ปัน ตี อาฮีซอเพลัะ วี กาลาง ดี อาบาซาโลม ต็อห, “เซ อึณ มูห โอว, แตห โอว ร็อห ดูอี อู หมึณ ดี อา แหรณ วี, แตห เฆ คูงครัห โดบ อาดาวีด อู เฌณ แคง หมึร นี. 2 โอว ดี กาโฆห ดี อัน ดอ แฮะ นูน ดีหลัห อัน. โอว ดี บอ โบง แตห อัน กาจัว, แตห เฆ อี โดบ อัน กอ กาโชต เตา เฆ. โอว ดี วี ง็อห มี คูนดีคัม. 3 แฮะ ฮอต, โอว ดี วี ดึห ดูอี อี โดบ อัน, แตห เฆ วี ตัห โดง กอย แม, แตห อึณ ปี ดีบยา อี ตัห โดง กอย อีมาย อัน. เซ ฮี ปึอน อาดาวีด อู วี, อึณ ปี แม แฮะ ปึอน ดูอี บอกาเฆลียด. ตู โลว แตห ดูอี กืน ชึม.” 4 โฆรห ตี อึณ บอ ล็อะ น็อห อาบาซาโลม บอ ดูอี อี แบน ดา ตาง กาแต ดูอี อีซาเรลัะ.

5 ปัน ตี อาบาซาโลม วี ต็อห, “แตห อาฮูเซ อี มูห ดูอี อาคีทา ตึอน ตัห, แตห เอ โทม บอ โฆรห อัน.” 6 อาฮูเซ แฮะ ฮอต ตัห ดี อาบาซาโลม, อาบาซาโลม วี ต็อห ดี อัน, “อาฮีซอเพลัะ แฮะ ดัว อากยาม อางยาน ต็อห ปาย นี. แตห แม กาลาง, โยว อึณ หมึอม โทม โฆรห อัน ตี.”

7 อาฮูเซ วี กาลาง ดี อาบาซาโลม ต็อห, “อากยาม อางยาน ปี ดัว อาฮีซอเพลัะ คา นี อาว หมึอม. 8 แม แฮะ นับ ฆูณ แม. บอ อัน บอ ดูอี อัน แฮะ โหมว ดี กาโฆห. เฆ มึห น็อห ฮาย กาเซา, ปี มาเฆรห แคง แปร ดอ พาด อี ดึห ฆอน อัน. แดง ตี, ฆูณ แม แฮะ มูห ดา ซึก อี แฮะ กาโฆห เซเซ, บอ แคง หมึร นี, โอว บอ นับ, อัน ตู อีด กาโดบ ดี ดา ซึก อี เฮา. 9 อัน แฮะ ฮอต เครียง อัน แคง กาเดา กาดาย อู โปละ อู โปละ. เซ อาว ปาย ตี มืร, อัน แฮะ เครียง นา เตต นา ตัะ. เซ อัน ฮี ง็อห ยัม ดูอี แม ดี อาต, อี ฮี ยึร ลอง อาตี, เฆ ดี ต็อห, ‘เฆ แฮะ กาโฆห ดา ซึก อาบาซาโลม, แฮะ ฮอต ยัม, แฮะ ฮอต ชึม.’ 10 ปัน ตี วี อี มึห น็อห ยัะ น็อห อี ปี มาครังซี ตึอน, เฆ ดี วี แบน น็อห ดีแตด. แคะ กอย ดูอี อีซาเรลัะ บอกาเฆลียด, เฆ ดี บอ นับ, ฆูณ แม มูห ดา โปลม ตาง. เฆ นับ, บอ เฆ อี โดบ อัน ตึอน มูห โตต ดูอี อี กยัะ อี ยัะ. 11 โกบ อึณ ปาย ตี โอว แตห อากยาม อางยาน ดี แม, หมาณ แม, แตห แม แดะ เฆ ดูอี อีซาเรลัะ บอกาเฆลียด, จูห ดี มืง ดาน กอ ฌัม ดี มืง บีราเซบา, แตห เฆ ตัห กาฌูะ. เซ ฮี ตีห, แตห กอ ปี กาฮาต อี กอย โคบ อึม นัมมูกซารา. เฆ ฮี ตัห กาฌูะ ดี แม, แม ดี แบน ดา อี แยต เฆ, แตห เบ บอกาเฆลียด ฮาว กาโฆห. 12 เอ ฮี ยึร โดง กอย อัน ตึอน, เอ ดี กาโพรม ดี กาโฆห อู เฌณ, แตห อึณ ปี อึม ดีงาน อี โจห แดง กาดาย นี. ปาย ตี บอ อัน บอ เฆ อี โดบ อัน อี กอย ดอน นา ดอน โปละ อาว ฮู ฆีด คอ อู วี. 13 แดง ตี, เซ อัน บอ เตา ฮาว แคง มืง อู มืง, ดูอี อีซาเรลัะ เฆ ดี ดึห ตัห วัน, แตห เฆ ดืด กาปยาต โตต ปี ซัม เฆ, แตห มืง บอ โจห โตต แคง ดีลัยะ แบลง อึม. มาว อู โบ็ง มืร, แกวะ แตห อึณ ซี มึห.” แคะ ตี อาฮูเซ ดัว อากยาม อางยาน.

