1 วาย อัน ตี อึณ แฮะ กาตัด ดี ฌัม คราว ดี ดึห เฌาพรา อาเอลียา, แตห อัน โฮะ โดบ คูน แคง ฆางหราว. อาเอลียา ฆาย อาเอลีซา กาโดบ ฮาว เลห ดี มืง ฆีลัะฆา. 2 อาเอลียา กาลาง ดี อาเอลีซา ต็อห, “แตห แม ฆืด กอย ดี นี. เฌาพรา แฮะ จัร โอว ฮาว ดี มืง เบดาเอน.” อาเอลีซา ปี วี ต็อห, “เฌาพรา แฮะ มูห แฮะ หมาน. บอ แม หณัม ยัม, แฮะ หมาน. ปาย ตี บอ โฆรห โอว แฮะ หมาน. โอว ตู ปึอน กาฆ็อห ดี แม.” ปัน ตี ฆาย บอ กาโดบ ฮาว ดี มืง เบดาเอน.

3 เฆ ดูอี อี บยาน โฆรห เฌาพรา แคง มืง เบดาเอน ตึอน บอ กาโพรม ดี ฮาว รวห อาเอลีซา, ดีหมอด อัน ต็อห, “แม นับ, เฌาพรา ดี ดึห ดา ซารา แม กาฆ็อห ดี แม อาตึร นี?” อัน วี ต็อห, “อึร, แฮะ หมาน. โอว แฮะ นับ. แตห อึณ เยน ปาย ตี.”

4 ปัน ตี อาเอลียา วี กาลาง ดี อัน ต็อห, “อึย อาเอลีซา, แม ฆืด กอย ดี นี. เฌาพรา แฮะ วี จัร โอว ฮาว ดี มืง เยรีโคว.” อัน ปี วี ต็อห, “เฌาพรา แฮะ มูห แฮะ หมาน. บอ แม ซี อีม, แฮะ มูห แฮะ หมาน. ปาย ตี บอ โฆรห โอว แฮะ มูห แฮะ หมาน. โอว ตู กาฆ็อห ดี แม ซารา.” ฆาย ตึอน บอ วี กาโดบ ฮาว ดี มืง เยรีโคว.

5 เฆ ดูอี อี บยาน โฆรห เฌาพรา แคง มืง เยรีโคว ตึอน บอ ตัห ดีหมอด อาเอลีซา ต็อห, “แม นับ, เฌาพรา ดี ดึห ดา ซารา แม, แตห อัน กาฆ็อห ดี แม อาตึร นี?” อัน วี ต็อห, “อึร แฮะ หมาน, โอว แฮะ นับ. แตห อึณ เยน ปาย ตี.”

6 อาเอลียา ปี วี กาลาง ดี อัน ต็อห, “แม ฆืด กอย ดี นี, เฌาพรา แฮะ จัร โอว ฮาว ดี แบลง อึม ยอดาน ตึอน.” อัน ปี วี ต็อห, “เฌาพรา แฮะ มูห แฮะ หมาน. บอ แม ซี อีม, แฮะ มูห แฮะ หมาน. ปาย ตี บอ โฆรห โอว แฮะ หมาน. โอว ตู กาฆ็อห ดี แม ซารา.” แฮะ ฮอต, ฆาย ปี วี กาโดบ ฮาว.

7 เฆ ดูอี อี บยาน โฆรห เฌาพรา พัน ฆึร วี กาโพรม ดี ฮาว จ็อง ยอด, แตห อึณ ราม กาโต็ง. ฆาย ดา ซารา บอ จ็อง โคบ แบลง อึม ยอดาน ตี.

8 อาเอลียา บอ ดึห ฮึบ อัน บัน, บอ มัห โลง แคง อึม ตี. อึม บอ กาย็อห แบน อา บลาก. ฆาย บอ ปึอน ดี กาโลห ฮาว แดง กาดาย เฮณ.

9 ดอ แฮะ ฮอต กาโลห ฆาย แบลง อึม ตึอน, อาเอลียา กาลาง ดี อาเอลีซา ต็อห, “เซ แม ซี หมาณ ดี โอว แฮะ ปึอน. อาต กาฆ็อห โอว ดี แม, โอว ดี ดัว.” อาเอลีซา วี หมาณ ต็อห, “แตห น็อห พึอม แม ซารา ตี กอย แคง น็อห โอว อา บูน.”

10 อาเอลียา วี ต็อห, “ปี หมาณ แม ตี อึณ หณาบ กาเซา. มาแล, เซ แม ฮี ยึร ดอ ฮาว โอว ตัะ แม, แม ดี ปึอน. เซ อาว ปาย ตี, แม ตู ปึอน.”

11 ดอ ลาย กามวน ฆาย ฮาว โดบ อึณเตณ ตี, อึณ บอ มึห ลักเลา ปี เงา, บอ อึณปร็อง ปี เงา ตัห กาปลูห บอ ดึห อาเอลียา, แตห ฆาย ลาย กาฆ็อห. อาเอลียา ตึอน บอ โฮะ โดบ คูน แคง ฆางหราว. 12 อาเอลีซา ตึอน บอ ยึร แฮะ ปาย ตี อัน บอ แดะ ต็อห, “อึย ฆูณ โอว, อึย ฆูณ โอว. โอว บอ ยึร ลักเลา บอ อึณปร็อง ดูอี อีซาเรลัะ.” วาย ตี, อัน มืร อาว ฮู ปึอน ดี ยึร อาเอลียา ตึอน. อัน บอ บูต แวน ซีโตว อัน, กายาต โตต.

