1 อาซาโลวโมว ตึอน บอ ลาย แบน อู ฆึก ดี คูนดีคัม พาโรว แคง มืง แอฆึบ ตึอน. อัน บอ ดึห ฆอน อีบึณ คูนดีคัม พาโรว, แตห อัน แบน อีบึณ อัน. อัน บอ แตห นาง ตี กอย แคง มืง อาดาวีด ตึอน. อัน บอ ซัม โฮว เฌาพรา บอ แรง มืง เยรูซาแลม, แตห อึณ กอ ฮอต โตต. 2 โกบ อึณ หณัม มึห โฮว เฌาพรา, ดูอี เฆ ตึอน ซี หลู ปี ดี หลู เฆ โดง กอย นา กัว แบน โปละ แบน โปละ. 3 อาซาโลวโมว ยี ร็อก กาเซา เฌาพรา. อัน โบง โดบ ดารา ปี ดึอม โบง โดบ ฆูณ อัน อี มูห อาดาวีด ตึอน. มาแล, อัน บอ ดึห โดว ซัดดาวา บอ ซีนัม อูห หงูน อี โดะ ดี เงา, หลู ดี กาโช็ง หลู อี กอย โดง จา แบน โปละ แบน โปละ.

4 คูนดีคัม บอ ฮาว ดี มืง กีปอง, แตห อัน ปึอน ดี หลู ดี ตี. โคว, กาโช็ง หลู อี กอย โดง จา ดี ตี อาเร อัน แฮะ ตาง หลึอม โดง จา แบน โปละ แบน โปละ. อัน บอ ดึห ปี ดี หลู อี โดะ ดี เงา, หลู แดง กาโช็ง หลู ตี อู แหรณ เฌณ. 5 ดอ กอย อาซาโลวโมว ดี มืง กีปอง ตึอน, เฌาพรา บอ กาปลูห ดี อัน ดอ อีด อัน แคง หมึร. อัน บอ อีด อึณบาว. เฌาพรา บอ ต็อห ดี อัน, “แตห แม หมาณ ดี โอว แคะ ปี ซี หมาณ แม.”

6 อาซาโลวโมว บอ ต็อห, “แม เฌาพรา แฮะ เฆฌู กืน กาเซา ดี แดเจณ แม อี มูห ฆูณ โอว อาดาวีด โกบ โดบ ซีคยา อัน ดี แม เฌา. อัน มืร มึห น็อห โดบ ดารา บอ น็อห ซืร น็อห หมาน. แม เฌาพรา แฮะ ร็อก กาเว อี มูห ฆูณ โอว, วี ดัว ฆอน อีมาย ดี อัน, แตห อัน ปึอน ดี อึบ มืง กอ ฌัม อาตึร นี. 7 ดอ ตี นี, แม เฌาพรา, แม มูห เฌาพรา ปี กรึบ โอว. แม เฌา แฮะ แตห โอว ปึอน ดี แบน คูนดีคัม กาดาง ฆูณ โอว อี มูห อาดาวีด. มาแล, โอว ยี ซี มูห ฆอน, โอว โยว โอว ตู แป ดี อึบ ซีคยา. 8 โอว ยี กอย กาแต ดูอี แปะ แฮะ ร็อห แม เฌา, อี มูห ครึร ดูอี ตาง, อี กืน กาเซา, กอ ฮู นับ ดี ตีห. 9 โคว อัน ตี โอว หมาณ, แตห โอว แดเจณ แม นี มึห อางยาน แคง น็อห โอว. แตห โอว นับ ดี ซูงพยาด อามู ดูอี อี มูห ดูอี แปะ แฮะ ร็อห แม. แตห โอว นับ ดี กาย็อห ลอง อี หมึอม บอ อี ตู หมึอม. เซ แม เฌาพรา ตู จอย, อาว มึห อาเซ อี ดี แป ดี อึบ ดูอี กืน เฆ ตี อี มูห ดูอี อาโมยว แม.”

10 โฆรห ปี หมาณ อาซาโลวโมว ตึอน อึณ ล็อะ กาเซา น็อห เฌาพรา. 11 เฌาพรา วี ต็อห ดี อัน, “แม แฮะ หมาณ มี แคะ ตี. แม ตู หมาณ แตห อาซาก แม โต็ง, ตู หมาณ โกรวกราม กืน, ตู หมาณ แตห แม แป รันซู แม. แม ยี หมาณ มี อางยาน บอด, แตห แม ปึอน ดี ซูงพยาด นา หมาน. 12 โคว อัน ตี โอว ดี แตห แคะ ปี หมาณ แม ตี. โอว ดี แตห น็อห พึอม อี แฌะฌูง ดี แม, แตห แม หล็อก แหลม, มึห อางยาน บอด. บอ อาต แม บอ วาย แม อาว มึห อี ปี แม คอ อู วี. 13 แดง ตี โอว ดี บอ แตห บอ ปี ตู หมาณ แม. บอ โกรวกราม บอ ซาเร โอว ดี ดัว ดี แม, แกวะ แตห อึณ มึห คูนดีคัม อี ปี แม ดอ มูห โจว แม นี. 14 เซ แม บอ โบง ปี อึง โอว, โบง โดบ โตต ดารา โอว, แตห อึณ ปี แปะ แฮะ โบง ฆูณ แม อี มูห อาดาวีด ตึอน, โอว ดี บอ แตห อาซาก แม โต็ง.” 15 วาย อัน ตี อาซาโลวโมว บอ วี อึณซึห. อัน บอ นับ อึณ มูห อัน อีด อึณบาว. ปัน ตี อัน บอ วี ฮาว ดี มืง เยรูซาแลม. อัน บอ ฮาว โดง กอย ฌีดืก เฌาพรา บอ หลู ปี หลู อี โดะ ดี เงา. อัน บอ หลู ปี หลู อี กอย กาฌูะ โฮม รึม. อัน บอ โบง บลอย เฮียง แดเจณ อัน บอกาเฆลียด.

