คาน 13
ลอง อามานูน ฆาย นาง ทามา
1 ปัน ตี อึณ มูห อาบาซาโลม อี มูห ฆอน อาดาวีด ตึอน. อัน มึห วา อีบึณ อู วี อี ชีด กาเซา. อัน จืร นาง ทามา. อามานูน อี มูห ฆอน อาดาวีด ปอ วี, อัน บอ อึง บอ ร็อก นาง ทามา ตี.
2 อึณ บอ หณาบ ดี น็อห อามานูน ตึอน. อัน กอ แบน วี ด็อะ เซา โกบ ซี ปึอน อัน วา อัน อี มูห นาง ทามา ตึอน, อี แฮะ แบน ดีบยา ชีด. อามานูน ยี ตู นับ ปี ดี ปาย ดี แตห อัน ปึอน.
3 ปัน ตี อามานูน วี มึห ฆึก อี จืร อายอนาดับ อี มูห ฆอน อาซีเมอาด อี มูห อีกัด อาดาวีด. อายอนาดับ ตึอน อัน หล็อก กาเซา. 4 อายอนาดับ ดีหมอด อามานูน ต็อห, “แม มูห ฆอน คูนดีคัม. ดอน ซีแง แม ยี แกร ดี คยา. แตห แม กาลาง ดี โอว, อึณ มูห โกบ มาเซ?” อามานูน วี ต็อห, “น็อห โอว ดึก ดี นาง ทามา อี มูห วา อาบาซาโลม. อาบาซาโลม วี มูห วา โอว.”
5 อายอนาดับ วี ต็อห ดี อัน, “แตห แม อีด แดง กาโช็ง อีด แม, ณึงราง เซา. ปัน ดี ตัห ยอด ฆูณ แม, แม หมาณ ดี อัน ต็อห, ‘หมาณ แตห แม ควาง วา โอว อี มูห นาง ทามา ตัห ดัว ปี ดี โฮม ดี โอว, แตห อัน ตัห ดัง ปี ดี โฮม นา อาต โอว ดี นี, แตห โอว ปึอน ดี ยึร ปี ปาย อัน ดี ดัง ปี ดี โฮม ตี, แตห อึณ มูห อัน อี ฮับ โอว โฮม.’”
6 ปัน ตี อามานูน ตึอน บอ อีด แดง กาโช็ง อีด อัน, ณึงราง เซา. ดอ ตัห คูนดีคัม ยอด อัน, อามานูน บอ หมาณ ดี อัน ต็อห, “แตห นาง ทามา อี มูห วา โอว ตึอน ตัห โบง คามูน คอ อา ดีแคลบ ดี อาต โอว. แตห อัน ฮับ โอว โฮม.”
7 อัน แฮะ ฮอต กาลาง โฆรห ตี, อาดาวีด บอ จัร เฆ ฮาว ดี กาง นาง ทามา ตึอน, บอ กาลาง ดี อัน ต็อห, “แตห แม ฮาว ดี กาง อีกัด แม อี จืร อามานูน, แตห แม ฌึอม ปี ดี โฮม ดัว ดี อัน.” 8 นาง ทามา ตึอน บอ ฮาว ดี กาง อีกัด อัน อี จืร อามานูน ตี. อามานูน แฮะ อีด แดง กาโช็ง อีด อัน. นาง ทามา บอ ดึห กาแปะ คามูน, กาวัร. แฮะ ฮอต, อัน บอ โบง แตห อึณ แบน ดีแคลบ, แตห อามานูน ยึร. อัน บอ ฆึม แตห อึณ ซีน. 9 แฮะ ฮอต, อัน บอ ดึห ฮับ แคง ซีลัยะ เบลห นา อาต อีกัด อัน. อัน ยี ตู โฮม. อัน ต็อห, “แตห ดอน อี เลห ดี นี.” แคะ กอย ดูอี เฆ ตึอน, เฆ บอ เลห.
10 อามานูน บอ กาลาง ดี นาง ทามา ต็อห, “ดึห ปี ดี โฮม ตี, ตึย แคง อีด นี, แตห แม ฮับ โอว โฮม.” นาง ทามา ตึอน บอ ดึห คามูน ดีแคลบ ปี โบง อัน ตึอน, ลึบ ฮาว แคง อีด โดง กอย อีกัด อัน อี จืร อามานูน ตึอน, ต็อห ดี แตห อัน โฮม. 11 ดอ อัน ตี อามานูน ตึอน บอ วี ดืด อัน, วี กาลาง ดี อัน ต็อห, “อึย วา, ตัห อีด โดบ โอว ดี นี.”
