1 วาย อัน ตี อึณ มึห อีบึณ อู วี. อีมาย อัน แฮะ ดึอม กอย แคง พึง ดูอี อี บยาน โฆรห เฌาพรา. อัน บอ ตัห โดง กอย อาเอลีซา ต็อห ดี อัน, “แดเจณ แม อี มูห อีมาย โอว, อัน แฮะ ฮอต ยัม. แม มืร นับ, อัน มูห ดูอี อี โรวเซ ซีคยา เฌาพรา. อึณ ยี มึห ดา อู วี, อีมาย โอว แฮะ ดึอม การ็อห รึอน อัน. ดอ ตี นี อัน แฮะ ตัห, ต็อห ดี ดึห ฆอน โอว อา วี, แตห ฆาย แบน หมาย อัน โกบ ตู มึห โอว ดี ดัว วีว รึอน อัน.”

2 อาเอลีซา วี ต็อห ดี อัน, “เหมา โอว ดี ปาย ดี จอย แม? แตห แม กาลาง ดี โอว. แคง กาง แม, แม ซี มึห โกรวกราม มาเซ?” อัน วี ต็อห, “อาว ฮู มึห มาเซ. อึณ มึห มี กาเปา นามัน อู กาเปา.”

3 อาเอลีซา วี ต็อห ดี อัน, “แตห แม ฮาว วาย บอ กาเปา เบลา ดี เฆ อี กอย กาตัด แม. วาย กืน กืน แกวะ วาย อี แจก. 4 แฮะ ฮอต, แตห แม วี ลึบ แคง กาง แม ตี, บอ กาบีด มาโลห, คร็อง บอ แม บอ ฆอน แม แคง กาง ตี บอ ฮูห นามัน ตี แคง กาเปา เฆ ตี. ฮี โนะ, แม บอ ดึห อูน อู โปละ.”

5 ปัน ตี อีบึณ ตึอน วี เวณ ดี กาง อัน. อัน บอ คร็อง เฆ ฆอน อัน, กาบีด มาโลห กาง อัน. ฆอน อัน บอ ดึห กาเปา, ดัว ดี อัน. อัน บอ ดึห นามัน, ฮูห แคง กาเปา แบน โมยว แบน โมยว. 6 อัน แฮะ ฮอต ฮับ แคง กาเปา ดอน โบ็ง, อัน วี ต็อห ดี ฆอน อัน, “ดึห ตัห กาเปา ปอ อึณ ปัว.” ฆอน อัน วี ต็อห, “อาว ฮู มึห.” อัน แฮะ ฮอต ต็อห ปาย ตี นามัน ตึอน บอ ฆืด อู เฌณ. อาว ฮู แหล.

7 อัน ปี วี ฮาว โดง กอย ดูอี ปี ตึย เฌาพรา. ดูอี ปี ตึย เฌาพรา ตึอน วี ต็อห ดี อัน, “แตห แม ดึห นามัน ตี, ฮาว ย็อง, ดัว วีว รึอน ปี การ็อห แม ตี. อี กาโลย, แตห อึณ แบน ปี ดี โฮม เบ ฆอน แม.”

8 วาย อัน ตี ปอ อู ซีแง, อาเอลีซา บอ ฮาว ดี มืง ซูนีม. แคง มืง ตี มึห อีบึณ อู วี อี ครัม กาเซา. อีบึณ ตี แฮะ ดึอม บาง อาเอลีซา ตัห โฮม โบม, เดียง อึม แคง กาง อัน. โคว, ดอน ฮี ฮาว อาเอลีซา, อัน บอ ว็อะ, เดียง อึม, โฮม โบม ดี กาง อีบึณ ตี. 9 อีบึณ ตึอน วี กาลาง ดี อีมาย อัน ต็อห, “โอว ยอด, ดูอี อี ฮาว เซเซ กาโลห กาง เอ นี, อัน มูห ดูอี บอด, ดูอี ปี ตึย เฌาพรา. 10 แคง กาง อาย คร็อง แดง นี, แตห อาย โบง โฮง อีด ดีแตด อาดา อัน. แตห อึณ มึห กาโช็ง อีด, กาโช็ง โฮม โบม, อึณบาง ตูต บอ เงา ออม. ดอ ตัห ว็อะ อัน ดี กาง อาย, อัน ดี ปึอน ดี ตัม ดี ตี.”

