1 วาย ตี อาเอลีซา อี มูห ดูอี บยาน โฆรห เฌาพรา ตึอน อัน บอ วี แดะ อู วี แคง พึง ดูอี บยาน โฆรห เฌาพรา บอ ต็อห ดี อัน, “แตห แม ดึห ฮู แม, ดึห กาเปา นามัน, ฮาว ดี มืง ราโมดฆีเลอาด. 2 แม ฮี ฌัม แคง มืง ตี, แม เหรต อาเยฮู อี มูห ฆอน อายอซาพาด, อี มูห บอ หลาน อานีมซี. แตห แม แดะ อาเยฮู เลห ตัะ พึง ฆึก อัน. แตห แม แดะ อัน ลึบ แคง กาง, ลึบ แคง โฮง อี กอย นา แคง. 3 แม บอ ดึห นามัน นี, พ็อห ดี ฆีณ อัน, ต็อห ดี อัน, “เฌาพรา ต็อห ดี แม, ‘โอว ดี พ็อห นามัน ดี ฆีณ แม, แตห แม แบน คูนดีคัม อี อึบ ดูอี อีซาเรลัะ.’ แฮะ ฮอต แตห แม วี วึห มาโลห, เลห เตา อู เฌณ. แกวะ บัร เหลณ.”

4 ดูอี แปะ แฮะ ร็อห อาเอลีซา, อี มูห ดูอี อี บยาน โฆรห เฌาพรา, อัน ยี ซี มูห กาโณม. อัน บอ ฮาว ดี มืง ราโมดฆีเลอาด ตี. 5 อัน บอ ตัห ฌัม แคง มืง, อัน บอ ยึร, ดา โบว เฆ แฮะ ตูต ลาย กามวน, อัน บอ ต็อห ดี เฆ, “อึย เบ ดา โบว, โอว มึห ปี ซี กาลาง ดี เบ.” อาเยฮู วี ต็อห, “อี เหมา แม ซี กาลาง?” อัน วี ต็อห, “โอว ดี กาลาง ดี แม, อี มูห ดา โบว ตาง.”

6 ปาย ตี อาเยฮู บอ วี ลึบ แคง กาง. ดูอี บยาน โฆรห เฌาพรา ตึอน บอ ดึห นามัน, พ็อห ดี ฆีณ อัน, บอ ต็อห ดี อัน, “เฌาพรา อี มูห เฌาพรา ปี กรึบ ดูอี อีซาเรลัะ, อัน ต็อห, ‘โอว ดี พ็อห นามัน ดี ฆีณ แม, แตห แม แบน คูนดีคัม ดูอี ปี อึบ เฌาพรา อี มูห ดูอี อีซาเรลัะ. 7 แม โลว ง็อห แวน ดูอี อาโมยว อาฮับ อี มูห ดา กาณา แม. ปาย ตี โอว ดี ดัม หมาบ ดี นาง เยจาเบน โกบ แฮะ ง็อห แวน อัน ดูอี บยาน โฆรห เฌาพรา บอ โกบ แฮะ ง็อห ยัม อัน แดเจณ เฌาพรา บอกาเฆลียด. 8 แคะ กอย อีมาย อาโมยว อาฮับ บอกาเฆลียด, โอว ดี แตห เฆ ชึม. อึณ บอ มูห หมาย อี, บอ อี ตู ดึอม แบน หมาย อี, อาว ลืก. โอว ดี ง็อห แวน โตต ดอน อี.

9 โอว ดี แตห หลูกหลาน อาฮับ ปี หลูกหลาน อาเยโรวโบว อี มูห ฆอน อาเนบัด, แตห อึณ ปี บอ หลูกหลาน อาบาซา อี มูห ฆอน อาฮียา ตึอน. 10 อึณ ยี มูห นาง เยจาเบน, มาโซว ดี โฮม ยัง อัน แคง มืง เยจาเรลัะ. อาว มึห อาเซ อี คัม ดี ฮาว ดีบ อัน.’” อัน แฮะ ฮอต กาลาง ปาย ตี อัน บอ วึห มาโลห เลห เตา อู เฌณ.