14 ปัน ตี อาบาซาโลม บอ ดูอี อีซาเรลัะ บอ ต็อห, “อากยาม อางยาน ปี ดัว อาฮูเซ อี มูห ดูอี อาคีทา ตี, อึณ หมึอม หลึอม ปี ดัว อาฮีซอเพลัะ ตึอน.” เฆ ทาง ปาย ตี โคว, เฌาพรา แฮะ ต็อห ดี แวน อากยาม อางยาน หมึอม ปี ดัว อาฮีซอเพลัะ ตึอน, แตห อาบาซาโลม วี ชึม, วี คัม หมาบ อัน.

15 ปัน ตี อาฮูเซ กาลาง ดี ดูอี อี หลู ดี เฌาพรา อี จืร อาฌาโดก ฆาย อาบาทา ตึอน ต็อห, “อาฮีซอเพลัะ ตึอน แฮะ ดัว อากยาม อางยาน ปาย นี ปาย นี ดี อาบาซาโลม บอ ดี เฆ ดา ตาง ดูอี อีซาเรลัะ ตึอน. โอว มืร แฮะ ฮอต ดัว อากยาม อางยาน ปาย นี ปาย นี. 16 โกบ อึณ ปาย ตี แตห แม จัร ดูอี ฮาว ครัน ครัน โดง กอย อาดาวีด ต็อห, ‘หมึร อาตึร นี, แกวะ กอย ดี บาง กาโลห อี กอย แคง แปร ตึอน. แตห แม กาโลห ฮาว ปวน ครัน ครัน. โยว แม คูนดีคัม บอ ดูอี อี โดบ แม ดี ชึม บอกาเฆลียด.’”

17 อาโยวนาทาน ฆาย อาฮีมาด ตึอน ฆาย โยว อี ยึร, ตู ยัะ ลึบ ฮาว แคง มืง. โคว, ฆาย แฮะ กอย บัร โดง จืร เอโรวเก ตึอน. อึณ บอ มึห หมาย อีบึณ อู วี, อัน บอ ฮาว กาลาง ดี ฆาย. ฆาย บอ วี กาลาง ดี คูนดีคัม อาดาวีด, 18 มาแล, อึณ ยี วี มึห ดูอี อู วี, อัน แฮะ ยึร ดอ ฮาว ฆาย, บอ วี ฮาว กาลาง ดี อาบาซาโลม. ฆาย ตึอน มืร ฮาว ปีครัน ปีแฮ ฆาย, บอ ฮาว ลึบ แคง กาง ดา อู วี, อี กอย แคง มืง บาฮูรีม ตึอน, อัน มึห อึม คึม แคง แวง อัน. ฆาย บอ ลึบ เครียง แคง อึม คึม ตี. 19 อี มูห ยา กาณา กาง ตึอน, อัน บอ ดึห ซีบลึก อึม คึม ตี, ซีบลึก ฆาย, บอ วี ดึห โหงว ราย นา แดง, แกวะ แตห อึณ มึห อาเซ นับ ลอง อัน ตี.

20 ปัน ตี แดเจณ อาบาซาโลม เฆ บอ ตัห ฌัม กาง ตึอน, บอ ดีหมอด ต็อห, “อาฮีมาด ฆาย อาโยวนาทาน กอย ดี เหมา?” อีบึณ ตึอน วี ต็อห, “ฆาย แฮะ ฮอต กาโลห แบลง อึม ฮาว.” เฆ ตึอน บอ เหรต มืร, เฆ อาว ฮู ยึร. แฮะ ฮอต, เฆ บอ วี เวณ แคง มืง เยรูซาแลม.

