1 ดอ อัน ตี อึณ มึห ดูอี ตู หมึอม อู วี. อัน จืร อาเซบา. อัน มูห ฆอน อาบีคารี อี มูห ดูอี ครึร อาเบนยาม. อัน บอ บูด เวา ต็อห, “อึย เบ ดูอี อีซาเรลัะ, เอ อาว ฮู ฮาว โดบ อาดาวีด. เอ ตู ลาย บาะ ดี ฆอน อาเยเซ. อึย, เบ ดูอี อีซาเรลัะ บอกาเฆลียด, แตห เบ ดอน อี วี เวณ โดง กอย กาง เบ.”

2 ปัน ตี ดูอี อีซาเรลัะ บอ เลห โดง กอย อาดาวีด, อาว ฮู โดบ อัน. เฆ วี โดบ อาเซบา อี มูห ฆอน อาบีคารี ตึอน. อี มูห ดูอี อายูดา, เฆ ยี โดบ อาดาวีด, จูห ดี แบลง ยอดาน กอ ฌัม แคง มืง เยรูซาแลม.

3 คูนดีคัม อาดาวีด แฮะ ฮอต ฌัม โดง กอย โฮว อัน แคง มืง เยรูซาแลม, อัน บอ ดึห ฌึง นาง เฆ ฆึร วี ปี อูน อัน แตห เฆ แบน อี บัร โฮว ตึอน. อัน บอ คร็อง อูน เฆ แคง กาง. อัน บอ เฮียง ลึมลา เฆ, ยี ตู กอย รึม โดบ เฆ. นาง เฆ ตึอน บอ กอย ปี ยา ซีปรัห, กอ ฌัม ปัน ดี กัด ยัม เฆ.

4 ปัน ตี คูนดีคัม วี ต็อห ดี อามาซา, “โอย ซีแง แม โลว ฮาว จัร ดูอี อายูดา ตัห กาฌูะ โตต. โอว โลว บอ แม วี ตัห ดี นี.” 5 แฮะ ฮอต, อามาซา บอ ฮาว แดะ ดูอี อายูดา ลาย กาฌูะ โตต. อึณ ยี ปวน ซีแง ปี ดัม คูนดีคัม ดี เฆ.

6 อาดาวีด วี กาลาง ดี อาพีเซ ตึอน ต็อห, “ดอ ตี นี, อาเซบา อี มูห ฆอน อาบีคารี ตึอน, อัน วี โบง อี ตู หมึอม ดี โอว หลึอม อาบาซาโลม ตึอน. แตห แม แดะ ดูอี ดา กาณา แม, แตห เบ คูงครัห โดบ ฮาว อัน. เซ อาว ปาย ตี, โยว อัน ปึอน ดี ลึบ เครียง แคง มืง อี มึห แรง. แกวะ แตห อัน ลอด ตัะ เอ.” 7 ปัน ตี เฆ ดูอี อายอพัะ บอ เฆ ดูอี เคเรซี บอ เฆ ดูอี เบลัะซี เฆ อี มึห โปลม มึห แฮณ, เฆ บอ เลห แคง มืง เยรูซาแลม บอ คูงครัห โดบ ดี ปัน อาเซบา อี มูห ฆอน อาบีคารี ตึอน. 8 เฆ บอ ตัห ฌัม โดง มึห มาว ตาง ดี มืง กีปอง ตึอน, อามาซา ตึอน บอ ตัห กาตูณ เฆ. อายอพัะ แฮะ ชึบ ครึง ปี ตา ดา ซึก. อัน บอ ชึบ แซะ ดี ณอย อัน, มึห บอ อาตึม อี กอย แคง บราม อัน แปะ แฮะ ปัก ดึก อัน ดี ณอย อัน. ดอ ฮาว อัน, อัน แตห อาตึม อัน บอ โจห.

9 อายอพัะ บอ ดีหมอด อามาซา ต็อห, “อึย แม วา, แม แฮะ กอย ดาคึย?” อายอพัะ บอ ตา แด อัน บลาก อาอัห ปา ดีโมห ดี กูงกาบ อามาซา แตห อัน ปึอน ดี อูห อามาซา ตึอน. 10 อามาซา ยี ตู ซาดีก อาตึม ปี โฆ็ง อายอพัะ ดี แด อัน บลาก อาฆัะ. อายอพัะ บอ ซัด วัต อามาซา, แตห ณ็อง วัต อัน บอ เลห โจห แดง กาดาย. อามาซา บอ ยัม อู เฌณ. อาว ฮู โลว ซัด ปอ อึณ ปัว. อายอพัะ ฆาย วา อัน อาพีเซ บอ คูงครัห โดบ อาเซบา อี มูห ฆอน อาบีคารี ตึอน.

11 อึณ ยี มูห ดูอี อี โดบ อายอพัะ อู วี, อัน วี จ็อง บัร ดี โคบ อามาซา ตึอน. อัน วี ต็อห, “อาเซ มูห ฆึก อายอพัะ, อาเซ อี กอย บลาก อาดาวีด, แตห อัน โดบ อายอพัะ.” 12 โดว อามาซา ตึอน ยี ซี กอย แคง หนาม อัน, กอย กาแต อึณเตณ ตึอน. ดูอี วี ตึอน บอ ยึร, ดอน อี ตัห จ็อง ฆืด ดี โดว อามาซา ตี, อัน บอ ดึห โดว อามาซา วี กาโทะ เบลห อูน แคง โดง นา. อัน บอ ดึห ครึง กาบีด อูน. 13 อัน แฮะ ฮอต กาโทะ เลห กาแต อึณเตณ ตึอน, แคะ กอย ดูอี เฆ ตึอน บอ กาโพรม ดี โดบ อายอพัะ, คูงครัห โดบ อาเซบา อี มูห ฆอน อาบีคารี ตึอน.

