1 ดี นี แฮะ วี แดม อูน โฆรห ปี กาลาง อาดาวีด อาต ยัม อัน. อาดาวีด มูห ฆอน อาเยเซ ตึอน. อัน มูห วี อี มึห อาพูง ดังโคว ตาง แปะ แฮะ ดัว เฌาพรา อี มูห เฌาพรา ปี กรึบ อาโกบ ตึอน. อัน บอ มูห วี ปี พ็อห เฆ นามัน ดี ฆีณ อัน, วี อี ต็อห โหมว ทัม กาแต ดูอี อีซาเรลัะ. อึณ มูห โหมว ทัม อี เลห แมง ดาคึย. อัน ต็อห,

2 “น็อห พึอม เฌาพรา แฮะ แตห โอว กาลาง โฆรห. ดารา อัน เฌา แฮะ เลห แคง โมต โอว.

3 เฌาพรา อี มูห เฌาพรา ปี กรึบ ดูอี อีซาเรลัะ, อัน แฮะ กาลาง ดี โอว. อัน เฌา อี ปี ดาอาง มาว ปี บึง เฆ ดูอี อีซาเรลัะ, อัน แฮะ ต็อห, เซ อึณ มูห ดูอี อึบ มืง, เซ อัน โรวเซ เฌาพรา บอ โบง นา หมาน เซเซ, 4 ดูอี วี ตี ปี บลาง ซีแง อี เลห ซีณวัห เจว ดอ ตู มึห อึณอูะ. อัน บอ ปี บลาง ซีแง อี เลห ซึอน วาย ฆลาย แฮะ โจห, อี แตห เปต ลัต.

5 อาโมยว โอว ดี บอ โบง ปี อึง เฌาพรา. โคว, อัน เฌา แฮะ ฮอต ดัว กาดีก ซัดฌา ดี โอว. อึณ ตู นับ ดี ลึร ดอ เหมา. กาดีก ซัดฌา ตี แฮะ ซีคยา, แฮะ เฌะฌูง. โคว, อึณ ดี บอ แบน ดอน โมยว ปี ต็อห อัน, อึณ ดี บอ คยอด โอว. อัน เฌา ดี บอ ดัว โตต ดอน โมยว แคะ ล็อะ น็อห โอว.

6 แคะ กอย ดูอี ตู หมึอม, อึณ กาอาบ แวน เฆ ปี เฮ มาอาต ปี แวน อี. เฮ มาอาต ตี ตู ปึอน ปา, ตู ปึอน ดึห ตา แด.

7 อี เหมา ซี ปา, ซี ดึห ดี โฆ็ง, อัน กาดูห ดี โฆ็ง อึณรีห บอ ฆล็อง เลียห. บอ โลว โดะ แวน โตต โดง กอย ดัง เฆ ตึอน.” แคะ ตี โฆรห ปี กาลาง อาดาวีด.

8 ดี นี อึณ มูห จืร เฆ ดา ตาง ดา ซึก อี โดบ อาดาวีด. อึณ มูห อาโยวเซ บาเซเบด, อี มูห ดูอี อาโมยว ฮักมอนี. อัน อึบ พึง ดา โบว. อาดา อู เฌณ อัน แฮะ ดึอม ดึห บลา เลียห อัน, กาโฆห ซัด ยัม ดูอี ดา มาย็อห วี.