11 อาเยฮู บอ วี ตัห โดง กอย ดูอี อัน, เฆ มัง อี บอ ดีหมอด อัน ต็อห, “มาเซ ปี โลว ดูอี ตึอน ดี แม? อัน ปี ดูอี ยอง. แฮะ มูห นา บอด นา หมึอม, ปี โลว อัน?” อัน วี ต็อห ดี เฆ, “เบ นับ ลอง ดูอี ตึอน. เบ บอ นับ, อัน นับ ดี กาลาง โมยว เหมา.”

12 เฆ วี ต็อห, “ฮี, โฆรห แม ตู หมาน. แตห แม กาลาง ซืร ดี เย, แตห เย นับ.” อัน วี ต็อห, ดูอี ตึอน แฮะ ต็อห ดี โอว, “เฌาพรา แฮะ ต็อห, ‘โอว ดี พ็อห นามัน ดี ฆีณ แม, แตห แม แบน คูนดีคัม ดูอี อีซาเรลัะ.’”

13 แฮะ ฮอต กาลาง โฆรห ตี, เฆ บอ วี ปีครัน เฆ ดี ดึห ครึง ตา เฆ, ดัะ ดี อึณแตง แตห อัน ฮาว นา แดง. เฆ บอ บูด นึง แป บอ ดัด ต็อห, “อาเยฮู แฮะ แบน คูนดีคัม.”

14 วาย ตี, อาเยฮู อี มูห ฆอน อายอซาพาด, อี บอ มูห หลาน อานีมซี ตึอน, อัน บอ วี ต็อห ดี กาโฆห ดี อาโยวรัม. ดอ อัน ตี อาโยวรัม บอ เฆ ดูอี อีซาเรลัะ, เฆ กอย ดี มืง ราโมดฆีเลอาด. เฆ กอย บัร อาฮาเจลัะ อี มูห คูนดีคัม อี อึบ มืง อาราม ตึอน, แกวะ แตห อัน ปยาต มืง เฆ. 15 มาแล, อี มูห คูนดีคัม อาโยวรัม ตึอน, อัน ตู กอย. อัน แฮะ ฮอต เวณ ดี มืง เยจาเรลัะ, ต็อห ดี ซีนัม ดีม อัน. อึณ มูห ดีม แปะ แฮะ ตา ดึร ดูอี อาราม ดอ กาโฆห อัน ดี อาฮาเจลัะ, อี มูห คูนดีคัม อี อึบ มืง อาราม ตึอน.

อาเยฮู วี ต็อห ดี เฆ อี กอย รึม โดบ อัน, “เซ เบ โพรม ปี ต็อห โอว, แกวะ แตห ดูอี แคง มืง นี เลห คอ อู วี, แกวะ แตห เฆ ปึอน ดี ฮาว กาลาง แคง มืง เยจาเรลัะ ลอง เอ นี.” 16 แฮะ ฮอต, อาเยฮู บอ ป็อะ ลักเลา อัน, ฮาว ดี มืง เยจาเรลัะ. อาโยวรัม แฮะ กอย แคง มืง ตี. บอ อาฮาฌียา อี มูห คูนดีคัม อี อึบ มืง ยูดา แฮะ ตัห จัร, ตัห ยอด อาโยวรัม.

17 ดูอี อี บัร มืง, อัน กอย แดง กาโช็ง จา แคง มืง เยจาเรลัะ ตึอน. อัน บอ ต็อห, “โอว แฮะ ยึร ดูอี อู พึง.” อาโยวรัม วี ต็อห, “แตห ดา ซึก อี ป็อะ ลักเลา อู วี ฮาว บัร อึณเตณ เฆ, ดีหมอด เฆ ต็อห, ‘เบ ตัห ดาคึย?’”

18 ดา ซึก อี ป็อะ ลักเลา ตึอน บอ ฮาว กาตูณ พึง อาเยฮู ต็อห, “คูนดีคัม ต็อห ดี เบ, ‘เบ ตัห ดาคึย?’” อาเยฮู วี ต็อห ดี อัน, “อาว โลว แม ตัห ดีหมอด, แตห แม ตัห แล โดบ โอว.” ดูอี อี บัร มืง ตึอน, อัน ปี วี ต็อห, “ดา ซึก ปี จัร แม ฮาว, อัน แฮะ ฮอต ฌัม โดง กอย เฆ, อัน ตู วี ตัห.”

