คาน 7
ปัน ตี อาเอลีซา บอ วี ต็อห ดี คูนดีคัม, “แตห แม โทม โฆรห เฌาพรา. เฌาพรา แฮะ ต็อห, แคหณา อาคราว นี, ดี มาโลห มืง ซามารี เฆ ดี ย็อง คามูน เคาคยูง พวน แบล อาดา รึอน อู โบ็ง, ซีโฆ็งรา อู คอน อาดา รึอน อู โบ็ง.”
2 อึณ ยี มูห อามาด ปี บึง คูนดีคัม, อัน วี เวียะ โฆรห อาเอลีซา ต็อห, “เซ เฌาพรา ปี บอ วึห ฆางหราว มืร, อาว นับ ดี แบน ปาย ตี.” อาเอลีซา วี ต็อห, “บัร แม ยอด, แม ดี ยึร ดี งาย แม. มาแล, แม ตู ปึอน ดี โฮม.”
ลอง เฆ วี มึห ปี ดี โฮม กืน
3 ดี บาง มาโลห มืง ตี, อึณ ยี มึห ดูอี ดูะ พวน วี. เฆ ลาย กามวน ต็อห, “อาว โคว กอย เอ ดี นี, แตห เอ กอ ยัม. 4 เซ เอ ต็อห ดี ลึบ ฮาว แคง มืง, เอ ดี บอ ฮาว ยัม แคง มืง ตี โกบ เอต ปี ดี โฮม. เซ เอ กอย ดี นี มืร, เอ ตู ลอด ยัม. เซ อึณ ปาย ตี ฮาว, แตห เอ ฮาว นา กอย ดา ซึก อาราม เฆ. เซ เฆ ตู ง็อห เอ, เอ ดี ลอด ยัม. เซ เฆ ดี บอ ง็อห ยัม เอ, เอ โลว คัม ดี ยัม.”
5 บา ดี อับ ตี เฆ บอ ฮาว โดง กอย ดา ซึก อาราม เฆ ตึอน. แฮะ ฮอต, เฆ บอ ตัห ฌัม ดี โคบ โดง กอย ดับ ตึอน, เฆ ยี ตู ยึร ดูอี คอ อู วี. 6 โคว, เฌาพรา แฮะ โบง แตห ดูอี อาราม ยึร โฆรห ยึร ฆรัณ ดา ซึก, แฮะ แหนน ดี กืน กาเซา อี ป็อะ ลักเลา เฆ มังปร็อง ตัห. แฮะ ฮอต, เฆ บอ ลาย กามวน ต็อห, “คูนดีคัม อีซาเรลัะ แฮะ ฌาง คูนดีคัม เฮทีด บอ คูนดีคัม แอฆึบ, แตห เฆ ตัห กาโฆห ดี เอ.” 7 โคว อัน ตี, เฆ บอ เตา บา ดี อับ ตี. เฆ มืร แวน ทึบ เฆ, มังปร็อง บอ มาโลว เฆ. โดง คยัะ เฆ บอ โกรวกราม เฆ ดอน โมยว, เฆ แฮะ แวน โตต. นับ มี โดว เฆ, แตห เฆ ลอด.
8 ดูอี ดูะ เฆ ตึอน บอ ตัห ฌัม โดง คยัะ เฆ ตี, เฆ บอ ลึบ แคง ทึบ อู ทึบ, บอ โฮม ปี ดี โฮม. เฆ บอ ดึห ครึง ตา บอ รึอน เฆ ครีว, วี ฮาว เครียง ปอ โปละ. เฆ ปี วี ตัห ลึบ ปอ อู ทึบ, ปี วี ดึห โกรวกราม แคง ทึบ ตี, วี ฮาว เครียง.
9 แฮะ ฮอต, เฆ วี ลาย กามวน ต็อห, “โอ, ปี โบง เอ นี, อาว แหนน ดี มูห. อาตึร นี, อึณ มูห ซีแง โลว กาลาง ลอง นา บอด. เซ เอ ตู กาลาง, เซ เอ กอย ฮี ฌัม แปร วัห, เอ ดี บอ ฌัม ดูก. โคว, แตห เอ ฮาว กาลาง ดี ดูอี แคง โฮว คูนดีคัม.”