9 วาย อัน ตึอน อึณ มูห อาเลอาซา อี มูห ฆอน อาดอดา อี มูห ดูอี อาโมยว อาโฮวฮีด. อัน บอ บา แคง พึง ดา โบว ตาง โอย วี อี อึบ ดา ซึก อี โดบ อาดาวีด. ดอ กาแคณ เฆ ดี ดูอี พีลีที อี แฮะ ตัห กาฌูะ ดี โดง จืร บาซาทามีม, ต็อห ดี กาโฆห ดี ดูอี อีซาเรลัะ, เฆ ดา ซึก ดูอี พีลีที บอ วี ฆืด วี วีว นา ปัน. 10 อึณ ยี มูห อาเลอาซา ตึอน, อัน บอ กาโฆห ง็อห แวน ดูอี พีลีที, แตห แด อัน กอ หณัม กอ ฮู วี ปึอน เบลห อูน มาปัวะ ลาง อัน. ซีแง ตี เฌาพรา บอ แตห เฆ ออง กืน กาเซา. ปัน ตี ดา ซึก อีซาเรลัะ บอ วี ตัห โดง กอย อาเลอาซา ตึอน, แตห เฆ ปึอน ดี ดึห ตัห บอ ครึง บอ โกรวกราม เฆ อี แฮะ ยัม. 11 แดง ตี อึณ วี มึห อาซามา อี มูห ฆอน อากี, อี มูห ดูอี อาโมยว ฮารา. ดอ ตัห กาฌูะ ดูอี พีลีที เฆ แบน พึง แบน พึง, เฆ กอย ดี โดง นา ปี ซัม เฆ เบล โลม. ดอ อัน ตี ดูอี อีซาเรลัะ บอ กาโพรม ดี เตา เลห โดง กอย ดูอี พีลีที เฆ ตึอน. 12 อาซามา ตึอน บอ ยีต จ็อง แคง โดง นา, บัร ดี ยอด, บัร ดี แร. อัน บอ กาโฆห ง็อห แวน ดูอี พีลีที. เฌาพรา บอ โบง แตห ดูอี อาดาวีด ออง, แตห เฆ แป กืน กาเซา.

13 ดอ มูห คราว โซะ อี โหงว, อึณ มึห ดูอี โอย วี อี มูห ดา ตาง แคง พึง ดา โบว โอย ฆึร วี ตึอน. เฆ บอ ฮาว โดง กอย อาดาวีด ดี กาเดา มาว อาดูลัม. ดอ อัน ตี ดา ซึก เฆ ดูอี พีลีที บอ คยัะ บาง แบลง เรพีม ตึอน. 14 อาดาวีด ยี ซี กอย แคง โดง เครียง อัน. เฆ ดา ซึก ดูอี พีลีที, เฆ กอย ดี มืง เบดแลม. 15 อาดาวีด มึห น็อห โหลห กาพา. อัน ต็อห, “แตห โอว นับ อาเซ ดี ต็อะ ตัห อึม แคง อึม คึม อี กอย โคบ มาโลห มืง เบดแลม ตึอน. อาเซ ดี ดึห ตัห, แตห โอว ปึอน ดี เดียง?”

16 ดา โบว โอย วี ตึอน, เฆ บอ ลึบ ฮาว รึร กาแต ดูอี พีลีที. เฆ แฮะ ต็อะ อึม แคง อึม คึม อี กอย โคบ มาโลห มืง เบดแลม ตึอน, เฆ วี ดึห ตัห โดง กอย อาดาวีด. มาแล, อัน ยี ตู เดียง. อัน วี ฮูห แดง กาดาย, หลู ดี เฌาพรา. อัน วี ต็อห, 17 “แม เฌาพรา, โอว ตู เดียง อึม นี ดอ เหมา. อึม นี, อึณ ปี หนาม เฆ อี ตู หลัยะ อาซาก โดว บรีม เฆ.” โกบ อึณ ปาย ตี อัน ตู เดียง. เฆ ดา โบว อี อึบ ดา ซึก โอย วี ตึอน, เฆ แฮะ โบง ปาย ตี.

18 อึณ บอ มูห วา อายอพัะ อี จืร อาพีเซ, อี มูห ฆอน นาง เจรูยา ตึอน. อัน มืร แยต ดา ซึก โอย วี. อัน บอ ดึห ดี โฆ็ง บลา เลียห อัน, กาโฆห ง็อห ยัม ดูอี โอย มาย็อห วี. ดอน อี บอ นับ ลอง อัน ปี เฆ นับ ลอง เฆ โอย วี ตึอน. 19 อัน บอ มึห ซาเร หลึอม เฆ โอย วี ตึอน. โกบ อึณ ปาย ตี อัน แบน ดา อี อึบ เฆ. อัน ยี ตู บา แคง พึง โอย วี ตี.

20 อาบีนายา อี มูห ฆอน อาเยฮอยาดา, อัน ตัห มืง กาบาเฌลัะ. อัน มูห ดา ซึก อี ยัะ กาโฆห. อัน แฮะ ดึอม ออง แบน เฌณ แบน เฌณ. อัน บอ ง็อห ยัม ดูอี อาโมวอาบ อา วี อี กยัะ ดี กาโฆห หลึอม อี เฮา. แดง ตี, ดอ มูห คราว โจห อึม ดาด, อัน บอ ฮาว ลึบ แคง กาเดา กาดาย ดึห มาครังซี, ง็อห ยัม.