21 วาย แฮะ ฮอต ฮาว เฆ ตึอน, ฆาย อา วี บอ วี เลห แคง อึม คึม ตึอน, บอ วี ฮาว กาลาง ดี คูนดีคัม อาดาวีด ต็อห, “แตห แม กาโลห แบลง อึม นี ครัน ครัน. อาฮีซอเพลัะ ตึอน แฮะ ต็อห ปาย นี ปาย นี, แตห แม ชึม.” 22 แฮะ ฮอต, อาดาวีด บอ ดูอี อี โดบ อัน, เฆ บอ กาโลห แบลง อึม ยอดาน ตึอน. แปร บอ วัห, อาว ฮู ฆีด คอ อู วี, อี ตู กาโลห.

23 อาฮีซอเพลัะ ตึอน บอ นับ, เฆ อาว ฮู โดบ อากยาม อางยาน ปี ต็อห อัน, อัน บอ ชึบ กอบ มาลา อัน, วี วีว ดี กาง อัน แคง มืง บรีม อัน. อัน บอ วี อึณปราย โตต แบน โมยว แบน โมยว แคง กาง อัน. แฮะ ฮอต, อัน วี ดึห วัน ปัก ฮอย แมง อัน, แตห อัน ยัม. เฆ บอ เบลห โดว อัน แคง บาเรว ฆูณ อัน.

24 อาดาวีด บอ ฮาว ฌัม แคง มืง มาฮานาอีม. อาบาซาโลม บอ ดูอี อีซาเรลัะ อี โดบ อัน, เฆ บอ กาโลห อึม แบลง ยอดาน ตึอน. 25 อาบาซาโลม บอ แตห อามาซัะ แบน ดา โบว อี อึบ ดา ซึก, แตห อัน กาดาง อายอพัะ ตึอน. อามาซัะ ตึอน มูห ฆอน อาเยซา, อี มูห ดูอี อีซาเรลัะ. อีบึณ อัน จืร นาง เอพีเฆลา อี มูห ฆอน อีบึณ อานาฮาซา. อัน บอ มูห วา นาง เจรูยา อี มูห มา อายอพัะ ตึอน. 26 อาบาซาโลม บอ เฆ ดูอี อีซาเรลัะ เฆ คยัะ ดี มืง ฆีเลอาด.

27 อาดาวีด บอ ตัห ฌัม ดี มืง มาฮานาอีม ตึอน, อึณ มูห อาซอพี, อี มูห ฆอน อานาฮาซา. อัน ตัห มืง ราบา อี มูห โดง กอย ดูอี อัมโมน. อึณ มูห บอ อามาคีลา อี มูห ฆอน อาเมลา, อี กอย แคง มืง ลอเดบา บอ อาบาจี อี ตัห มืง รอแกลีม, อี มูห โดง กอย เฆ ดูอี อาโมยว ฆีเลอาด ตึอน. 28 เฆ โอย วี ตี แฮะ ดึห ตัห อึณเบว เฆ ฮึบ บอ ซีลัยะ เฆ กาโละ แบน โมยว แบน โมยว, ดัว ดี อาดาวีด. เฆ บอ ดึห ดีฆาว เคาคยูง, ดีฆาว ซีโฆ็งรา บอ กาแปะ บอ มาตูห อาหรึก, บอ เบล โลม, เบล โลม แปร บอ เบล โลม เรณ, 29 บอ งาม มาเพียน, เบรียง อึม ปู มัก, โดว ซัดดาวา บอ อึม ปู มัก อี ปราง โปลม. เฆ ดึห ฌึร ตี ดัว ดี อาดาวีด บอ ดี ดูอี อี โดบ อัน, แตห เฆ ปึอน ดี โฮม. เฆ แฮะ ดึห ดัว โตต ฌึร ตี โกบ ต็อห เฆ, “ดูอี อาดาวีด แฮะ นูน, แฮะ ดีหลัห กาเซา, แฮะ เอต ปี ดี โฮม. เฆ แฮะ กาปราณ โกบ กอย เฆ แคง แปร กาฮ็อห ตึอน.”