1 อาดาวีด บอ ยอด ซีคยา แคะ กอย ดา ซึก อัน. อัน บอ แตห เฆ กอย แบน พึง แบน พึง, ดาง แตห มึห ดา อี อึบ อู แหรณ วี บอ ดา อี อึบ อู มาย็อห วี. 2 อาดาวีด บอ แตห ดา ซึก เฆ ตึอน ฮาว. อู พึง อัน ดัว ดี อายอพัะ. ปอ อู พึง อัน ดัว ดี อาพีเซ อี มูห วา อายอพัะ, อี มูห ฆอน นาง เจรูยา ตึอน. ปอ อู พึง อัน ดัว ดี อาอีทายัะ อี มูห ดูอี กีดตี ตึอน. คูนดีคัม กาลาง ดี ดา ซึก อัน ต็อห, “โอว ดี ฮาว โดบ เบ.”

3 เฆ ดา ซึก วี ต็อห, “แม อาว โลว ฮาว. เซ เย ปี บอ เตา โตต มืร, เฆ ตู มาด เย มูห มาเซ. เซ เย ปี บอ ยัม อู กาแต มืร, เฆ ตู มาด อึณ มูห มาเซ. เฆ ดี เหรต แม อู กาดัง. เซ เฆ ปึอน เหมต แม, อึณ ปี เฆ เหมต เย อู หมึณ วี. โกบ อึณ ปาย ตี, เซ แม กอย แคง มืง, ตึย อี จอย เซ เย โลว อี จอย เย, อึณ ดี หมึอม หลึอม ฮาว แม โดบ เย.”

4 คูนดีคัม มืร วี ต็อห, “เซ เบ ทาง อึณ ดี หมึอม หลึอม โดบ โอว ดี เบ, โอว ดี กอย ดี ตี.” ปาย ดี คูนดีคัม บอ ยีต จ็อง บาง มาโลห มืง, ยอด ดูอี เฆ ตึอน ฮาว. อึณ บอ มูห แบน พึง แบน พึง, มัง พึง อู มาย็อห วี, มัง พึง อู แหรณ วี. 5 คูนดีคัม มืร จัร อายอพัะ, อาพีเซ บอ อาอีทายัะ ต็อห, “แตห เบ กาเว โอว, แกวะ โบง กาเซา ดี อาบาซาโลม, อี ซี มูห บาหนึม เตียะ.” บอ ดา ซึก ดอน อี แฮะ ยึร โฆรห ปี กาลาง คูนดีคัม ลอง อาบาซาโลม ดี ดา ตาง อี แยต ดา ซึก เฆ ตึอน.

6 ปัน ตี เฆ บอกาเฆลียด บอ เลห ฮาว โดง ฆลัง, แตห เฆ ปึอน ดี กาโฆห ดี ดูอี อีซาเรลัะ. เฆ ยี ลาย กาโฆห แคง นัง เฮ นัง แปร อี จืร อาเอพารีม ตึอน. 7 เฆ ดูอี อีซาเรลัะ บอ ชึม ดี ดูอี อาดาวีด. ซีแง ตี เฆ บอ ลาย กาโฆห ยัม กืน กาเซา. อึณ บอ มึห อา หมึณ วี อี แฮะ ยัม. 8 ซีแง ตี โดง กาโฆห เฆ ตี, อึณ บอ กาว็อห ดอน นา ดอน บลาก. เฆ อี ยัม แคง นัง เฮ, เฆ มืร แฮะ กืน หลึอม เฆ อี ยัม ดี บลา ปัวะ ลาง.

9 อาบาซาโลม บอ ตา กาตูณ ดูอี อาดาวีด เฆ ตึอน. อาบาซาโลม บอ ป็อะ มาโลว อัน. มาโลว ตี บอ ลึบ ฮาว ครึม รา เฮ เทเรบ ตาง อี มึห รา กืน. ฆีณ อัน บอ ฮ็อะ ดี รา เฮ ตี. อัน บอ ฮอย โดว อัน แคง ดีโว็ง ปาย ตี. มาโลว ปี ป็อะ อัน ตึอน บอ กาโลห ฮาว.

10 ดูอี อู วี บอ ยึร อัน, บอ วี ฮาว กาลาง ดี อายอพัะ ต็อห, “โอว แฮะ ฮอต ยึร อาบาซาโลม แฮะ ฮอย ดี รา เฮ เทเรบ.”

11 อายอพัะ วี ต็อห, “แม ต็อห, แม แฮะ ฮอต ตัห ยึร อัน. แม ยี ตู แดบ แตห อัน โจห ยัม แดง กาดาย. เซ แม ยี โบง ปาย ตี โอว ดี บอ ดัว รึอน แฌด ฆึร กยาบ บอ แซะ ดา ซึก ดี แม.”

