1 อึณ มึห อู ซีแง, เฆ พึง ดูอี บยาน โฆรห เฌาพรา ต็อห ดี อาเอลีซา, “แม ซารา, แม ยอด โดง กอย เอ นี แฮะ กาเคียะ กาเซา. 2 แตห เย ฮาว ดึห เฮ อี กอย ดี แบลง อึม ยอดาน, อู วี อู ลูน, แตห เย โบง โดง ดี กอย ดี ตี.” อัน วี ต็อห ดี เฆ, “อึร, แตห เบ ฮาว.”

3 อึณ วี มึห อู วี, อัน วี ต็อห ดี อาเอลีซา, “แตห บอ แม ฮาว รึม โดบ เย.” แฮะ ฮอต, อาเอลีซา วี ต็อห, “อึร, บอ โอว ดี ฮาว รึม โดบ เบ.”

4 เฆ บอ ฮาว ฌัม โคบ แบลง ยอดาน ตี, เฆ บอ กาโพรม ดี ฆัร เฮ. 5 ดอ ฆัร เฆ เฮ ตี, อึณ มึห อู วี, มึย อัน บอ โจห แคง อึม. อัน บอ ดัด ต็อห, “อึย ดา ซารา, โอว แฮะ วาย ตัห โกรว ตี ดี อี เฮา.”

6 ดูอี ปี ตึย เฌาพรา วี ดีหมอด อัน ต็อห, “อึณ โจห ดี เหมา?” ดูอี วี ตึอน บอ แหน ดี อัน โดง โจห. อัน วี แดบ เฮ อู ปอด, วี บยัว โลง ดี ตี. บลา มึย ตี บอ นับ ดี วี บรึย โฮะ. 7 อัน วี ต็อห, “ดึห เลห.” ดูอี วี ตึอน บอ ดึห เลห มึย ตี.

8 วาย ตี, อึณ มึห คูนดีคัม อี อึบ มืง อาราม, อัน แฮะ ตัห กาโฆห ดี มืง อีซาเรลัะ. อัน บอ ซังคยาง ดี ดา ซึก อัน ต็อห, “แตห เอ คยัะ ดี นี, ดี นี.”

9 ดูอี ปี ตึย เฌาพรา บอ จัร อู วี ฮาว ดี คูนดีคัม ดูอี อีซาเรลัะ ต็อห, “แตห เบ ซาดีก, เบ ฮี ฮาว นา นี นา นี, ดูอี อาราม แฮะ ตัห กอย ดี ตี.” 10 ปัน ตี คูนดีคัม อีซาเรลัะ วี จัร เฆ ฮาว โดง ต็อห ดูอี ปี ตึย เฌาพรา ตึอน อู เฌณ, แตห เฆ คยอง ดี ยอด. แบน เฌณ แบน เฌณ อาเอลีซา วี กาลาง โดง ดี ว็อะ เฆ, แตห คูนดีคัม ซาดีก ดอ ฮาว ดูอี อัน โดง กอย เฆ ตี.

11 แฮะ ฮอต ปาย ตี คูนดีคัม อาราม ตึอน บอ รู กาเซา. อัน บอ ดีหมอด ดา ซึก อัน ต็อห, “เหมา อึณ ปาย ปี ตู กาลาง เบ ดี โอว? กาแต เอ นี อี เหมา อี แบน น็อห คูนดีคัม ดูอี อีซาเรลัะ ตี?”

12 อัน แฮะ ฮอต ต็อห ปาย ตี แดเจณ อัน อู วี วี ต็อห, “อึย แม คูนดีคัม, อาว มูห ปาย ตี. ดูอี อี บยาน โฆรห เฌาพรา อี จืร อาเอลีซา อี กอย แคง มืง อีซาเรลัะ ตึอน, อัน ยึร โฆรห ปี กาลาง แม โดง อีด แม. อัน วี กาลาง ดี คูนดีคัม อีซาเรลัะ.”