12 นาง ทามา มืร วี ต็อห, “อึย แม อีกัด โอว, แม แกวะ โบง ปาย ตี. แม แกวะ แตห โอว ชึม ซาเร. อาว หมึอม เซ แม โบง ฌึร ตี. กาแต ดูอี อีซาเรลัะ อาว ปึอน โบง นา หมึอม กาอีห ปาย นี.
13 แตห แม โหลห โอว, โอว ดี บอ โลว ซาย เซเซ วาย นี. เฆ ดูอี อีซาเรลัะ, เฆ ดี บอ แค ลอง ตู บอด ตู หมึอม แม. แตห แม กาลาง ดี คูนดีคัม ดี อาต. อัน ดี แตห อาย คัด ลาย ดึห.” 14 อัน ปี บอ ต็อห ปาย ตี มืร, อามานูน ตู โทม โฆรห นาง. โกบ มึห อัน โปลม หลึอม นาง, อัน บอ เหมต ลาย อีด โดบ นาง ทามา ตึอน.
15 บอ กอย วาย ตี, อามานูน บอ วี ฌ็อง นาง ตึอน. น็อห ฌ็อง อัน แฮะ วี หลึอม น็อห ดึอม ร็อก อัน คา อาต. อัน วี กาลาง ดี นาง ต็อห, “แตห แม ยีต เลห ฮาว.”
16 นาง ทามา วี ต็อห, “อาว ปึอน ซูต โอว เลห ฮาว. หมาบ ตี ดี วี ตาง หลึอม หมาบ แปะ แฮะ ฮอต โบง แม ดี โอว.” อัน ยี ตู โทม โฆรห นาง ตึอน.
17 อัน บอ แดะ หมาย อี ลึมลา อัน บอ ต็อห, “โฮว แวน อีบึณ วี นี, วี กาบีด แซ มาโลห วาย เลห อัน.” 18 หมาย ปี จัร อามานูน ตึอน บอ โฮว แตห นาง ทามา เลห บอ กาบีด แซ มาโลห วาย เลห ฮาว อัน. ดอ อัน ตี นาง ทามา แฮะ ชึบ ครึง กาดึก อี ตูน อี มูห ครึง ชีด, ครึง ปี ตา ฆอน คูนดีคัม อี มูห ดีบยา ตึอน. 19 วาย เลห อัน ดี อีกัด อัน, อัน บอ ดึห กาฟาง ฮับ แดง ฆีณ อัน, บอ กายาต ครึง ชีด ตึอน, วี ดาง แด อัน แดง ฆีณ อัน. อัน บอ ยาม ตาง ดอ วี ฮาว อัน โดบ อึณเตณ อัน.
20 อีกัด อาราง อัน, อี จืร อาบาซาโลม, อัน บอ ดีหมอด วา อัน ต็อห, “แฮะ มูห, อีกัด แม อี จืร อามานูน แฮะ กอย รึม โดบ แม? มาแล, แม วา โอว, แตห แม กอย เยน เยน, แกวะ แตห แม แบน น็อห กลึร ลอง อัน ตี. บอ อัน มูห อีกัด แม.” วาย อัน ตี นาง ทามา บอ กอย ดี กาง อีกัด อัน อี จืร อาบาซาโลม ตึอน, อาว ฮู มึห อี มวน อัน.
21 แฮะ ฮอต, คูนดีคัม อาดาวีด บอ ยึร ลอง อัน ตี, อัน บอ รู กาเซา. 22 อาบาซาโลม ตึอน ยี ตู กาลาง โฆรห อี หมึอม ตู หมึอม ดี อีกัด อัน อี จืร อามานูน ตึอน. มาแล, อัน แฮะ ฌ็อง อามานูน โกบ แฮะ โบง อามานูน แตห วา อัน อี จืร นาง ทามา ชึม ซาเร.
23 วาย ตี อึณ บอ โนะ อา ซีนัม, ดอ กับ เฆ ดูอี อาบาซาโลม ฮึก มาบู, กอย กาตัด เรา บาลาฮาจอ อี กอย ดี โคบ มืง อาเอพารีม, อาบาซาโลม บอ บาง โตต แคะ กอย ฆอน คูนดีคัม บอกาเฆลียด, แตห เฆ ตัห โบง บลอย. 24 อัน บอ ฮาว โดง กอย คูนดีคัม บอ ต็อห, “โอว อี มูห แดเจณ แม, โอว แฮะ โบง บลอย กับ ฮึก มาบู. หมาณ, แตห บอ แม แตห บอ อามู อามาด แม กาโดบ ฮาว ยอด.”
