1 อาซามูเอน ปี วี กาลาง ดี ดูอี อีซาเรลัะ บอกาเฆลียด แตห เฆ โทม.

ปัน ตี ดูอี อีซาเรลัะ ต็อห ดี ฮาว กาโฆห ดี ดูอี พีลีที. เฆ ดา ซึก ดูอี อีซาเรลัะ บอ ตัห คยัะ โคบ มืง เอปัะเนจัะ. อี มูห ดา ซึก พีลีที บอ คยัะ โคบ มืง เอแพก. 2 ดูอี พีลีที เฆ แรน ซีคยา โดว เฆ. ปัน ตี เฆ บอ กาโฆห ดี ดูอี อีซาเรลัะ. ดูอี อีซาเรลัะ บอ ชึม ดี เฆ ดูอี พีลีที ตึอน. เฆ ดูอี พีลีที บอ ง็อห ยัม ดา ซึก ดูอี อีซาเรลัะ พวน แหรณ วี. 3 เฆ ดา ซึก ดูอี อีซาเรลัะ บอ วี ตัห ฌัม โดง คยัะ เฆ. เฆ อี มูห ดา ตาง ดูอี อีซาเรลัะ บอ ลาย กามวน ต็อห, “โกบ อึณ ปาย เหมา, เฌาพรา แตห เอ ชึม ดี เฆ ดูอี พีลีที อาตึร นี? แตห เอ ฮาว ดึห เลห ฌีดืก เฌาพรา อี กอย ดี มืง ซีโลว ตึอน, แตห อึณ ตัห ฌัม โดง กอย เอ นี, แตห อึณ คยอด เอ, แตห เอ ลอด ตัะ รันซู เอ.”

4 เฆ บอ จัร ดูอี มัง อี ฮาว ดี มืง ซีโลว ตึอน. เฆ บอ ดึห ตัห ฌีดืก เฌาพรา อี มูห โดง กอย เฌาพรา อี อึบ โตต ดอน โมยว, อี กอย ดี กาแต ราง อามู อามาด เฌาพรา. อี มูห ฆอน อาเอลี อี จืร อาฮอพีม ฆาย อาพีเนฮาด อา วี ตึอน, ฆาย มืร ตัห โดบ ฌีดืก เฌาพรา ตี.

5 ฌีดืก ตี แปะ แฮะ ฮับ เฆ ปี กาแซณ เฌาพรา ดี เฆ ดูอี อีซาเรลัะ, อึณ บอ ตัห ฌัม โดง คยัะ เฆ ดา ซึก. แฮะ ฮอต, เฆ ดูอี อีซาเรลัะ บอกาเฆลียด บอ กาโพรม ดี โคย, ดัด ซีนัน ซีนืง, แตห กาดาย กอ แหนน ดี ดีเยณ.

6 เฆ ดูอี พีลีที ตึอน บอ ยึร ปี ซีนัน ซีนืง เฆ ตึอน, เฆ วี ดีหมอด ต็อห, “มาเซ อึณ มูห อี อาฮืน โดง คยัะ ดูอี แฮแบร ตึอน?” 7 เฆ บอ นับ, ฌีดืก เฌาพรา แฮะ ตัห ฌัม โดง กอย เฆ. ปัน ตี ดูอี พีลีที เฆ บอ โยว. เฆ วี ลาย กาลาง ต็อห, “อัน เฌา อู กาดัง แฮะ ตัห ฌัม โดง คยัะ เฆ. เอ ดี ชึม ดี เฆ.” เฆ วี ต็อห, “อึณ อาว หมึอม ดี เอ. อาว ดึอม ปาย นี คอ อู เฌณ. 8 อาเซ ดี จอย แตห เอ ลอด ตัะ อัน เฌา อี มึห อาพูง ดังโคว ตาง ตี? อัน เฌา ตี มูห อัน เฌา อี ดึอม แตห ดูก ดอน โมยว ดี เฆ ดูอี แอฆึบ ตึอน. อัน ดัม หมาบ ดี เฆ ดอ กอย เฆ แคง แปร กาฮ็อห ตึอน. 9 เอ ดูอี พีลีที, เอ โลว โบง ปี กาอาบ อีมาย โบง. เอ โลว มึห แฮณ กืน, แกวะ แตห เอ กาดูห ดี แบน หมาย ดูอี แฮแบร ตี, แกวะ แตห อึณ ปี เฆ แฮะ ดึอม กาดูห ดี แบน หมาย เอ. แตห เอ กาโพรม ดี กาโฆห ปี โลว โบง อีมาย.”

10 ปัน ตี เฆ บอ กาโฆห ดี ดูอี อีซาเรลัะ ตึอน. เฆ ดูอี อีซาเรลัะ บอ ชึม ดี เฆ. เฆ ดูอี อีซาเรลัะ บอ เตา ฮาว เครียง แคง ทึบ บีก เฆ ตึอน. เฆ อี แฮะ กาโฆห, เฆ กืน กาเซา แฮะ ยัม. อี มูห ดา ซึก อี ฮาว ดี เปลา ตึอน, เฆ แฮะ ยัม โอย หมึณ วี. 11 บอ ฌีดืก เฌาพรา ตึอน, ดูอี พีลีที เฆ แฮะ ฮอต ดึห ฮาว. อาฮอพีม ฆาย อาพีเนฮาด, อี มูห ฆอน อาเอลี ตึอน มืร แฮะ ฮอต ยัม.

