1 อายอพัะ อี มูห ฆอน นาง เจรูยา ตึอน, อัน วี นับ ลอง คูนดีคัม แฮะ นัมโหลห ดีเกน ฆอน อีมาย อัน อี จืร อาบาซาโลม ตึอน. 2 อายอพัะ บอ จัร อี ฮาว ดี มืง เดกอ, แตห เฆ แดะ ตัห อีบึณ อี หล็อก อี มึห อางยาน, แตห อัน ตัห. แฮะ ฮอต, อัน กาลาง ดี อีบึณ ตี ต็อห, “แม ณึงราง มึห น็อห ตู ดาคึย, บอ ณึงราง กลึร, บอ ตา ครึง ปี ดูอี ฆีน. แม มืร ตู โลว พ็อห นามัน. แม โบง ปี อีบึณ อี แฮะ กลึร เหลณ, โกบ แฮะ มึห ดูอี ยัม. 3 แม ฮาว โดง กอย คูนดีคัม, กาลาง ปี ต็อห โอว นี ดี อัน.” แฮะ ฮอต, อายอพัะ วี แค โฆรห ปี ดี โลว กาลาง ดี อีบึณ ตึอน.

4 ปัน ตี อีบึณ อี ตัห มืง เดกอ ตึอน, อัน บอ ฮาว โดง กอย คูนดีคัม. อัน บอ มูด ฆึบ แดง กาดาย, กรึบ คูนดีคัม บอ ต็อห, “แม คูนดีคัม ตาง, หมาณ แม กาเว จอย โอว.” 5 คูนดีคัม วี ดีหมอด ต็อห, “แม มึห ปี โลว มาเซ?” อัน วี กาลาง ต็อห, “โอว แดเจณ แม นี, โอว แฮะ แบน ยา ซีปรัห. อีมาย โอว แฮะ ยัม. 6 โอว มึห ฆอน อา วี, ฆาย แฮะ ลาย กาลูต. อาว มึห อาเซ อี แคร ฆาย. อู วี แฮะ โบง แตห ปอ อู วี กอ ยัม. 7 ดอ ตี นี, บีนอง วอแว โอว, เฆ วี ต็อห ดี โอว, ‘แม โลว ดึห ตัห วี อี แฮะ ง็อห อีกัด อัน ตึอน, อาบ ดัว ดี เย, แตห เย ง็อห บอ อัน, แกวะ ฮู แตห อึณ มึห อี ปลูะ อีมาย แม.’ เซ โอว ฮี โบง ปาย ตี โอว อาว ฮู มึห อาเซ. อึณ ปี เฆ บยัด โตต เงา อี ซี กอย ดี กาฟาง โอว. อีมาย โอว ตี มืร, อาว ฮู มึห จืร. แดง กาดาย นี บอ หลูกหลาน อัน อาว ฮู มึห อี โหลห เฆ.” อัน แฮะ ฮอต ต็อห ปาย ตี, 8 คูนดีคัม วี ต็อห ดี อีบึณ ตึอน, “แตห แม วี เวณ ดี กาง แม, โอว ดี บัร แกวะ แตห อี โบง อี ตู หมึอม ดี ฆอน แม ตี.”

9 อีบึณ อี ตัห แคง มืง เดกอ ตึอน, อัน วี กาลาง ดี คูนดีคัม ต็อห, “แม ดา กาณา โอว, แม คูนดีคัม ตาง, หมาบ ตี ซี มูห หมาบ โอว อี มูห แดเจณ แม นี. แกวะ แตห อี เฮา ต็อห, คูนดีคัม บอ อึณโฮม อัน มึห หมาบ.” 10 คูนดีคัม วี ต็อห ดี อัน, “วี อี ดัม หมาบ ดี แม ตี, แม แดะ ตัห อัน โดง กอย โอว. วาย นี, อัน ฮู ปึอน ดี โบง ดี แม ปอ อึณ ปัว.”

11 อีบึณ ตึอน วี ต็อห, “โอว โยว เฆ ง็อห ฆอน โอว. เหมา ดี ปาย, แกวะ แตห เฆ โบง นา ตู หมึอม ดี ฆอน โอว? แม คูนดีคัม, หมาณ แม ดืง แตห บอ เฌาพรา โทม. อัน มูห เฌาพรา ปี กรึบ แม.” แฮะ ฮอต, คูนดีคัม วี ต็อห, “เฌาพรา นับ, โฆรห โอว แฮะ หมาน, แฮะ มูห. ฆอน แม ตี, อัน ตู โลว ยัม. อึณ ปี ฮึก ฆีณ อัน อู ณ็อง มืร ตู โจห แดง กาดาย.”