19 คูนดีคัม ปี วี จัร ดา ซึก อี ป็อะ ลักเลา ปอ อู วี ฮาว. วี ตี บอ ฮาว ฌัม โดง กอย พึง อาเยฮู ต็อห, “เบ ตัห ดาคึย?” อาเยฮู ปี วี ต็อห, “อาว โลว แม ตัห ดีหมอด. ตัห แล โดบ โอว.”

20 ดูอี อี บัร มืง วี ต็อห, “ดูอี ปี ตึย เอ, อัน แฮะ ฮอต ฮาว ฌัม. มาแล, บอ อัน ตู วี ตัห. ปี ปาย ดี ป็อะ ลักเลา ดี แฮ ดีครัน, อึณ แหนน อาเยฮู อี มูห ฆอน อานีมซี ตึอน. มี อัน ตี อี นับ ดี แวด ลักเลา ฮาว ปาย ตี.”

21 ปัน ตี คูนดีคัม อาโยวรัม วี ต็อห, “อึณปราย ลักเลา โอว.” เฆ บอ ครึง ลักเลา เฆ อึณปร็อง ดัว ดี อัน. คูนดีคัม อาโยวรัม อี มูห คูนดีคัม ดูอี อีซาเรลัะ บอ คูนดีคัม อาฮาฌียา อี มูห คูนดีคัม ดูอี อายูดา ตึอน, ฆาย บอ ป็อะ ลักเลา อู วี อู หลาง, ฮาว รวห อาเยฮู ตึอน. เฆ บอ ลาย กาตูณ โดง มูห มาน อานาโบด, อี กอย แคง มืง เยจาเรลัะ. 22 อาโยวรัม บอ ยึร อาเยฮู, อัน บอ ดีหมอด ต็อห, “อึย อาเยฮู แม แฮะ ดาคึย?” อาเยฮู วี ต็อห, “เหมา ดี ปาย ดี ดาคึย? มา แม อี มูห นาง เยจาเบน แฮะ โบง นา ตู หมึอม แบน โมยว แบน โมยว. อัน แฮะ โบง อาดาด บอ กรึบ อารึบ กืน.”

23 ปาย ตี อาโยวรัม บอ วี กาบัด เตา อู เฌณ. อัน วี ต็อห ดี อาฮาฌียา, “อึย อาฮาฌียา, อี เฮา แฮะ กาบัห ดี อาย.”

24 อาเยฮู บอ วีต อัะ อัน บอ บัณ, ล็อะ ยัะ อาโยวรัม. บลา อัะ ตี บอ กาหลัน ฌัม หล็อะ น็อห อัน. ปาย ตี อาโยวรัม บอ ดีหลัห โจห โลง ดี ลักเลา อัน. 25 อาเยฮู วี ต็อห ดี อาบีคา อี มูห ดูอี อี อึบ ลักเลา อัน, “ดึห โดว อัน ตี, ฮาว แวน แคง มาน อานาโบด อี ตัห มืง เยจาเรลัะ ตึอน. แม โนว ปี ดึอม กาลาง เฌาพรา ลอง อัน, ดอ ป็อะ อาย มังปร็อง โดบ อาฮับ อี มูห ฆูณ อัน ตึอน. 26 ดอ อัน ตึอน เฌาพรา แฮะ ต็อห, ‘อาหมึร โอว แฮะ ยึร หนาม อานาโบด บอ หนาม ฆอน อัน อี แฮะ โจห แดง กาดาย ซืร นี. โอว เฌาพรา ปี วี ต็อห, โอว ดี ดัม บอ หมาบ แม แคง กาดาย นี.’ โกบ อึณ ปาย ตี, โลว ดึห โดว ยัม อัน, ฮาว แวน ดี ตี, แตห อึณ โดบ แคะ ปี ดึอม กาลาง เฌาพรา.”

