1 วาย ตี อาบาซาโลม บอ แตห อี โบง ลักเลา มังปร็อง. อัน บอ จัร อีมาย พัน ฆึร วี แตห เฆ กาแบลบ แยต นา อาต อัน. 2 อัน บอ ยีต ซีณวัห เจว เจว, จ็อง โดบ อึณเตณ บาง มาโลห มืง. เซ อึณ บอ มึห ดูอี อี ตัห กาลาง อามู อัน แตห คูนดีคัม ซูงพยาด, อาบาซาโลม บอ ดีหมอด อัน ต็อห, “แม มูห ดูอี มืง เหมา?” ปัน ตี ดูอี วี ตึอน วี ต็อห, “โอว มูห ดูอี ครึร อีซาเรลัะ อู โมยว อู โมยว.” 3 แฮะ ฮอต, อาบาซาโลม วี ต็อห ดี อัน, “ยอด, อามู แม นี แฮะ หมาน. มาแล, อาว มึห อาเซ อี ปึอน กาลาง แตห คูนดีคัม วี โทม ลอง อามู แม นี.” 4 ปาย ตี อาบาซาโลม บอ ต็อห, “เซ โอว ดี บอ แบน ดา ตาง อี ซูงพยาด ดารา แคง มืง นี, แคะ กอย เฆ อี มึห อามู, เฆ ดี ปึอน ตัห ดี โอว. โอว ดี ซูงพยาด อามู เฆ, แตห อึณ โดบ ดารา.”

5 อึณ บอ มึห มัง อี ตัห กาตัด อัน, ต็อห ดี กรึบ อัน. อัน บอ ปา เฆ ตี, วี อูห เฆ. 6 อาบาซาโลม บอ โบง ปาย ตี ดี เฆ ดูอี อีซาเรลัะ อี ตัห ดี คูนดีคัม ตึอน, แตห เฆ กาปลูะ น็อห, แตห เฆ วี ร็อก อัน. 7 วาย ตี, แฮะ วี ปึอน พวน ซีนัม, อาบาซาโลม บอ กาลาง ดี คูนดีคัม ต็อห, “หมาณ, แตห แม ควาง โอว ฮาว ดี มืง เฮโบรว, แตห โอว ฮาว โบง แคะ ปี ดึอม ดัว โอว กาดีก ซัดฌา ดี เฌาพรา. 8 ดอ กอย โอว ดี มืง เฆซูรา แคง มืง อาราม ตึอน, โอว แฮะ ดึอม ดัว กาดีก ซัดฌา ดี เฌาพรา. โอว แฮะ ต็อห, ‘เซ เฌาพรา บอ แตห โอว วี ตัห ดี มืง เยรูซาแลม มืร, โอว ดี หลู ดี กรึบ เฌาพรา แคง มืง เฮโบรว.’”

9 คูนดีคัม มืร วี ต็อห, “แตห แม ฮาว ดาคึย ฮาว ซีคยา.” ปัน ตี อาบาซาโลม บอ ฮาว ดี มืง เฮโบรว.

10 มาแล, อาบาซาโลม วี จัร ดาลาม, แตห เฆ ปรา ดี ฮาว กาลาง ดี ดูอี แคง มืง อีซาเรลัะ ดอน นา ดอน โปละ. อัน ต็อห, “เซ เบ ฮี ยึร ฮัม บูด นึง แป, แตห เบ ต็อห, ‘อาบาซาโลม แฮะ แบน คูนดีคัม ดี มืง เฮโบรว.’” 11 อึณ ยี มึห อีมาย อา มาย็อห วี อี มูห ดูอี แปะ แฮะ บาง อาบาซาโลม, เฆ บอ เลห แคง มืง เยรูซาแลม ฮาว โดบ อัน. เฆ มึห น็อห ดาคึย, ตู นับ ลอง แปะ แฮะ คราม อัน. 12 ดอ เบลห อาบาซาโลม ปี ดี หลู อัน ตึอน, อัน จัร เฆ ฮาว แดะ บอ อาฮีซอเพลัะ อี มูห ดูอี แคง มืง กีโลว, อี มูห อามาด อาดาวีด, แตห บอ อัน ฮาว ดี โดง กอย อาบาซาโลม. ปาย ตี ดูอี เฆ อี โดบ อาบาซาโลม แฮะ แกร ดี แบร กืน, แตห ปี ซี โบง อัน แกร ดี ออง.

13 อึณ ยี มึห ดูอี อู วี อี ตัห กาลาง ดี อาดาวีด ต็อห, “น็อห ดูอี อีซาเรลัะ บอกาเฆลียด แฮะ ฮอต ฮาว โตต โดบ อาบาซาโลม.”

