1 วาย ตี, เฌาพรา บอ รู กาเซา ดี เฆ ดูอี อีซาเรลัะ. อัน บอ กาซูห อาดาวีด แตห อัน โบง นา ตู หมึอม ดี เฆ. อัน ต็อห, “ฮาว ตีห ดูอี อีซาเรลัะ บอ ดูอี อายูดา.”

2 อาดาวีด มืร วี กาลาง ดี อายอพัะ บอ ดี ดา โบว อี กอย โดบ อัน. อัน ต็อห, “เบ ฮาว แลบ ดี ยอด โดง กอย ดูอี อีซาเรลัะ, จูห ดี มืง ดาน กอ ฌัม ดี มืง บีราเซบา. แคะ กอย เฆ ดูอี อี ปึอน กาโฆห, แตห เบ แดม โตต ฌาราง เฆ, แตห โอว นับ ดูอี เฆ ตี แฮะ กืน แคะ เหมา.”

3 อายอพัะ วี ต็อห ดี คูนดีคัม, “เฌาพรา อี มูห เฌาพรา ปี กรึบ แม, แตห อัน แตห ดูอี แบร กืน หลึอม อี แฮะ มึห ดอ ตี นี, แตห อึณ วี มึห ดา ซึก ปอ อู มาย็อห บูน. เซ แม คูนดีคัม กอ ปึอน ดี ยึร, เหมา อึณ ปาย ปี ซี นับ แม แคะ กืน ดูอี แม?”

4 อายอพัะ บอ ดา โบว เฆ ตึอน, เฆ กาดูห ดี โทม โฆรห คูนดีคัม ตึอน. โคว, เฆ บอ เลห โดง กอย คูนดีคัม บอ ฮาว ตีห ดูอี อีซาเรลัะ บอ แดม ฌาราง เฆ. 5 เฆ บอ ฮาว กาโลห แบลง อึม ยอดาน ตึอน, บอ คยัะ กาตัด มืง อารอ โดง มึห ดีลัยะ แบลง. แฮะ ฮอต, เฆ บอ กาโลห มืง ฆัด บอ ฌัม ดี มืง ยาเฌรา. 6 เฆ ปี วี ฮาว ดี มืง ฆีเลอาด บอ มืง ทักเตมฮอดซี, วี ฌัม บอ ดี มืง ดานยาน, วี แลบ ตัห ฌัม ดี มืง ซีโดน. 7 เฆ ปี วี ตัห ฌัม บอ โดง มึห แรง ตาง กาตัด มืง ทูโรว. เฆ บอ ฮาว ดอน นา ดอน โปละ, โดง กอย เฆ อี มูห ดูอี ฮีวีด เฆ ดูอี กานัณ. แฮะ ฮอต, เฆ บอ ฮาว นา กัว มืง ยูดา กอ ฌัม มืง บีราเซบา.

8 เฆ บอ แล ฮาว แคง มืง บอ มืง อาดา ดีม มาเฆียน ดี อา ฆึร ซีแง. แฮะ ฮอต, เฆ บอ วี ตัห แคง มืง เยรูซาแลม.

9 อายอพัะ บอ ฮาว ดึห ฌาราง ดูอี เฆ ตึอน, วี อาบ ดี อาดาวีด. อี มูห ดูอี อีซาเรลัะ อี ปึอน กาโฆห ตา มาปัวะ ลาง, อึณ กอย ดา แซน วี. อี มูห ดูอี อายูดา, อึณ กอย พัน แซน วี.

10 อาดาวีด แฮะ ฮอต ตีห แคะ กอย ดูอี เฆ ตึอน, อัน วี กาลูต น็อห อัน. อัน วี ต็อห, “นา ตู หมึอม แปะ แฮะ โบง โอว แฮะ กืน กาเซา. ดอ ตี นี โอว หมาณ แม เฌา แตห แม ฆ็อห แวน หมาบ โอว นี. โอว แฮะ โบง อี รึร กาเซา.” 11 บอ ฌัม ซีณวัห อาต ยีต อาดาวีด, เฌาพรา แฮะ กาลาง ดี ดูอี บยาน โฆรห เฌาพรา อี จืร อาฆัด ตึอน. อัน มูห ดูอี อี ดีหมอด ดี เฌาพรา อาดา อาดาวีด. เฌาพรา แฮะ ต็อห ดี อัน, 12 “แม กาลาง ดี อาดาวีด ต็อห, ‘เฌาพรา แฮะ ต็อห, โอว ดี บยัะ โอย โมยว ดี แม. แม โลว ร็อห อู โมยว ปี ดี โบง โอว ดี แม.’”

13 อาฆัด ตึอน, บอ ฮาว โดง กอย อาดาวีด บอ ต็อห ดี อัน, “แม โลว ร็อห ปี ดี โบง เฌาพรา. อัน ดี แตห เบ เอต ปี ดี โฮม แคง มืง แม นี อาดา โอย ซีนัม. เซ อาว ปาย ตี, แม โลว เตา รันซู แม อาดา โอย มาเฆียน. เซ อาว ปาย ตี โอว ดี แตห เบ มึห เซา, แตห อึณ กอ โนะ โอย ซีแง. แตห แม เฌณฌา กาพา แคง น็อห แม, กาลาง ดี โอว, แตห โอว ปึอน ดี วี กาลาง ดี อัน เฌา อี แฮะ จัร โอว ตัห โดง กอย แม.”

