพรา.

22 อาเอลี ตึอน แฮะ แกร ดี กัด กาเซา. อัน บอ ยึร ลอง ปี โบง ฆอน อัน ดอน โมยว ดี ดูอี อีซาเรลัะ. อัน บอ นับ ลอง แปะ แฮะ ลาย ลาย เฆ ดี ฆอน อีบึณ อี กอย ดี โคบ มาโลห แคง โฮว เฌาพรา ตึอน. 23 อัน บอ ต็อห ดี ฆาย, “เหมา อึณ ปาย ปี โบง บาย ปาย ตี? หมาบ แปะ แฮะ โบง บาย ตี ดอน โมยว, อี เฮา แฮะ กาลาง โตต, แตห โอว ยึร. 24 ฆอน บาย อึย, อาว หมึอม แปะ แฮะ ยึร โอว ตี. บาย โบง แตห ดอน อี แฮะ นับ ลอง ปี โบง บาย ตี. 25 เซ ดูอี แฮะ ลาย กาลูต, เฌาพรา นับ ดี จอย แตห อึณ วี ดาคึย. เซ ดูอี ยี กาลูต ดี เฌาพรา, อาว มึห อี ดี ปึอน จอย อัน.” ฆอน อาเอลี ตึอน ยี ตู โทม โฆรห ฆูณ ฆาย. โคว, เฌาพรา แฮะ ฮอต ซูงพยาด ดี แตห ฆาย ยัม.

26 อาซามูเอน ยี เหรห บอ ตาง บอ โบง ฆาน อี บอด อี หมึอม ดี อาต เฌาพรา. บอ ดูอี ดอน อี อึง ปี โบง อัน.

27 วาย อัน ตี ดูอี ปี ตึย เฌาพรา อู วี, อัน ตัห กาลาง ดี อาเอลี. อัน ต็อห, “เฌาพรา ต็อห, ‘โอว แฮะ กาปลูห ดี ดูอี อาโมยว แม ดอ กอย เฆ แคง มืง แอฆึบ, แบน หมาย คูนดีคัม พาโรว ตึอน. 28 โอว แฮะ ร็อห ฆูณ แม แคง ดูอี อีซาเรลัะ บอกาเฆลียด, แตห อัน แบน ดูอี อี หลู ดี โอว, แตห อัน หลู แดง กาโช็ง หลู ดี โอว, แตห อัน บอ โดะ อึณกรึห อูห หงูน แคง เงา. โอว มืร แตห อัน ชึบ ซีโตว เอโพด นา อาต โอว. โอว มืร ดัว ดี อัน บอ อึณโฮม อัน, แตห อัน ปึอน ดี โฮม ปี ดี หลู ดอน โมยว อี โดะ แคง เงา. 29 เหมา อึณ ปาย, ปี ตู โรวเซ แม ปี ดี หลู อี ดี โอว? อึณ มูห ปี จัร โอว เฆ หลู ดี โดง กอย โอว. โกบ มาเซ ปี วี โรวเซ แม ฆอน แม หลึอม โรวเซ แม ดี โอว? เบ แฮะ ฆลัณ กาเซา ดอน อี, โกบ ดึห เบ ยัง อี หมึอม ดี ดอน โดว ปี หลู ดูอี อีซาเรลัะ ดี โอว.’

30 โกบ โบง เบ ปาย ตี, เฌาพรา อี มูห เฌาพรา ปี กรึบ ดูอี อีซาเรลัะ, อัน ต็อห, ‘โอว แฮะ ดัว กาดีก ซัดฌา บอ ดี แม ต็อห, อึณกรึห แม บอ อึณกรึห ฆูณ แม, เบ ดี ปึอน ดี โบง ฆาน โอว เซเซ.’ ดอ ตี นี เฌาพรา ยี วี กาลาง ต็อห, ‘โอว แฮะ แวน กาดีก ซัดฌา ตี. โอว ดี วี มยูก อืบ เฆ ดูอี อี อืบ มยูก โอว. เฆ อี ตู โรวเซ โอว, เฆ ยี โลว คัม แตห ซาเร เฆ ชึม.’ 31 แม ยอด, อึณ ดี ฌัม ซีแง ดี แวน โอว แฮณ แม บอ แฮณ เฆ อี มูห อึณกรึห ฆูณ แม. แคง วอแว แม อาว ฮู มึห ดูอี กัด. อู วี มืร อาว ฮู มึห. 32 แม ดี ยึร ดูก ตาง แคง โดง กอย โอว. อึณ ดี บอ มึห นา หมึอม ปี ดี โบง โอว ดี ดูอี อีซาเรลัะ. แคง อึณโฮม แม อึณ ยี ตู วี มึห ดูอี กัด ดอ เหมา. 33 โอว ตู แวน อี มูห ดูอี อาโมยว แม ดอน อี. เฆ อี ซี กอย ตี ดี บอ ยาม กืน, แตห งาย เฆ กอ โอบ, อาว ปึอน ยึร มาเซ. โอว ดี แตห แม ยึร ลอง อัน ตี, แตห น็อห แม ดีแตด บอ กลึร กาเซา. เฆ หลูกหลาน แม ดอน อี ดี ยัม อาต กัด เฆ.

34 อึณ ยี มูห ฆอน แม อี จืร อาฮอพีม ฆาย อาพีเนฮาด, ฆาย อา วี ตี, ฆาย ดี ยัม อู ซีแง. ลอง อัน ตี ดี แตห แม นับ, แปะ แฮะ กาลาง โอว แฮะ หมาน. 35 ปัน ตี อาเซ โดบ ซีคยา โอว, โอว ดี แตห อัน วี แบน ดา อี หลู ดี โอว. อัน ดี โบง แคะ ปี อึง โอว, แคะ ปี กาพา โอว. โอว มืร ดี โบง แตห หลูกหลาน อัน กอย ซีคยา. อัน ดี ปึอน ดี โบง ฆาน ดูอี ปี ร็อห ปี ตึย โอว เซเซ, อี มูห ดูอี แปะ แฮะ พ็อห โอว นามัน ดี ฆีณ อัน. 36 เฆ อี ซี ฆีด, อี มูห อึณกรึห แม ดอน อี, เฆ ดี กาโพรม ดี ตัห โดง กอย ดา อี หลู ดี เฌาพรา ตี. เฆ ดี กาดูห ดี ตัห กรึบ หมาณ รึอน อู บยา บอ คามูน อู โบ็ง. เฆ ดี บอ ตัห ต็อห ดี อัน, “หมาณ แตห แม ควาง โอว โบง ฆาน แคง โดง หลู แม นี, แตห โอว มึห ปี ดี โฮม.”