14 อาดาวีด มืร วี กาลาง ดี อามู อามาด อัน อี กอย โดบ อัน แคง มืง เยรูซาแลม ต็อห, “เอ โลว เตา. เซ เอ ตู เตา, เอ ตู ลอด ยัม ดี อาบาซาโลม. เอ โลว เตา อู เฌณ, โยว อัน ดัน ตัห ครับ เอ. อัน ดี โบง แตห เอ ชึม. อัน ดี บอ กาโฆห ดี มืง เอ, แตห ดอน อี ฌัม ดูก.”

15 เฆ อามู อามาด วี ต็อห, “อึร, เย โบง โดบ โตต ดอน โมยว ปี ซูงพยาด แม คูนดีคัม.”

16 อัน บอ แยต ดอน อี อี กอย แคง โฮว อัน, เลห ฮาว. อัน ยี อูน อีบึณ เตียะ อัน ฆึร วี, แตห เฆ บัร โฮว ตึอน. 17 ปัน ตี คูนดีคัม บอ ดูอี เฆ อี โดบ อัน, เฆ บอ เลห ฮาว ดี เปลา, วี คยัะ บาง เฆ โดง อี แฮะ ราม กาโต็ง. 18 แคะ กอย ดูอี อี โดบ อัน บอ กาโลห ฮาว แตห เฆ ฮาว ดี อาต อัน. อึณ มูห ดูอี กัะทัะ เดา มาย็อห วี อี แฮะ โดบ อาดาวีด ตัห มืง ฆาทัะ ตึอน บอ เฆ อี บัร อาซาก คูนดีคัม.

19 คูนดีคัม วี กาลาง ดี อาอีทายัะ อี มูห ดูอี อี แยต เฆ ดูอี กีดตี ต็อห, “เหมา อึณ ปาย ปี ฮาว แม โดบ โอว? แตห แม วี เวณ กอย โดบ คูนดีคัม แม อี จืร อาบาซาโลม. แม มูห ดูอี อาโมยว เฮา อี แฮะ เตา ตัะ มืง แม, ตัห แบน แคต มืง เย. 20 โกบ ซอะ ตัห แม อาหมึร, อาตึร แม ตู โลว วี แล วีว แล เวณ โดบ โอว. โอว มืร ตู นับ โยว โอว ดี ฮาว นา เหมา. แตห แม วี แดะ ดา ซึก อาโมยว แม, แตห เบ วี เวณ, แตห เบ มึห น็อห ร็อก น็อห ซืร เซเซ.”

21 อาอีทายัะ ตึอน วี ต็อห ดี คูนดีคัม, “เฌาพรา แฮะ นับ โอว ตู กาโลว. แตห บอ แม คูนดีคัม นับ, โฆรห โอว แฮะ หมาน แฮะ มูห. แม บอ กอย ดี เหมา, เซ โอว บอ ปึอน ดี กอย ดาคึย โดบ แม, เซ โอว ดี บอ ยัม โดบ แม, อาว ลืก. โอว ยี ตู กาฆ็อห ดี แม ดอ เหมา.”

22 อาดาวีด วี กาลาง ดี อาอีทายัะ ตึอน ต็อห, “แม กาโลห ฮาว ดี อาต โอว.” ปัน ตี อาอีทายัะ อี มูห ดูอี กีดตี ตึอน บอ เฆ ดูอี อาโมยว อัน บอ อึณโฮม เฆ, เฆ บอกาเฆลียด บอ ฮาว รึม โดบ อาดาวีด.

23 ดูอี เรา ดูอี กาง เฆ บอกาเฆลียด บอ ยาม ตาง. ดูอี เฆ ตึอน บอ กาโลห ฮาว. แฮะ ฮอต, บอ คูนดีคัม บอ กาโลห อึม แบลง คีดาโรน ตึอน. แคะ กอย ดูอี เฆ ตึอน, เฆ บอ วี ฮาว โดบ อึณเตณ นา แคง แปร กาฮ็อห.

24 อาบาทา บอ อาฌาโดก บอ เฆ ดูอี อาเลวี แฮะ โดบ อัน. เฆ แฮะ ฆอด ตัห ฌีดืก เฌาพรา บอ เบลห อูน ฌีดืก ดี โคบ แบลง อึม ตึอน. อาบาทา บอ หลู ปี ดี หลู แตห อึณ กอ ฌัม ปัน ดี เลห ดูอี บอกาเฆลียด แคง มืง เยรูซาแลม.

