1 ปาย ตี เฌาพรา แฮะ จอย อาดาวีด แตห อัน แป รันซู อัน, แตห อัน บอ ลอด ตัะ อาซอลู เฆ ดูอี อัน. ดอ อัน ตี อัน วี ต็อห โหมว, อืบ เฌาพรา. อัน ต็อห,

2 “เฌาพรา แฮะ ปี ดาอาง ตาง อี แร โอว. อัน ปี แรง ตาง ดี โอว. อัน แฮะ แตห โอว ลอด ดี รันซู โอว.

3 เฌาพรา ปี กรึบ โอว แฮะ ปี ดาอาง มาว ปี บึง โอว. อัน ปี มัง ฆ็อง อี ฆ็อง อี แร โอว. อัน มูห อี คยอด โอว. อัน ปี โดง ดี ปึอน เตา เครียง โอว. เฌาพรา แฮะ คยอด ดึห เลห โอว ตัะ อี ตู หมึอม ดอน โมยว.

4 โอว ดี กาลาง ดี แม เฌาพรา, แฮะ กาอาบ โอว อืบ แม เฌา. แม แฮะ คยอด โอว ดี รันซู โอว บอกาเฆลียด.

5 เฆ ดูอี อี ซี ง็อห ยัม โอว, เฆ แฮะ ดึอม กอย โรบ โอว. อึณ แฮะ ปี อึม ดี อึณปูน โอว. อี ตู หมึอม, อี ซี แตห โอว ชึม, เฆ แฮะ กืน ปี อึม อี แฌว กาเซา แฮะ ฌูห โอว.

6 เฆ อี กอย แคง มืง มารานัะ มืร แฮะ โรบ โอว. อึณ ปี เฆ ต็อห ดี ปัก โอว. โอว มืร แฮะ รีน ดี ยัม, แฮะ ปี ยอต เฆ ดูอี ยัม แฮะ กืน, แฮะ ครอด โอว.

7 ดอ ดูก หณาบ ดี น็อห โอว ตี, โอว บอ แดะ เหรต เฌาพรา, โอว บอ ดัด แดะ เฌาพรา อี มูห ดา กาณา โอว. อัน เฌา อี กอย แคง โฮว อัน, อัน บอ ยึร โฆรห โอว. โฆรห ปี แดะ โอว ตี บอ ลึห ดี อัน.

8 ดอ อัน ตี มาอีม บอ เยณ, กาดาย บอ ดียูห ดีเยณ กาเซา. ดัง เบลณ เฆ ตึอน มืร บอ ดียูห ดีเยณ. อึณ รัร โกบ รู อัน เฌา.

9 อึณ บอ ปี ดัก เงา เลห แคง ฆูงมูห อัน เฌา. เงา บอ เลห ตัห แคง โมต อัน เฌา. อึณกึร เงา มืร บอ กูห แคง โมต อัน เฌา.

10 อัน เฌา บอ แตห ฆางหราว อึณ วึห, แตห อัน เฌา โลง. ครึม เปลา อัน เฌา, อึณ บอ ปี อึณอูะ ว็อง.

11 อัน เฌา บอ ป็อะ เครูบ, แตห อัน บึณ. อัน เฌา บอ ตัห ดาคึย โดบ คูน.

12 อัน เฌา บอ แตห อี อับ ว็อง กอย กาบีด อัน, แตห บอ อึณอูะ ว็อง แบน อี ฆ็อง โรบ อัน.

13 บอ อาโรง บลาง อี กอย รึม โดบ อัน เฌา, อึณ ปี อึณกึร เงา.

14 เฌาพรา บอ แตห ฮัม กานัม เลห แคง ฆางหราว, อึณ ปี เฌาพรา อี อึบ โตต ดอน โมยว, อัน แฮะ แตห โฆรห อัน เลห.

15 อัน เฌา บัณ บลา อัะ อัน, แตห รันซู กาโชต ฮาว เตา. อัน เฌา แตห อึณ มึห บอ ปลัะ อึณเปลต แตห เฆ ชึม.

16 เฌาพรา บอ เอห อี บอ ฮึห เลห พึอม อัน แคง ฆูงมูห อัน. ปัน ตี อี ครึม บืน อึม นัมมูกซารา บอ เลห, บอ อึณบลัห, แตห ดัง กาดาย ลึห.

