1 อาดาวีด บอ กาโลห ฮาว ปวน อี แจก แดง นอน ตึอน, อาฌีบา อี มูห หมาย อาเมพีบอเซด ตึอน บอ บัร ดี รวห อาดาวีด. อัน แฮะ ดึห มาโลว อา โดว ชึบ บอ กอบ อัน. อัน แฮะ ดึห บอ คามูน อา มาย็อห โบ็ง, เบล มางูน กาฮ็อห อู มาย็อห ดีแคลบ, เบล ดีปู อู มาย็อห ดี แคลบ บอ กาเปา อึม มางูน อู กาเปา. อัน แฮะ ดาง โตต แดง กาตูะ มาโลว ตึอน ฮาว บัร โดบ อึณเตณ.

2 คูนดีคัม วี ดีหมอด อาฌีบา ตึอน ต็อห, “แม โฆ็ง โกรว นี, โลว มาเซ?” อาฌีบา วี ต็อห, “มาโลว นี, แตห ดูอี แคง อึณโฮม แม ป็อะ. คามูน เฆ เบล นี, แตห เฆ ดูอี อี โดบ แม โฮม. อึม มางูน นี, แตห เฆ อี ตัห แคง แปร กาฮ็อห, อี แฮะ นูน กาเซา เดียง.”

3 คูนดีคัม วี ต็อห, “ฆอน อีมาย ดา กาณา แม ตึอน, อัน กอย ดี เหมา?” อาฌีบา วี ต็อห ดี คูนดีคัม, “อัน กอย ดี มืง เยรูซาแลม. โคว, อัน ทาง, อาตึร นี เฆ ดูอี อีซาเรลัะ ดี วี อาบ วีว มาน มืง ปี ดึอม อึบ ฆูณ อัน, แตห อัน วี แบน คูนดีคัม.”

4 คูนดีคัม วี ต็อห ดี อาฌีบา, “แคะ มึห โกรวกราม ดี อาเมพีบอเซด ตึอน, อึณ ดี วี แบน โตต โกรวกราม แม ดอ ตี นี.” อาฌีบา วี ต็อห, “แม คูนดีคัม, หมาณ, แตห แม กาเว โอว เซเซ ปาย ตี.”

5 อาดาวีด บอ วี ตัห ฌัม ดี มืง บาฮูรีม, อึณ วี มึห ดา อู วี, อัน จืร อาซีมี. อัน มูห ฆอน อาฆีรา อี มูห วอแว อาซอลู ตึอน. อัน บอ ตัห บอ ดืง บอ เอห อาดาวีด ดอ ฮาว อัน โดบ อึณเตณ. 6 อัน ยึร เฆ ดา ซึก อาดาวีด บอ เฆ อี บัร อัน, เฆ บอกาเฆลียด กอย รึม โดบ อาดาวีด. อัน ยี ตู โยว เฆ, อัน ยัะ ดึห มาว วึณ อาดาวีด เฆ อามู อามาด อัน. 7 อาซีมี บอ ดืง ต็อห, “ฮาว, ฮาว, เบ อี ฮาย, เบ อี ซีมา ง็อห อี. 8 เบ แฮะ ง็อห กืน ดูอี อาซอลู. ดอ ตี นี, เฌาพรา ดี วี เวียะ ดี เบ ปาย ตี. แม แฮะ กาดาง โดว อัน, แฮะ บึง มาน มืง อัน. เฌาพรา แฮะ วี ดึห มาน มืง แม, ดี วี อาบ ดัว ดี ฆอน แม อี มูห อาบาซาโลม. โกบ แฮะ ดึอม ง็อห แม ดูอี กืน, แม โลว คัม ฌึร ตี.” 9 อาพีเซ อี มูห ฆอน นาง เจรูยา, อัน บอ วี กาลาง ดี คูนดีคัม ต็อห, “ดูอี นี ปี มาโซว ยัม. โกบ อึณ ปาย เหมา, แม แตห อัน ปึอน ดี ดืง แม คูนดีคัม ปาย ตี? แตห โอว ฮาว แดบ แวน ฆีณ อัน.” 10 คูนดีคัม วี ต็อห, “อึย ฆอน นาง เจรูยา, อาว บาะ แม. แตห อัน ดืง, อาว ลืก. เซ เฌาพรา แฮะ กาลาง ดี อัน ต็อห, ‘แตห แม เอห ดืง อาดาวีด.’ อาว มึห อาเซ อี ปึอน ต็อห, ‘โกบ มาเซ แม โบง ปาย นี.’”

