1 ดอ มูห โจว บาน คูนดีคัม อาดาวีด ตึอน, อึณ มึห อาคราว เอต ปี ดี โฮม อาดา โอย ซีนัม. ดอ อัน ตี อาดาวีด บอ ดีหมอด เฌาพรา. เฌาพรา วี ต็อห ดี อัน, “อึณ มูห อาซอลู เฆ วอแว อัน. เฆ มึห หมาบ ดอ ง็อห เฆ ดี อี. โกบ ง็อห ยัม เฆ ดูอี กีปอง, เบ โลว คัม ดี เอต โบม.”

2 วาย อัน ตี คูนดีคัม บอ แดะ ดูอี กีปอง ตัห, บอ ลาย กามวน ดี เฆ. ดูอี กีปอง ยี ตู มูห ดูอี อาโมยว อีซาเรลัะ. เฆ มูห ดูอี อาโมยว อาโมวรีด อี ซี ฆีด เฆ ตึอน. เฆ ดูอี อีซาเรลัะ แฮะ ดัว กาดีก ซัดฌา ดี เฆ. บอ อาซอลู ยี ดีงัณ โฆยวฆยา ดี แตห ดูอี อีซาเรลัะ บอ ดูอี อายูดา อึง อัน. โคว, อัน แฮะ ต็อห ดี ง็อห แวน โตต เฆ ดูอี กีปอง. 3 ดอ ตัห เฆ, คูนดีคัม อาดาวีด บอ กาลาง ดี ดูอี กีปอง ต็อห, “เบ ซี แตห โอว โบง มาเซ, แตห อึณ ฆ็อห แวน หมาบ แปะ แฮะ โบง เย ดี เบ, แตห เบ วี ม็องการา ดัว ดี เย อี แฮะ ปึอน คาฆูน ปี ดัว เฌาพรา?”

4 ดูอี กีปอง เฆ บอ ต็อห, “อาว กาอาบ เย หมาณ รึอน เฆ ครีว ดี อาซอลู เฆ บีนอง วอแว อัน. อาว กาอาบ เย ง็อห ยัม ดูอี อีซาเรลัะ คอ อู วี.” แฮะ ฮอต, คูนดีคัม วี ต็อห, “มาเซ ปี ซี หมาณ เบ แตห โอว โบง?”

5 เฆ มืร วี ต็อห ดี คูนดีคัม, “ดูอี อี โบง นา จีจีว ดี เย ตึอน, อี ต็อห ดี ปยาต เย แกวะ ฮู แตห เย ปึอน ดี กอย กาแต ดูอี อีซาเรลัะ, 6 หมาณ แตห แม อาบ ฆอน อัน บู วี ดี เย. เย ดี ดึห เฆ ตี วี ง็อห, วี ฮอย อูน โดว เฆ ดี มืง ฆีบียา ตึอน, อี มูห โดง ดึอม กอย อาซอลู. อาซอลู ยี มูห ดูอี แปะ แฮะ ดึอม ร็อห เฌาพรา. เย ดี โบง ปาย ตี แตห บอ เฌาพรา ยึร.” เฆ แฮะ ฮอต ต็อห ปาย ตี คูนดีคัม อาดาวีด วี ต็อห, “โอว ดี ดัว เฆ ดี เบ.”

7 มาแล, คูนดีคัม ยี หลัยะ อาซาก อาเมพีบอเซด อี มูห ฆอน อาโยวนาทาน, อาโยวนาทาน วี มูห ฆอน อาซอลู. โคว, อาดาวีด ฆาย อาโยวนาทาน แฮะ ลาย ดัว กาดีก ซัดฌา ดี เฌาพรา. 8 โกบ อึณ ปาย ตี คูนดีคัม วี ดึห อามอนี ฆาย อาเมพีบอเซด, อี มูห ฆอน อาซอลู ฆาย นาง รีฌาบา ตึอน. นาง รีฌาบา ยี มูห ฆอน อาเอยา. อาดาวีด ดึห บอ ฆอน นาง เมราบ พัน วี. นาง เมราบ ยี มูห ฆอน อีบึณ อาซอลู. ฆูณ เฆ พัน วี ตี ยี มูห อาดาเรลัะ อี มูห ฆอน อาบาจี อี มูห ดูอี อาโมยว เมโฮวลัะซี. 9 อัน บอ อาบ บู วี ตี ดี ดูอี กีปอง เฆ ตึอน. แฮะ ฮอต, เฆ ดูอี กีปอง บอ ง็อห เฆ, วี ฮอย โดว เฆ แดง นอน อู โปละ แตห เฌาพรา ยึร. เฆ บู วี ตึอน บอ ยัม กาโดบ อู ซีแง. ดอ อัน ตี อึณ มูห อาคราว โซะ โหงว, ซีแง กาจูห อี ดี โซะ ซีโฆ็งรา.

