1 ปัน ตี อี เฮา บอ กาลาง ดี อายอพัะ ลอง คูนดีคัม แฮะ ยาม บอ กลึร โกบ แฮะ ยัม อาบาซาโลม. 2 ซีแง ตึอน ยี แฮะ กาโฆห ออง. มาแล, อึณ วี แบน ดูก ดี น็อห ดอน อี. โคว, เฆ แฮะ ยึร ลอง คูนดีคัม แฮะ กลึร แฮะ เหงา โกบ แฮะ ยัม ฆอน อัน. 3 เฆ บอ ปรา ดี ลึบ ตัห แคง มืง แตห อึณ ปี อี เตา ซึก, อี โบง นา หมึอม ซาย, วี ปรา ดี ลึบ ตัห. 4 คูนดีคัม มืร กาโหมะ นา อัน บอ ยาม ตาง ต็อห, “อึย ฆอน โอว อาบาซาโลม, อาบาซาโลม อึย. อึย ฆอน อีมาย โอว, อึย ฆอน โอว.”

5 ปัน ตี อายอพัะ บอ ลึบ แคง โฮง โดง กอย คูนดีคัม ตึอน, บอ กาลาง ดี อัน ต็อห, “อาตึร นี แม แฮะ พยาก เย บอกาเฆลียด, เย แฮะ คยอด อาซาก แม บอ ฆอน อีบึณ อีมาย แม, บอ นาง ฮอคัม เฆ อีบึณ เตียะ แม. ปี โบง แม ดอ ตี นี อึณ ยี แตห เย หมึอม ซาย ปี ดูอี อี แฮะ โบง อี ตู หมึอม.

6 แม ยี ร็อก เฆ อี ฌ็อง แม, วี ฌ็อง เย อี ร็อก แม. อาตึร นี แม แฮะ บยัะ ลอง ตู มาด แม อามู อามาด แม เฆ ดา ซึก แม. โอว แฮะ ฮอต ยึร ซีคยา, เซ อึณ มูห อาบาซาโลม วี อีม, เซ เย แดเจณ แม ยี ยัม โตต, อาตี ดี วี ล็อะ น็อห แม, วี โดบ ปี อึง แม. 7 ดอ ตี นี, โอว หมาณ แม, แตห แม เลห กาลาง โฆรห, แตห อึณ ล็อะ น็อห ดา ซึก แม. โอว ดืง แตห บอ เฌาพรา โทม. เซ แม ตู เลห ฮาว ดอ ตี นี, แคง หมึร นี, อึณ อาว ฮู มึห อาเซ อี ดี กอย รึม โดบ แม. เซ อึณ ปาย ตี อึณ ดี หมึอม โยว หลึอม ดูก แปะ แฮะ ดึอม กาดูห แม ซีณ ดอ หนึม ดอ ดีแตด แม กอ ฌัม อาตึร นี.”

8 ปัน ตี คูนดีคัม บอ ยีต ตูต บาง มาโลห มืง ตึอน. เฆ ดอน อี บอ ต็อห, “คูนดีคัม แฮะ ยีต ตูต บาง มาโลห มืง.” แคะ กอย ดูอี เฆ บอ ตัห ดี อาต คูนดีคัม. ดอ อัน ตี อี มูห ดูอี อีซาเรลัะ, เฆ บอ เตา ฮาว โดง กอย บรีม เฆ. 9 แคะ กอย ครึร ดูอี อีซาเรลัะ ดอน ครึร, เฆ นังฆัน ลาย ซังคยาง ต็อห, “คูนดีคัม แฮะ แตห เย เลห ตัะ รันซู เย, แกวะ แตห ดูอี พีลีที อึบ เย. ดอ ตี นี, อัน แฮะ วี เตา ฮาว ตัะ มืง นี โกบ ซี แวน อาบาซาโลม ฆูณ อัน. 10 อาบาซาโลม แปะ แฮะ ดาง เอ ตึอน, แยะ แฮะ ยัม ดอ กาโฆห เฆ. โคว, ดอ ตี นี แตห เอ วี แดะ ตัห คูนดีคัม เอ.”

