คาน 9
ลอง อาดาวีด ฆาย อาเมพีบอเซด
1 อึณ บอ มึห อู เฌณ อาดาวีด ดีหมอด อี ต็อห, “อึณ ซี มึห วอแว ครึร อาซอลู ตึอน อี ฆีด คอ อู วี, แตห โอว ปึอน ดี โบง เวียะ แปะ แฮะ เฆฌู อาโยวนาทาน ตึอน ดี โอว?”
2 อึณ บอ มึห หมาย อาซอลู ตึอน อู วี, อัน จืร อาฌีบา. เฆ บอ แดะ ตัห อัน. คูนดีคัม อาดาวีด บอ ดีหมอด อัน ต็อห, “แม มูห อาฌีบา?” แฮะ ฮอต, อัน วี กาลาง ต็อห, “อึร, อึณ แฮะ มูห โอว.”
3 คูนดีคัม บอ ต็อห, “อึณ ซี มึห หลูกหลาน อาซอลู อู วี, อี หณัม ยัม? โอว ซี โบง นา หมึอม ดี อัน.” อาฌีบา วี กาลาง ดี คูนดีคัม ต็อห, “อึณ มึห ฆอน อาโยวนาทาน อู วี อี มึห เปลา แฆะ บอ อา บลาก.” อัน แฮะ ฮอต ต็อห ปาย ตี, 4 คูนดีคัม วี ดีหมอด ปัว ต็อห, “อัน กอย ดี เหมา?” อาฌีบา วี ต็อห, “อัน กอย ดี กาง อามาคีรา อี มูห ฆอน อาเมลา, อี กอย ดี มืง ลอเดบา ตึอน.”
5 ปัน ตี อาดาวีด บอ จัร อี ฮาว ดี กาง อามาคีรา อี มูห ฆอน อาเมลา, อี กอย ดี มืง ลอเดบา ตึอน, แตห เฆ แดะ ตัห อัน.
6 อึณ ยี มูห อาเมพีบอเซด อี มูห ฆอน อาโยวนาทาน. อาโยวนาทาน วี มูห ฆอน อาซอลู. อาเมพีบอเซด บอ ตัห ฌัม โดง กอย อาดาวีด, อัน บอ ครึบเครา กรึบ อาดาวีด. อาดาวีด บอ ต็อห, “อึย อาเมพีบอเซด.” อัน วี ต็อห, “โอว มูห หมาย แม.”
7 อาดาวีด วี ต็อห, “แม แกวะ โยว. โอว ดี โบง นา หมึอม ดี แม อาคัร หมาน. ฆูณ แม อี จืร อาโยวนาทาน แฮะ ดึอม มูห ฆึก โอว. โคว, กาดาย อี ดึอม มูห โกรว ดา แม อี จืร อาซอลู ตึอน, โอว ดี วี ดัว ดี แม. แม ดี บอ ปึอน ดี โฮม รึม โดบ โอว ดอน ซีแง.”
8 อัน บอ วี ฆึบ วี ต็อห, “โอว ตู นับ, เหมา อึณ ปาย ปี ต็อห แม โฆรห ตี ดี โอว. โอว แฮะ ปี มาโซว ยัม. แม ยี ต็อห ดี โบง นา หมึอม กาเซา ดี โอว.”
9 แฮะ ฮอต, คูนดีคัม บอ วี แดะ อาฌีบา อี มูห หมาย อาซอลู ตึอน, ต็อห ดี อัน, “โอว แฮะ ดึห โตต โกรวกราม อี ดึอม มูห โกรว อาซอลู บอ วอแว อัน, วี อาบ ดัว ดี หลาน ดา กาณา แม นี. 10 บอ แม บอ ฆอน อีมาย แม, บอ หมาย แม บอกาเฆลียด, เบ โลว รัณ ฆาน อาดา อัน. เบ ฮี ปึอน เบล อัน, เบ โลว ดัว ดี หลาน ดา กาณา แม ตี, แตห อัน มึห แคะ ปี โลว อัน. มาแล, อาเมพีบอเซด นี อี มูห หลาน ดา กาณา แม, อัน ดี ปึอน โฮม ปี ดี โฮม รึม โดบ โอว เซเซ.” อาฌีบา ตึอน ยี มึห ฆอน อีมาย ฆึร ดี พัน วี บอ หมาย อัน อา ฆึร วี.
11 อาฌีบา วี กาลาง ดี คูนดีคัม ต็อห, “แคะ ปี ต็อห แม คูนดีคัม ตาง ดี โอว นี, โอว มืร ดี โบง โตต ดอน โมยว.” อาเมพีบอเซด ตึอน บอ ปึอน ดี โฮม รึม โดบ อาดาวีด, แตห อัน ปี ฆอน อาราง คูนดีคัม.