25 คูนดีคัม บอ กาลาง ดี อาบาซาโลม ต็อห, “อึย แม ฆอน โอว, อาว หมึอม แตห เย ฮาว กืน. อาว โลว แตห เย ฮาว บอกาเฆลียด. โอว โยว อึณ หณาบ ดี แม.” อัน บอ แดะ คูนดีคัม แคะ เหมา, คูนดีคัม มืร ตู ฮาว. อัน ยี ม็องการา แตห ปี โบง ฆอน อัน, แตห อึณ ออง.
26 อาบาซาโลม วี กาลาง อึณ ปัว ต็อห, “เซ แม ตู ฮาว, หมาณ แตห แม ควาง อีกัด โอว อี จืร อามานูน ตึอน, แตห อัน ฮาว.” ปัน ตี คูนดีคัม วี ต็อห, “อึณ ปาย เหมา กอ โลว แตห อัน ฮาว โดบ แม?” 27 อาบาซาโลม บอ หมาณ กาเซา, แตห คูนดีคัม ควาง ฆอน อัน อี จืร อามานูน ฮาว, แตห บอ ฆอน อีมาย อัน ดอน วี ปึอน ดี ฮาว.
28 อาบาซาโลม บอ กาลาง ดี ดูอี อัน ต็อห, “แตห เบ บัร อามานูน แฮะ เดียง อึม มางูน, ฮี โบยว ดาคึย. เซ โอว จัร เบ ซัด อัน, แตห เบ ซัด อัน กอ ยัม. เบ แกวะ โยว. อึณ มูห โอว อี แฮะ จัร เบ โบง. แตห เบ มึห โปลม บอ มึห น็อห ยัะ.” 29 ดูอี อาบาซาโลม บอ โบง ดี อามานูน, แตห อึณ โดบ โฆรห ปี กาลาง อาบาซาโลม ตึอน. ปัน ตี แคะ กอย ฆอน คูนดีคัม เฆ ตึอน, เฆ ดอน อี วี ป็อะ มาโลว เฆ, เลห เตา.
30 ดอ ซี ฮาว เฆ โดบ อึณเตณ ตึอน, อึณ วี มึห มัง อี วี ตัห กาลาง ดี อาดาวีด ต็อห, “อาบาซาโลม แฮะ ง็อห ยัม โตต แคะ กอย ฆอน แม คูนดีคัม. อาว ฮู ฆืด คอ อู วี.” 31 ปัน ตี คูนดีคัม บอ ยีต กายาต ซีโตว ปี ตา อัน บอ อีด แดง กาดาย. ดูอี อัน มืร บอ กายาต ครึง ปี ตา เฆ, กอย โคบ อัน.
32 อายอนาดับ อี มูห ฆอน อีกัด อาดาวีด อี จืร อาซีเมอาด ตึอน, อัน บอ ตัห ต็อห, “แกวะ หณึม ปี ต็อห เฆ ลอง ฆอน แม แฮะ ยัม โตต. อามานูน อู วี อี ยัม. ซีณ ซีแง ดอ โบง แตห อัน นาง ทามา ชึม ซาเร ตึอน, อาบาซาโลม แฮะ คราม ดี โบง ปาย ตี. 33 โคว, แม คูนดีคัม, แม แกวะ ทาง, ฆอน แม บอกาเฆลียด แฮะ ฮอต ยัม. อาว มูห ปาย ตี. อามานูน อู วี อี แฮะ ยัม.”
34 ดอ อัน ตี อาบาซาโลม มืร บอ วี เตา เลห ฮาว.
ปัน ตี ดูอี อี บัร โฮว ตึอน, อัน บอ งึอบ บอ ยึร ดูอี กืน ตัห โดบ อึณเตณ อี ฮาว ดี เบรต นอน อี กอย ดี ปัน อัน. ดูอี บัร ตึอน วี ฮาว กาลาง ดี คูนดีคัม ต็อห, “โอว แฮะ ยึร ดูอี กืน ตัห โดบ อึณเตณ อี ฮาว มืง โฮวรานีม, อี กอย ดี เบรต นอน.”
35 อายอนาดับ วี กาลาง ดี คูนดีคัม ต็อห, “แม ยอด, ฆอน แม, เฆ แฮะ วี ตัห. โฆรห ปี กาลาง โอว แฮะ หมาน.”
36 อัน แฮะ ฮอต กาลาง ปาย ตี ฆอน คูนดีคัม แฮะ ลึบ โดง กอย อัน, วี กาโพรม ดี ยาม ตาง. บอ คูนดีคัม เฆ ดูอี อัน บอกาเฆลียด วี กาโพรม ดี ยาม.
37 อาบาซาโลม บอ เตา ฮาว โดง กอย อาตาลาม อี มูห ฆอน อามีฮูด อี อึบ มืง เฆซูรา ตึอน. อาดาวีด ยี ยาม บอ กลึร ดอง วัน ดอง คืน โกบ ยัม ฆอน อัน.