11 คูนดีคัม อาดาวีด บอ จัร ดูอี ฮาว โดง กอย ดา อี หลู ดี เฌาพรา อี มูห อาฌาโดก ฆาย อาบาทา ตึอน ต็อห, “แตห บาย กาลาง ดี เฆ ดา ตาง แคง มืง ยูดา ต็อห, ‘อึณ ปาย เหมา เบ ปี ซอ บัร เหลณ ลอง ดี วี บาง ตัห เบ คูนดีคัม แคง โฮว อัน. คูนดีคัม แฮะ ฮอต ยึร โฆรห ปี กาลาง ดูอี อีซาเรลัะ ดอน โปละ, แฮะ โทม โฆรห ปี กาลาง เฆ แคง โฮว คูนดีคัม. 12 เบ มูห บีนอง วอแว โอว. อึณ ปาย เหมา เบ บัร เหลณ ลอง ดี แตห คูนดีคัม วี ตัห?’ 13 บาย วี กาลาง บอ ดี อามาซา ต็อห, ‘แม มูห วอแว โอว. นา อาต นี ฮาว, โอว ดี แตห แม แบน ดา อี อึบ ดา ซึก โอว, แตห แม กาดาง อายอพัะ ตึอน. แตห เฌาพรา ดัม กืน หมาบ ดี โอว, เซ โอว ตู โบง ปาย ตี.’”

14 ปัน ตี อามาซา โบง แตห น็อห ดูอี อายูดา ลาย โพรม, แตห เฆ แบน อู น็อห. เฆ บอกาเฆลียด วี บาง คูนดีคัม ต็อห, “แตห แม คูนดีคัม บอ เฆ อี โดบ แม วี ตัห โตต.”

15 ปัน ตี คูนดีคัม บอ วี วีว บอ โฮะ ฌัม ดี แบลง อึม ยอดาน ตึอน. เฆ ดูอี อายูดา แฮะ ฮาว ฌัม ดี มืง ฆีลัะฆา, บัร ดี รวห คูนดีคัม. เฆ บอ จอย คูนดีคัม กาโลห อึม แบลง ยอดาน ตี.

16 อึณ ยี มูห อาซีมี, อี มูห ฆอน อาฆีรา, อี มูห อาโมยว อาเบนยาม ตึอน, อัน ตัห มืง บาฮูรีม. อัน บอ ปีครัน อัน ตัห โดบ ดูอี อายูดา, แตห บอ อัน ปึอน ดี บัร ดี รวห คูนดีคัม อาดาวีด ตึอน.

17 อัน แดะ ดูอี อาเบนยาม อู แหรณ วี, บอ อาฌีบา อี ดึอม แบน แดเจณ อาซอลู, บอ ฆอน อีมาย อัน ฆึร ดี พัน วี บอ หมาย อัน อา ฆึร วี. เฆ บอกาเฆลียด แฮะ ตัห โดง กอย คูนดีคัม. 18 เฆ กาโลห อึม ดี บาง กาโลห ตึอน บอ จอย ดึห กาโลห ดูอี แคง อึณโฮม คูนดีคัม บอ โบง แตห อึณ ล็อะ น็อห คูนดีคัม. อาซีมี อี มูห ฆอน อาฆีรา ตึอน, อัน บอ ตัห ครึบเครา ดี อาต คูนดีคัม. 19 อัน บอ กาลาง ดี คูนดีคัม ต็อห, “อึย แม เฌา, หมาณ แม เฌา, แกวะ ดัม หมาบ ดี โอว. หมาณ แม ฆ็อห แวน หมาบ แปะ แฮะ โบง ลูต โอว ดอ มูห ซีแง ดอ เลห แม คูนดีคัม แคง มืง เยรูซาแลม ตึอน. หมาณ, แม แกวะ อูน แคง น็อห แม. 20 โอว แฮะ นับ, โอว แฮะ โบง นา ตู หมึอม ดี แม. โอว ยี ตัห ดี อาต ดอน อี อี มูห แคง ครึร อาโยว เฆ ตึอน, แตห โอว ปึอน ดี บัร ดี รวห แม อี มูห คูนดีคัม อี อึบ โอว.”

21 อาพีเซ อี มูห ฆอน นาง เจรูยา ตึอน บอ ต็อห, “อาซีมี นี โลว ยัม. โกบ แฮะ ดืง แฮะ เอห อัน ดูอี ปี พ็อห เฌาพรา นามัน ดี ฆีณ อัน.”