27 ปัน ตี อาฮาฌียา อี มูห คูนดีคัม ดูอี อายูดา, อัน บอ ยึร ลอง อัน ตี, อัน บอ วี เตา ฮาว นา มืง ฮากาน. อาเยฮู บอ คูงครัห โดบ อัน ต็อห, “บัณ บอ อัน, แตห อัน ยัม.” เฆ บอ บัณ อัน, ดอ ฮาว อัน โดบ อึณเตณ อี ฮาว นา มืง กูรัะ อี กอย กาตัด มืง อีปาลัม ตึอน. อัน บอ เตา ฮาว ดี มืง มีกีตอ, บอ ฮาว ยัม ดี ตี. 28 แดเจณ อัน บอ วี ดึห โดว อัน ดาง แดง ลักเลา, ฮาว ดี มืง เยรูซาแลม. เฆ บอ ดีบ อัน แคง บาเรว ดา ดา อัน อี กอย แคง มืง อาดาวีด ตึอน. 29 อาโยวรัม อี มูห ฆอน อาฮับ, อัน แฮะ แบน คูนดีคัม อาดา ฆึร ดี อู ซีนัม. ดอ อัน ตี อาฮาฌียา แฮะ แบน คูนดีคัม อี อึบ มืง ยูดา.

30 วาย อัน ตี อาเยฮู แฮะ วี ตัห ฌัม แคง มืง เยจาเรลัะ. อี มูห นาง เยจาเบน, อัน บอ ยึร ลอง อัน ตี, อัน บอ ปีชีด อัน, พ็อห ฮึก งาย อัน, จัห ฆีณ อัน, ซีโฆลต ฆีณ อัน, วี กอย บาง กาเดา ปาแตง. 31 อาเยฮู บอ ตัห ลึบ บาง มาโลห แวง โฮว, นาง เยจาเบน วี ต็อห, “อึย อาฌีมารี, แม แฮะ ง็อห ยัม ดา กาณา แม, แม แฮะ ดาคึย?”

32 อาเยฮู บอ วี ยอด โฮะ บาง กาเดา ปาแตง ตี, วี ดัด ต็อห ดี อี กอย ดี ตี, “อาเซ ดี กอย บลาก โอว, อาเซ ดี โทม โอว?” อึณ วี มึห อีมาย ซัห อา โอย วี, วี งึอบ โลง. 33 อาเยฮู วี ต็อห ดี เฆ, “บยัว โลง อีบึณ ตี.” เฆ บอ บยัว โจห นาง เยจาเบน ตี. หนาม อัน บอ กาชัต ดึก ดี แรง บอ ดี มังปร็อง อี แณต อัน.

34 อาเยฮู บอ วี ลึบ นา แคง โฮว บอ โฮม บอ เดียง ปี ซี เดียง อัน. แฮะ ฮอต, อัน บอ วี ต็อห ดี อี, “เฌาพรา แฮะ ฮอต ดืง อีบึณ ตี. มาแล, โกบ มูห อัน ฆอน คูนดีคัม, แตห เบ ฮาว ดีบ อัน.” 35 เฆ บอ ต็อห ดี ฮาว ดีบ อัน, เฆ บอ ยึร, แฮะ ฆีด มี กาอาง ฆีณ อัน บอ เปลา เฆ แด อัน. 36 เฆ วี ตัห กาลาง ลอง อัน ตี ดี คูนดีคัม อาเยฮู. อัน วี ต็อห, “เฌาพรา แฮะ ดึอม กาลาง ดี แดเจณ อัน อี จืร อาเอลียา อี มูห ดูอี ทีซาบี ตึอน ต็อห, มาโซว ดี โฮม ยัง นาง เยจาเบน แคง มืง เยจาเรลัะ. ดอ ตี นี อึณ แฮะ แบน ปาย ตี. 37 อาเอลียา มืร แฮะ ต็อห, โดว ยัม อัน ดี แบน อี หมึอม กาอีห แดง กาดาย. โคว, แกวะ แตห อึณ มึห อาเซ อี ปึอน ต็อห, ‘โดว นาง เยจาเบน แฮะ กอย ดี นี ดี นี.’”