11 วาย อัน ตี ดูอี ปี ตึย เฌาพรา ตึอน บอ ฮาว. อัน บอ ตัห ว็อะ ดีเหลา ดี โฮง อีด นา แดง ตึอน. 12 อัน วี ต็อห ดี อาเกฮาฌี, อี มูห ดีแบ อัน, “แม ฮาว แดะ ตัห อีบึณ ซูนีม ตึอน.” อัน บอ ฮาว แดะ อีบึณ ตึอน บอ ตัห กอย นา อาต อัน. 13 อัน วี ต็อห ดี ดีแบ อัน, “แตห แม ต็อห ดี อีบึณ นี, อัน แฮะ โบง แบน โมยว แบน โมยว, ลึมลา โอว ปาย นี. โคว, มาเซ ปี ดี ปึอน โอว โบง เวียะ ดี อัน? อึณ มึห มาเซ ปี ดี โลว กาลาง ดี คูนดีคัม เฆ ดา ตาง อี อึบ ดา ซึก ดาง อัน?” อีบึณ ตึอน วี ต็อห, “โอว แฮะ กอย รึม โดบ วอแว โอว, อาว ฮู โลว มาเซ.”

14 แฮะ ฮอต, อัน ปี วี ต็อห ดี ดีแบ อัน, “เซ อึณ ปาย ตี มาเซ อี ดี หมึอม ปี ปึอน โอว โบง ดัว ดี อีบึณ ตี?” อาเกฮาฌี วี ต็อห, “อึร, อีบึณ ตี ตู มึห ดี เฮียง ฆอน. อีมาย อัน แฮะ กัด.”

15 อัน ปี วี ต็อห, “ฮาว ปอ เฌณ, แดะ อัน ตัห.” อีบึณ ตึอน บอ ตัห กอย บาง มาโลห. 16 อัน วี ต็อห ดี อีบึณ ตึอน, “ฮี โนะ ปอ อู ซีนัม, แม ดี มึห ดี เฮียง ฆอน อีมาย.” อัน แฮะ ฮอต ต็อห ปาย ตี อีบึณ ตึอน วี ต็อห, “แม ดูอี ปี ตึย เฌาพรา, แม แกวะ กาโลว โอว. โยว อึณ ตู หมาน ปี ต็อห แม ตี.”

17 วาย อัน ตี อีบึณ ตึอน บอ แด บาดีก ซันเท. แฮะ โนะ อู ซีนัม, อัน บอ มึห ฆอน อีมาย. อึณ บอ หมาน แคะ ปี ดึอม กาลาง อาเอลีซา ดี อัน.

18 ฆอน อัน ตึอน บอ แกร ดี ตาง. อู ซีแง, อัน บอ ฮาว โดบ ฆูณ อัน โดง โซะ เฆ โหงว. 19 อัน ต็อห ดี ฆูณ อัน, “อาลึร, ฆีณ โอว เซา. แฮะ เซา กาเซา.” ฆูณ อัน วี ต็อห ดี แดเจณ อัน อู วี, “ดึห ฮาว ตึย อัน ดี มา อัน.” 20 แดเจณ อัน ตึอน บอ ดึห ตัห ฌัม โดง กอย มา อัน, อัน บอ กอย แดง บึม มา อัน. บอ ฌัม ซีแง กาแต, อัน บอ ยัม. 21 มา อัน บอ ดึห โฮะ อัน คร็อง แดง, เบลห อูน อัน แดง กาโช็ง อีด ดูอี ปี ตึย เฌาพรา ตึอน บอ กาบีด มาโลห, วี เลห ฮาว.

22 อัน บอ วี แดะ อีมาย อัน ต็อห, “ดึห มาโลว อู โดว, แตห บอ แดเจณ อู วี โดบ โอว, แตห โอว ปึอน ดี ฮาว แฮ แฮ, ฌัม โดง กอย ดูอี ปี ตึย เฌาพรา, ปี วี ตัห ครัน ครัน.”