22 อาดาวีด วี ต็อห, “อึย เบ ฆอน นาง เจรูยา, เบ ซอ แบน รันซู โอว อาตึร นี. อาตึร นี อาว มึห อาเซ อี โลว ยัม แคง มืง อีซาเรลัะ นี. ดอน อี โลว โคย. โคว, โอว แฮะ วี แบน คูนดีคัม ดูอี อีซาเรลัะ.” 23 ปัน ตี คูนดีคัม วี ต็อห ดี อาซีมี, “แม ตู โลว ยัม.” แฮะ ฮอต, คูนดีคัม วี ดัว กาดีก ซัดฌา ดี อัน.

24 บอ อาเมพีบอเซด อี มูห หลาน อาซอลู ตึอน, อัน บอ ตัห แตห อัน ปึอน ดี บัร ดี รวห คูนดีคัม. ซีณ ซีแง เลห ฮาว คูนดีคัม ตึอน, กอ วี ฌัม ซีแง วี ตัห คูนดีคัม, อัน ตู บาย เปลา อัน, ตู ฆาด แวน ดีโมห ดี กูงกาบ อัน, ตู ลัห ครึง อัน. 25 ดอ ตัห อัน มืง เยรูซาแลม, ตัห บัร ดี รวห คูนดีคัม, คูนดีคัม บอ ดีหมอด อัน ต็อห, “อึย อาเมพีบอเซด, เหมา อึณ ปาย ปี ตู ฮาว แม โดบ โอว?”

26 อัน วี ต็อห, “อึย แม คูนดีคัม, โกบ แดเจณ แม อาว ปึอน ฮาว ดี เปลา, โอว แฮะ จัร อี ต็อห, ‘แรน กอบ มาลา โอว ดี ป็อะ ฮาว โดง กอย คูนดีคัม.’ 27 อึณ ยี มูห แดเจณ โอว อี จืร อาฌีบา, อัน วี กาย็อง โอว ดี แม คูนดีคัม. มาแล, แม ดา กาณา, แม แฮะ ปี อามู อามาด เฌาพรา. หมาณ, แตห แม โบง ดี โอว แคะ ปี อึง แม. 28 แคะ กอย ครึร ฆูณ โอว แฮะ กาอาบ แม ง็อห ยัม ดอน อี. ยี มูห โอว, แม คูนดีคัม แฮะ แตห โอว กอย โดง อึอบ. แฮะ แตห โอว ปึอน ดี โฮม รึม โดบ แม. โกบ อึณ ปาย ตี อาว ฮู กาอาบ โอว หมาณ ดี แม คูนดีคัม ปอ อึณ ปัว.”

29 คูนดีคัม วี ต็อห ดี อัน, “เหมา อึณ ปาย ปี ซี กาลาง แม ปอ อึณ ปัว ลอง โกรว แม ดี โอว? โอว แฮะ ฮอต ซูงพยาด แตห บอ แม บอ อาฌีบา ลาย กาซาง กาดาย ตึอน.” 30 อาเมพีบอเซด วี ต็อห, “ดอ ตี นี, แม คูนดีคัม แฮะ วี ฌัม ซีคยา แคง โฮว แม. โคว, แตห อาฌีบา ดึห โตต ดอน โมยว ดี อัน.”

