1 อึณ บอ มึห ดูอี อู วี, อี จืร อาเนมาน. อัน มูห ดา โบว อี อึบ ดา ซึก คูนดีคัม อาราม. อัน มูห อี มึห อาพูง ดังโคว ตาง ปี ดัว ดา กาณา อัน. บอ ดอน อี โรวเซ อัน. โคว, เฌาพรา แฮะ จอย อัน แตห เฆ ดูอี มืง อาราม ตี แป โตต รันซู เฆ. อาเนมาน ตึอน แบน ดา ตาง อี มึห โปลม มึห แฮณ. มาแล, อัน มึห เซา ดูะ.

2 อู ซีแง, เฆ ดูอี อาราม บอ ฮาว กาโฆห ดี รันซู เฆ แบน พึง แบน พึง. เฆ บอ ปึอน ดี เหมต ตัห ฆอน อีบึณ อู วี อี มูห ดูอี อีซาเรลัะ. ฆอน อีบึณ ตี บอ กอย แบน หมาย อีบึณ อาเนมาน ตึอน. 3 อัน บอ ต็อห ดี ยา กาณา อัน, “เซ ดา กาณา โอว บอ ปึอน ดี ฮาว โดง กอย ดูอี บยาน โฆรห เฌาพรา แคง มืง ซามารี, ดูอี ตี นับ ดี แตห เซา ดูะ อัน หราย.”

4 ปัน ตี อาเนมาน บอ วี ฮาว กาลาง ดี ดา กาณา อัน ต็อห, “ฆอน อีบึณ อี มูห ดูอี อีซาเรลัะ, อัน แฮะ ต็อห ปาย นี ปาย นี ดี โอว.” 5 คูนดีคัม อี อึบ มืง อาราม วี ต็อห ดี อัน, “แตห แม ฮาว. โอว ดี แดม บอ แปะ, ตึย ดี คูนดีคัม อีซาเรลัะ ตี.” อัน บอ ฮาว, บอ ดึห ดี โฆ็ง รึอน ฆึร ทาเลน. บอ ครีว เดา แหรณ โบ็ง บอ ครึง ตา ฆึร ฌึม.^a 6 อัน บอ ตึย ฮาว แปะ ตึอน ดี คูนดีคัม อี อึบ ดูอี อีซาเรลัะ. แคง แปะ ตี แฮะ แดม ต็อห, “โอว แฮะ จัร แดเจณ โอว อี จืร อาเนมาน, แตห อัน โฆ็ง ตัห แปะ นี. หมาณ แม คูนดีคัม, แตห แม แตห เซา ดูะ อัน หราย.”

7 ปัน ตี คูนดีคัม อีซาเรลัะ แฮะ ฮอต ตีห แปะ ตี, อัน บอ กายาต ครึง อัน ต็อห, “ดูอี วี นี เหมา อึณปาย ปี จัร อัน แดเจณ อัน ตัห โดง กอย โอว? โอว บอ มูห เฌาพรา, อี นับ ดี แตห ดูอี อีม, ดูอี ยัม? อัน ต็อห, แตห โอว ปีแกน เซา ดูะ แดเจณ อัน. แตห เบ ยอด ปี โบง อัน นี. อัน เหรต ดี กาลูต ดี โอว.”

8 อาเอลีซา อี มูห ดูอี บยาน โฆรห เฌาพรา, อัน ยี ยึร ลอง คูนดีคัม แฮะ กายาต ครึง ตา อัน, อัน จัร อี ฮาว กาลาง ดี คูนดีคัม ต็อห, “โกบ มาเซ ปี ซอ กายาต แม คูนดีคัม ครึง ปี ตา แม? เซ ดูอี วี ตี บอ ตัห, แตห แม ตึย อัน ตัห โดง กอย โอว, แตห อัน นับ, อึณ มึห ดูอี บยาน โฆรห เฌาพรา กอย แคง มืง อีซาเรลัะ.” 9 ปัน ตี อาเนมาน บอ ป็อะ ลักเลา, ตัห ฌัม บาง มาโลห กาง อาเอลีซา ตึอน. 10 อาเอลีซา บอ จัร อี เฮา ฮาว ต็อห ดี อัน, “แตห แม ฮาว ตา อึม แคง แบลง ยอดาน อาดา บู จึบ. โดว แม ดี วี แกน. เซา ดูะ แม ดี หราย.”