13 คูนดีคัม วี ต็อห, “โลว ฮาว ยอด โดง กอย อัน, แตห เอ ปึอน ดี ปัก ตัห อัน.” อี เฮา วี ต็อห ดี อัน, “อัน กอย แคง มืง โดวทาน.” 14 อัน บอ จัร ดา ซึก อัน บอ ดา โบว อัน, แตห เฆ ป็อะ ลักเลา, ฮาว ดี มืง ตี. เฆ บอ ตัห โรบ มืง ตี แคง หมึร.

15 บอ ฌัม ปา แคหณา ซีณวัห แดเจณ ดูอี ปี ตึย เฌาพรา บอ ยีต, เลห นา เรต. อัน บอ ยึร ดา ซึก เฆ ตึอน แฮะ ป็อะ มังปร็อง, ป็อะ ลักเลา, ตัห โรบ มืง ตี, อัน บอ วี เวณ กาลาง ดี ดา ซารา อัน ต็อห, “อาลึร, ดา ซารา อึย, เหมา เอ ดี ปาย ดอ ตี นี?”

16 ดูอี ปี ตึย เฌาพรา วี ต็อห, “อาว โลว โยว. เฆ อี กอย รึม โดบ เอ, อึณ ซี กืน หลึอม เฆ.”

17 อาเอลีซา บอ ซาคึร ดี เฌาพรา ต็อห, “อึย แม เฌาพรา, หมาณ แตห แดเจณ โอว นี ปึอน ดี ยึร.” เฌาพรา บอ โบง แตห แดเจณ อัน ยึร. อัน บอ ยอด, อึณ มึห มังปร็อง เฆ ลักเลา อี ปี เงา, แฮะ กอย โรบ เฆ, กอ โนะ แดง นอน ดอน โปละ. 18 ปาย ตี ดูอี อาราม เฆ บอ โลง โดง กอย อาเอลีซา. อาเอลีซา บอ ซาคึร ดี เฌาพรา ต็อห, “หมาณ, แตห แม แตห งาย เฆ อับ.” เฌาพรา บอ แตห งาย เฆ อับ ดอน อี. อึณ บอ แบน แคะ ปี ซาคึร อาเอลีซา.

19 อัน บอ กาลาง ดี เฆ ต็อห, “อาว มูห อึณเตณ นี, อาว มูห มืง นี. ตัห โดบ โอว, โอว ดี ฮาว ตึย เบ ดี ดูอี ปี เหรต เบ ตี.” ปัน ตี อัน บอ โย็ง ฮาว เฆ ดี มืง ซามารี.

20 เฆ แฮะ ฮอต ลึบ แคง มืง ซามารี, อาเอลีซา บอ วี ซาคึร ดี เฌาพรา ต็อห, “อึย แม เฌาพรา, โอว หมาณ, แตห งาย เฆ วี ยึร.” เฌาพรา บอ โบง แตห งาย เฆ วี ยึร อู เฌณ. ปัน ตี เฆ บอ วี นับ, เฆ แฮะ ฮอต กอย แคง มืง ซามารี.

21 วาย ตี, คูนดีคัม อีซาเรลัะ บอ ยึร เฆ บอ วี ดีหมอด อาเอลีซา ต็อห, “อึย ฆูณ, เอ ดี ปาย เหมา? เอ ดี ง็อห ยัม เฆ?”

22 อาเอลีซา วี ต็อห, “อาว โลว ง็อห แตห เฆ ยัม. แม มืร ตู ง็อห ดูอี แปะ แฮะ เหมต แม ตา มาปัวะ ลาง เฆ อัะ แม. ดึห อึม เฆ คามูน, แตห เฆ โฮม. เฆ ฮี ฮอต โฮม, วี ตึย แตห เฆ วีว โดง กอย ดา กาณา เฆ.” 23 อัน บอ แรน กืน ปี ดี โฮม, อึณ กอ ดาน บลอย. เฆ แฮะ ฮอต โฮม, อัน บอ ตึย เฆ, แตห เฆ เวณ โดง กอย ดา กาณา เฆ. ปัน ตี ดูอี มืง อาราม, เฆ อาว ฮู ตัห กาโฆห ดี ดูอี อีซาเรลัะ ปอ อู เฌณ.