23 อีมาย อัน วี ต็อห, “โกบ มาเซ ปี ซี ฮาว แม โดง กอย ดูอี ปี ตึย เฌาพรา อาตึร นี? อาว มูห ซีแง ลืนโมน. อาว มูห ซีแง ดีเหลา.” อัน วี ต็อห, “อาว ลืก, แตห โอว ฮาว.”

24 ปัน ตี นาง ตึอน บอ ครึง กอบ มาลา อัน. อัน วี กาลาง ดี แดเจณ อัน ต็อห, “แตห แม ฮาว แยต ดี อาต แฮ แฮ. เซ โอว ตู แดะ แม, แม แกวะ บัร โอว.” 25 นาง บอ ฮาว ฌัม โดง กอย ดูอี ปี ตึย เฌาพรา ดอ กอย อัน ดี นอน ฆาเมลัะ ตึอน. ดูอี ปี ตึย เฌาพรา บอ ยึร นาง ดอ ซี กอย โต็ง อัน. อัน วี ต็อห ดี อาเกฮาฌี อี มูห ดีแบ อัน, “ยอด, อีบึณ ซูนีม แฮะ ตัห.” 26 แตห แม กาแบลบ ฮาว รวห อัน, ดีหมอด อัน ต็อห, “แม แฮะ กอย ดาคึย? อีมาย แม แฮะ กอย ดาคึย? บอ ฆอน แม แฮะ กอย ดาคึย?” นาง วี ต็อห, “แฮะ ดาคึย.”

27 นาง บอ ตัห ฌัม โดง กอย อาเอลีซา อี กอย ดี นอน ตึอน, อัน บอ ตัห ต็อห ดี เงียม เปลา อาเอลีซา. อาเกฮาฌี บอ ตัห แคร อัน. อาเอลีซา วี ต็อห, “แกวะ แคร อัน. โคว, อึณ มึห ดูก ดี น็อห อัน. ลอง อัน ตี, เฌาพรา ยี แฮะ เครียง, ตู บยัะ ดี โอว.”

28 นาง วี ต็อห, “โอว ตู ดึอม หมาณ แม ดัว ฆอน อีมาย ดี โอว. โอว แฮะ ต็อห, แกวะ กาโลว โอว.”

29 ดูอี ปี ตึย เฌาพรา วี ต็อห ดี อาเกฮาฌี, “แตห แม รีด แซะ ดี ณอย แม, โฆ็ง ฮาว บอ อึณกรวน โอว นี. เซ แม บอ กาตูณ อี เฮา, แกวะ โฆรห ดี อัน. เซ อัน บอ โฆรห ดี แม, แม แกวะ เวียะ โฆรห อัน. แตห แม ดึห อึณกรวน โอว นี, ดาง แดง นา ฆอน ตี.”

30 มา ฆอน ตึอน วี ต็อห, “แฮะ มูห, แฮะ หมาน, บอ เฌาพรา บอ แม แฮะ กอย ซีคยา. ปาย ตี อึณ บอ หมาน อาคาคัร, โอว ตู กาฆ็อห ดี แม ดอ เหมา.” ปัน ตี อาเอลีซา บอ ฮาว โดบ อีบึณ ตึอน.

31 อาเกฮาฌี ตึอน แฮะ ฮอต ฮาว แยต ดี อาต, แตห อัน ปึอน ดี ดาง อึณกรวน แดง นา ฆอน ตึอน. มาแล, ฆอน ตึอน หณัม โฆรห, หณัม โหลห โดว. โคว, อัน บอ วี วีว, กาลาง ดี อาเอลีซา ดอ ฮาว อัน โดบ อึณเตณ ตึอน. อัน ต็อห, “ฆอน ตี หณัม อึณซึห.”

