คาน 10
ลอง เฆ วอแว คูนดีคัม อาฮับ ยัม ดอน อี
1 แคง มืง ซามารี อึณ มึห อีมาย บู ฆึร วี อี มูห หลูกหลาน อาโมยว อาฮับ. อาเยฮู บอ แดม แปะ ตึย ฮาว ดี เฆ ดา ตาง มืง ซามารี. อัน แดม ดี เฆ ดา ตาง อี อึบ มืง เยจาเรลัะ บอ ดี เฆ อี แบน ฆีณ อึณโฮม แคง อาโมยว อาฮับ ตี, อัน แตห เฆ บอกาเฆลียด ตีห แปะ ตี. 2 แคง แปะ ตี อัน ต็อห, “อึย เบ ดอน อี, เฆ ฆอน ดา กาณา เบ กอย รึม โดบ เบ. เบ กอย แคง มืง อี มึห แรง. เบ มึห บอ ลักเลา เฆ อึณปร็อง, บอ ครึง กาโฆห แบน โมยว แบน โมยว. 3 โคว อัน ตี, แตห เบ ร็อห ฆอน อีมาย ดา กาณา เบ อี แฮะ หมึอม หลึอม ดอน อี, แตห อัน แบน คูนดีคัม. แฮะ ฮอต, แตห เบ วี กาโฆห ดี รันซู อาฮับ, อี มูห ดา กาณา เบ.”
4 เฆ ดูอี อี ตีห ลอง อัน ตี บอ โยว กาเซา. เฆ วี ต็อห, “อัน แฮะ ฮอต แวน คูนดีคัม อา กาดัง. เอ ตู นับ ดี แป ดี กาโฆห ดี อัน.” 5 โคว, ดา ตาง อี อึบ โฮว คูนดีคัม บอ ดา ตาง อี อึบ มืง บอ เฆ ฆีณ อึณโฮม อาโมยว อาฮับ ตึอน, เฆ บอ วี ต็อห ดี อาเยฮู, “เย มูห แดเจณ แม, เย ดี โบง แคะ ปี ต็อห แม. เย ตู โจะ อาเซ แบน คูนดีคัม เย. แตห แม โบง, แตห อึณ ล็อะ น็อห แม.”
6 แฮะ ฮอต, อัน ปี วี แดม แปะ ปอ พืน ต็อห, “เซ เบ แฮะ โพรม ปี ต็อห โอว, แฮะ โทม โฆรห โอว, แตห เบ แดบ ฆีณ ฆอน อีมาย แคง หลูกหลาน ดา กาณา เบ ตี. แคหณา อาคราว นี, แตห เบ ตัห ตึย ดี โอว แคง มืง เยจาเรลัะ นี.” อึณ บอ มึห หลูกหลาน คูนดีคัม ตึอน บู ฆึร วี. เฆ แฮะ กอย รึม โดบ เฆ ดา ตาง บอ เฆ ฆีณ อึณโฮม เฆ ตึอน. 7 แปะ ตึอน บอ ตัห ฌัม โดง กอย เฆ, เฆ บอ กาโพรม ดี ง็อห ยัม อีมาย อาโมยว คูนดีคัม อี มูห บู ฆึร วี ตึอน. เฆ บอ แดบ ฆีณ เฆ ดอน วี, ฮับ แคง กรึก, วี ตึย ฮาว โดง กอย อาเยฮู แคง มืง เยจาเรลัะ ตึอน. 8 อึณ วี มึห อู วี อี ตัห กาลาง ดี อาเยฮู ต็อห, “เฆ แฮะ ฮอต ดึห ตัห ฆีณ ฆอน คูนดีคัม ตึอน.” อัน วี ต็อห, “แตห เบ ฮาว เบลห ดี บาง มาโลห มืง, เบลห แตห อึณ แบน อา อึณปึม, แตห อึณ กอย กอ ฌัม ปา แคหณา ซีณวัห.”
9 บอ ฌัม ปา แคหณา ซีณวัห, อัน บอ ยีต กาลาง ดี ดูอี กืน ต็อห, “เบ แฮะ มูห ดูอี น็อห ซืร น็อห หมาน. เบ ตู มึห หมาบ. อึณ ยี มูห โอว, โอว แฮะ คราม ดี ง็อห ยัม ดา กาณา โอว. โอว ยี ตู นับ, อาเซ แฮะ ง็อห ยัม เฆ ตี. 10 แตห เบ โนว โฆรห เฌาพรา, แกวะ แตห เบ ปีว. แคะ ปี กาลาง เฌาพรา ลอง อาโมยว อาฮับ, อึณ แฮะ แบน โตต ดอน โมยว. เฌาพรา แฮะ โบง แคะ ปี กาลาง อูน อัน ดี แดเจณ อัน อี จืร อาเอลียา ตึอน.” 11 ปาย ตี อาเยฮู แฮะ ง็อห แวน โตต แคะ กอย ดูอี อาฮับ อี กอย แคง มืง เยจาเรลัะ บอ เฆ ดา ตาง อี มูห อามู อามาด อัน บอ ฆึก อัน บอ เฆ ดูอี หลู ดี เฌา บาลัะ ตึอน, อาเยฮู แฮะ ง็อห ยัม โตต, แกวะ แตห อึณ ซี มึห คอ อู วี.
