1 วาย ตี เฌาพรา บอ จัร อานาทาน อี มูห ดูอี บยาน โฆรห เฌาพรา, แตห อัน ฮาว โดง กอย อาดาวีด บอ กาลาง ดี อัน ต็อห, “แคง มืง อู มืง อึณ มึห ดา ซาเท อู วี บอ ดูอี ฆีน อู วี. 2 ดา ซาเท ตึอน ตู เอต มาเซ. อัน มึห เฌะฌูง โตต ดอน โมยว. พึง มาบู เฆ มามัก อัน กืน กาเซา. 3 อี มูห ดูอี ฆีน ตึอน อัน ยี ตู มึห มาเซ. อัน มึห ดี จึห มาบู ดีแตด อู โดว. แดง ตี, อัน ยี ตู มึห มาเซ. มาบู ดีแตด ตี แบน ฆึก อัน, กอย โดบ ดา กาณา อัน บอ ฆอน ดา กาณา อัน. อัน บอ แกร ดี ตาง บอ โฮม โดง โฮม ดา กาณา อัน. อัน บอ เดียง ก็อก ปี เดียง ดา กาณา อัน, บอ อีด โดง อีด ดา กาณา อัน. อัน บอ ปี ฆอน อีบึณ ดา กาณา อัน.

4 ดา ซาเท ตึอน บอ มึห แคต อู วี ตัห ฌัม ดี กาง อัน. อัน ยี ตู ดึห มาบู อัน, เฮียง แคต อัน ตึอน. อัน วี ดึห มาบู ดูอี ฆีน ตึอน, ง็อห เฮียง แคต อี ตัห ฌัม โดง กอย อัน ตึอน.”

5 อานาทาน แฮะ ฮอต กาลาง ลอง อัน ตี, อาดาวีด บอ รู กาเซา ดี ดา ซาเท ตึอน. อัน กาลาง ดี อานาทาน ต็อห, “แฮะ หมาน อาคาคัร, อึณ กาอาบ ง็อห แวน ดูอี อี โบง ปาย ตี. 6 โกบ ตู มึห อัน น็อห กาเว อี, โกบ โบง อัน ปาย ตี อัน โลว วี ดัว วีว พวน บูน.”

7 อานาทาน ต็อห ดี อาดาวีด, “อึร, ดูอี วี ตี แฮะ มูห แม. เฌาพรา อี อึบ ดูอี อีซาเรลัะ, อัน ต็อห ดี แม, ‘โอว แฮะ พ็อห นามัน ดี ฆีณ แม, แตห แม แบน คูนดีคัม อี อึบ ดูอี อีซาเรลัะ. โอว แฮะ แตห แม ลอด ดี อาซอลู. 8 แคะ มึห ดา กาณา แม ตึอน อี จืร อาซอลู, โอว แฮะ ดัว โตต ดี แม. บอ อีบึณ อัน โอว แฮะ อาบ ดี แม. โอว แฮะ แตห แม อึบ อาโมยว อีซาเรลัะ บอ ดูอี อายูดา. เซ โมยว ตี ยี ซี เปรต, โอว ซี มึห แบน โมยว แบน โมยว ปี ดี ดัว ดี แม. 9 โกบ อึณ ปาย เหมา, แม แฮะ แวน โฆรห เฌาพรา, โบง อี ตู หมึอม ปี ตู อึง เฌาพรา? แม แฮะ ง็อห อาอูรียา อี มูห ดูอี เฮทีด ตึอน, แตห อัน ยัม ดี บลา อัะ. แม บอ วี ดึห อีบึณ อัน, แตห อัน แบน อีบึณ แม. แม แฮะ โบง แตห เฆ ดูอี อัมโมน ง็อห อัน. 10 ดอ ตี นี, โกบ แฮะ แวน แม โฆรห โอว, โกบ แฮะ ดึห แม อีบึณ อาอูรียา อี มูห ดูอี เฮทีด ตึอน, แตห อัน วี แบน อีบึณ แม, โอว ดี ดัม หมาบ ดี แม. แคง อึณโฮม แม, อึณ ดี มึห ดูอี อี ลาย กาโฆห ลาย กาง็อห เซเซ.’