10 นาง รีฌาบา อี มูห ฆอน อาเอยา ตึอน, บอ ดึห จาน ดัะ แดง มาว แตห อัน ปึอน ดี กอย นา แดง. ซีณ กาจูห เฆ ดี โซะ โหงว กอ ฌัม อาคราว โจห ฆลาย. อัน บอ บัร ดี ยอด. กาแต ซีแง อัน ตู แตห มาซีม ปึอน ดี โฌะ โดว ดูอี ยัม เฆ ตึอน. แคง หมึร อัน ตู แตห มาโดว แปร ปึอน ดี ตัห โฮม ยัง เฆ. 11 อี เฮา บอ กาลาง ดี อาดาวีด ลอง ปี โบง อีบึณ เตียะ อาซอลู อี จืร นาง รีฌาบา อี มูห ฆอน อาเอยา ตึอน. 12 อาดาวีด บอ ฮาว ดึห กาอาง อาซอลู บอ กาอาง อาโยวนาทาน อี มูห ฆอน อาซอลู ตึอน. อัน ดึห กาอาง ตี ดี ดูอี แคง มืง ยาเบด อี กอย แคง กาดาย มืง ฆีเลอาด ตึอน. เฆ ดูอี ยาเบด แฮะ ดึอม ปรา ดี ดึห ตัห กาอาง ตี ดี ฆลัง แคง มืง เบดซัน. โดง ตี มูห โดง ฮอย เฆ ดูอี พีลีที โดว เฆ วาย ง็อห ยัม เฆ อาซอลู ดี นอน ฆีลัะปอ ตึอน. 13 อาดาวีด บอ ดึห ตัห กาอาง อาซอลู บอ กาอาง ฆอน อัน อี จืร อาโยวนาทาน ตึอน. แฮะ ฮอต, อัน บอ ดึห บอ กาอาง ดูอี เฮา อี ยัม, อี มูห กาอาง ปี หณัม ดึห อูน อี. 14 เฆ บอ ดึห กาอาง อาซอลู บอ กาอาง อาโยวนาทาน อี มูห ฆอน อาซอลู ตึอน, ฮาว อูน แคง บาเรว ฆูณ อาซอลู อี จืร อากีซา. บาเรว ตี กอย ดี มืง เจลัะ แคง กาดาย ดูอี อาเบนยาม. เฆ บอ โบง โตต ดอน โมยว แคะ ปี ดัม อูน คูนดีคัม อาดาวีด. วาย อัน ตี เฌาพรา มืร วี โทม โฆรห ปี ซาคึร เฆ ดาง มาน มืง เฆ ตึอน.

15 วาย ตี, ดูอี พีลีที วี กาโฆห ดี ดูอี อีซาเรลัะ ปอ อู เฌณ. อาดาวีด บอ ดา ซึก อัน บอ ฮาว กาโฆห ดี ดูอี พีลีที เฆ ตึอน, แตห อาดาวีด นูน บอ ดีหลัห กาเซา.

16 อึณ ยี มูห อาซาบีเบนูด อี มูห ดูอี อาโมยว อาราพัะ ตึอน. อัน แฮะ ตาง จา กาเซา. อัน บอ ดึห ดี โฆ็ง บลา เลียห อี มึห กาแดะ บ็อง เดณ อี จัน โอย มาย็อห เซเคน.^a อัน บอ โฆ็ง มาปัวะ ลาง กามาย, ต็อห ดี ง็อห ยัม อาดาวีด. 17 อาพีเซ อี มูห ฆอน นาง เจรูยา ตึอน, อัน บอ ตัห จอย อาดาวีด บอ กาโฆห ดี ดูอี ตึอน บอ ง็อห ยัม อัน. ปัน ตี เฆ ดา ซึก อาดาวีด บอ ต็อห ดี อัน, “เย ตู วี แตห แม คูนดีคัม ฮาว กาโฆห โดบ เย ดอ เหมา. เย ตู ซี แตห ดูอี อี ปี บลาง แคง มืง ดูอี อีซาเรลัะ ยัด.”

18 วาย ตี ปอ อู เฌณ เฆ ปี วี กาโฆห ดี ดูอี พีลีที ดี มืง กอบัะ ตึอน. ดอ อัน ตี อาซีเบเค อี มูห ดูอี อาโมยว ฮูซา, อัน บอ ง็อห ยัม อาซาพัะ อี มูห อาโมยว อาราพัะ อู วี, อี แฮะ ตาง จา กาเซา ตึอน.

19 วาย ตี, เฆ วี ลาย กาโฆห ดี ดูอี พีลีที ดี มืง กอบัะ ตึอน ปอ อู เฌณ. อาเอฮานัน อี มูห ฆอน อายาอีรัะ อี ตัห มืง เบดแลม, อัน บอ ง็อห ยัม วา อากอลาด อี มูห อาโมยว ดูอี กีดตี, อี โฆ็ง บลา เลียห อี มึห ฆล็อง ตาง, กอ ดาน กาบ็อง ด็อะ ฆลาง ตึอน.

20 วาย ตี เฆ ปี วี กาโฆห ดี มืง ฆาทัะ ตึอน. อึณ มึห ดูอี อู วี อี ตาง จา. กานู แด อัน อู บลาก อึณ กอย เดา กานู. กานู เปลา อัน อู บลาก อึณ กอย บอ เดา กานู. เซ วี ลาย กาฌูะ บอ เปลา บอ แด, แฮะ แบน อา ฆึร ดี พวน กานู. บอ อัน มูห ดูอี อาราพัะ ตึอน. 21 เฆ ยี ซี ลาย กาแคณ ดี ดูอี อีซาเรลัะ. อึณ มูห อาโยวนาทาน อี มูห ฆอน อีกัด อาดาวีด อี จืร อาซีเมอาด ตึอน, อัน บอ ง็อห ยัม ดูอี ตาง จา ตี.

22 เฆ ดูอี อี ตาง จา พวน วี ตี, เฆ มูห ดูอี อาราพัะ อี กอย ดี มืง ฆาทัะ ตึอน. เฆ บอ ยัม ดี อาดาวีด เฆ ดา ซึก อัน.