คาน 11
ลอง อาดาวีด ฆาย นาง เบดเซบา
1 อึณ บอ ฌัม ซีนัม กามาย. อึณ มูห อาคราว ดอ ลาย กาโฆห เฆ คูนดีคัม. อาดาวีด บอ จัร อายอพัะ บอ ดา ซึก อัน บอกาเฆลียด อี กอย แคง มืง อีซาเรลัะ ตึอน, แตห เฆ กาโฆห ดี ดูอี อัมโมน อี กอย โรบ มืง ราบา ตึอน. อี มูห อาดาวีด, อัน ยี กอย ดี มืง เยรูซาแลม.
2 ดอ อัน ตี อู ซีแง บา ดี อับ อาดาวีด บอ ยีต แดง กาโช็ง อีด อัน, วี โฮะ นา แดง กาตูะ โฮว อัน, วี ยอด ฮาว.a อัน บอ ยึร อีบึณ อู วี ตา อึม. อีบึณ ตึอน, อัน ชีด กาเซา. 3 อาดาวีด บอ จัร อู วี ฮาว ดีหมอด อาเซ อัน มูห. ดูอี ตี วี ต็อห ดี อัน, “อีบึณ วี นี, อัน จืร นาง เบดเซบา, อัน มูห ฆอน อาเอลัม, วี แบน อีบึณ อาอูรียา อี มูห ดูอี เฮทีด.” 4 ปัน ตี อาดาวีด บอ จัร ดาลาม อัน, แตห เฆ แดะ อีบึณ ตึอน ตัห โดง กอย อัน. อีบึณ ตึอน มืร ตัห ณืร อัน. ฆาย บอ ลาย ลาย, อีด กาโดบ. อีบึณ แฮะ ฮอต ตา อึม, แตห อัน ซีงา โดบ ปี ดัม ดารา วาย มึห อัน ครึง กาปลูะ. แฮะ ฮอต, อัน บอ วี เวณ ดี กาง อัน. 5 ดอ อัน ตี อีบึณ ตึอน แฮะ ฮอต แด บาดีก ซันเท. อัน บอ วี จัร อี ฮาว กาลาง ดี อาดาวีด ต็อห, “โอว แฮะ ฮอต แด บาดีก ซันเท.”
6 ปัน ตี อาดาวีด บอ จัร อี ฮาว โดง กอย อายอพัะ, แตห อัน ต็อห, “แม แตห อาอูรียา อี มูห ดูอี เฮทีด ตึอน ตัห โดง กอย โอว.” อายอพัะ บอ จัร อาอูรียา ฮาว โดง กอย อาดาวีด.
7 อาอูรียา บอ ตัห ฌัม, อาดาวีด บอ วี ดีหมอด ลอง อายอพัะ เฆ ดูอี อัน, โยว เฆ แฮะ กอย ดาคึย. อัน บอ ดีหมอด ลอง ปี กาโฆห เฆ, โยว แฮะ ออง ตู ออง.
8 แฮะ ฮอต, อาดาวีด มืร จัร อาอูรียา ต็อห, “แตห แม เวณ ดี กาง แม, เวณ บาย เปลา แม.” อาอูรียา บอ เลห แคง โฮว ตึอน ฮาว. คูนดีคัม บอ ตึย บอ คอซอง ดัว ฮาว ดี อัน.
9 มาแล, อาอูรียา ตู ฮาว ดี กาง อัน. อัน วี ตัม โดบ แดเจณ ดา กาณา อัน ตึอน อี กอย โคบ มาโลห โฮว คูนดีคัม. 10 บอ มึห อี เฮา วี กาลาง ดี อาดาวีด ลอง อาอูรียา ตู เวณ ดี กาง อัน. อาดาวีด บอ วี ดีหมอด อาอูรียา ต็อห, “แม แฮะ ฮอต ตัห โดบ อึณเตณ โต็ง. อึณ ปาย เหมา, แม ปี ตู เวณ ดี กาง แม.”
11 อาอูรียา วี ต็อห ดี อาดาวีด, “ฌีดืก เฌาพรา บอ ดูอี อีซาเรลัะ บอ ดูอี อายูดา เฆ ซี กอย แคง ทึบ. อายอพัะ อี มูห ดา กาณา โอว บอ แดเจณ อัน, เฆ แฮะ กอย นา เรต. โคว, บอ โอว อาว ปึอน เวณ ดี กาง โอว. อาว ปึอน กอย โฮม ดาคึย, กอย โดบ อีบึณ โอว. โอว ต็อห อาคัร ดี แม, โอว ตู ปึอน โบง ปาย ตี ดอ เหมา.”