32 อาเอลีซา บอ ตัห ฌัม กาง ตี, ฆอน อี แฮะ ฮอต ยัม, อัน ซี กอย แดง กาโช็ง อีด ตึอน. 33 อาเอลีซา บอ ลึบ ฮาว แคง โฮง ตึอน, กาบีด มาโลห, แตห อึณ ฆีด มี ฆาย อา วี. แฮะ ฮอต, อัน วี ซาคึร ดี เฌาพรา. 34 อัน บอ กอย เดียะ ฆอน ตี, อีด แดง ฆอน ตี. อัน บอ แตห โมต อัน กาซืร โมต ฆอน, งาย อัน มืร กาซืร งาย ฆอน. อัน บอ อีด กาตับ แดง ฆอน, แตห โดว ฆอน บอ แกร ดี ซีอูณ. 35 แฮะ ฮอต, อัน บอ แล วีว แล เวณ แคง โฮง ตึอน. อัน ปี วี อีด กาตับ แดง ฆอน ปอ อู เฌณ. ฆอน บอ อาชีห บู เฌณ, บอ บลาง งาย อัน.

36 อัน วี แดะ อาเกฮาฌี ต็อห, “แดะ อีบึณ ซูนีม ตัห.” อาเกฮาฌี บอ ฮาว, แดะ ตัห อีบึณ ตี. นาง บอ ตัห ฌัม โดง กอย ฆอน อัน, อาเอลีซา วี ดัว ฆอน ตี ดี มา อัน, วี ต็อห, “ดึห ฆอน แม นี.”

37 อีบึณ ตึอน บอ ลึบ ฮาว แคง โฮง ตึอน, อัน บอ มูด ฆึบ อี ครึม. แฮะ ฮอต, อัน บอ ดึห ฆอน อัน, วี เลห ฮาว.

38 วาย อัน ตี อาเอลีซา วี ฮาว ดี มืง ฆีลัะฆา. แคง มืง ตี เฆ เอต ปี ดี โฮม. ดอ อัน ตี อึณ มึห พึง เฆ ดูอี อี บยาน โฆรห เฌาพรา อี กอย รึม โดบ อาเอลีซา. อัน บอ จัร ดีแบ อัน ต็อห, “ดึห กาโละ ตาง ตี, โกย, โบง โบม ณัะ อาดา ดูอี อี บยาน โฆรห เฌาพรา เฆ นี.”

39 อึณ มึห ดา อู วี, อัน บอ เลห ฮาว นา เรต, เหรต ดี เบต เดา แปร. อัน บอ ยึร เดา กาเปา แปร อู โมยว, อัน บอ โฆรบ ตัห. อัน ยี ตู นับ โมยว อัน, บอ ปอด ฮับ แคง กาโละ ตึอน. 40 เฆ บอ อ็อห, ต็อห ดี โฮม. ดอ โฮม เฆ ตี, เฆ บอ กาโพรม ดี ต็อห, “อึย ดูอี ปี ตึย เฌาพรา, แคง กาโละ นี แฮะ มึห เดา กาปู ยัม.” อาว ฮู ปึอน โฮม.

41 อัน วี ต็อห, “ดึห ตัห กาแปะ คามูน อี แจก.” เฆ บอ ดึห ตัห, อัน วี ฮับ แคง กาโละ ตึอน. อัน วี ต็อห, “อ็อห, แตห เฆ โฮม.” ดอ วี โฮม เฆ, อาว ฮู มึห มาเซ อี แบน กาปู แคง กาโละ ตึอน.

42 วาย อัน ตี อึณ วี มึห ดูอี อู วี, อัน ตัห มืง บาลัะซาลีซา. อัน โฆ็ง คามูน ซีโฆ็งรา อา ฆึร โบ็ง. อึณ มูห ปี ดึห เฆ เบล ดัง อัน โบง. เฆ บอ ดึห โหงว ปี โซะ เฆ ดี อาต, ดัว ดี อาเอลีซา. อาเอลีซา วี ต็อห, “แตห ดูอี เฆ ตี โฮม.”

43 ดีแบ อัน วี ต็อห, “แคะ นี, ดี โกบ เบลห ดูอี แบน มาย็อห โฮม?” อัน วี ต็อห, “ดึห, แตห ดูอี เฆ ตี โฮม. เฌาพรา แฮะ ต็อห, ‘เฆ ดี โฮม แพ, อึณ กอ ดี วี กาโลย.’”

44 แฮะ ฮอต, ดีแบ อัน บอ ดึห เบลห, แตห เฆ โฮม. เฆ บอ โฮม แพ ดอน อี. อึณ กอ วี กาโลย, บอ หมาน แคะ กาลาง เฌาพรา ตี.