1 วาย ตี นาง เอทาลี อี มูห มา อาฮาฌียา ตึอน, อัน บอ วี นับ, ฆอน อัน แฮะ ฮอต ยัม, อัน บอ วี ง็อห ยัม โตต แคะ กอย เฆ ฆอน คูนดีคัม, แกวะ แตห อึณ มึห อี ดี ปึอน ปลูะ คูนดีคัม. ปัน ตี นาง เอทาลี วี อึบ มืง ยูดา. 2 อึณ ยี มึห นาง ยอเซพัะ อี มูห ฆอน คูนดีคัม อาเยโฮวรัม. อัน บอ มูห วา อาฮาฌียา ตึอน. อัน บอ วี ปรา ดี ดึห เครียง อาโยวอาด อี มูห ฆอน คูนดีคัม อาฮาฌียา, แกวะ แตห อัน กอย รึม โดบ เฆ ฆอน คูนดีคัม ดอน อี อี กาดูห ดี ยัม. อัน บอ วี ดึห อาโยวอาด, แตห บอ อัน บอ อี รัต อัน ฮาว กอย แคง โฮง อีด โบ็ง แคง, แกวะ แตห นาง เอทาลี ปึอน ดี ง็อห ยัม บอ อาโยวอาด. 3 วาย ตี, อาโยวอาด บอ กอย โดบ อี รัต อัน, กอย เครียง แคง โฮว เฌาพรา อาดา เดา ซีนัม. ดอ อัน ตี นาง เอทาลี ตึอน อึบ บึง มืง.

4 อึณ บอ ฌัม บู ซีนัม, อึณ มึห ดา อี หลู ดี เฌาพรา อี จืร อาเยฮอยาดา. อัน บอ แดะ ดา ซึก อี อึบ อู มาย็อห บอ ดา ตาง ดา ซึก บอ ดา ซึก อี บัร โฮว คูนดีคัม, แตห เฆ ตัห โดง กอย อัน แคง โฮว เฌาพรา. อัน บอ แตห เฆ ลาย ดืง, กาแซณ ดี อัน แคง โฮว เฌาพรา ตี. แฮะ ฮอต, อัน บอ บยัะ แตห เฆ ยึร ฆอน คูนดีคัม ตึอน.

5 อัน วี ต็อห ดี เฆ, “แตห เบ นับ ปี โลว โบง เบ. เบ โอย พึง โลว บัร แบน โปละ แบน โปละ ดอ มูห ซีแง ดีเหลา. อู พึง อี มูห โอย บูน อู บูน, แตห เฆ บัร บาง มาโลห โฮว คูนดีคัม. 6 ปอ โอย บูน อู บูน, แตห เฆ บัร บาง มาโลห อี จืร ซูรัะ. ปอ โอย บูน อู บูน, แตห เฆ บัร บาง มาโลห อี กอย นา ปัน โดง กอย เฆ ดูอี บัร. ปาย ตี เบ โลว ลาย ปลูะ บัร ซีคยา โฮว คูนดีคัม. 7 ปอ อา พึง อี ซี กอย, อี ตู โลว บัร ซีแง ดีเหลา, แกวะ แตห เฆ เลห, แตห เฆ บัร โรบ โฮว เฌาพรา, บัร คูนดีคัม อี กอย ดี ตี. 8 เบ โลว โฆ็ง ครึง กาโฆห เบ ดอน อี, บัร คูนดีคัม. อาเซ ตัห เครียะ เบ, เบ โลว ง็อห ยัม. เบ โลว โดบ ดี ยอด โดง ลึบ โดง เลห คูนดีคัม ตี.”

9 เฆ ดา ซึก อี อึบ อู มาย็อห บอ โบง โดบ ปี ต็อห อาเยฮอยาดา อี มูห ดูอี หลู ดี เฌาพรา ตึอน. เฆ บอ แดะ ดูอี อี โลว บัร ซีแง ดีเหลา บอ เฆ อี ดีเหลา ซีแง ดีเหลา, แตห เฆ ดอน อี ตัห โดง กอย ดา อี หลู ดี เฌาพรา อี จืร อาเยฮอยาดา ตึอน. 10 ดา อี หลู ดี เฌาพรา บอ ดึห บลา เลียห เฆ มัง ฆ็อง อี มูห ครึง ปี ดึอม ตา คูนดีคัม อาดาวีด, ครึง อี กอย แคง โฮว เฌาพรา ตึอน, วี ดัว ดี เฆ ดา ซึก อี อึบ อู มาย็อห ตึอน. 11 เฆ อี โลว บัร ตึอน, เฆ บอ โฆ็ง ครึง กาโฆห, บัร ดี กาโช็ง หลู, บัร โรบ โฮว เฌาพรา จูห ดี นา เตต กอ ฌัม นา กัว บอ บัร คูนดีคัม ตี.