10 เฆ บอ ฮาว แดะ ดูอี บัร มาโลห มืง ต็อห, “เย แฮะ ฮอต ตัห ยอด โดง คยัะ ดูอี อาราม. เย ตู ยึร อาเซ. อาว มึห โฆรห ฆรัณ ดูอี คอ อู วี. อึณ มึห มี มาโลว เฆ มังปร็อง เฆ. ทึบ เฆ ยี ซี กอย ปี บรีม.” 11 ปัน ตี ดูอี อี บัร มาโลห บอ กาลาง ดี เฆ อี กอย แคง มืง แคง โฮว ตึอน.
12 คูนดีคัม บอ ยีต ซีณ ซีณวัห ว็อง, กาลาง ดี อามู อามาด อัน ต็อห, “โอว ดี กาลาง ลอง ปี ดี โบง ดูอี อาราม เฆ ดี เอ. โกบ แฮะ นับ เฆ, เอ แฮะ เอต ปี ดี โฮม, เฆ ฮาว เครียง โดว เฆ แคง แปร อี กอย นา เรต โดง คยัะ เฆ. เฆ กาพา ต็อห, ‘เซ ดูอี อีซาเรลัะ ฮี เลห นา เรต มืง, เอ วี เหมต โดว อีม เฆ, ฮาว ลึบ แคง มืง เฆ.’”
13 อามู อามาด อัน อู วี วี ต็อห, “ฮาว แตห เอ ตึย ดูอี พัน วี ดึห ป็อะ มังปร็อง อี ซี กอย แคง มืง นี, แตห เฆ ฮาว ยอด. เอ ปี บอ กอย ดี นี, เอ ดี ยัม. โคว, อาว ลืก, เซ เอ ฮาว เทว ดี ยอด.”
14 แฮะ ฮอต, คูนดีคัม บอ จัร เฆ แรน ลักเลา อา หลาง บอ อึณปร็อง อา โดว. อัน บอ ต็อห ดี เฆ อี ป็อะ ลักเลา ตี, “แตห เบ ฮาว ยอด.” 15 เฆ บอ ฮาว โดบ อึณเตณ ปี เตา ดูอี อาราม, กอ ฌัม ดี แบลง ยอดาน. ดอน โปละ เฆ บอ ยึร โกรวกราม เฆ ครึง ตา ดูอี อาราม แปะ แฮะ แวน เฆ โดบ อึณเตณ ตี โกบ แฮะ กาแหม เฆ ดี เตา. แฮะ ฮอต เฆ บอ วี เวณ กาลาง ดี คูนดีคัม. 16 ปัน ตี ดูอี แคง มืง ตึอน บอ วี ฮาว ดึห โกรวกราม ดูอี อาราม เฆ ตี. เฆ บอ ย็อง กาแปะ เคาคยูง พวน แบล อาดา รึอน อู โบ็ง, ดีฆาว ซีโฆ็งรา อู คอน อาดา รึอน อู โบ็ง. อึณ บอ แบน แคะ ปี ต็อห ดูอี ปี ตึย เฌาพรา ตึอน. 17 คูนดีคัม แฮะ จัร อามาด อัน วี ปี บึง อัน ตึอน, แตห อัน แบน ดา อี บัร มาโลห มืง. ดูอี บอ แณต ฮาว แดง อัน, แตห อัน กอ ยัม บาง มาโลห มืง ตี. ปาย ตี อึณ บอ แบน แคะ ปี ดึอม ต็อห ดูอี ปี ตึย เฌาพรา ดอ ตัห คูนดีคัม โดง กอย อัน ตึอน. 18 อึณ บอ แบน แคะ ปี กาลาง ดูอี ปี ตึย เฌาพรา ดี คูนดีคัม ตึอน, ดอ ต็อห อัน, “แคหณา อาคราว นี, ดี บาง มาโลห มืง ซามารี, เฆ ดี ย็อง คามูน เคาคยูง พวน แบล อาดา รึอน อู โบ็ง, บอ ซีโฆ็งรา อู คอน อาดา รึอน อู โบ็ง.”