12 วาย อัน ตี อาเยฮู บอ วี ฮาว ดี มืง ซามารี. อัน บอ ตัห ฌัม โดง กับ เฆ ฮึก มาบู อี กอย โคบ อึณเตณ.
13 อัน บอ ยึร วอแว อาฮาฌียา อี มูห คูนดีคัม อี อึบ ดูอี อายูดา ตึอน. อัน บอ ต็อห ดี เฆ, “เบ มูห อาเซ?” เฆ วี ต็อห, “เย มูห วอแว อาฮาฌียา. เย ตัห แตห เย ฮาว งึอบ ฆอน คูนดีคัม บอ นาง ฮอคัม แคง มืง เยจาเรลัะ ตึอน.”
14 อัน วี จัร ดูอี อัน ต็อห, “เหมต โดว อีม เฆ ตี.” เฆ ดูอี อัน บอ เหมต เฆ, บอ ง็อห เฆ โคบ อึม คึม อี กอย โดง กับ เฆ ฮึก มาบู ตึอน. เฆ กอย พวน ฆึร ดี อา วี แฮะ ยัม โตต. อู วี มืร อาว ฮู มึห.
15 อัน บอ วี ฮาว โดบ อึณเตณ บอ วี กาตูณ อายอนาดาบ อี มูห ฆอน อาเรคาบ. อัน แฮะ ตัห ต็อห ดี ตัห ยอด อาเยฮู. อาเยฮู บอ ดีหมอด อายอนาดาบ ต็อห, “แม โพรม น็อห โอว ปี โอว แฮะ โพรม น็อห แม?” อายอนาดาบ วี ต็อห, “แฮะ โพรม.” อัน ปี วี ต็อห, “เซ แม แฮะ โพรม โอว, แตห แม ปา แด โอว.” อายอนาดาบ บอ ปา แด อัน. อัน บอ ดืด โฮะ อายอนาดาบ แดง ลักเลา อัน, แตห อายอนาดาบ ตูต โคบ อัน. 16 อัน วี ต็อห, “ฮาว โดบ โอว, แตห แม ยอด แคะ โฆยวฆยา โอว ดี โบง ปี อึง เฌาพรา.” โคว, อัน บอ แตห อายอนาดาบ ป็อะ ลักเลา ฮาว โดบ อัน.
17 อัน บอ ตัห ฌัม แคง มืง ซามารี, อัน บอ ง็อห แวน โตต แคะ กอย ดูอี อาโมยว อาฮับ อี กอย แคง มืง ซามารี ตึอน. อึณ บอ แบน แคะ ปี ต็อห เฌาพรา ดี อาเอลียา ตึอน.
18 วาย ตี อาเยฮู บอ แดะ กาฌูะ เฆ ดูอี บอกาเฆลียด บอ ต็อห ดี เฆ, “อาฮับ แฮะ กรึบ เฌา บาลัะ อี แจก. โอว ยี ดี วี กรึบ เฌา ตี แตห อึณ กืน. 19 โคว, เบ โลว แดะ ตัห โตต แคะ กอย ดูอี บยาน โฆรห เฌา บาลัะ บอ เฆ ดูอี กรึบ, ดูอี หลู, แตห เฆ ตัห โตต ดอน อี. แกวะ แตห อึณ ลูด คอ อู วี. โอว ดี หลู ปี ดี หลู ดี เฌา บาลัะ ตี. อาเซ ตู ตัห โลว ยัม.” อาเยฮู ยี กาโลว ดี โบง ปาย ตี. อัน โบง แตห อัน ปึอน ดี ง็อห แวน เฆ อี กรึบ เฌา บาลัะ ดอน อี.
20 อาเยฮู ปี วี ต็อห, “แตห เอ แรน โบง บลอย กรึบ เฌา บาลัะ.” เฆ บอ กาลาง ดอน นา ดอน โปละ แตห ดอน อี นับ ลอง อัน ตี. 21 อาเยฮู บอ จัร เฆ ฮาว ดอน โปละ แคง มืง อีซาเรลัะ. แคะ กอย ดูอี อี กรึบ เฌา บาลัะ บอ ตัห โตต ดอน อี. เฆ บอ ตัห, แตห กอ โนะ ดอน โปละ แคง โฮว ปี กรึบ เฆ เฌา บาลัะ ตึอน. 22 อัน บอ กาลาง ดี ดา อี บัร ครึง ปี ดี ตา แคง โฮว ตึอน. อัน ต็อห, “ดึห เลห โตต แคะ กอย ครึง ตา, แตห เฆ อี หลู ดี เฌา บาลัะ ปึอน ดี ชึบ.” ดา อี บัร ครึง ตา บอ ดึห เลห โตต ครึง ตา, ดัว ดี เฆ.
