1 ดอ มูห อายอซาพาด คูนดีคัม อี อึบ มืง ยูดา อาดา ฆึร ดี ดา ซีนัม, อาเยโฮวรัม อี มูห ฆอน อาฮับ ตึอน, อัน วี แบน คูนดีคัม อี อึบ มืง อีซาเรลัะ, กอย แคง มืง ซามารี. อัน วี อึบ บึง มืง ฆึร ดี อา ซีนัม. 2 อาเยโฮวรัม ตึอน โบง ปี ตู อึง เฌาพรา. มาแล, อัน ตู โบง แคะ ปี โบง ฆูณ มา อัน. อัน บอ ปยาต แวน อารึบ เฌา บาลัะ ปี โบง ฆูณ อัน ตึอน. 3 อัน ยี ซี โบง หมาบ ปี อาเยโรวโบว อี มูห ฆอน อาเนบัด ตึอน, วี แตห บอ เฆ ดูอี อีซาเรลัะ โบง หมาบ ตี. อัน มืร ตู แวน หมาบ ตี.

4 อึณ ยี มูห คูนดีคัม อาเมซา อี อึบ ดูอี โมวอาบ ตึอน, อัน มูห ดูอี เฮียง มาบู. อัน บอ ดึห ฆอน มาบู อู แซน โดว บอ ฮึก มาบู อาโล็ง อู แซน โดว, อาบ ดี คูนดีคัม อีซาเรลัะ, บอ ดัว บอ โดว บอ ฮึก. 5 คูนดีคัม อาฮับ แฮะ ฮอต ยัม, คูนดีคัม อี อึบ ดูอี โมวอาบ ตี ตู วี โยว คูนดีคัม อีซาเรลัะ. จึง ปี โลว ฮับ อัน, อัน ฮู ฮับ. 6 ปัน ตี คูนดีคัม อาโยวรัม บอ เลห แคง มืง ซามารี, วี แดะ กาฌูะ แคะ กอย เฆ ดา ซึก แคง มืง อีซาเรลัะ. 7 อัน บอ จัร ดาลาม อัน ฮาว โดง กอย อายอซาพาด อี มูห คูนดีคัม แคง มืง ยูดา. อัน บอ ต็อห, “คูนดีคัม โมวอาบ อาว ฮู ดัว จึง ดี โอว. แม ดี คัม ดี โดบ โอว, ฮาว กาโฆห มืง ตี?” ปัน ตี อายอซาพาด วี ต็อห, “โอว ดี ฮาว. บอ แม บอ โอว แฮะ มูห อู โมยว. เฆ ดูอี โอว แฮะ ปี ดูอี แม. อึณปร็อง โอว, แฮะ ปี อึณปร็อง แม.”

8 อัน ปี วี ดีหมอด, “เอ ดี ว็อะ อึณเตณ เหมา?” อาโยวรัม วี ต็อห, “แตห เอ ว็อะ อึณเตณ แคง แปร กาฮ็อห อี จืร เอโดม ตึอน.”

9 ปัน ตี คูนดีคัม อีซาเรลัะ บอ คูนดีคัม ยูดา บอ คูนดีคัม เอโดม, เฆ บอ แลบ ฮาว โดบ อึณเตณ อาดา บู ซีแง. ดา ซึก เฆ โดว ซัดดาวา อาว ฮู มึห ดี เดียง อึม.

10 คูนดีคัม อีซาเรลัะ บอ ต็อห, “อาว หมึอม หณึม, เฌาพรา ซอ แตห เอ คูนดีคัม โอย กาดัง นี ตัห กาฌูะ, แตห อัน อาบ เอ ดี ดูอี โมวอาบ เฆ นี.”

11 อายอซาพาด วี ต็อห, “อึณ โลว มึห ดูอี บยาน โฆรห เฌาพรา ดี นี, แตห เอ ปึอน ดี ดีหมอด.” แดเจณ คูนดีคัม อีซาเรลัะ อู วี วี ต็อห, “อึณ มึห อาเอลีซา อี มูห ฆอน อาซาพัด, อี ดึอม แบน แดเจณ อาเอลียา ตึอน, อัน กอย ดี นี.”

12 อายอซาพาด วี ต็อห, “อัน มูห ดูอี กาลาง หมาน โฆรห เฌาพรา.” ปัน ตี คูนดีคัม อี อึบ ดูอี อีซาเรลัะ บอ อายอซาพาด บอ คูนดีคัม อี อึบ มืง เอโดม ตึอน, เฆ บอ ฮาว โดง กอย อัน.

13 อาเอลีซา วี กาลาง ดี คูนดีคัม อี อึบ ดูอี อีซาเรลัะ ต็อห, “อาเร แม อาว บาะ อาเร โอว. อาว โลว ดีหมอด โอว. แตห แม ฮาว ดีหมอด อี มูห ดูอี อี บยาน โฆรห เฌา ปี กรึบ ฆูณ มา แม ตึอน.” คูนดีคัม วี ต็อห, “แม แกวะ ต็อห ปาย ตี. โคว, เฌาพรา แฮะ แดะ เย คูนดีคัม โอย กาดัง นี, แตห อัน ปึอน ดี อาบ เย ดี ดูอี โมวอาบ เฆ นี.”