11 แฮะ ฮอต, อาดาวีด ปี วี กาลาง ดี อาพีเซ บอ ดี เฆ อามู อามาด อัน ต็อห, “เบ ยอด ฆอน อาราง โอว, อัน แฮะ ฆึอด ตัห ดี โอว, ยี บอ วี เหรต ดี ง็อห อาซาก โอว. ดูอี อาโมยว อาเบนยาม ตึอน, อัน ดี บอ แว ซี โบง. อาว ลืก, แตห อัน ดืง. เฌาพรา แฮะ ควาง อัน โบง ฌึร ตี. 12 เฌาพรา อี ดี ยอด ลอง อี ดูก ดี โอว. อัน บอ ยึร ลอง ดูอี วี ตี ดืง โอว อาตึร นี. แตห เบ ยอด, โยว เฌาพรา ดี วี โบง เวียะ อี บอด อี หมึอม ดี โอว.”

13 ปัน ตี อาดาวีด บอ ดูอี อัน, เฆ วี ฮาว โดบ อึณเตณ เฆ. อาซีมี วี ฮาว โดบ อึณเตณ ดี นอน ปอ อู บลาก บอ ดืง บอ เอห ดอ ฮาว อัน. อัน บอ ดึห มาว วึณ, ดึห บอ กาปูห บรัด ดี เฆ. 14 คูนดีคัม บอ เฆ อี โดบ อัน แฮะ นูน กาเซา. เฆ บอ ตัห ฌัม โคบ แบลง ยอดาน, เฆ บอ ดีเหลา นูน เฆ.

15 อึณ ยี มูห อาบาซาโลม ตึอน, บอ อัน บอ ดูอี อีซาเรลัะ, เฆ แฮะ วี ตัห ฌัม ดี มืง เยรูซาแลม, กอย แคง โฮว. บอ อาฮีซอเพลัะ แฮะ ตัห โดบ อัน.

16 ปัน ตี อาฮูเซ อี มูห ดูอี อาคีทา, อี มูห ฆึก อาดาวีด ตึอน, อัน มืร แฮะ ตัห ฌัม โดง กอย อาบาซาโลม ตึอน. อัน ต็อห ดี อาบาซาโลม, “แตห แม คูนดีคัม กอย ดาคึย เซเซ. แตห บอ อาซาก แม คูนดีคัม โต็ง.”

17 อาบาซาโลม วี ดีหมอด อาฮูเซ ต็อห, “โอว ทาง, แม ร็อก ฆึก แม. อึณ ปาย เหมา ปี ตู กอย แม โดบ อัน?” 18 อาฮูเซ วี ต็อห, “แม แกวะ ต็อห ปาย ตี. โอว คัม ดี แบน หมาย อี มูห วี ปี ร็อห เฌาพรา, บอ ปี ร็อห ดูอี อีซาเรลัะ บอกาเฆลียด. โอว ดี โดบ วี ตี. 19 แดง นี อึณ กาอาบ โอว แบน หมาย ฆอน อี ปลูะ ฆูณ อัน. โอว แฮะ ดึอม คัม ดี แบน หมาย ฆูณ แม ตึอน. ดอ ตี นี, โอว ดี คัม ดี แบน บอ หมาย แม ปาย ตี.”

20 ปัน ตี อาบาซาโลม ต็อห ดี อาฮีซอเพลัะ, “แตห แม กาลาง อากยาม อางยาน เหมา ดี ปาย ดี โบง.”

21 อาฮีซอเพลัะ วี ต็อห, “แตห แม วี ฮาว โดง กอย ฌืง นาง ปี อูน ฆูณ แม แตห อึณ บัร โฮว อัน ตึอน, แตห แม ลาย เฆ. ปัน ตี เฆ ดูอี อีซาเรลัะ บอกาเฆลียด ฮี ยึร, กอ นับ ลอง ฆูณ แม แฮะ รู ดี แม, แฮะ แวน กาดัด แม. แฮะ ฮอต, เฆ ดี วี โดบ มี แม, แตห แม วี มึห แฮณ กืน.” 22 เฆ บอ ดึห ทึบ บีก, เบลห นา แดง กาตูะ โฮว บอ แตห อาบาซาโลม โฮะ กอย นา แดง, วี ลูต ฌืง นาง ฆูณ อัน ตึอน, แตห ดูอี อีซาเรลัะ ยึร.

23 ดอ อัน ตี อากยาม อางยาน ปี ดัว อาฮีซอเพลัะ, อึณ ปี โฆรห ปี กาลาง เฌาพรา เซ อี ดีหมอด อัน. ปาย ตี อาดาวีด ฆาย อาบาซาโลม หณึม อากยาม อางยาน ปี ดัว อาฮีซอเพลัะ.