12 ดูอี ตึอน วี ต็อห ดี อายอพัะ, “เซ โอว ปี บอ แฮะ ปึอน รึอน อู แหรณ กยาบ มืร, โอว ตู คัม ดี โบง ดี ฆอน คูนดีคัม ปาย ตี. โคว, โอว แฮะ ยึร คูนดีคัม แฮะ กาลาง ดี แม บอ ดี อาพีเซ บอ ดี อาอีทายัะ ต็อห, ‘แตห เบ กาเว โอว, แกวะ แตห อาบาซาโลม ฌัม ดูก กาเซา.’ 13 เซ โอว ฮี โบง ปี ต็อห แม, คูนดีคัม ดี บอ ง็อห ยัม โอว. โคว, อาว มึห อี ปึอน เครียง คอ อู โมยว ดี คูนดีคัม, แกวะ แตห อัน นับ. เซ อึณ ปาย ตี บอ แม ตู วี จอย โอว.”

14 อายอพัะ วี ต็อห, “โอว ตู ดัน กอย เหลณ โทม โฆรห แม.” แฮะ ฮอต, อัน บอ ดึห ดี โฆ็ง บลา เลียห ดีเตียม โอย บลัะ. อัน บอ ฮาว ซัด หลูห บังน็อห อาบาซาโลม อาต ยัม อัน, ดอ ฮอย อัน ดี เฮ เทเรบ ตึอน. 15 อึณ ยี มึห ซึก ดีรอย เฆ ฆึร วี, อี โฆ็ง ครึง กาโฆห อายอพัะ ตึอน, เฆ บอ แวง โรบ อาบาซาโลม, ง็อห แตห อัน ยัม.

16 ปัน ตี อายอพัะ บอ บูด เวา. เฆ ดา ซึก อัน บอ วี จู คูงครัห ดูอี อีซาเรลัะ โกบ แฮะ แคร อายอพัะ ดี เฆ. 17 เฆ บอ ดึห อาบาซาโลม, เบลห โดว อัน แคง กาเดา กาดาย อี ลึก แคง นัง เฮ ตึอน, บอ วี ดึห มาว เบลห นา แดง, แตห กอ อึณปึม จา. ดูอี อีซาเรลัะ, เฆ ดอน อี บอ เตา เวณ ดี กาง เฆ.

18 ดอ หณัม ยัม อาบาซาโลม ตึอน, อัน แฮะ ดึอม ซัม ร็อง หล็อก โดบ ดีลัยะ คูนดีคัม ตึอน, แตห อี โหลห อัน เซเซ. อัน โบง ปาย ตี โคว อัน ต็อห, “โอว ตู มึห ฆอน อีมาย อี ดี ปลูะ โอว, อี ดี แตห อี นัมโหลห โอว เซเซ.” ร็อง ตี, อัน แตห อึณ จืร ‘ร็อง อาบาซาโลม.’ กอ ฌัม อาตึร นี เฆ ต็อห ปาย ตี.

19 ปัน ตี อาฮีมาด อี มูห ฆอน อาฌาโดก ตึอน, หมาณ ต็อห, “แตห โอว กาแบลบ ฮาว กาลาง ลอง อัน ตี ดี คูนดีคัม, แตห อัน นับ ลอง เฌาพรา แฮะ จอย อัน, แฮะ แตห อัน ลอด รันซู อัน.”

20 อายอพัะ วี ต็อห, “อาตึร นี, อาว ปึอน แตห แม ฮาว กาลาง. แม ปึอน กาลาง ลอง อัน ตี ปอ อู ซีแง. อาตึร นี แม ยี ตู ปึอน กาลาง. โคว, ฆอน คูนดีคัม แฮะ ยัม.”

21 วาย อัน ตี อายอพัะ วี กาลาง ดี ดูอี อู วี อี มูห อาโมยว กูซา. อัน ต็อห, “แม ฮาว กาลาง ดี คูนดีคัม แคะ ปี ยึร แม ดี นี.” อัน บอ ตัห ฆึบ ดี อาต อายอพัะ. แฮะ ฮอต, อัน บอ ฮาว.

22 ปัน ตี อาฮีมาด อี มูห ฆอน อาฌาโดก ตึอน ปี วี หมาณ ดี อายอพัะ อึณ ปัว ต็อห, “บอ มูห ฌึร เหมา, แตห โอว กาแบลบ ฮาว โดบ ดี ปัน ดูอี กูซา ตึอน.” อายอพัะ บอ ต็อห, “อึย แม ฆอน, เหมา อึณ ปาย ปี ซี ฮาว กาเซา แม. อาว มูห นา หมึอม ปี ดี กาลาง แม.”