31 อึณ มึห บอ อาบาจี อี กอย มืง ฆีเลอาด, อัน บอ เลห แคง มืง ลอเกลีม, ตัห กาโลห อึม แบลง ยอดาน, แตห อัน ปึอน ดี ตึย คูนดีคัม ฌัม นา ตัะ แบลง อึม. 32 อาบาจี แฮะ กัด กาเซา. อาซาก อัน แฮะ ปึอน ดา ฆึร ซีนัม. อัน มูห ดูอี ครัม ตาง. โคว, อัน แฮะ ดึอม เฮียง คูนดีคัม ดอ กอย คูนดีคัม ดี มืง มาฮานาอีม ตึอน. 33 คูนดีคัม วี ต็อห ดี อาบาจี, “แตห แม ฮาว กาโลห อึม โดบ โอว. แตห แม ฮาว โดบ โอว ดี มืง เยรูซาแลม. โอว ดี วี เฮียง แม.” 34 อาบาจี วี ต็อห, “อาซาก โอว อาว ฮู โต็ง. อาว ฮู โคว โดบ แม คูนดีคัม ฮาว ดี มืง เยรูซาแลม. 35 ดอ ตี นี, อาซาก โอว บอ แฮะ ฮอต โนะ ดา ฆึร ซีนัม. โอว ฮู นับ ดี กาย็อห อี หมึอม ตู หมึอม. โอว ฮู นับ ปี ดี โฮม โมยว เหมา ซีแงห. โอว ฮู นับ ดี โทม อีบึณ อีมาย ต็อห โหมว. โกบ อึณ ปาย ตี อึณ ดี แว หณาบ กืน ดี แม คูนดีคัม. 36 โอว ดี ฮาว โดบ แม คูนดีคัม แตห อึณ ฌัม นา ดอย แบลง อึม ยอดาน คอ อี แจก. โคว อัน ตี, แม คูนดีคัม ตู โลว ดัว นา หมึอม กืน ดี โอว. 37 หมาณ อาควาง แม, แตห แม แตห โอว วี เวณ แคง มืง โดง กอย โอว, อี มูห โดง กอย บาเรว ฆูณ มา โอว ตึอน. ยี มูห อาคีมัะ ตึอน, หมาณ แตห อัน ฮาว โดบ แม คูนดีคัม. แตห แม โบง แคะ ปี ทาง แม อี บอด อี หมึอม ดี อัน.” 38 คูนดีคัม วี ต็อห, “อาคีมัะ ปึอน กาโลห ฮาว โดบ โอว. โอว ดี โบง ดี อัน แคะ ล็อะ น็อห แม. แคะ ปี หมาณ แม ดี โอว ตี มืร, โอว ดี โบง ดัว ดี แม.”

39 แฮะ ฮอต, แคะ กอย ดูอี, เฆ บอ กาโลห แบลง อึม ยอดาน ตึอน. ปัน ตี บอ คูนดีคัม กาโลห. คูนดีคัม บอ อูห อาบาจี บอ ม็องการา ดัว ดี อัน. แฮะ ฮอต, อาบาจี บอ วี เวณ โดง กอย อัน.

40 คูนดีคัม แฮะ ฮอต กาโลห อึม, อัน บอ ฮาว ดี มืง ฆีลัะฆา. อาคีมัะ มืร โดบ. แคะ กอย ดูอี อายูดา บอ ดูอี อีซาเรลัะ อู กาแต, เฆ แฮะ ตัห โดบ คูนดีคัม.

41 ปัน ตี ดูอี อีซาเรลัะ บอกาเฆลียด บอ กาโพรม ดี ตัห โดง กอย คูนดีคัม ต็อห ดี อัน, “โกบ อึณ ปาย เหมา, บีนอง แม อี มูห ดูอี อาโมยว ยูดา เฆ ปี ซอ ปรา ดี รวห แม คูนดีคัม บอ อามู อามาด แม, บอ ดูอี แคง โฮว เฆ ตึอน, แตห เบ กาโลห แบลง อึม ยอดาน?”

42 ดูอี อายูดา เฆ วี ต็อห ดี ดูอี อีซาเรลัะ, “เย โบง ปาย ตี โคว, คูนดีคัม แฮะ มูห บีนอง กาเครียะ ดี เย. เหมา อึณ ปาย ปี รู เบ ดี เย? เย ตู โฮม ปี ดัว คูนดีคัม. คูนดีคัม ตู มึห ดี ดัว มาเซ ดี เย.”

43 ดูอี อีซาเรลัะ วี เวียะ โฆรห เฆ ตี ต็อห, “แคง มืง ปี อึบ อาดาวีด, เย ดูอี อีซาเรลัะ แฮะ กืน. เย มูห ฆึร บูน. โคว, อึณ กาอาบ เย กอย เครียะ คูนดีคัม หลึอม เบ. โคว, เหมา อึณ ปาย ปี ตู โรวเซ เบ ดี เย? เย แฮะ ต็อห ดี วี แดะ คูนดีคัม ดี อาต เบ.” โฆรห ปี วี เวียะ เฆ ดูอี อายูดา, อึณ ยี ฮาย หลึอม โฆรห เฆ ดูอี อีซาเรลัะ ตึอน.