1 วาย อัน ตี อึณ มูห อีบึณ ตึอน, วี แปะ แฮะ ดึอม ปีอีม อาเอลีซา ฆอน อัน. อาเอลีซา วี ต็อห ดี อัน, “บอ แม, บอ อึณโฮม แม, แตห เบ ฮาว กอย ปอ โปละ. โคว, เฌาพรา แฮะ ต็อห, แคง มืง นี อึณ ดี มึห อาคราว ดี เอต ปี ดี โฮม อาดา บู ซีนัม.” 2 อัน บอ โทม โฆรห ดูอี ปี ตึย เฌาพรา ตึอน. บอ อัน บอ ดูอี แคง อึณโฮม อัน, เฆ ฮาว กอย แคง มืง พีลีที อาดา บู ซีนัม.

3 แฮะ ฮอต ปวน บู ซีนัม ตึอน, อัน บอ วี เลห แคง มืง พีลีที, วี ตัห หมาณ กาง อัน เฆ มาน อัน ดี คูนดีคัม. 4 คูนดีคัม แฮะ กอย กามวน ดี อาเกฮาฌี อี มูห ดีแบ ดูอี ปี ตึย เฌาพรา. อัน แฮะ ต็อห, “แตห แม กาลาง ดี โอว ลอง อี หมึอม อาม แปะ แฮะ โบง อาเอลีซา.”

5 ดอ กาลาง อาเกฮาฌี ดี คูนดีคัม ลอง แปะ แฮะ โบง อาเอลีซา แตห ฆอน อี แฮะ ยัม วี ยีต วี อีม, อึณ มูห มา ฆอน วี ตี, อัน บอ ตัห, หมาณ กาง เฆ มาน อัน ดี คูนดีคัม. อาเกฮาฌี วี ต็อห ดี คูนดีคัม, “อีบึณ วี นี, อัน มูห มา ฆอน ตี. อึณ มูห ฆอน อีมาย อัน, ปี โบง อาเอลีซา แตห อัน วี ยีต วี อีม.” 6 คูนดีคัม บอ ดีหมอด อีบึณ ลอง อัน ตี. อีบึณ ตึอน บอ กาลาง ดี อัน. คูนดีคัม บอ วี จัร แดเจณ อัน อู วี ต็อห, “ดึห โตต โกรวกราม อัน, บอ อี เลห ตัห แคง มาน อัน ซีณ ดอ ฮาว อัน กอ ฌัม อาตึร นี, วี ดัว วีว โตต ดี อัน ดอน โมยว.”

7 วาย อัน ตี อาเอลีซา บอ ฮาว ดี มืง ดามาคู. ดอ อัน ตี อาเบนฮาดาด อี มูห คูนดีคัม แคง มืง อาราม แฮะ มึห เซา. อี เฮา บอ ต็อห ดี คูนดีคัม, “ดูอี ปี ตึย เฌาพรา แฮะ ตัห ฌัม ดี นี.”

8 คูนดีคัม วี ต็อห ดี อาฮาเจลัะ, “ดึห แม โฆ็ง ลักซอง ฮาว, บัร ดี รวห ดูอี ปี ตึย เฌาพรา ดอ ฮาว อัน โดบ อึณเตณ, ดีหมอด อัน ลอง เซา โอว นี, โยว อึณ ดี นับ ดี แกน.”

9 อาฮาเจลัะ บอ โฆ็ง ลักซอง อี มูห โกรว บอด แบน โมยว แบน โมยว แคง มืง ดามาคู. อัน บอ ดาง มังปร็อง กาฮาต อาดา พวน ฆึร โดว, บอ ฮาว บัร ดี รวห อาเอลีซา. ดูอี ปี ตึย เฌาพรา บอ ตัห ฌัม, อัน บอ ต็อห, “ฆอน แม ซารา อี มูห คูนดีคัม อี อึบ มืง อาราม, อี จืร อาเบนฮาดาด, อัน แฮะ จัร โอว ตัห. อัน ดีหมอด แม ต็อห, ‘เซา โอว นี, อึณ ดี นับ ดี แกน?’”