12 แฮะ ฮอต, อีบึณ ตึอน วี กรึบ กาลาง ต็อห, “หมาณ, แม ควาง โอว แดเจณ แม นี, แตห โอว วี กาลาง ดี แม คูนดีคัม คอ อู แด.” แฮะ ฮอต, คูนดีคัม วี ต็อห ดี อัน, “แตห แม กาลาง.”

13 อีบึณ วี ต็อห, “เซ อึณ ปาย ตี, ปี ซี โบง แม ดี ดูอี อีซาเรลัะ บอ ปี ซี โบง แม ดี เฆ วอแว โอว แฮะ มูห อู โมยว. เหมา อึณ ปาย แม ตู ซี โบง ฌึร ตี ดี ดอน อี? แม แฮะ โฮว เลห ฆอน แม, ตู วี แตห อัน ตัห. โฆรห ปี กาลาง แม ดี โอว แฮะ แบน โฆรห อี ดัม หมาบ ดี แม. 14 ดูอี เอ นี โลว ยัม ดอน อี. เอ ปี อึม อี ฮูห แดง กาดาย, อาว ปึอน วี ฆีด วีว. เฌาพรา ยี ตู ซี แตห ดูอี ยัม. เซ อึณ มึห ดูอี อี แฮะ คัม แตห อี โฮว เลห อัน, อัน ตู โลว กอย กาโต็ง เซเซ. เฌาพรา ซี แตห อัน วี ตัห. 15 โกบ อึณ ปาย ตี โอว แดเจณ แม แฮะ ตัห กาลาง ลอง อามู โอว ดี แม คูนดีคัม ตาง. ดูอี เฮา แฮะ กาโบยว แตห โอว โยว. โอว แดเจณ แม มืร ต็อห, ‘โอว ดี กาลาง ดี คูนดีคัม. คูนดีคัม มูห อี นับ ดี แคร เฆ. อัน ดี บอ นับ ดี โบง โดบ แคะ ปี หมาณ โอว. 16 คูนดีคัม ดี โทม ดี คยอด โอว, แกวะ แตห อี ง็อห ฆอน โอว. อัน ดี แตห ฆอน โอว กอย ดี คาฆูน ปี ดัว เฌาพรา ดี เอ แคง มืง นี.’

17 โอว แดเจณ แม แฮะ ทาง, เซ คูนดีคัม ดัว กาดีก ซัดฌา ดี โอว, โอว อาว ฮู โลว มาเซ. แม คูนดีคัม แฮะ นับ ดี กาย็อห อี หมึอม บอ อี ตู หมึอม. อัน ปี อามู อามาด เฌาพรา. แตห เฌาพรา อี มูห เฌาพรา ปี กรึบ แม บอ กอย รึม โดบ แม เซเซ.”

18 อัน แฮะ ฮอต กาลาง โฆรห ตี, คูนดีคัม วี ดีหมอด อีบึณ ตึอน ต็อห, “แม แกวะ เครียง มาเซ ลอง ปี ดี ดีหมอด โอว ดี แม.” อีบึณ ตึอน วี ต็อห, “แตห แม ดา กาณา โอว ดีหมอด. อาว ลืก.”

19 คูนดีคัม วี ดีหมอด อัน ต็อห, “อึณ มูห อายอพัะ อี จัร แม ตัห ดี โอว?” แฮะ ฮอต, อีบึณ ตึอน วี ต็อห, “แม คูนดีคัม, แฮะ หมาน อาคาคัร, เซ แม แฮะ กาลาง โฆรห, ดอน อี โลว โดบ ซืร. อาว มึห อาเซ อี ปึอน วัห นา ฆัะ นา อัห. แฮะ มูห แดเจณ แม อี จืร อายอพัะ ตึอน, อัน แฮะ กาลาง ดี โอว ลอง อัน ตี ดอน โมยว. อัน แฮะ จัร โอว. 20 อัน แตห โอว ณึงราง โบง ปาย นี. แม เฌา มืร แฮะ มึห อางยาน ปี อามู อามาด เฌาพรา. แม นับ โตต อี กอย แดง กาดาย นี.”