11 เฌาพรา ต็อห ดี แม, ‘แคง อึณโฮม แม อึณ ดี มึห ดูอี อี ดี โบง นา ตู หมึอม ดี แม. โอว ดี วี ดึห อีบึณ แม เฆ ตึอน, วี อาบ ดัว ดี ฆึก แม อี กาล็อะ ดี แม. วี ตี, อัน ดี วี อีด โดบ อีบึณ แม ดอ กาแต ซีแง.’ 12 ดอ โบง แม หมาบ ตี, แม เครียง ดี โบง, แกวะ แตห อี นับ. โอว ยี ดี วี โบง ฌึร ตี ดอ กาแต ซีแง, แตห ดูอี อีซาเรลัะ ดอน อี กอ นับ.”

13 ปัน ตี อาดาวีด วี ต็อห ดี อานาทาน, “โอว แฮะ ฮอต ลูต เฌาพรา.”

อานาทาน วี กาลาง ดี อาดาวีด ต็อห, “เฌาพรา แฮะ ฮอต ฆ็อห แวน หมาบ แม. แม ตู โลว ยัม. 14 แม แฮะ โบง ฌึร ตี, แตห รันซู เฌาพรา ตู โยว อัน. โคว, ฆอน แม อี แฮะ ฆึอด กามาย ตี, อัน ดี ยัม.”

15 วาย อัน ตี อานาทาน บอ วี เลห เวณ ดี กาง อัน. อู เฌณ เฌาพรา บอ โบง แตห ฆอน อาดาวีด มึห เซา. อัน มูห ฆอน อาดาวีด ฆาย อีบึณ อาอูรียา ตึอน. 16 อาดาวีด บอ หมาณ ดี เฌาพรา อาดา ฆอน อัน ตึอน. อัน บอ ยืน ปี ดี โฮม, บอ ฮาว อีด แดง กาดาย ดอง คืน. 17 เฆ ดา ตาง อี กอย แคง โฮว อัน, เฆ บอ ตัห เทว ดี เณา, แตห อัน ยีต, แตห อัน บอ โฮม ปี ดี โฮม. อัน ยี บัห แวน เฆ, ตู ยีต, ตู โฮม, ตู เดียง มาเซ.

18 อึณ บอ ปึอน บู ซีแง, ฆอน อัน มืร ยัม. แดเจณ อาดาวีด ยี ตู ยัะ ฮาว กาลาง ดี อัน ลอง ฆอน แฮะ ฮอต ยัม. เฆ วี ทาง, “ดอ ซี อีม ฆอน อัน ตึอน, อัน ตู โทม โฆรห ปี กาลาง เอ ดี อัน. เซ เอ ดี กาลาง ลอง ฆอน อัน แฮะ ฮอต ยัม, โยว อัน ดี แว โบง ดี โดว บรีม อัน, แตห อึณ ดูก กาเซา ดี อัน.”

19 ปัน ตี อาดาวีด บอ ยึร ลอง แดเจณ อัน ลาย โฆรห พูพาบ. อัน บอ นับ, ฆอน อัน แฮะ ฮอต ยัม. อัน บอ ดีหมอด แดเจณ อัน ต็อห, “ฆอน ตึอน แฮะ ฮอต ยัม?” เฆ มืร วี ต็อห, “แฮะ ฮอต ยัม.”

20 ปัน ตี อาดาวีด บอ ยีต แดง กาดาย ตึอน, ตา อึม บอ พ็อห นามัน ดี อัน, กาปลูะ ครึง ปี ตา อัน ตึอน. แฮะ ฮอต, อัน บอ ฮาว กรึบ ดี โฮว เฌาพรา. วาย ตี, อัน บอ วี ตัห ดี โฮว อัน, หมาณ ปี ดี โฮม ดี เฆ. เฆ บอ ดึห ตัห, เบลห แตห อัน โฮม.