10 อาเอลีซา วี ต็อห, “แม วี เวณ กาลาง ดี คูนดีคัม ต็อห, ‘เซา แม ตี, อึณ ดี แกน.’ มาแล, เฌาพรา ปี วี บยัะ ดี โอว ลอง ดี ยัม อัน.” 11 ดูอี ปี ตึย เฌาพรา บอ วี ยอด ต็อง ดูอี ตึอน, แตห อัน กอ ซาย. แฮะ ฮอต, ดูอี ปี ตึย เฌาพรา บอ วี ยาม.

12 อาฮาเจลัะ วี ต็อห, “เหมา อึณ ปาย ปี ยาม แม ซารา?” อัน วี ต็อห, “โคว, โอว แฮะ นับ แม ดี โบง นา ตู หมึอม ดี เฆ ดูอี อีซาเรลัะ. แม ดี ดึห เงา โดะ มืง เฆ อี มึห แรง. แม ดี ง็อห ยัม ดูอี หนึม เฆ. แม ดี ดึห ฆอน เฆ ซัต ดี กาดาย. แม ดี เปรห บอ วัต อีบึณ อี แฮะ มึห ฆอน แคง วัต. โอว ยาม โกบ ปาย ตี.”

13 อาฮาเจลัะ วี ต็อห, “โอว แดเจณ แม ซารา นี, โอว ปี มาโซว. เหมา โอว ดี ปาย ดี โบง อี หณาบ แคะ ตี?” อาเอลีซา วี ต็อห, “เฌาพรา แฮะ ฮอต บยัะ ดี โอว ลอง แม ดี แบน คูนดีคัม อี อึบ มืง อาราม.”

14 แฮะ ฮอต อาฮาเจลัะ บอ วี วีว ฌัม โดง กอย ดา กาณา อัน. คูนดีคัม บอ ดีหมอด อัน ต็อห, “อาเอลีซา ต็อห มาเซ ดี แม?” อัน วี ต็อห, “อัน แฮะ ต็อห ดี โอว, เซา แม ดา กาณา, อึณ ดี แกน อาคัร หมาน.” 15 บอ ฌัม ปา แคหณา อัน วี ดึห ฮึบ จึบ แคง อึม, กาบีด นา คูนดีคัม, แตห อัน กอ ยัม. อาฮาเจลัะ ตึอน บอ วี แบน คูนดีคัม, วี ปลูะ อาเบนฮาดัด.

16 อาโยวรัม อี มูห ฆอน คูนดีคัม อาฮับ ตึอน แฮะ แบน คูนดีคัม อี อึบ ดูอี อีซาเรลัะ อาดา พัน ซีนัม, อาเยโฮวรัม วี จูห ดี อึบ มืง ยูดา. ดอ อัน ตี บอ ฆูณ อัน อี มูห อายอซาพาด ซี กอย แคง มืง ยูดา. 17 ดอ แบน อัน คูนดีคัม, อาซาก อัน แฮะ โนะ โอย ฆึร ดี อา ซีนัม. อัน บอ วี อึบ มืง, กอย แคง มืง เยรูซาแลม อาดา ดา ซีนัม. 18 อัน โบง โดบ ปี ปาย คูนดีคัม อีซาเรลัะ. โคว, อัน คัด ดึห ฆอน อีบึณ คูนดีคัม อาฮับ. อัน โบง นา ตู หมึอม ปี ตู อึง เฌาพรา อี ปี ปี โบง ดูอี อาฮับ ตึอน.

19 เฌาพรา ยี โหลห อาดาวีด. โคว, อัน ตู ซี โบง แตห มืง ยูดา ลึร. อัน แฮะ ดึอม ดัว กาดีก ซัดฌา ดี อาดาวีด, ต็อห ดี แตห อึณ มึห หลูกหลาน อัน อี อึบ มืง ยูดา เซเซ.

20 ดอ มูห โจว อาเยโฮวรัม ตี, ดูอี แคง มืง เอโดม อาว ฮู โดบ คูนดีคัม อี อึบ มืง ยูดา. เฆ บอ วี โจะ ดูอี เฆ อู วี, แตห อัน แบน คูนดีคัม เฆ.