21 ปัน ตี คูนดีคัม วี กาลาง ดี อายอพัะ ต็อห, “โอว แฮะ ฮอต ซูงพยาด, แตห แม ฮาว แดะ อาบาซาโลม อี แฮะ เตา อาต นี, แตห อัน วี ตัห.”

22 อายอพัะ บอ มูด ฆึบ ดี กาดาย ต็อห, “แม คูนดีคัม อี อึบ โอว, ซีแง อาตึร นี โอว แฮะ นับ, แม แฮะ อึง โอว. โคว, แม แฮะ โบง โดบ แคะ ปี หมาณ โอว.”

23 วาย ตี, อายอพัะ บอ ฮาว ดี มืง เฆซูรา ตึอน, วี ดึห ตัห อาบาซาโลม ดี มืง เยรูซาแลม. 24 คูนดีคัม วี ต็อห, “แตห อัน วัห ฮาว ดี กาง อัน, แกวะ แตห อัน ยึร โอว.” โคว, อาบาซาโลม บอ วัห ฮาว ดี กาง อัน. อัน มืร อาว ฮู ยึร คูนดีคัม.

25 กาแต เฆ ดูอี อีซาเรลัะ บอกาเฆลียด อาว มึห อี ชีด ปี อาบาซาโลม. เฆ ดอน อี อืบ อารึบ อัน. จูห อู ดี กาบา เปลา กอ ฌัม ฆีณ, อาว มึห โดง ดี แน มาเซ.

26 ดอ กับ อัน ฮึก ฆีณ อัน, อัน บอ ซัะ ฮึก ฆีณ อัน ตา เบล ซัะ คูนดีคัม. อึณ จัน อา มาย็อห เซเคน, อี มูห อู ซัะ ดี โอย คัน โลย. เซ ฮึก ฆีณ อัน ฮี จัน กาเซา, อัน บอ โลว กับ มัง เฌณ.

27 อาบาซาโลม มึห ฆอน อีมาย โอย วี บอ ฆอน อีบึณ อี จืร ทามา อู วี. บอ ฆอน อีบึณ ตี แฮะ ชีด กาเซา.

28 อาบาซาโลม ยี กอย แคง มืง เยรูซาแลม กอ โนะ อา ซีนัม, ตู ปึอน ยึร คูนดีคัม. 29 อัน บอ แดะ อายอพัะ ต็อห ดี จัร อัน ฮาว โดง กอย คูนดีคัม, อายอพัะ ยี ตู ตัห. วี แดะ ปอ อู เฌณ มืร, อัน ตู ตัห. 30 โกบ อึณ ปาย ตี อัน บอ กาลาง ดี หมาย อัน ต็อห, “เบ ยอด, โดง นา อายอพัะ อึณ กอย กาตัด โดง นา โอว. แฮะ มึห บอ เคาคยูง. แตห เบ ดึห เงา โดะ.” หมาย อาบาซาโลม บอ ดึห เงา โดะ.

31 ปัน ตี อายอพัะ บอ ตัห ดี กาง อาบาซาโลม. อัน บอ ดีหมอด ต็อห, “โกบ มาเซ หมาย แม แฮะ ดึห เงา โดะ โดง นา โอว นี?”

32 อาบาซาโลม วี กาลาง ดี อายอพัะ ต็อห, “แม ยอด, โอว แฮะ จัร เฆ แดะ แม ตัห ดี นี, แตห โอว ปึอน ดี จัร แม ฮาว โดง กอย คูนดีคัม, แตห แม วี กาลาง ดี อัน ลอง แฮะ เลห โอว แคง มืง เฆซูรา ตัห ฌัม ดี นี, ยี ตู มึห ดีโคว. โอว อาว โลว กอย ดี มืง ตี แตห กอ ฌัม อาตึร นี. ดอ ตี นี, แตห แม กาลาง ดี คูนดีคัม, โอว ซี ยึร อัน. เซ อัน ยี ซี ทาง โอว มึห หมาบ, แตห อัน ง็อห ยัม โอว.”

33 ปัน ตี อายอพัะ บอ ฮาว โดง กอย คูนดีคัม อัน บอ กาลาง แคะ ปี ต็อห อาบาซาโลม ดี อัน. คูนดีคัม มืร บอ วี แดะ อาบาซาโลม. อาบาซาโลม บอ ตัห มูด ฆึบ ดี อาต คูนดีคัม. คูนดีคัม บอ อูห อูห อัน.