23 อาเยฮู ฆาย อายอนาดาบ อี มูห ฆอน อาเรคาบ ตึอน ฆาย บอ ลึบ แคง โฮว เฌา บาลัะ ตี บอ กาลาง ดี เฆ อี กรึบ เฌา บาลัะ ต็อห, “แตห เบ ยอด ซีคยา อี มูห แดเจณ เฌาพรา. อู วี มืร แกวะ แตห อึณ มึห. แตห อึณ มึห มี เฆ อี กรึบ เฌา บาลัะ ดีโลย.” 24 อัน แฮะ ฮอต ต็อห ปาย ตี เฆ บอ ลึบ แคง โฮว ตี, บอ หลู โดว ซัดดาวา บอ หลู อี โดะ ดี เงา ดอน โมยว. อาเยฮู แฮะ อูน ดา ซึก ดา ฆึร วี, แตห เฆ กอย นา เรต. อัน แฮะ ต็อห ดี เฆ, “โอว แฮะ อาบ ดัว ดูอี เฆ นี ดี เบ. อาเซ ฮี แตห ดูอี อู วี ลอด, อัน โลว วี ยัม กาดาง ดูอี วี ตี.”
25 อาเยฮู แฮะ ฮอต แตห เฆ หลู ปี หลู เฆ, อัน วี ต็อห ดี ดา ซึก อัน บอ เฆ อี บัร ดอน อี, “แตห เบ ลึบ, ง็อห ยัม โตต เฆ. อู วี มืร, แกวะ แตห อึณ ลอด.” ดา ซึก อัน, เฆ บอ ดึห มาปัวะ ลาง เฆ, ง็อห ยัม เฆ อี กรึบ เฌา บาลัะ ตี. เฆ บอ ดึห โดว ยัม วี แวน นา เรต. เฆ บอ ลึบ บอ แคง โฮง นา แคง. 26 เฆ บอ ดึห โดะ บอ อารึบ ปี กรึบ เฆ อี กอย แคง โฌง เฌา บาลัะ ตี. 27 เฆ บอ กาโพรม ดี ปยาต แวน โฌง เฌา บาลัะ บอ อารึบ ปี กรึบ เฆ ตี, แตห อึณ แบน ฮูวีด กอ ฌัม อาตึร นี.
28 อาเยฮู บอ ดึห แวน โตต อึณกรึห เฌา บาลัะ, แกวะ ฮู แตห ดูอี อีซาเรลัะ ซี ปึอน ดี กรึบ. 29 อึณ ยี ซี มึห อารึบ มามัก ครีว อา โดว, แปะ แฮะ โบง อาเยโรวโบว อี มูห ฆอน อาเนบัด ตึอน. อารึบ ตี แฮะ กอย แคง มืง เบดาเอน ฆาย มืง ดาน แตห ดูอี อีซาเรลัะ โบง หมาบ เซเซ. อาเยฮู ยี ตู ปยาต แวน อารึบ ตี.
30 เฌาพรา วี ต็อห ดี อาเยฮู, “โกบ แฮะ โบง แม นา หมึอม อี ล็อะ น็อห โอว, โกบ แฮะ โบง แม บอ ดี ดูอี อาฮับ ตึอน แคะ ล็อะ น็อห โอว, โอว ดี แตห หลูกหลาน แม แบน คูนดีคัม อี อึบ มืง อีซาเรลัะ อาดา พวน โจว.” 31 อาเยฮู ยี ตู โฆยวฆยา แตห ปี โบง อัน โตต ดอน โมยว โดบ ปี อึง เฌาพรา, อี มูห เฌาพรา ปี กรึบ ดูอี อีซาเรลัะ. อัน ตู แวน หมาบ ปี โบง อาเยโรวโบว บอ หมาบ แปะ แฮะ โบง ดูอี อีซาเรลัะ โกบ อาเยโรวโบว ตึอน.
32 ดอ อัน ตี เฌาพรา บอ แตห มืง อีซาเรลัะ โยม โลง. คูนดีคัม อาฮาเจลัะ แฮะ กาโฆห แป เฆ ดูอี อีซาเรลัะ อี กอย ดี กาอูน มืง แบน โปละ แบน โปละ. 33 อึณ มูห มืง อี กอย นา เลห ซีแง ดี แบลง ยอดาน, มืง ฆีเลอาด บอกาเฆลียด อี มูห โดง กอย ดูอี ครึร อาฆัด, ดูอี ครึร อารูเบน บอ ดูอี ครึร อามานาเซ. อึณ จูห ดี มืง อารอ อี กอย โดบ ดีลัยะ อารานูน, ฮาว ฌัม มืง ฆีเลอาด บอ มืง บาซัน, อัน แฮะ ฮอต ปึอน โตต.
34 ลอง ปี โบง อาเยฮู อี หณัม ดึอม กาลาง, บอ ปี โบง อัน บอ อาพูง ดังโคว อัน, อึณ แฮะ แดม อูน แคง บับ คูนดีคัม อีซาเรลัะ.