21 แดเจณ อัน วี ต็อห ดี อัน, “อึณ ปาย เหมา ปี โบง แม ฌึร ตี? ดอ หณัม ยัม ฆอน แม, แม แฮะ ยืน ปี ดี โฮม บอ ยาม. ดอ ตี นี, ฆอน แม แฮะ ฮอต ยัม, แม ยี วี ยีต, โฮม ปี ดี โฮม.”

22 อาดาวีด วี กาลาง ต็อห, “ดอ หณัม ยัม ฆอน ตึอน, โอว ยืน ปี ดี โฮม บอ ยาม. โคว, โอว กาพา ต็อห, ‘หณัม นับ, โยว เฌาพรา ซอ กาเว โอว บอ แตห ฆอน ตี วี แกน.’ 23 ดอ ตี นี, ฆอน ตี แฮะ ฮอต ยัม. อาว ฮู โคว ยืน ปี ดี โฮม. อาว ฮู ปึอน วี แตห อัน อีม. โอว ปี บอ โลว ฮาว โดง กอย ฆอน ตี มืร, อัน ตู ปึอน วี ตัห โดง กอย โอว ดอ เหมา.”

24 ปัน ตี อาดาวีด บอ เหลา น็อห นาง เบดเซบา ตึอน บอ ฮาว กอย รึม โดบ อัน. นาง ตึอน บอ วี มึห ฆอน ปอ อู วี. ฆูณ อัน บอ แตห อัน จืร อาซาโลวโมว. 25 เฌาพรา มืร ร็อก ฆอน ตี. โคว, อัน จัร ดา อี บยาน โฆรห เฌาพรา อี จืร อานาทาน ฮาว โดง กอย ฆอน ตึอน, แตห อัน ดัว จืร กามาย ดี ฆอน ตี, แตห อัน จืร อายีตีตี.

26 ดอ อัน ตี อายอพัะ บอ กาโฆห มืง ราบา อี มูห มืง ดูอี อัมโมน, แตห อึณ วี แบน มืง อัน. 27 อัน บอ จัร ดาลาม อัน ฮาว โดง กอย อาดาวีด, ต็อห ดี อัน, “โอว แฮะ กาโฆห มืง ราบา, แฮะ ปึอน บอ โดง มึห อึม แคง มืง ตี.

28 ดอ ตี นี แตห แม แดะ ตัห กาฌูะ โตต ดา ซึก อี ซี ฆีด, แตห เฆ ตัห กอย โรบ มืง ตี, แตห แม กอ แป. เซ แม ตู โบง ปาย ตี, โอว ดี วี แตห อัน จืร ปี จืร โอว.” 29 ปัน ตี อาดาวีด บอ แดะ แคะ กอย ดูอี อัน, แตห เฆ ตัห กาฌูะ. อัน บอ ฮาว ดี มืง ราบา, กาโฆห มืง ตี, แตห อัน กอ แป. 30 อัน บอ บูต มังฆึม ดี ฆีณ คูนดีคัม อี อึบ มืง ตึอน. มังฆึม ตี, อึณ มูห ครีว อี จัน อู ทาเลน. อึณ มึห บอ แซณ บอด. เฆ บอ วี ชึบ มังฆึม ตี ดี ฆีณ อาดาวีด. โกรวกราม ปี พาด ดึห เฆ แคง มืง ตึอน มืร, แฮะ กืน กาเซา. 31 ดูอี อี กอย แคง มืง ตึอน, อัน บอ แตห เฆ รัณ ฆาน, ตา ครึง ฮีน, เลกลึร, บลา อึณแท บอ ตา มึย. อัน โบง ดี เฆ ปาย ตี, คาหนาบ แตห เฆ โดะ มาอูด. อัน แตห เฆ ดูอี อี กอย ดี มืง อัมโมน ดอน มืง โบง ปาย ตี. แฮะ ฮอต, อาดาวีด บอ ดา ซึก อัน บอกาเฆลียด บอ วี ตัห ฌัม ดี มืง เยรูซาแลม.