12 แฮะ ฮอต, อาดาวีด วี กาลาง ดี อาอูรียา ต็อห, “บอ หมึร อาตึร นี, แตห แม กอย ดี นี. แคหณา โอว ดี แตห แม ฮาว.” ซีแง ตี บอ ปา แคหณา, อาอูรียา บอ กอย ดี มืง เยรูซาแลม. 13 อาดาวีด มืร แดะ อัน, แตห อัน ปึอน ดี โฮม รึม เดียง ป็อห, แตห อัน กอ ยึต. บา ดี อับ ตึอน, อัน ยี ตู โลง ดี กาง อัน. อัน วี เลห ฮาว ตัม โดง ตัม แดเจณ ดา กาณา อัน ตึอน.
14 ซีณวัห อาดาวีด บอ วี แดม แปะ, ดัว ดี อาอูรียา, แตห อัน ตึย ดี อายอพัะ. 15 แคง แปะ ปี แดม อัน ตี อึณ ต็อห, “แตห แม แตห อาอูรียา กอย ดี อาต ซืด, แตห อัน กาโฆห ดี ดา ซึก อี ฮาย, อี หล็อก กาเซา, แตห อัน กอ ยัม. แกวะ จอย อัน.”
16 ปัน ตี อายอพัะ ตึอน แฮะ ฮอต แตห ดา ซึก อัน โรบ มืง ตึอน. อัน บอ จัร อาอูรียา แตห อัน กอย นา บลาก รันซู อี มึห โปลม หลึอม อี. 17 ดอ เลห ดูอี แคง มืง ตึอน บอ กาโฆห ดี ดูอี อายอพัะ, อึณ มูห ดา ซึก อาดาวีด มัง อี, เฆ บอ ยัม. บอ อาอูรียา อี มูห ดูอี เฮทีด ตึอน แฮะ ยัม.
18 วาย ตี, อายอพัะ บอ จัร ดาลาม ฮาว กาลาง โตต ดอน โมยว ดี คูนดีคัม อาดาวีด ลอง แปะ แฮะ กาโฆห เฆ ตึอน. 19 อัน ต็อห ดี ดาลาม ตึอน, “แม กาลาง ดี คูนดีคัม ลอง แฮะ กาโฆห ตึอน, แตห กอ ฮอต โตต. 20 เซ คูนดีคัม บอ รู, เซ อัน บอ ดีหมอด ต็อห, ‘ดอ กาโฆห เบ ตี เหมา อึณ ปาย ปี กาโฆห เครียะ รึร เบ มืง ตี? เบ บอ นับ ซีคยา, เฆ ดี บัณ บลา ดี แรง มืง ตี. 21 เบ ตู โหลห, อาเซ แฮะ ง็อห อาบีเมน ตึอน อี มูห ฆอน อาเยรูเบซีด ตึอน? อึณ มูห อีบึณ อู วี. อัน แฮะ ดึห มาว กรีด โหงว อู โบ็ง, บยัว โลง ดี แรง มืง ตี, บอ ดึร อัน. อัน บอ ยัม ดี มืง เซบีด ตึอน. โกบ มาเซ เบ โลว ตัห กอย เครียะ รึร แรง มืง ตี?’ เซ อัน บอ ต็อห ปาย ตี แม วี กาลาง ต็อห, ‘แดเจณ แม, อี จืร อาอูรียา อี มูห ดูอี เฮทีด ตึอน, อัน มืร แฮะ ฮอต ยัม.’”
22 ดาลาม ตึอน บอ ฮาว ฌัม โดง กอย อาดาวีด บอ แค โตต แคะ ปี จัร อายอพัะ อัน กาลาง. 23 อัน ต็อห, “รันซู เฆ ตึอน แฮะ ออง แดเจณ แม เฌา. เฆ แฮะ เลห แคง มืง, ฌัม โดง ฆลัง. เย ปี วี กาโฆห ดี เฆ, แตห เฆ กอ วี เวณ, ฌัม บาง มาโลห มืง. 24 เฆ ดา กาณา อัะ ตึอน มืร บอ กอย แดง แรง มืง วี บัณ เย. เย มืร บอ ยัม มัง อี. แดเจณ แม อี จืร อาอูรียา อี มูห ดูอี เฮทีด ตึอน, บอ อัน แฮะ ยัม ดี ตี.”
25 อาดาวีด วี กาลาง ดี อัน ต็อห, “แม กาลาง ดี อายอพัะ ต็อห, ‘แกวะ แตห น็อห แม ลึร ลอง อัน ตี. โคว, บลา ปัวะ ตู ร็อห โดง ล็อะ อัน. แตห แม วี กาโฆห มืง ตี, แตห เอ กอ ปึอน.’ แม กาลาง โฆรห ตี, แตห อึณ แบน โปลม แบน แฮณ ดี น็อห อัน.”