17 อัน เฌา อี กอย นา แดง, อัน แฮะ โซ็ง โลง แด อัน, แตห อัน ปา โอว. อัน เฌา บอ ดึห เลห โอว แคง ดูก อี ปี อึม ตาง ตี.

18 อัน เฌา บอ คยอด โอว, แตห โอว ลอด ดี รันซู โอว อี มึห โปลม ตาง. อัน บอ คยอด โอว ดี เฆ อี ฌ็อง โอว. เฆ อี มึห โปลม กืน หลึอม โอว, เฆ ยี ตู แป โอว.

19 เฆ ตัห กาตูณ โอว ดอ มูห ซีแง ฌัม โอว ดูก อี หณาบ ตึอน. มาแล, เฌาพรา แฮะ แบน อี จอย โอว, อี ปี บึง โอว.

20 อัน เฌา บอ ดึห ตึย โอว, แตห โอว ฌัม โดง กาว็อห ซีคยา. อัน เฌา บอ คยอด โอว โกบ มึห อัน น็อห ดาคึย, น็อห ร็อก โอว.”

21 “เฌาพรา ดัว อาฆยึร แคะ กาดาน น็อห ซืร น็อห หมาน โอว. อัน เฌา วี เวียะ ดัว ดี โอว แตห อึณ โดบ น็อห ลูย โอว.

22 อัน โบง ฌึร ตี ดอน โมยว โคว, โอว แฮะ โดบ เฌาพรา เซเซ. โอว ตู โบง นา จาว, ตู วัห แวน เฌาพรา ปี กรึบ โอว ตี.

23 ดารา เฌาพรา ดอน ณ็อง โอว แฮะ โหลห เซเซ. แคะ ปี จัร อัน เฌา อี โบง, โอว ตู แวน ดอ เหมา.

24 อาว มึห อาเซ อี ปึอน พยาก โอว ดี อาต อัน เฌา. โอว แวน อี ตู หมึอม, โอว ตู โบง.

25 โคว, เฌาพรา วี ดัว อาฆยึร ดี โอว แตห อึณ กาดาน น็อห ซืร โอว, แตห อึณ บอ กาดาน น็อห ซีงา บอด แคะ ปี ยึร อัน เฌา ดี โอว.”

26 “อาเซ มึห น็อห หมาน, แม เฌา มืร ดี โบง นา หมาน นา หมึอม ดี อัน. อาเซ ฮู มึห ปี ดี ปึอน อี ดี พยาก, อี มึห เฌะฌูง, แม เฌาพรา มืร ตู พยาก อัน.

27 อาเซ อี มึห น็อห ซีงา, แม เฌาพรา มืร ดี ดัว อี ซีงา ดี อัน. อาเซ โบง กาบัห ดี แม, แม เฌา ดี วี แบน รันซู อัน.

28 เฆ อี ตู ปีคึก น็อห เฆ แม เฌาพรา มืร ดี คยอด เฆ. เฆ อี มึห น็อห จา น็อห ปีคึก, แม เฌา มืร ดี วี แตห เฆ โจห เตียม.

29 แม เฌาพรา, แม ปี เงา ราง ดี โอว. ดอ อับ ว็อง ดี โอว, แม เฌาพรา แฮะ โบง แตห อึณ วี บลาง.

30 เซ แม เฌาพรา จอย โอว, โอว บอ ปึอน ดี กาแบลบ กาโฆห ดี ดา ซึก บอ พึง. เซ แม เฌาพรา กอย รึม โดบ โอว, โอว บอ ปึอน ดี แดน ฮาว กาโลห แรง ตาง.

31 อึณเตณ แม เฌาพรา อึณ เฌะฌูง เซเซ. โฆรห แม เฌาพรา แฮะ หมาน, แฮะ หมึอม. เฆ อี ตัห บึง อัน เฌา, อัน เฌา แบน อี แร อี ฆ็อง เฆ ดอน อี.

32 แดง เฌาพรา นี อาว มึห เฌาพรา ปอ อู กาดัง. แดง เฌาพรา นี อาว มึห อี ปี ดาอาง มาว ปี ปึอน บึง โอว.

33 เฌาพรา นี แตห อึณ แบน โปลม ดี โอว, แตห โอว ปึอน ดี โดบ อึณเตณ อี ซีคยา.

34 อัน เฌา บอ แตห เปลา โอว ฮาว แฮ, กอ ปี เปลา มาฌัะ โดว มา. อัน เฌา บอ แตห โอว กอย โดง จา.