14 อาเอลีซา วี ต็อห, “เฌาพรา ปี กรึบ โอว อี มูห เฌาพรา อี อึบ โตต ดอน โมยว, อัน แฮะ นับ, โฆรห โอว แฮะ หมาน. เซ โอว ตู กาเว อายอซาพาด อี อึบ ดูอี อายูดา, โอว ตู หงึย หงาย ดี ยอด แม. 15 มาแล, ดอ ตี นี, แตห แม ฮาว แดะ ดูอี อี นับ ดี บัห ดีง, แตห อัน ตัห โดง กอย โอว.” ดูอี บัห ดีง บอ ตัห บัห ดีง อัน, ปวน เฌาพรา บอ ตัห ปลึก อาเอลีซา.

16 อัน บอ ต็อห, “เฌาพรา ต็อห ปาย นี, ‘โคบ ดีลัยะ นี, แตห เบ ฆึห กาเดา กืน กืน.’ 17 โคว, เฌาพรา ต็อห, ‘เบ ตู ปึอน ยึร คูน เฆ ฆลาย. อึม ยี ดี โนะ แคง ดีลัยะ นี. บอ เบ, บอ มามัก เบ, บอ โดว ซัดดาวา เบ ดอน โมยว, เบ ดี ปึอน ดี เดียง.’ 18 ลอง ปี ดี โบง เฌาพรา ตี, อึณ หงึย ดี อัน. บอ เฆ ดูอี โมวอาบ เฌาพรา ดี บอ อาบ ดี เบ. 19 เบ ดี ปึอน ดี ปยาต แวน มืง อี มึห แรง ซีคยา บอ มืง ตาง ดอน มืง. เบ ดี ปึอน ดี ฆัร แวน เฮ อี ชีด ดอน กาดัง, ปึอน ดี ปูน แวน บอ อึม คึม, ปึอน ดี ดึห มาว แวน แคง โดง นา อี บอด, แกวะ แตห อึณ วี ลัต มาเซ.”

20 อาเอลีซา แฮะ ฮอต กาลาง โฆรห ตี, บอ ฌัม ปา แคหณา ซีณวัห ดอ หลู เฆ ปี โลว หลู ตึอน, อึม บอ ตัห นา มืง เอโดม บอ โนะ แคง มืง โดง กอย เฆ ตี.

21 ดูอี โมวอาบ, เฆ บอ ยึร ลอง คูนดีคัม โอย กาดัง แฮะ ต็อห ดี ตัห กาโฆห ดี เฆ, เฆ บอ แดะ กาฌูะ ดูอี ดอน อี อี แฮะ นับ ดี ตา ครึง กาโฆห บอ อี เตียะ อี ตาง, แตห เฆ บัร โคบ กาอูน กาดาย มืง เฆ. 22 เฆ บอ ยีต ซีณวัห เจว, บอ ยึร อาโรง ซีแง, อี ทอง แคง อึม ตึอน. เฆ บอ ยึร อึม กาซืร งึอบ เฆ ตึอน, อึณ เรณ, แหนน หนาม. 23 เฆ บอ ลาย กาลาง ต็อห, “อาดอย แฮะ มูห หนาม. อึณ แหนน คูนดีคัม เฆ ตึอน, เฆ แฮะ ลาย กาง็อห ยัม ราง เฆ. อึย เบ ดูอี โมวอาบ, แตห เอ กาโพรม ดี ฮาว ดึห โกรว เฆ ดอ ตี นี.”

24 เฆ บอ ตัห ฌัม โดง คยัะ ดูอี อีซาเรลัะ, เฆ ดูอี อีซาเรลัะ บอ กาโพรม ดี กาโฆห ดี เฆ บอ ง็อห ยัม ดูอี โมวอาบ เฆ ตี, แตห เฆ กอ เตา. แฮะ ฮอต, เฆ บอ คูงครัห ดี ง็อห ดูอี โมวอาบ, บอ ลึบ แคง มืง เฆ. 25 เฆ บอ กาโพรม ดี ปยาต แวน แบน มืง แบน มืง. ดอน อี บอ ดึห มาว วึณ แดง กาดาย บอด ดอน โปละ, แตห อึณ กอ โนะ. เฆ บอ ดึห กาดาย ปูน โตห อึม ดอน โปละ. เฆ บอ ฆัร แวน เฮ อี ซีคยา ดอน กาดัง, แตห อึณ เกห. อึณ มึห มี มืง กีรัะฮารีด, เฆ ตู ปยาต แวน มาว ดี แรง, เฆ ยี แตห ดูอี อี นับ ดี ปืะ มาโกง วี โรบ วี กาโฆห มืง ตี.

26 คูนดีคัม โมวอาบ บอ ยอด, อาว ฮู แหนน ดี ปึอน คัม. อัน บอ แดะ เฆ ดูอี อี โฆ็ง บลา เลียห บู มาย็อห วี. อัน บอ แตห เฆ เทว ดี เลห เตา โดง กอย คูนดีคัม อี อึบ มืง เอโดม. เฆ ยี ตู ปึอน ดี เลห.

27 ปัน ตี อัน บอ ดึห ฆอน ฆีณ อัน, อี มูห วี อี ดี ปลูะ อัน, วี ง็อห หลู โดว อัน แดง แรง มืง ตึอน. แคะ กอย เฆ คูนดีคัม โอย กาดัง ตึอน บอ โยว กาเซา. เฆ บอ อูน มืง ตี, วี เวณ มืง บรีม เฆ.