1 วาย ตี คูนดีคัม อี อึบ ดูอี อัมโมน บอ ยัม. ฆอน อีมาย อัน อี จืร อาฮานูน บอ วี ปลูะ อัน.

2 อาดาวีด วี กาพา, “โอว ดี โบง นา หมึอม ดี อาฮานูน อี มูห ฆอน อานาฮาซา โกบ แฮะ ดึอม โบง ฆูณ อัน นา หมึอม ดี โอว.” อาดาวีด บอ จัร ดา ตาง มัง อี ฮาว กาลาง ลอง น็อห กลึร อัน โกบ ฆูณ อาฮานูน แฮะ ยัม.

ดูอี อาดาวีด บอ ฌัม แคง มืง อัมโมน, 3 เฆ อามู อามาด แคง มืง อัมโมน บอ กาลาง ดี คูนดีคัม อาฮานูน ต็อห, “ลอง ปี ตึย อาดาวีด เฆ ตึอน ตัห, แม เฌา ทาง, อึณ มูห โกบ โรวเซ อัน ฆูณ แม ตึอน? อาดาวีด จัร เฆ ตัห ดี แม, แตห เฆ ปึอน ดี คยอง แคง มืง แม, แตห เฆ ปึอน ดี ปยาต แวน มืง แม นี.” 4 แฮะ ฮอต, อาฮานูน ตึอน บอ เหมต ดูอี อาดาวีด. อัน บอ ฆาะ แวน ดีโมห ดี กูงกาบ เฆ อู กาแต, บอ กาซัวะ บอ ครึง ปี ตา เฆ แตห อึณ ฌัม ดี ซีโป็ง เฆ. แฮะ ฮอต, อัน วี เบลห เฆ แตห เฆ ฮาว.

5 ดอ วี กาลาง อี ลอง อาตี ดี อาดาวีด, อัน บอ จัร แตห เฆ ฮาว บัร ดี รวห เฆ โดบ อึณเตณ. โกบ แฮะ หมึอม ซาย กาเซา เฆ, อัน กาลาง ดี เฆ ต็อห, “แตห เบ ฆืด กอย ดี มืง เยรีโคว, แตห ดีโมห ดี กูงกาบ เบ วี ดี โต็ง. วาย นี เบ บอ วี ตัห.”

6 เฆ ดูอี อาโมยว อัมโมน ตึอน บอ วี นับ ลอง แฮะ แบน เฆ ดูอี ปี ฌ็อง อาดาวีด. เฆ บอ ฌาง ดา ซึก อาโมยว อาราม อา หมึณ วี อี กอย ดี มืง เบดเรโฮบ บอ มืง จอพัะ. เฆ บอ จัร อามาคา บอ ดูอี อัน อู แหรณ วี จอย เฆ. บอ ดูอี แคง มืง ตอพัะ อู หมึณ ดี อา แหรณ วี โดบ เฆ.

7 อาดาวีด บอ ยึร ลอง อัน ตี, อัน บอ จัร อายอพัะ บอ ดา ซึก อัน บอกาเฆลียด แตห เฆ ฮาว. 8 ดูอี อัมโมน เฆ บอ เลห ตัะ มืง, บัร ดี กาโฆห บาง มาโลห มืง เฆ. ดูอี อาราม อี ตัห ดี มืง จอพัะ ฆาย มืง เรโฮบ บอ ดูอี อี ตัห มืง ตอพัะ บอ ดูอี คูนดีคัม อามาคา, เฆ ยี ซี กอย ราง เฆ โดง ฆลัง นา เรต มืง.

9 อายอพัะ บอ ยึร ลอง ซึก เฆ ตึอน แฮะ ตัห กอย อา บลาก, บอ นา อาต บอ นา ปัน. อัน บอ ร็อห ดูอี อี โปลม อี ครัน แคง ดูอี อีซาเรลัะ, แตห เฆ แบน อี บัร อี แร ดูอี อาราม เฆ ตึอน. 10 เฆ อี ซี ฆีด ตึอน, อัน บอ แตห วา อัน อี จืร อาพีเซ แยต เฆ, แตห เฆ บัร ดูอี อัมโมน เฆ ตึอน. 11 อัน ต็อห, “เซ ดูอี อาราม บอ แป โอว, แม โลว ตัห จอย โอว. เซ ดูอี อัมโมน บอ แป แม, โอว ดี ตัห จอย แม. 12 แตห เอ มึห น็อห โปลม, แตห เอ ยัะ กาโฆห อาดา ดูอี เอ บอ อาดา มาน มืง ปี อึบ เฌาพรา เอ. เฌาพรา ดี โบง แตห อึณ แบน ปี อึง อัน.”

13 ปัน ตี อายอพัะ บอ ดูอี อี โดบ อัน, เฆ บอ ฮาว กาตัด ดูอี อาราม, แตห เฆ ปึอน ดี กาโฆห ดี เฆ. เฆ ดูอี อาราม ยี เตา ฮาว นา อาต เฆ. 14 เฆ ดูอี อัมโมน บอ วี ยึร ดูอี อาราม แฮะ เตา, เฆ มืร วี กาโพรม ดี เตา นา อาต อาพีเซ ตึอน, วี ลึบ ฮาว แคง มืง เฆ. อายอพัะ บอ เลห โดง กอย เฆ, วี เวณ แคง มืง เยรูซาแลม.

15 ดูอี อาราม, เฆ บอ นับ, เฆ แฮะ ชึม ดี ดูอี อีซาเรลัะ, เฆ บอ วี ตัห กาฌูะ ปอ อู เฌณ. 16 คูนดีคัม อาฮาเดจา อี อึบ มืง จอพัะ บอ จัร อี ฮาว แดะ ดูอี อาราม อี กอย บลาก นา ตัะ แบลง อึม ตึอน. แฮะ ฮอต, เฆ บอ วี ตัห ดี มืง เฮลัม. อาฮาเดจา แฮะ จัร อาซอบาก, แตห อัน อึบ ดา ซึก เฆ ตี, แตห อัน แยต เฆ.

17 อาดาวีด บอ ยึร ลอง อัน ตี, อัน บอ แตห ดูอี อีซาเรลัะ ตัห กาฌูะ, แตห เฆ กาโลห แบลง อึม ยอดาน ตึอน, วี ฮาว ฌัม ดี มืง เฮลัม. ดูอี อาราม บอ แรน ซึก, วี กาโฆห ดี อาดาวีด. 18 ปัน ตี เฆ บอ เตา ดี อาต ดูอี อีซาเรลัะ. อาดาวีด บอ ง็อห ดา ซึก อี ป็อะ ลักเลา เฆ ดูอี อาราม บู มาย็อห วี. อัน บอ ง็อห ดา ซึก อี ป็อะ มังปร็อง พวน หมึณ วี, แตห เฆ ยัม. บอ อาซอบาก อี มูห ดา อี อึบ ดา ซึก ตึอน บอ ยัม ดี ตี. 19 เฆ คูนดีคัม ปี อึบ อาฮาเดจา ตึอน, เฆ บอ ยึร ลอง แฮะ ชึม เฆ ดี ดูอี อีซาเรลัะ, เฆ บอ กาโพรม ดี แบน อู ฆึก ดี ดูอี อีซาเรลัะ, วี คัม ดี แบน หมาย เฆ. วาย ตี ดูอี อาราม เฆ อาว ฮู ยัะ จอย ดูอี อัมโมน กาโฆห ดี อี.