14 ยี มูห อาเซบา ตึอน, อัน บอ กาโลห โดง กอย ดูอี อีซาเรลัะ ดอน ครึร, แตห กอ ฌัม มืง อาเบลัะเบดมาคา, บอ โดง จืร เบรีกา. อัน แฮะ แดะ กาฌูะ เฆ ตี, แตห เฆ กาดึม โดบ ดี ปัน อัน. 15 เฆ ดา ซึก อี โดบ อายอพัะ ตึอน บอ ฮาว โรบ มืง อาเบลัะเบดมาคา. เฆ ฆึห กาดาย, โบง บล็อะ อึณแตง ดี แรง มืง. เฆ บอ กอย บัร ปอ อู โปละ, เทว ดี ดูห แรง มืง แตห อึณ กาปยาต.

16 ปัน ตี อึณ มึห อีบึณ ยี หล็อก กาเซา อู วี, อี กอย แคง มืง ตึอน. อัน ดัด ต็อห, “โทม โทม อึย, กาลาง ดี อายอพัะ, แตห อัน ตัห ดี นี, แตห โอว กาลาง โฆรห ดี อัน.”

17 อายอพัะ บอ ตัห โดง กอย อีบึณ ตึอน. อีบึณ ตึอน บอ ดีหมอด อัน ต็อห, “แม มูห อายอพัะ?” อัน วี ต็อห, “แฮะ มูห โอว นี.” แฮะ ฮอต, อีบึณ วี ต็อห, “หมาณ แม โทม โฆรห โอว.” อัน วี ต็อห, “อึร, โอว ดี โทม.” 18 อีบึณ ตึอน วี ต็อห, “โฆรห อี ดอ มึอน อึณ ต็อห, ‘แตห เอ ลาย ซังคยาง ดี มืง อาเบลัะ.’” ปาย ตี เฆ บอ ซูงพยาด อามู แตห อึณ หมาน.

19 “เย มูห ดูอี น็อห หนีม, น็อห ซืร แคง มืง อีซาเรลัะ. เหมา อึณ ปาย ปี เหรต แม ดี ปยาต มืง อี มูห มืง ดัง แคง มืง อีซาเรลัะ. เย ปี มา เฆ ดูอี อีซาเรลัะ ดอน อี. เย บอ ปี คาฆูน ปี ดัว เฌาพรา ดี ดูอี อีซาเรลัะ. เหมา อึณ ปาย ปี ซี ปยาต แม ดี เย?”

20 อายอพัะ ตึอน วี ต็อห, “โอว ตู ซี ปยาต มืง เบ ตี, โอว มืร ตู ซี ปยาต ดูอี แคง มืง เบ. 21 อาว มูห ปาย ตี. ยี มูห ดูอี ตัห ดี นอน อาเอพารีม, อี จืร อาเซบา, อี มูห ฆอน อาบีคารี ตึอน. อัน แฮะ ต็อห ดี กาโฆห ดี คูนดีคัม, ต็อห ดี กาแคณ ดี อาดาวีด. แตห เบ ดึห อาบ ดัว ดูอี วี ตี. แฮะ ฮอต, โอว ดี วี เลห ตัะ มืง นี.” อีบึณ ตึอน วี ต็อห ดี อายอพัะ, “บัร แม ยอด, โอว ดี ดึห ฆีณ อัน ฌัต กาโลห แรง ตี ดัว ดี แม.”

22 อีบึณ ตึอน บอ ฮาว โดง กอย ดูอี ดอน อี แคง มืง ตึอน บอ กาลาง อากยาม อางยาน อัน ดี เฆ. เฆ บอ แดบ ฆีณ อาเซบา อี มูห ฆอน อาบีคารี ตึอน, ฌัต ดี อายอพัะ อี กอย นา เรต แรง มืง ตึอน. อายอพัะ บอ บูด เวา, แตห เฆ ดอน อี บอ เลห ดี มืง ตึอน, วี เวณ โดง กอย เฆ. อายอพัะ บอ วี เวณ แคง มืง เยรูซาแลม, วี ฮาว โดง กอย คูนดีคัม.

23 อายอพัะ ตึอน แบน ดา โบว อี อึบ ดูอี อีซาเรลัะ บอกาเฆลียด. อาบีนายา อี มูห ฆอน อาเยฮอยาดา อัน แบน อี อึบ เฆ ดูอี เคเรซี บอ ดูอี เบลัะซี. 24 อาตอรัม ตึอน บอ แบน ดา อี แฆบ รึอน จึง. อายอซาพาด อี มูห ฆอน อาฮีลูด ตึอน, อัน แบน ดา จาเร. 25 อาซีวา บอ แบน ดา อี จอย ดา จาเร ตาง. อาฌาโดก ฆาย อาบาทา ตึอน ฆาย แบน ดา อี หลู ดี เฌาพรา.

26 อาอีรา อี มูห ฆอน อายาอีรัะ, อัน แบน ดา อี หลู ดี เฌาพรา อาดา อาดาวีด.