21 ดูอี แอฆึบ อี ตาง จา กาเซา มืร, อัน ง็อห ยัม. ดูอี แอฆึบ ตึอน ยี โฆ็ง บลา เลียห. อี มูห อาบีนายา ตึอน, อัน โฆ็ง มี มัง มัห. อัน ฮาว พาด บลา เลียห แคง แด ดูอี แอฆึบ ตึอน, วี ง็อห ยัม อัน.

22 อาบีนายา อี มูห ฆอน อาเยฮอยาดา อัน โบง ปาย ตี แบน เฌณ แบน เฌณ. ดอน อี บอ นับ ลอง อัน ปี เฆ นับ ลอง โอย วี ตึอน. 23 อัน แฮะ มึห ซาเร หลึอม เฆ โอย ฆึร วี ตึอน, อัน ยี ตู บา แคง พึง ดา โบว โอย วี ตึอน. อาดาวีด วี แตห อัน อึบ ดา ซึก อี บัร อาซาก อัน.

24 เฆ ดูอี แคง พึง โอย ฆึร วี, อึณ บอ บา ดูอี เฆ นี. อาซาเฮลัะ อี มูห วา อายอพัะ ตึอน, อาเอฮานัน อี มูห ฆอน อาตอตอ อี กอย มืง เบดแลม ตึอน,

25 อาซามา อี มูห อาโมยว ฮารอดีด บอ อาเอลีกัะ อี มูห อาโมยว ฮารอดีด.

26 อึณ มูห บอ อาเฮเลด อี มูห อาโมยว พาลาตี, อาอีรา อี มูห ฆอน อาอีเกซา อี ตัห มืง เดกอ,

27 อาบีเอจา อี มูห อาโมยว อานาโทด, อาเมบูนนี อี มูห อาโมยว ดูอี ฮูซา,

28 อาจอลัะมูน อี มูห อาโมยว อาโฮวฮีด บอ อามาฮาเร อี มูห อาโมยว อาเนตอพา.

29 อึณ มูห บอ อาเฮลีด อี มูห ฆอน อาบาอานา, อี มูห อาโมยว อาเนตอพา, อาอีเด อี มูห ฆอน อารีเบ อี กอย มืง ฆีบียา, อี มูห อาโมยว อาเบนยาม,

30 อาบีนายา อี มูห อาโมยว บีราโทน, อาฮีเด อี กอย โดบ ดีลัยะ กาอาด,

31 อาบาลัะบูน อี มูห อาโมยว อาบาซี, อาฌามาวีด อี มูห อาโมยว บาฮูมี,

32 อาเอลีอาบา อี มูห อาโมยว ซาลาโบน. อึณ มูห บอ เฆ ฆอน อายาเซน บอ อาโยวนาทาน 33 อี มูห ฆอน อาซามา อี มูห ดูอี ฮารา, อาฮีอาม อี มูห ฆอน อาซารัะ, อี มูห ดูอี อาโมยว อารัะรี,

34 อาเอลีเพเลด อี มูห ฆอน อาฮาซัะแพ, อี มูห อาโมยว ดูอี มาคาทีด, อาเอลัม อี มูห ฆอน อาฮีซอเพลัะ, อี มูห อาโมยว กีโลว,

35 อาเฮจารอ อี มูห อาโมยว กาเมลัะ, อาพาเร อี มูห อาโมยว อาพี,

36 อาอีฆาลัะ อี มูห ฆอน อานาทาน อี กอย แคง มืง จอพัะ, อี มูห ฆอน อาฮาเกรี.

37 อึณ มูห บอ อาเฌลีก อี มูห อาโมยว อัมโมน, อานาฮาเร อี มูห อาโมยว บีรอซี. อัน มูห ดูอี อี โฆ็ง ครึง กาโฆห อาดา อายอพัะ อี มูห ฆอน นาง เจรูยา ตึอน.

38 อึณ มูห บอ อาอีรา อี มูห อาโมยว อีทารี, อากอรีบ อี มูห อาโมยว อีซารี

39 บอ อาอูรียา อี มูห อาโมยว เฮทีด ตึอน. แคะ กอย ดูอี เฆ ตี, เฆ บอกาเฆลียด กอย โอย ฆึร ดี บู วี.