12 ซีแง อัน ตี อึณ มึห ดูอี อาโมยว อาเบนยาม อู วี, อี ตัห โดง กาโฆห เฆ. ครึง ปี ตา อัน แฮะ กายาต, บอ กาปูห แฮะ ฮูย แดง ฆีณ อัน. อัน บอ กาแบลบ ฮาว ฌัม มืง ซีโลว ตึอน. 13 ดอ ตัห ฌัม อัน แคง มืง, อาเอลี ตูต แดง กาโช็ง โคบ อึณเตณ. น็อห อัน มืร อาว ฮู ดาคึย โกบ โหลห อัน ฌีดืก เฌาพรา ตึอน, โยว อึณ แบน ดูก. ดูอี ตึอน บอ กาลาง ดี ดูอี ลอง ปี ปาย เฆ ดี กาโฆห ตี. ปัน ตี ดูอี เฆ ตึอน บอ มืง บอ กาโพรม ดี ยาม.

14 อาเอลี บอ ยึร ซีนัน ยาม เฆ ตึอน, อัน วี ต็อห, “อึณ มูห ซีนัน มาเซ?” ดูอี ตึอน บอ ปีครัน อัน, ต็อห ดี ฮาว กาลาง ดี อาเอลี. 15 ดอ อัน ตี อาซาก อาเอลี แฮะ ปึอน ดีม ฆึร ดี ดา ซีนัม. งาย อัน มืร อาว ฮู ลึห. อาว ฮู ปึอน ยึร มาเซ. 16 ดูอี ตึอน บอ กาลาง ดี อาเอลี. อัน ต็อห, “โอว แฮะ ตัห โดง กาโฆห เฆ. อาตึร นี โอว แฮะ เตา เลห โดง กาโฆห เฆ ตี.” อาเอลี บอ ดีหมอด ต็อห, “อึย ฆอน โอว, อึณ ปาย เหมา?”

17 ปัน ตี ดูอี อี ตัห กาลาง ลอง กาโฆห ตึอน, อัน วี ต็อห, “ดูอี อีซาเรลัะ แฮะ กาดูห ดี เตา ตัะ ดูอี พีลีที. เฆ แฮะ กาโฆห, แฮะ กาง็อห กืน กาเซา. ฆอน แม อี มูห อาฮอพีม ฆาย อาพีเนฮาด มืร แฮะ ฮอต ยัม. ฌีดืก เฌาพรา มืร เฆ ดูอี พีลีที แฮะ ฮอต ดึห ฮาว.”

18 ดูอี ตึอน แฮะ ฮอต กาลาง ลอง ฌีดืก เฌาพรา ตึอน, อาเอลี บอ กาเบลียะ เกห นา ปัน. อัน บอ โจห แดง อึณบาง โดง ตูต อัน ดี โคบ มาโลห ตึอน. แมง อัน บอ กาบัก. อัน บอ ยัม ดี ตี. อัน มืร แฮะ กัด กาเซา. โดว อัน บอ จัน กาเซา. อัน แฮะ แบน ดา ตาง อี ซูงพยาด อามู ดูอี อีซาเรลัะ อาดา พวน ฆึร ซีนัม.

19 อึณ ยี มูห เอา อัน, อีบึณ อาพีเนฮาด ตึอน, อัน แฮะ ตู อัห, แฮะ กาตัด ดี ฆึอด ฆอน อัน. อัน บอ ยึร ลอง อี แฮะ ดึห ฮาว ฌีดืก เฌาพรา บอ ลอง บึร อัน ฆาย อีมาย อัน แฮะ ฮอต ยัม, บอ แบน วัต เซา. ฆอน อัน บอ ฆึอด อู เฌณ. 20 ปัน ตี อัน บอ รีน ดี ยัม. อีบึณ อี จอย อัน ตึอน บอ กาลาง ดี อัน ต็อห, “แม แกวะ กลึร, แม แฮะ ฆึอด ฆอน อีมาย.” อัน ตึอน ยี ตู โฆรห, ยี ตู ต็อห มาเซ.

21 แฮะ ฮอต ปัน ตี อัน บอ แตห ฆอน อีมาย อัน จืร อาอีคาบูด. ลอง ดาง อัน อึณ เลห, “อาพูง ดังโคว เฌาพรา อี กอย กาแต เฆ ดูอี อีซาเรลัะ แฮะ หราย.” เฆ ต็อห ปาย ตี โคว, อี แฮะ ดึห ฮาว ฌีดืก เฌาพรา ตึอน บอ โกบ หมาบ ปี โบง บึร อัน ฆาย อีมาย อัน ตึอน. 22 อัน ต็อห, “อาพูง ดังโคว เฌาพรา แฮะ ฮอต หราย แคง มืง อีซาเรลัะ โกบ แฮะ ปึอน อี เฮา ดี ดึห ฮาว ฌีดืก เฌาพรา.”