16 ปัน ตี อึณ มึห ยา มาลัม อา วี ตัห โดง กอย คูนดีคัม ตึอน, ตัห กอย นา อาต อัน. 17 อีบึณ อู วี บอ ต็อห ดี อัน, “อึย แม คูนดีคัม, บอ โอว บอ อีบึณ วี นี ยาย กอย ดีรึม อู กาง. ฆอน โอว อี มูห แดเจณ แม นี บอ ฆึอด ตัห ดอ กอย อัน โคบ โอว. 18 วาย ฆอน โอว แฮะ ฆึอด, แฮะ ปึอน โอย ซีแง, ฆอน อีบึณ วี นี บอ วี ฆึอด ดอ อัน ตี. ยาย กอย ดีรึม อู กาง, อาว มึห อี เฮา คอ อู วี. อึณ มึห มี ยาย อา วี.

19 กาแต ซึอม ฮู มึอน, ฆอน วี นี บอ ยัม. โกบ แฮะ อีด ทีบ อัน ฆอน อัน. 20 กาแต ซึอม ตี, ดอ ปึอน โอว ดี อีด, อัน วี ยีต ดึห ฆอน โอว, วี ฮาว เบลห โคบ อัน, แตห อึณ ปู ดี อัน. อัน วี เบลห ฆอน อี แฮะ ยัม ตี กอย โคบ โอว. 21 ซีณวัห โอว บอ ยีต ต็อห ดี แตห ฆอน โอว ปู. ฮอต, แฮะ วี ฮอต ยัม. ปัน ตี โอว บอ วี ยอด ซีคยา, กอ นับ, อาว มูห ฆอน อาราง โอว.”

22 อีบึณ ปอ อู วี ตึอน ปี วี ต็อห, “อาว มูห, ฆอน อี อีม ตี มูห ฆอน โอว. ฆอน อี แฮะ ยัม ตี มูห ฆอน แม.” อีบึณ และ อาต ตึอน ปี วี ต็อห, “อาว มูห ปาย ตี. ฆอน อี ยัม ตี มูห ฆอน แม. ฆอน อี ซี อีม ตี มูห ฆอน โอว.” ฆาย ตึอน บอ ลาย กาลาง ปาย ตี ดี อาต คูนดีคัม.

23 แฮะ ฮอต, คูนดีคัม บอ ต็อห ดี ฆาย, “อีบึณ อู วี แฮะ ต็อห, ‘ฆอน อี ซี อีม ตี มูห ฆอน โอว. ฆอน อี แฮะ ยัม มูห ฆอน แม.’ ปอ อู วี ปี วี ต็อห, ‘อาว มูห ปาย ตี. ฆอน แม อี แฮะ ยัม, ฆอน โอว อี ซี อีม.’”

24 ปัน ตี คูนดีคัม วี ต็อห, “ดึห ตัห มาปัวะ ลาง ดัว ดี โอว.” เฆ บอ ดึห มาปัวะ ลาง เบลห นา อาต คูนดีคัม. 25 คูนดีคัม วี ต็อห, “กาแดบ ฆอน อี ซี อีม ตี, ดัว ดี อีบึณ ฆาย ตี อู วี อู กาแต.” 26 แฮะ ฮอต ต็อห ปาย ตี มา ฆอน อี ซี อีม ตึอน, อัน กาเว กาเซา ฆอน อัน. อัน บอ หมาณ ดี คูนดีคัม ต็อห, “ดึห ฆอน อี ซี อีม ตี, ดัว ดี อีบึณ วี ตี. อาว โลว ง็อห, แตห อัน ยัม.” อีบึณ ปอ อู วี ตึอน วี ต็อห, “แกวะ ดัว มี ดี โอว. แกวะ ดัว มี ดี อัน. กาแดบ กาแต ตี อี มูห.”

27 ปัน ตี คูนดีคัม วี ต็อห, “ดึห ฆอน อี ซี อีม ตี, วี ดัว ดี อีบึณ วี อาต ตึอน. แกวะ ง็อห อาซาก อัน. อีบึณ วี ตี, อี มูห มา อาราง อัน.”

28 เฆ ดูอี อีซาเรลัะ บอกาเฆลียด บอ ยึร ลอง ปี ซูงพยาด คูนดีคัม ตี. เฆ บอ โรวเซ คูนดีคัม โกบ แฮะ ยึร เฆ ลอง อัน แฮะ มึห อางยาน ปี ดัว เฌาพรา, แตห อัน นับ ดี ซูงพยาด ดารา.