11 ปัน ตี อาเนมาน บอ รู บอ เลห ฮาว ต็อห, “โอว ทาง, ดูอี บยาน โฆรห เฌาพรา ดี ตัห กอย กาตัด โอว, ซาคึร ดี เฌาพรา อี มูห เฌาพรา ปี กรึบ อัน, ดึห บอ แด อัน โซ็ง วีว โซ็ง เวณ กาโรย โดง มึห เซา ตี, แตห ดูะ โอว หราย. 12 อึม แบลง อาบานา เฆ อึม แบลง พัะพา แคง มืง ดามาคู ซี หมึอม หลึอม อึม แคง มืง อีซาเรลัะ นี ดอน โมยว. เซ โอว ตา อึม เฆ ตี, โอว ปี ดี ซีงา.” อัน แฮะ ฮอต ต็อห ปาย ตี อัน บอ ต็อห ดี วี วีว โกบ รู อัน.

13 แดเจณ อัน เฆ บอ วี กาโพรม ดี ต็อห ดี อัน, “อึย แม ดา กาณา, เซ ดูอี อี บยาน โฆรห เฌาพรา ดี บอ จัร แม โบง โมยว อี อาเร ตาง, แม ดี บอ โบง. โคว, ปี วี ต็อห อัน, ‘แตห แม ตา อึม, แตห แม แกน,’ แฮะ แว หมึอม โบง.” 14 เฆ แฮะ ฮอต ต็อห ปาย ตี ดี อัน, อัน บอ ลึบ โลง แคง อึม แบลง ยอดาน ตึอน. อัน บอ แตห โดว อัน อึณปรูด แคง อึม ตี อาดา บู เฌณ, แตห อึณ โดบ ปี ต็อห ดูอี บยาน โฆรห เฌาพรา ตึอน. แฮะ ฮอต, ฮูน อัน เฆ ยัง อัน บอ วี แกน, วี ปี ยัง ฆอน งัะ. เซา อัน บอ หราย อู เฌณ.

15 อัน แฮะ ฮอต โบง ปาย ตี บอ อัน บอ เฆ อี โดบ อัน, เฆ บอ วี ตัห โดง กอย ดูอี ปี ตึย เฌาพรา ตึอน. เฆ บอ วี ต็อห ดี อัน, “ดอ ตี นี, เย แฮะ นับ, แดง กาดาย นี, อาว มึห เฌาพรา ปอ อู กาดัง. เฌาพรา มึห มี แคง มืง อีซาเรลัะ นี. โกบ อึณ ปาย ตี เย หมาณ, แตห แม ดึห ลักซอง ปี ดัว เย นี.”

16 อัน วี ต็อห ดี เฆ, “โอว กาลาง โฆรห หมาน ดี เบ, โอว ตู ดึห มาเซ.” เฆ ซี แตห อาเอลีซา ดึห. อัน ยี ตู โลว, ตู ดึห มาเซ.

17 อาเนมาน ปี วี ต็อห, “เซ อึณ ปาย ตี โอว หมาณ ดี ดาง ฮาว กาดาย อาดา มาโลว อา โดว. โป็ง อาตึร นี ฮาว, โอว ดี กรึบ ดี หลู มี ดี เฌาพรา นี. โอว มืร อาว ฮู กรึบ เฌา ปี กรึบ อี เฮา. 18 แดง ตี, โอว หมาณ, แตห เฌาพรา ฆ็อห แวน หมาบ โอว, เซ ดา กาณา โอว บอ แดะ บอ บึง โอว ลึบ โดบ อัน แคง โฌง เฌา รีมโมน. เซ อัน ดี บอ ปา แด โอว, ฆึบ กรึบ, บอ โอว ดี บอ โลว ฆึบ กรึบ โดบ อัน, โอว หมาณ, แกวะ แตห อึณ แบน หมาบ ดี โอว.”