14 อาดาวีด วี ต็อห ดี อาฆัด, “โอว แฮะ ฌัม ดูก ตาง. หมาณ, แตห เฌาพรา โบง แคะ ปี อึง อัน ดี โอว. โคว, อัน นับ ดี กาเว กาเซา. แกวะ แตห ดูอี โบง ปี อึง เฆ ดี โอว.”

15 ปัน ตี เฌาพรา บอ แตห ดูอี อีซาเรลัะ เซา. อึณ บอ จูห ซีณวัห ตึอน กอ โตต อาคราว ปี ต็อห เฌาพรา ตึอน. จูห ดี มืง ดาน, ฮาว ฌัม ดี มืง บีราเซบา ตึอน, ดูอี บอ ยัม บู หมึณ วี.

16 ปัน ตี อามู อามาด เฌาพรา ต็อห ดี ปยาต มืง เยรูซาแลม. ดอ อัน ตี เฌาพรา บอ วี แบน น็อห กลึร. อัน วี นัมโหลห ดูก ตาง ปี ดี โลว คัม เฆ. โคว, อัน วี กาลาง ดี อามู อามาด อัน ตึอน ต็อห, “จู แคะ ตี. แกวะ ฮู โบง ปัว.” ดอ อัน ตี อามู อามาด เฌาพรา ตึอน, อัน กอย โคบ กางน็อห, อี มูห กางน็อห อารอนา อี มูห ดูอี เยบูซีด. 17 อาดาวีด บอ ยึร อามู อามาด เฌาพรา แฮะ ดัม หมาบ ดี ดูอี กืน, อัน บอ ซาคึร ดี เฌาพรา ต็อห, “อึณ มูห โอว อี แฮะ กาลึบ. โอว แฮะ โบง นา จาว นา มืก. อี มูห ดูอี เฆ นี, เฆ ปี มาบู ตู โบง มาเซ. โอว หมาณ แม เฌา, แตห แม ดัม หมาบ มี ดี โอว บอ ดี ครึร โอว.”

18 ซีแง ตี, อาฆัด ตึอน, อัน บอ ตัห โดง กอย อาดาวีด บอ ต็อห, “แตห แม วี ฮาว โบง กาโช็ง หลู ดี เฌาพรา ดี กางน็อห อารอนา อี มูห ดูอี เยบูซีด ตึอน.”

19 ปัน ตี อาดาวีด บอ โบง แคะ ปี กาลาง เฌาพรา ดี อาฆัด. 20 อารอนา บอ ยึร อาดาวีด เฆ ดูอี อัน, เฆ ตัห โดง กอย อัน. อัน บอ เลห ฮาว มูด ฆึบ ดี กาดาย นา อาต คูนดีคัม. 21 อัน บอ ดีหมอด ต็อห, “โกบ มาเซ แม ตัห โดง กอย โอว นี?” อาดาวีด วี ต็อห, “เย ตัห แตห เย ปึอน ดี จึห โอ็ง กางน็อห แม, แตห เย ปึอน ดี โบง กาโช็ง หลู ดี เฌาพรา, แตห อัน ฆ็อห แวน เซา ดูอี, แตห เฆ วี แกน.”

22 อารอนา วี ต็อห ดี อาดาวีด, “แตห แม ดึห หลู แคะ ปี อึง แม ดา กาณา โอว. ดี นี โอว แฮะ มึห บอ มัก อี ปึอน หลู, บอ ครึง มัห โหงว ตึอน, แตห อึณ แบน เฮ โดะ ดี เงา. 23 แคะ ปี มึห โอว ดี นี ดอน โมยว, โอว ดี อาบ ดัว ดี แม คูนดีคัม.” แฮะ ฮอต, อารอนา ปี วี ต็อห, “แตห เฌาพรา ปี กรึบ แม ดา กาณา บอ รับ ปี หลู แม.”

24 คูนดีคัม วี ต็อห ดี อารอนา, “อาว มูห ปาย ตี. โอว ดี แตห ง็อห อัน ดี แม. โอว ดี จึห โตต. เซ โอว ตู โตต รึอน, อาว ปึอน หลู ดี เฌาพรา อี มูห เฌาพรา ปี กรึบ โอว.” อาดาวีด บอ ดึห รึอน พัน ฆึร โบ็ง จึห โอ็ง กางน็อห บอ มัก. 25 อัน บอ โบง กาโช็ง หลู ดี เฌาพรา, บอ หลู ปี หลู อี โดะ ดี เงา บอ ปี หลู อี กอย กาฌูะ โฮม รึม. ปัน ตี เฌาพรา บอ โทม โฆรห ปี ซาคึร อาดาวีด อาดา ดูอี แคง มืง อัน. อัน บอ แตห เซา เฆ หราย, บอ แตห อึณ เยน ดี ดูอี อีซาเรลัะ. แคะ ตี แฮะ แดม ลอง คูนดีคัม อาดาวีด.