24 วาย อัน ตี คูนดีคัม อาเบนฮาดาด อี อึบ มืง อาราม, อัน บอ แดะ กาฌูะ ดา โบว อัน เฆ ดา ซึก อัน, ต็อห แตห เฆ ฮาว โรบ มืง ซามารี. 25 แคง มืง ซามารี ตี, ปี ดี โฮม ปี ดี ฮาบ, อึณ ง็อห กาเซา โกบ กอย โรบ เหลณ เฆ มืง ตี. เฆ กาดูห ดี จึห ฆีณ มาโลว อู โบ็ง อาดา รึอน ดา ฆึร โบ็ง. บอ โหงว อี จืร เอียง มาโบลย เฆ บอ โลว จึห อู แบล อาดา รึอน พัน โบ็ง. 26 ดอ ฮาว คูนดีคัม อีซาเรลัะ แดง แรง มืง ตึอน, อึณ มึห อีบึณ อู วี แดะ อัน ต็อห, “อึย แม คูนดีคัม อี อึบ โอว, หมาณ, แตห แม จอย.”

27 อัน วี ต็อห, “เซ เฌาพรา ตู จอย, เหมา โอว ดี ปาย ดี จอย? อาว ปึอน ดึห ดี โอ็ง กางน็อห เฆ โดง กรีด เบล มางูน.” 28 คูนดีคัม ปี วี ต็อห ดี อัน, “มาเซ ปี โลว แม?” อัน วี ต็อห, “นี, อีบึณ วี นี, อัน แฮะ ต็อห, ‘อาตึร, แตห อาย โฮม ฆอน แม, แคหณา อาย บอ วี โฮม ฆอน โอว.’ 29 ปาย ตี ยาย แฮะ ก็อง ฆอน โอว แตห ยาย โฮม. บอ ฌัม ปา แคหณา, โอว วี ต็อห ดี อัน, ‘ดึห ตัห ฆอน แม, แตห อาย โฮม.’ อัน บอ วี ฮาว เครียง ฆอน อัน.”

30 คูนดีคัม บอ ยึร โฆรห ปี กาลาง อีบึณ ตี, อัน บอ กายาต ครึง ตา อัน. อัน ปี วี ฮาว แดง แรง มืง ตึอน, เฆ ดูอี เฮา บอ วี ยึร, อัน แฮะ ชึบ ดี ตา ครึง จาน นา แคง. 31 อัน วี ต็อห, “แตห เฌาพรา ดัว ดูก กาเซา ดี โอว, เซ โอว ตู ปึอน ดี ง็อห อาเอลีซา อี มูห ฆอน อาซาพาด อาตึร นี.”

32 ดอ อัน ตี อาเอลีซา บอ เฆ อี มูห ดา ตาง กอย รึม แคง กาง อัน. คูนดีคัม วี จัร ดูอี อู วี ฮาว โดง กอย เฆ. อาเอลีซา วี ต็อห ดี เฆ อี กอย โดบ อัน, “เบ ยึร, ดา อี ง็อห ดูอี แฮะ จัร หมาย อัน ตัห แดบ ฆีณ โอว. เซ หมาย อัน ตี ฮี ตัห ฌัม, แตห เบ กาบีด มาโลห, แกวะ แตห อัน ปึอน ดี ลึบ. ดา กาณา อัน ดี วี โดบ ตัห นา ปัน.”

33 ดอ กาลาง อาเอลีซา โฆรห ตี, ดูอี ปี จัร คูนดีคัม ตึอน บอ ตัห. คูนดีคัม มืร บอ ตัห ต็อห, “ดูก นี, เฌาพรา แฮะ โบง. โอว อาว ฮู โลว บัร เฌาพรา.”