19 อาเอลีซา วี ต็อห, “แตห แม ฮาว ดาคึย.” อัน บอ ฮาว หณัม โต็ง, 20 อึณ มึห อาเกฮาฌี อี มูห แดเจณ อาเอลีซา. อัน วี เฌณฌา แคง น็อห อัน ต็อห, “ดา กาณา โอว ปี ตู คัม ดี ดึห โกรว ปี ดึห ตัห อาเนมาน อี มูห ดูอี อาราม นี, อึณ หมึอม หลัยะ กาเซา. โอว ดี กาแบลบ โดบ ดี ปัน อัน. โอว ดี ฮาว อาคัร หมาน, ดึห ตัห ดี อัน คอ อี แจก.”

21 อาเกฮาฌี บอ กาแบลบ ฮาว โดบ อาเนมาน. อัน บอ ยึร, อึณ มึห ดูอี อู วี กาแบลบ ตัห. อัน บอ โลง แดง ลักเลา อัน, บัร ดี ดีหมอด ต็อห, “เหมา อึณ ปาย ปี ตัห แม? แฮะ ดาคึย โตต ดอน โมยว?”

22 อาเกฮาฌี วี ต็อห, “อึร, แฮะ มูห, ดา กาณา โอว วี ต็อห, ‘ดอ ตี นี, แฮะ มึห กาโณม อา วี วี ตัห. ฆาย มูห ดูอี บยาน โฆรห เฌาพรา, ฆาย ตัห ดี นอน อาเอพารีม. แตห แม ดัว รึอน อู ทาเลน บอ ครึง อา ฌึม ดี ฆาย.’”

23 อาเนมาน วี ต็อห, “โอว ดี แตห อา ทาเลน.” อัน บอ จัร เฆ ดึห รึอน อา ทาเลน ฮับ แคง ฮู อา โบ็ง, บอ ครึง อา ฌึม ตึอน, แตห แดเจณ อัน ปัห ฮาว แยต นา อาต อาเกฮาฌี. 24 บอ ฌัม แดง นอน อู โปละ, อาเกฮาฌี บอ ดึห โกรว ตึอน ดี เฆ, แตห อัน เวณ เครียง แคง กาง อัน, บอ วี จัร เฆ วีว. 25 แฮะ ฮอต, อัน บอ วี ฮาว โดง กอย ดา กาณา อัน. อาเอลีซา บอ ดีหมอด อัน ต็อห, “อึย อาเกฮาฌี, นา เหมา แม ตัห?” อัน วี ต็อห, “โอว ตู มึห ดี ฮาว ดี เหมา.”

26 ปัน ตี อาเอลีซา วี ต็อห ดี อัน, “ดอ เลห โลง ดูอี วี ตึอน แดง ลักเลา อัน, วี บัร ดี รวห แม, แม ทาง น็อห พึอม โอว ตู นับ ปี แฮะ โบง แม? อาว กาอาบ แม ดึห รึอน เฆ ครีว, ครึง ตา, บอ กาปึม เฮ เบล, กาปึม มางูน, บอ มาบู เฆ มามัก, เฆ หมาย อี มูห อีบึณ อีมาย. 27 โกบ โบง แม ปาย ตี, เซา ดูะ อี ดึอม ดึก ดี อาเนมาน, อึณ ดี วี ดึก ดี แม บอ ดี ครึร แม เซเซ.” ปาย ตี อาเกฮาฌี บอ วี มึห เซา ดูะ. อึณ กอ ลูย แหนน เบรีย. อัน มืร อาว ฮู ปึอน ดี กอย โดบ ดา กาณา อัน.