25 คูนดีคัม วี กาลาง ดี อาฌาโดก ตึอน ต็อห, “แม วี ดึห ฌีดืก เฌาพรา วี เวณ อูน แคง มืง. เซ เฌาพรา บอ เฆฌู โอว, อัน ดี แตห โอว วี ตัห. อัน ดี แตห โอว วี ยึร โดง กอย ฌีดืก เฌาพรา ตี. 26 เซ เฌาพรา ยี ตู กาเว โอว, ตู อึง โอว, แตห อัน เฌา โบง ปี ซี โบง อัน ดี โอว.” 27 คูนดีคัม วี กาลาง ดี ดูอี หลู ดี เฌาพรา อี จืร อาฌาโดก ตึอน ต็อห, “โอว ทาง แม มูห ดูอี นับ ดี บยาน โฆรห เฌาพรา. แตห แม ดึห ฆอน แม อี จืร อาฮีมาด บอ อาโยวนาทาน อี มูห ฆอน อาบาทา ตึอน, แตห บอ แม บอ อาบาทา แดะ ฆอน บาย อา วี, แตห เบ วี เวณ แคง มืง. 28 โอว ยี กอย บัร ดี บาง กาโลห อึม แบลง ยอดาน อี ฮาว แคง แปร กาฮ็อห ตึอน, แตห ดูอี ปี ตึย แม กอ ตัห ฌัม ดี โอว, แตห อัน กาลาง ลอง ปี ดี โบง อาบาซาโลม ดี โอว.” 29 อาดาวีด แฮะ ฮอต กาลาง โฆรห ตี, อาฌาโดก บอ อาบาทา บอ ดึห ฌีดืก เฌาพรา, วี เวณ ตึย ดี มืง เยรูซาแลม, แตห เฆ บอ กอย ดี ตี.

30 อาดาวีด บอ วี โฮะ ดี นอน อี มึห เฮ นามัน. อัน บอ ยาม ฮาว โดบ อึณเตณ, บอ กาโหมะ ฆีณ อัน. คูดีณ มืร อัน ตู ชึบ. ดูอี อี โดบ อัน เฆ บอกาเฆลียด มืร กาโหมะ ฆีณ เฆ, ยาม ดอ โฮะ โดบ อึณเตณ ตึอน. 31 อึณ บอ มึห อู วี กาลาง ดี อาดาวีด ลอง อาฮีซอเพลัะ แฮะ วี ฮาว โดบ อาบาซาโลม. ปัน ตี อาดาวีด วี ซาคึร ดี เฌาพรา ต็อห, “หมาณ อากยาม อางยาน อาฮีซอเพลัะ ตี ปี ดี ดัว อัน ดี อาบาซาโลม, แตห อึณ แบน อี ตู หมึอม.”

32 อาดาวีด บอ ตัห ฌัม แดง กาแดะ นอน. ดอ ตัห อัน โดง กรึบ ซาคึร อี ดี เฌาพรา, อาฮูเซ อี มูห ดูอี อาคีทา ตึอน แฮะ ตัห ฌัม โดง กอย อัน. อัน แฮะ กายาต ซีโตว ตาง อัน, บอ ดึห กาปูห ฮับ แดง ฆีณ อัน, บอ บัร ดี รวห อาดาวีด. 33 อาดาวีด วี ต็อห ดี อัน, “เซ แม บอ ฮาว โดบ โอว, แม ดี แตห อึณ หณาบ กาเซา ดี โอว. 34 แตห บอ แม วี เวณ แคง มืง, กาลาง ดี อาบาซาโลม ต็อห, ‘อึย แม คูนดีคัม, ดอ ตี นี โอว ดี คัม ดี แบน หมาย แม, แตห อึณ ปี ดอ แบน โอว หมาย ฆูณ แม อาต นี ตึอน, ดอ ดัว โอว อากยาม อางยาน ดี อัน.’ เซ แม โบง ปาย ตี แม วี ปึอน ดี จอย โอว. แม ปึอน ดี แวน อากยาม อางยาน อาฮีซอเพลัะ ตึอน. 35 อึณ บอ มึห ดูอี หลู ดี เฌาพรา อี จืร อาฌาโดก ฆาย อาบาทา, ฆาย ดี กอย โดบ แม. แคะ ปี ยึร แม แคง โฮว, แม โลว วี กาลาง โตต ดี อาฌาโดก ฆาย อาบาทา ตึอน. 36 อึณ มึห ฆอน ฆาย อา วี, ฆาย จืร อาฮีมาด ฆาย อาโยวนาทาน, ฆาย อี ดี วี ตัห กาลาง โตต ดี โอว.”

37 ปัน ตี อาฮูเซ อี มูห ฆึก อาดาวีด, อัน บอ เวณ ดี มืง เยรูซาแลม. อัน แฮะ ฮอต ฌัม, บอ อาบาซาโลม แฮะ วี ลึบ ฮาว แคง มืง เยรูซาแลม.