12 ดา อี หลู ดี เฌาพรา บอ ดึห เลห ฆอน คูนดีคัม ตี, บอ ดึห มังฆึม, ชึบ ดี อัน บอ ดึห บับ ดารา เฌาพรา, อาบ ดัว ดี อัน บอ โจะ อัน แบน คูนดีคัม. เฆ บอ กาโพรม ดี กาทัะ แด ต็อห, “แตห คูนดีคัม กอย ดาคึย เซเซ.”

13 นาง เอทาลี บอ ยึร ปี โบง เฆ ดา ซึก บอ เฆ ดูอี อี บัร โฮว ตึอน, อัน บอ ฮาว โดง กอย เฆ ดูอี กืน ดี โฮว เฌาพรา ตึอน. 14 อัน บอ ยึร คูนดีคัม แฮะ กอย โคบ ร็อง ตึอน, แตห อึณ โดบ ทูงฆยาม เฆ. ดา ตาง บอ ดา อี บูด เวา แฮะ กอย โคบ คูนดีคัม ดี ตี. ดูอี บอ เรา บอ มืง บอ โคย บอ กาโพรม ดี บูด เวา ตึอน. นาง เอทาลี บอ ยึร โตต ดอน โมยว, อัน บอ กายาต ครึง ตา อัน, ดัด ต็อห, “เฆ แฮะ บลัวะ แวน โอว.”

15 ดา อี หลู ดี เฌาพรา อี จืร อาเยฮอยาดา, อัน ตู ซี แตห เฆ ง็อห ยัม นาง เอทาลี แคง โฮว เฌาพรา. โคว, อัน ต็อห ดี ดา โบว อี อึบ ดา ซึก อู มาย็อห, แตห เฆ แตห อัน เลห นา เรต. แกวะ แตห เฆ ง็อห ยัม อัน แคง โฮว เฌาพรา.

16 เฆ บอ แตห อัน เลห ฮาว ฌัม โดง ลึบ มังปร็อง แคง แวง โฮว คูนดีคัม ตึอน. เฆ บอ ง็อห ยัม อัน ดี ตี.

17 ปัน ตี อาเยฮอยาดา แตห บอ ดูอี บอ คูนดีคัม ดัว กาดีก ซัดฌา ดี เฌาพรา, แตห เฆ วี โดบ ซีคยา เฌาพรา. อัน บอ แตห บอ คูนดีคัม ฆาย ดูอี กืน ลาย ดัว กาดีก ซัดฌา. 18 ดูอี บอ เรา บอ มืง บอ กาโพรม ดี ฮาว ปยาต แวน โฮว เฌา บาลัะ, ปยาต แวน บอ กาโช็ง หลู เฆ บอ อารึบ ราง บอกาเฆลียด. เฆ บอ ง็อห ยัม บอ ดา อี หลู ดี เฌา บาลัะ อี จืร อามาตาน. อัน บอ ยัม ดี อาต กาโช็ง หลู ตี. อาเยฮอยาดา บอ วี แตห ดา ซึก บัร โฮว เฌาพรา ตี.

19 อัน บอ แดะ เฆ ดา อี อึบ ดา ซึก อู มาย็อห บอ เฆ ดา ตาง ดา ซึก บอ เฆ อี บัร โฮว บอ ดูอี เรา ดูอี กาง บอกาเฆลียด. เฆ บอ แตห คูนดีคัม เลห แคง โฮว เฌาพรา, วี ฮาว ลึบ แคง โฮว คูนดีคัม. เฆ ลึบ แคง โฮว ตี โดง ดี ลึบ ดา ซึก อี บัร มาโลห โฮว ตึอน. แฮะ ฮอต ลึบ แคง โฮว คูนดีคัม, อัน บอ ตูต แดง มาลาง อัน. 20 ดูอี บอ เรา บอ กาง ดอน อี บอ โคย. มืง บอ มืง บอ ดาคึย โตต โกบ แฮะ ง็อห ยัม เฆ นาง เอทาลี โคบ โฮว อัน ตี.

21 ดอ อาโยวอาด แบน คูนดีคัม อึบ บึง มืง, อาซาก อัน แฮะ โนะ บู ซีนัม.