21 อาเยโฮวรัม ตึอน บอ แดะ แคะ กอย ดา ซึก เฆ ดา โบว อัน, แตห เฆ ป็อะ ลักเลา ฮาว ดี มืง จาอีรัะ, แตห เฆ ปึอน ดี กาโฆห ดี ดูอี มืง เอโดม ตึอน. เฆ ดา โบว อี ป็อะ ลักเลา ตึอน บอ กาโฆห ดี ดูอี เอโดม อี กอย โรบ เฆ ตึอน. เฆ ดูอี เอโดม บอ กาดูห ดี เตา โดง กอย บรีม เฆ. 22 กอ ฌัม อาตึร นี ดูอี มืง เอโดม อาว ฮู โดบ คูนดีคัม อี อึบ มืง ยูดา. ดอ อัน ตี บอ มืง ลีปานา อาว ฮู โดบ คูนดีคัม อี อึบ มืง ยูดา.

23 ลอง แปะ แฮะ โบง อาเยโฮวรัม อี หณัม ดึอม กาลาง, อึณ แฮะ แดม อูน แคง บับ คูนดีคัม ยูดา. 24 อาเยโฮวรัม ตี, อัน บอ ยัม ปี ดา ดา อัน. เฆ บอ ดีบ อัน แคง มืง อาดาวีด. ฆอน อีมาย อัน อี จืร อาฮาฌียา บอ วี ปลูะ อัน, แบน คูนดีคัม.

25 คูนดีคัม อาโยวรัม อี มูห ฆอน คูนดีคัม อาฮับ อี อึบ ดูอี อีซาเรลัะ, อัน แฮะ อึบ บึง มืง อาดา ฆึร ดี อา ซีนัม. ดอ อัน ตี อาฮาฌียา อี มูห ฆอน คูนดีคัม อาเยโฮวรัม, อัน บอ วี แบน คูนดีคัม, วี อึบ มืง ยูดา.

26 ดอ แบน อาฮาฌียา คูนดีคัม, อาซาก อัน แฮะ ปึอน อา ฆึร ดี อา ซีนัม. อัน บอ อึบ บึง มืง ยูดา, กอย แคง มืง เยรูซาแลม อาดา อู ซีนัม. มา อัน จืร นาง เอทาลี. อัน มูห หลาน อาโอวมารี อี มูห คูนดีคัม ดูอี อีซาเรลัะ ตึอน. 27 โกบ มูห อัน เอียะ คูนดีคัม อาฮับ, อัน มืร โบง นา ตู หมึอม, โบง ปี ตู อึง เฌาพรา, แตห อึณ ปี ปี ดึอม โบง ครึร อาฮับ ตึอน.

28 อัน บอ โดบ อาโยวรัม อี มูห ฆอน อาฮับ ตึอน, แตห ดา ซึก ฆาย ฮาว กาโฆห ดี มืง ราโมดฆีเลอาด อี มูห โดง อึบ คูนดีคัม อาฮาเจลัะ อี อึบ มืง อาราม ตึอน. อาโยวรัม บอ กาดูห เซา ดอ กาโฆห เฆ ดี ดูอี อาราม ตี. 29 คูนดีคัม อาโยวรัม ตี, อัน บอ วี เวณ ดี มืง เยจาเรลัะ, แตห อัน ปึอน ดี ซีนัม ดีม อัน, แตห อึณ แกน. อึณ มูห ดีม แปะ แฮะ ตา ดึร เฆ ดูอี อาราม ดี อัน ดอ กาโฆห เฆ ดี คูนดีคัม อาฮาเจลัะ อี อึบ มืง อาราม ดอ กอย เฆ ดี มืง ราโมดฆีเลอาด ตึอน. ดอ มึห อัน เซา ตี, อาฮาฌียา อี มูห ฆอน อาเยโฮวรัม อี อึบ ดูอี อายูดา, อัน บอ ตัห จัร, ตัห ยอด อาโยวรัม ดี มืง เยจาเรลัะ ตี.