13 อัน บอ ดึห กัน ฮึบ อาเอลียา อี แฮะ โจห ตึอน. ปัน ตี อัน วี ฮาว ดี โคบ แบลง อึม ยอดาน ตึอน.

14 อัน บอ ดึห ฮึบ ปี ดัว อาเอลียา ดี อัน ตึอน, มัห แคง อึม ตี ต็อห, “แม เฌาพรา อี มูห เฌาพรา ปี กรึบ อาเอลียา, แม กอย ดี เหมา?” อัน แฮะ ฮอต มัห แคง อึม ตี, อึม บอ กาย็อห แบน อา บลาก. อัน บอ กาโลห.

15 ดูอี อี บยาน โฆรห เฌาพรา อี กอย ดี มืง เยรีโคว, เฆ บอ วี ยึร อัน, เฆ ลาย กาลาง ต็อห, “น็อห พึอม อาเอลียา แฮะ กอย รึม โดบ อาเอลีซา.” เฆ บอ กาโพรม ดี ฮาว รวห อัน, บอ ครึบเครา แดง กาดาย ดี อาต อัน. 16 เฆ ตึอน วี กาลาง ดี อัน ต็อห, “อึณ ซี มึห เฆ พัน ฆึร วี อี โปลม ตาง, หมาณ แม ควาง แตห เฆ ปึอน ดี ฮาว เหรต ดา ซารา แม ตึอน, โยว น็อห พึอม เฌาพรา แฮะ โจะ ฮาว อัน เบลห อูน แดง นอน อู โปละ อู โปละ. เซ อาว ปาย ตี โยว อึณ มูห โดบ ดีลัยะ อู โปละ อู โปละ.” อัน วี ต็อห, “อาว โลว จัร เฆ ฮาว.”

17 เฆ ตึอน แนะ อี หมาณ ดี อัน, แตห อัน กอ กาดูห ดี ควาง เฆ ฮาว. อัน มืร วี ต็อห, “จัร เฆ ฮาว.” ปัน ตี เฆ บอ จัร ดูอี พัน ฆึร วี ตึอน ฮาว. เฆ บอ กาโพรม ดี เหรต. อึณ กอ โนะ โอย ซีแง, เฆ ยี ตู ยึร.

18 เฆ บอ วี กาโพรม ดี วี ตัห. อาเอลีซา มืร ซี กอย ดี มืง เยรีโคว ตึอน. อัน วี กาลาง ดี เฆ ต็อห, “โอว แฮะ ต็อห ดี เบ, ‘แกวะ ฮาว,’ อาว มูห?”

19 วาย อัน ตี เฆ ดูอี มืง ตึอน วี กาลาง ดี อาเอลีซา ต็อห, “ยอด โดง ดี แด อี มืง นี, อึณ มูห โดง ดาคึย ซีคยา. แม แฮะ ยึร, อาว มูห? มาแล อึม ยี ตู หมึอม. บอ กาดาย มืร ตู ลัต อี หมึอม.”

20 อัน มืร วี ต็อห, “ดึห กาเปา อึม อี กามาย, ฮัร ซัยะ ดึห ตัห.” เฆ บอ ดึห ตัห ดัว ดี อัน.

21 อัน บอ ดึห เลห ฮาว โดง โตห อึม, อัน บอ ฮัร ซัยะ ตึอน, วี ต็อห, “เฌาพรา แฮะ กาลาง ต็อห, อัน แฮะ แตห อึม นี วี ซีแงห. ดึห โป็ง อาตึร ฮาว นา อาต นี, อึม ตี อาว ฮู แตห อี ลึร บอ ยัม.” 22 วาย อัน ตี อึม ตี บอ ซีแงห กอ ฌัม อาตึร นี. อึณ บอ หมาน แคะ ต็อห อาเอลีซา ตึอน.

23 ปัน ตี อาเอลีซา ตึอน บอ ยีต ดี มืง เยรีโคว ตึอน, วี เวณ ดี มืง เบดาเอน. ดอ ฮาว อัน โดบ อึณเตณ, อึณ มึห ฆอน ดีรอย แคง มืง ตึอน, ตัห กาลาง โฆรห วาณาก ดี อัน. เฆ ต็อห, “อาฆีณ ฆลัะ โฮะ โฮะ, อาฆีณ ฆลัะ โฮะ โฮะ.” 24 อัน บอ วี มางัห ยอด บอ ยึร เฆ. อัน บอ ฆาว ปวน เฌาพรา, ดืง เฆ. อัน แฮะ ฮอต ดืง, อึณ บอ มึห มาเฆรห อา โดว ตัห แคง แปร, ก็อะ ฆอน ดีรอย เฆ ตึอน, แตห กอ ยัม พวน ฆึร ดี อา วี.

25 อัน วี เลห แคง มืง ตี, วี ฮาว ดี นอน ฆาเมลัะ. แฮะ ฮอต, อัน วี ฮาว ดี มืง ซามารี.