1 อาซามูเอน โบง ฆาน เฌาพรา โดบ อาเอลี ตึอน. ดอ มูห คราว ตี, เฌาพรา ตู โกบ กาลาง โฆรห ดี อี. อึณ ราม นาน ดี ยึร อาโรง ปี บยัะ เฌาพรา.

2 ดอ อัน ตี งาย อาเอลี อาว ฮู ลึห ซีคยา. อู หมึร, อัน บอ ฮาว อีด โดง อีด อัน. 3 เงา ราง ปี ปีด็อะ เฆ นา อาต เฌาพรา หณัม ยัด. อาซามูเอน ตึอน มืร อีด โดง อีด อัน แคง โดง กรึบ เฆ เฌาพรา, อี มูห โดง กอย ฌีดืก เฌาพรา ตึอน. 4 เฌาพรา บอ แดะ อาซามูเอน ตึอน. อัน บอ เวียะ โฆรห ตี ต็อห, “โอว กอย ดี นี.” 5 อัน แฮะ ฮอต ต็อห ปาย ตี อัน วี กาแบลบ ฮาว โดง กอย อาเอลี ตึอน. อัน ต็อห, “แม ดา, แม แฮะ แดะ โอว? โอว แฮะ ตัห ดี นี.” อาเอลี วี ต็อห, “โอว ตู มึห ดี แดะ แม, แม วี ฮาว อีด โดง อีด แม.” อัน ปี วี ฮาว อีด โดง อีด อัน.

6 เฌาพรา ปี วี แดะ ปอ อู เฌณ, วี ต็อห, “อึย อาซามูเอน, อึย อาซามูเอน.” อัน ปี วี ยีต ฮาว โดง กอย อาเอลี ตึอน. อัน ปี วี ต็อห, “แม ดา, แม แฮะ แดะ โอว. โอว แฮะ ตัห.” อาเอลี ปี วี ต็อห, “โอว ตู มึห ดี แดะ แม, ฆอน อึย. แตห แม ฮาว อีด โดง อีด แม.”

7 อาซามูเอน หณัม นับ เฌาพรา. อัน หณัม ดึอม ยึร โฆรห เฌาพรา.

8 ปอ อู เฌณ, เฌาพรา แดะ อาซามูเอน ตึอน. อัน บอ ยีต ฮาว โดง กอย อาเอลี ตึอน. อัน ต็อห, “โกบ มาเซ แม ดา แฮะ แดะ โอว? โอว แฮะ ฮอต ตัห.” ปัน ตี อาเอลี บอ นับ, อึณ มูห เฌาพรา อี แดะ ฆอน วี นี. 9 อาเอลี วี กาลาง ดี อัน ต็อห, “แตห แม วี ฮาว โดง อีด แม. เซ แม ยึร อี แดะ แม ปอ อู เฌณ, แตห แม วี ต็อห, ‘อึย แม เฌา, มาเซ ปี โลว แม? โอว แฮะ กอย ดี นี โทม, แตห แม กาลาง ดี โอว.’” วาย อัน ตี อาซามูเอน บอ วี ฮาว อีด โดง อีด อัน.

10 เฌาพรา บอ ตัห ปี คา อาต ตึอน. อัน ต็อห, “อึย อาซามูเอน, อึย อาซามูเอน.” แฮะ ฮอต ปัน ตี อาซามูเอน วี ต็อห, “อึย แม เฌา, มาเซ ปี โลว แม? โอว แฮะ โทม.”

11 เฌาพรา มืร วี ต็อห ดี อัน, “บัร แม ยอด, ปี ดี โบง โอว ดี เฆ ดูอี อีซาเรลัะ. โอว ดี แตห เฆ อี โทม ลอง อัน ตี, อึณ ปี ดี ฮัม ซ็อห แคง กาเดา โหยะ เฆ, แกวะ แตห เฆ ซี ปึอน คัม. 12 ซีแง ตี, โอว ดี โบง ดี อาเอลี แคะ ปี ดึอม กาลาง อูน โอว ลอง อึณโฮม อัน. ปี ดึอม กาลาง โอว ซีณ ดอ โฆว, แตห อึณ กอ ฌัม กาแดะ ฮอต โตต, โอว ดี โบง ดอน โมยว. 13 โอว แฮะ ดึอม กาลาง อูน ดี อัน ลอง ปี ดี ดัม โอว หมาบ ดี อึณโฮม อัน. อึณ มูห หมาบ แปะ แฮะ นับ อัน, หมาบ แปะ แฮะ โบง ฆอน อัน ฆาย ตึอน. ฆาย ตู โฆม เฌาพรา. อัน มืร ตู มาโนว, ตู แคร ฆอน อัน, แกวะ แตห ฆาย โบง. 14 โคว, โอว แฮะ ดัว กาดีก ซัดฌา ดี อึณโฮม อาเอลี ตึอน. โอว แฮะ ต็อห, อาว มึห โกรว ปี ดี หลู อี ปึอน ฆ็อห แวน หมาบ ตี ดอ เหมา.” แคะ ตี เฌาพรา กาลาง ดี อาซามูเอน.

15 บอ ฌัม ซีณวัห, อาซามูเอน บอ ฮาว วึห มาโลห แคง โฮว เฌาพรา. อัน ยี ตู ยัะ กาลาง ดี อาเอลี ลอง แปะ แฮะ ยึร อัน แคง หมึร. 16 อาเอลี บอ แดะ อาซามูเอน. อัน ต็อห, “อึย อาซามูเอน, ฆอน โอว.” อาซามูเอน บอ เวียะ โฆรห อัน ต็อห, “อึร, โอว กอย ดี นี.”

17 อาเอลี บอ ต็อห ดี อัน, “มาเซ ปี ต็อห เฌาพรา ดี แม? แม แกวะ เครียง มาเซ ดี โอว. เซ แม ฮี เครียง อู โมยว, เฌาพรา ดี โบง แตห อึณ กาเซา บอ ดี แม.” 18 อาซามูเอน ตึอน มืร ตู เครียง มาเซ. อัน กาลาง โตต, แตห อาเอลี นับ. อาเอลี บอ โทม. อัน วี ต็อห, “อึณ มูห เฌาพรา, แตห อัน โบง แคะ ปี อึง อัน.”

19 อาซามูเอน มืร แกร ดี ตาง. เฌาพรา มืร กอย รึม โดบ อัน เซเซ. โฆรห ปี กาลาง อัน, อู แด มืร ตู ชึม. อึณ แบน โตต ดอน โมยว ปี ดึอม กาลาง อัน. 20 เฆ ดูอี อีซาเรลัะ บอกาเฆลียด อี กอย จูห ดี มืง ดาน กอ ฌัม มืง บีราเซบา, เฆ แฮะ นับ โตต ลอง อาซามูเอน แฮะ แบน ดูอี อี บยาน โฆรห เฌาพรา. 21 เซ เฌาพรา ตัห กาลาง โฆรห ดี ดูอี, อัน ตัห กาลาง ดี มืง ซีโลว เซเซ. เฌาพรา บอ กาลาง โฆรห ดี อาซามูเอน, แตห อัน นับ โตต ดอน โมยว ลอง เฌาพรา.