35 อัน เฌา บอ มาโนว แตห แด โอว นับ ดี กาโฆห, บอ แตห โอว ปึอน ดี วีต อัะ บ็อง.

36 แม เฌา ดัว บอ มัง ฆ็อง, แตห อึณ คยอด โอว. แม แฮะ กาเว โอว, วี โจะ โอว แบน ดา ตาง.

37 แม เฌา แฮะ โบง อึณเตณ อี กาว็อห, แตห โอว ปึอน ดี ฮาว ซีคยา. แม เฌา ตู แตห เปลา โอว ดีปลาด.

38 โอว บอ คูงครัห โดบ รันซู โอว, บอ ปยาต แวน เฆ. ดอ หณัม ดึห แวน โตต โอว ดี เฆ, โอว มืร หณัม วี ตัห.

39 โอว แฮะ ปยาต แวน เฆ บอ บลูห แตห เฆ กอ กาหลูห, แกวะ แตห เฆ ซี ปึอน ดี วี ยีต, แตห โอว อึบ โตต เฆ.

40 โคว, แม เฌา แตห แบน โปลม ดี โอว, แตห โอว นับ ดี กาโฆห ดี รันซู แตห อึณ ปี แม แฮะ ดึห แซะ ปัก รีด ดี ณอย โอว. เฆ อี ตัห ต็อห ดี กาโฆห ดี โอว, แม เฌา แฮะ แตห เฆ เกห ชึม โตต ดี อาต โอว.

41 แม เฌา แฮะ แตห รันซู โอว วี มางัห วีว เลห เตา ดี โอว. โอว แฮะ ปยาต แวน เฆ บอกาเฆลียด อี ฌ็อง โอว.

42 เฆ เหรต อี ดี จอย เฆ, ยี ตู ยึร อาเซ. เฆ บอ แดะ เฌาพรา. อัน ยี ตู เวียะ โฆรห เฆ.

43 โอว บอ มัห เฆ, แตห เฆ กามูน ปี กาปูห แดง กาดาย. โอว บอ แณต เฆ กอ ปี โณะ ณัะ อี กอย โดบ อึณเตณ, อี กาโชต ดอน บลาก.

44 แม เฌา บอ จอย โอว, แตห โอว ลอด ดี ดูอี อี กาแคณ กาโฆห ดี โอว. แม เฌา มืร แฮะ บัร รีด โอว, แตห โอว วี แบน ดา ตาง อี แยต พึง ดูอี แบน โมยว แบน โมยว. บอ ดูอี ปี ตู ดึอม นับ โอว, แม แฮะ แตห เฆ แบน หมาย โอว.

45 บอ ดูอี อาโมยว เฮา แฮะ ตัห บึง โอว. เซ เฆ บอ ยึร โฆรห โอว, เฆ บอ โทม โดบ อู เฌณ.

46 เฆ แบน น็อห ดีแตด, ดียูห ดีเยณ โดง เครียง เฆ.

47 แม เฌาพรา อี อีม, โอว อืบ แม เฌาพรา อี ปี ดาอาง มาว ปี บึง โอว. โอว บอ อืบ มยูก แม เฌาพรา, อี ปี ดาอาง มาว อี แฮะ คยอด โอว.

48 แม เฌาพรา วี โบง เวียะ แคะ ปี โบง อี เฮา ดี โอว. แม บอ แตห ดูอี อาโมยว เฮา กอย ครึม โอว.

49 แม เฌา แตห โอว ลอด ดี รันซู โอว. แม เฌา แฮะ มยูก แฮะ โจะ โอว แตห โอว อึบ เฆ อี กาโฆห ดี โอว. แม เฌา แฮะ จอย ดึห เลห โอว ดี เฆ อี ตู หมึอม.

50 โกบ อึณ ปาย ตี โอว อืบ มยูก ฆูง เฆฌู แม เฌาพรา, แตห บอ ดูอี อาโมยว เฮา นับ ลอง อัน ตี.

51 แม เฌา, แม แฮะ จอย คูนดีคัม ปี ดาง แม, แตห อัน แป กืน รันซู อัน. แม เฌา บอ เฆฌู บอ ร็อก โอว อี มูห วี แปะ แฮะ พ็อห แม นามัน ดี ฆีณ. แม ร็อก โอว อาดาวีด บอ ครึร โอว ดอน โจว ดอน บาน.” แคะ ตี อาดาวีด แฮะ อืบ เฌาพรา.