23 อัน ปี วี หมาณ อึณ ปัว ต็อห, “บอ ปาย เหมา มืร, แตห โอว ฮาว.” แฮะ ฮอต, อายอพัะ บอ ต็อห, “แตห แม กาแบลบ ฮาว.” ปัน ตี อาฮีมาด ตึอน บอ กาแบลบ ฮาว โดบ อึณเตณ ฆลัง บอ กาโลห ปวน ดูอี กูซา ตึอน.

24 ดอ อัน ตี อาดาวีด กอย ดี มาโลห มืง. อัน กอย ดี กาแต มาโลห เรต ฆาย มาโลห แคง. ดูอี บัร มืง อู วี, อัน บอ โฮะ นา แดง มาโลห, บัร ดี ยอด ดี โคบ แรง มืง ตึอน. อัน บอ ยึร ดูอี อู วี กาแบลบ ตัห. 25 ดูอี บัร ตึอน บอ แดะ ดี กาลาง ดี คูนดีคัม. คูนดีคัม มืร วี ต็อห ดี อัน, “เซ อึณ มูห อู วี ตัห, อัน ดี ตัห กาลาง นา หมึอม.” ดูอี อี กาแบลบ ตึอน บอ แกร ดี ตัห เครียะ.

26 ดูอี บัร ตึอน ปี วี ยึร ปอ อู วี อี กาแบลบ ตัห. อัน บอ แดะ เฆ อี กอย บัร บาง มาโลห ตึอน ต็อห, “แตห แม ยอด, ดูอี ปอ อู วี แปะ แฮะ วี กาแบลบ ตัห.” คูนดีคัม มืร วี ต็อห, “วี ตี มืร ตัห กาลาง นา หมึอม.”

27 ดูอี บัร มืง ตึอน วี ต็อห, “โอว ทาง วี อี กาแบลบ ตัห ดี อาต ตึอน ปี ปาย อัน ดี กาแบลบ อึณ แหนน อาฮีมาด อี มูห ฆอน อาฌาโดก ตึอน.” ปัน ตี คูนดีคัม มืร วี ต็อห, “ดูอี วี ตี, อัน มูห ดูอี บอด. อัน ดี บอ ตัห กาลาง นา หมึอม.”

28 ปัน ตี อาฮีมาด บอ แดะ ดี กาลาง ดี คูนดีคัม ต็อห, “แฮะ ดาคึย ฆยามซา ดอน โมยว.” อัน บอ มูด ฆึบ ดี อาต คูนดีคัม บอ ต็อห, “แตห แม อืบ เฌาพรา, อี มูห เฌาพรา ปี กรึบ แม. อัน แฮะ แตห เฆ อี ซี กาโฆห ดี แม ชึม โตต.”

29 คูนดีคัม บอ ดีหมอด ต็อห, “อาบาซาโลม อี มูห บาหนึม เตียะ ตึอน แฮะ ดาคึย?” แฮะ ฮอต, อาฮีมาด วี ต็อห, “ดอ จัร อายอพัะ โอว ตัห, โอว ยึร เฆ ดูอี ลาย กาวัร กืน, โอว มืร ตู บอ นับ ซีคยา, ลอง มาเซ อึณ มูห.”

30 คูนดีคัม วี ต็อห, “กาโทะ ฮาว กอย ดี นี.” อัน ตึอน บอ กาโทะ.

31 ปัน ตี ดูอี กูซา ตึอน บอ วี ตัห ฌัม บอ กาลาง ต็อห, “อึย แม คูนดีคัม ตาง, แตห แม โทม นา หมึอม ปี ดี กาลาง โอว ดี แม. อาตึร เฌาพรา แฮะ แตห รันซู อี กาโฆห ดี แม ชึม โตต.”

32 คูนดีคัม วี ดีหมอด ดูอี กูซา ตึอน ต็อห, “อาบาซาโลม อี มูห บาหนึม เตียะ ตึอน แฮะ ดาคึย?” ดูอี กูซา วี ต็อห, “บอ รันซู แม บอ เฆ อี ต็อห ดี โบง นา จาว ดี แม, แตห เฆ บอกาเฆลียด ปี ฆอน แม ตี.”

33 ปัน ตี คูนดีคัม บอ กลึร กาเซา. อัน บอ วี โฮะ โดง กอย โฮง นา แดง มาโลห แรง มืง ตึอน, บอ วี ยาม. ดอ โฮะ อัน ตึอน อัน ต็อห, “อึย ฆอน โอว อาบาซาโลม. อึย ฆอน อีมาย โอว, อึย อาบาซาโลม. โอว แฮะ มึห น็อห ซี ยัม กาดาง โดว แม. อึย อาบาซาโลม ฆอน โอว, อึย.”